A scampamento ebꞌ israel dꞌa Gilgal
5
Masanil ebꞌ vin̈ sreyal ebꞌ amorreo ay dꞌa scꞌaxepal ecꞌta aꞌ Jordán dꞌa stojolal bꞌaj tzꞌem cꞌu yedꞌ ebꞌ vin̈ sreyal ebꞌ cananeo dꞌa stiꞌ aꞌ mar Mediterráneo, ix yabꞌ specal ebꞌ tas ix aj stacji aꞌ Jordán yuj Jehová ayic ix ecꞌta ebꞌ israel dꞌa yol aꞌ. Yuj chiꞌ ix xivbꞌat ebꞌ, man̈xalaj junoc ebꞌ stecꞌbꞌej sbꞌa sbꞌat yacꞌ oval yedꞌ ebꞌ israel chiꞌ.2 A dꞌa jun tiempoal chiꞌ ix yal Jehová dꞌa vin̈aj Josué chiꞌ icha tic: Bꞌoec jayeoc qꞌuen cuchilubꞌ dꞌa qꞌuen pachabꞌ, tzalani to tzꞌacꞌji circuncidar ebꞌ etchon̈abꞌ tic, xchi dꞌa vin̈.
3 Ix yalan vin̈aj Josué chiꞌ to sbꞌo qꞌuen cuchilubꞌ chiꞌ, yic tzꞌacꞌji circuncidar masanil ebꞌ vin̈ israel ayic ayecꞌ ebꞌ vin̈ dꞌa tzalan Aralot. 4 Ix acꞌji circuncidar ebꞌ vin̈ smasanil, yujto a masanil ebꞌ vin̈ stiempo yoch soldadoal ayic yelnac ebꞌ dꞌa Egipto, chamnaccan ebꞌ vin̈ dꞌa tzꞌinan luum. 5 Yujto a ebꞌ vin̈ elnaccot dꞌa Egipto chiꞌ, acꞌbꞌil circuncidar ebꞌ vin̈ smasanil, axo ebꞌ vin̈ ix alji dꞌa tzꞌinan luum chiꞌ, manto acꞌbꞌiloclaj circuncidar ebꞌ vin̈. 6 Ay 40 abꞌil ix ecꞌ ebꞌ israel chiꞌ dꞌa tzꞌinan luum chiꞌ, yuj chiꞌ a ebꞌ vin̈ stiempoal yoch soldadoal ayic yelnac ebꞌ dꞌa Egipto, toxo ix laj cham ebꞌ vin̈, yujto maj scꞌanabꞌajej ebꞌ vin̈ tas ix yal Jehová. Yuj chiꞌ yalnac to malaj junoc ebꞌ ol ilan lum yacꞌnac stiꞌ yacꞌan dꞌa ebꞌ smam yicham ebꞌ, aton lum te yax sat. 7 Yuj chiꞌ, ix schec vin̈aj Josué chiꞌ acꞌchaj circuncidar ebꞌ vin̈ yuninal ebꞌ vin̈ ix alji, aton ebꞌ vin̈ ix can sqꞌuexuloc smam, manto acꞌjilaj circuncidar ebꞌ vin̈ yujto dꞌa yol bꞌe ix laj alji ebꞌ vin̈. 8 Axo ix lajvi yacꞌji circuncidar ebꞌ vin̈, ix can ebꞌ vin̈ dꞌa yol scampamento, masanto ix laj bꞌoxi ebꞌ vin̈. 9 Ix yalan Jehová dꞌa vin̈aj Josué chiꞌ icha tic: A dꞌa jun cꞌu tic svicꞌcanel sbꞌuchval lolonel ebꞌ aj Egipto dꞌayex, xchi dꞌa vin̈. Yuj chiꞌ Gilgal ix sbꞌiejcan jun lugar chiꞌ.*
10 Ayic aytoecꞌ ebꞌ israel dꞌa yol scampamento dꞌa Gilgal dꞌa acꞌlic dꞌa yichan̈cot Jericó, dꞌa 14 yoch uj dꞌa yemcꞌualil, ix yacꞌanoch qꞌuin̈ ebꞌ yic snaancot ebꞌ ayic yelnac ebꞌ libre dꞌa Egipto. 11 Axo dꞌa yevial slajvi qꞌuin̈ chiꞌ, a tastac tzꞌel dꞌa sat luum chiꞌ, a ix sva ebꞌ, aton ixim pan malaj yich yedꞌ ixim trigo maybꞌil dꞌa cal cꞌacꞌ. 12 Atax taꞌ ochnaccan vaan sjavi maná, yuj chiꞌ majxo svalaj maná chiꞌ ebꞌ israel chiꞌ. A dꞌa jun abꞌil chiꞌ axon̈ej tas tzꞌel dꞌa sat lum Canaán chiꞌ ix sva ebꞌ.
Ix yil Yajalil ebꞌ soldado Jehová vin̈aj Josué
13 Ayic ayecꞌ vin̈aj Josué dꞌa slacꞌanil Jericó, ix yil jun icha soldado vin̈ yedꞌnacqꞌue yespada dꞌa yol scꞌabꞌ, ix snitzanbꞌat sbꞌa vin̈aj Josué chiꞌ dꞌa stzꞌey, ix scꞌanbꞌan vin̈ dꞌay icha tic:
—¿Tom quetbꞌeyum ach, mato etbꞌeyum a bꞌa yedꞌ ebꞌ ayoch ajcꞌolal dꞌayon̈? xchi vin̈ dꞌay.
14 —Maay, val yel a in tic Yajal vaj dꞌa ebꞌ soldado Jehová, xchi. Ayic ix yalan jun chiꞌ, ix emcꞌoch n̈ojnaj vin̈aj Josué chiꞌ dꞌa sat luum dꞌa yichan̈, ix yalan vin̈ dꞌay icha tic:
—Iqꞌuel a xan̈abꞌ, yujto a jun lugar bꞌaj ayach ecꞌ tic yic Jehová yaji, xchi. Yuj chiꞌ ix scꞌanabꞌajej vin̈aj Josué chiꞌ dꞌay.