6 Ix yavtancot ebꞌ vin̈ sacerdote vin̈aj Josué chiꞌ, ix yalan vin̈ dꞌa ebꞌ vin̈ icha tic: Ol eyicꞌbꞌat teꞌ scaxail strato Jehová. Tzex bꞌabꞌlaj ucvan̈oc ex dꞌa yichan̈ teꞌ, tzeyicꞌanbꞌat junjunoc nocꞌ e chꞌaac, xchi vin̈. 7 Ix yalanpax vin̈ dꞌa ebꞌ anima chiꞌ icha tic: Ol bꞌat ex ecꞌ oyoyoc juneloc dꞌa spatic jun chon̈abꞌ tic. Bꞌabꞌelocabꞌ sbꞌat ebꞌ vin̈ soldado dꞌa yichan̈ teꞌ scaxail strato Jehová, xchi vin̈.

8-9 Ix scꞌanabꞌajan ebꞌ masanil tas ix yal vin̈aj Josué chiꞌ: Bꞌabꞌel sbꞌat jun macan̈ ebꞌ vin̈ soldado yedꞌ syamcꞌabꞌ. Slajvi chiꞌ tzacꞌan ucvan̈ ebꞌ vin̈ sacerdote van spuꞌann̈ej schꞌaac. Tzacꞌanpax ebꞌ vin̈ sacerdote bꞌachjinac teꞌ scaxail strato Jehová. Axo dꞌa spatic ebꞌ vin̈ tzacꞌan junxo macan̈ ebꞌ vin̈ soldado. 10 Ix yalan vin̈aj Josué chiꞌ dꞌa ebꞌ vin̈ soldado chiꞌ to malaj junoc ebꞌ vin̈ tzꞌel yav, ma sloloni, masanto a vin̈ ol alanoc, ichato chiꞌ te chaan̈ ol el yav ebꞌ smasanil.

11 Ix yalan vin̈aj Josué chiꞌ to tzꞌecꞌ oyoyoc ebꞌ yedꞌ teꞌ caxa chiꞌ juneloc dꞌa spatictac chon̈abꞌ chiꞌ. Ix lajvi chiꞌ ix meltzaj vin̈ yedꞌ masanil ebꞌ anima dꞌa campamento. Ataꞌ ix ecꞌ acꞌval yuj ebꞌ. 12-13 Axo dꞌa junxo cꞌu, te acꞌvalto ix qꞌue vaan vin̈aj Josué chiꞌ, ix bꞌat ecꞌxi oyoyoc ebꞌ vin̈ dꞌa spatictac jun chon̈abꞌ chiꞌ. Bꞌabꞌel sbꞌat jun macan̈ ebꞌ vin̈ soldado yedꞌ syamcꞌabꞌ. Tzacꞌanpax ucvan̈ ebꞌ vin̈ sacerdote spuꞌan nocꞌ chꞌaac, max och vaan ebꞌ vin̈ spuꞌan nocꞌ. Tzacꞌanpax ebꞌ vin̈ sacerdote bꞌachjinac teꞌ scaxail strato Jehová. Axo dꞌa spatic ebꞌ vin̈ tzacꞌan junxo macan̈ ebꞌ vin̈ soldado. 14 A dꞌa schabꞌil cꞌual chiꞌ an̈ejaꞌ junel ix ecꞌ oyoyoc ebꞌ vin̈ dꞌa spatic jun chon̈abꞌ chiꞌ. Ix lajvi chiꞌ, ix meltzajpax ebꞌ vin̈ dꞌa scampamento, ichan̈ej chiꞌ ix scꞌulej ebꞌ vin̈ dꞌa vaqueꞌ cꞌual.

15 Axo dꞌa yuquil cꞌual, te acꞌvalto ix qꞌue vaan ebꞌ vin̈, ix bꞌatxi ebꞌ vin̈ junelxo. Uquel ix ecꞌ oyoyoc ebꞌ vin̈ dꞌa jun cꞌu chiꞌ. 16 Axo dꞌa yuquelal, ayic toxo ol spu schꞌac ebꞌ vin̈ sacerdote chiꞌ, ix yalan vin̈aj Josué chiꞌ dꞌa masanil ebꞌ vin̈ soldado: Ayic ol eyabꞌan sbꞌatcan numan sjaj nocꞌ schꞌac ebꞌ vin̈ sacerdote tic, chaan̈ tzex avaji, yujto toxo ix yacꞌoch jun chon̈abꞌ tic Jehová dꞌa yol co cꞌabꞌ. 17 Masanil jun chon̈abꞌ tic yedꞌ masanil ebꞌ anima ayecꞌ dꞌa yol chiꞌ, toxo ix yal Jehová to masanil ebꞌ ol sateloc, an̈ej ix Rahab, ix ajmul ix, man̈ ol satel-laj ix yedꞌ masanil mach ayecꞌ yedꞌ ix dꞌa yol spat, yujto a ix, ix cꞌubꞌanel ebꞌ vin̈ ix ulecꞌ yil jun chon̈abꞌ tic cuuj. 18 Scham eyabꞌani, ayta val junoc tas ay dꞌa jun chon̈abꞌ tic tzeyamaꞌ, ma tzeyicꞌbꞌati, yujto toxo ix yal Jehová to masanil satjieli. Tato ay tas ol eyamaꞌ, ol cot yoval scꞌol Jehová chiꞌ dꞌa quibꞌan̈ co masanil, ol on̈ lajvoquel yuuj. 19 An̈ej qꞌuen oro, qꞌuen plata, qꞌuen bronce yedꞌ qꞌuen hierro, a juntzan̈ chiꞌ tzꞌochcan yicoc Jehová, scan bꞌaj sicꞌchaj tas tzꞌacꞌji dꞌay, xchi vin̈aj Josué chiꞌ.

20 A val dꞌa jun rato chiꞌ ix spuꞌan nocꞌ schꞌaac ebꞌ vin̈ sacerdote chiꞌ, ix bꞌatcan numan sjaj nocꞌ. Ayic ix yabꞌan ebꞌ vin̈ soldado chiꞌ, te chaan̈ ix el yav ebꞌ vin̈ smasanil, yuj chiꞌ ix em lan̈naj smuroal jun chon̈abꞌ chiꞌ. Elan̈chamel, junjun soldado ix bꞌat dꞌa yichan̈ bꞌaj ayecꞌ ebꞌ chiꞌ, ix och ebꞌ vin̈ dꞌa jun chon̈abꞌ chiꞌ. 21 Ix laj smilancham masanil anima ebꞌ ay dꞌa jun chon̈abꞌ chiꞌ. Ebꞌ vin̈ vinac, ebꞌ ix ix, vachꞌchom ichamtac anima, ma unin, nocꞌ vacax, nocꞌ calnel yedꞌ nocꞌ bꞌuru, masanil ix satel ebꞌ.

22 Yalnacxo vin̈aj Josué dꞌa ebꞌ vin̈ chavan̈ xidꞌnaquecꞌ yil jun chon̈abꞌ chiꞌ dꞌa sbꞌabꞌelal to sbꞌat yiqꞌuelta ix ajmul ix chiꞌ ebꞌ vin̈ yedꞌ ebꞌ ayecꞌ yedꞌ ix dꞌa spat, icha aj yalannaccan ebꞌ vin̈ dꞌa ix. 23 Yuj chiꞌ elan̈chamel ix bꞌat ebꞌ vin̈. Ix bꞌat yicꞌanelta ix ebꞌ vin̈ dꞌa yol spat chiꞌ yedꞌ smam snun, ebꞌ snulej ix yedꞌ masanil ebꞌ ayto yuj sbꞌa ix yedꞌoc yedꞌ masanil tastac ay dꞌa ebꞌ. Ix icꞌjibꞌat ebꞌ dꞌa jun lugar dꞌa spatiquel campamento. 24 Ix lajvi chiꞌ ix yacꞌanoch scꞌacꞌal jun chon̈abꞌ chiꞌ ebꞌ, ix tzꞌabꞌat masanil tastac. An̈ej tastac bꞌobꞌil dꞌa qꞌuen plata, qꞌuen oro, qꞌuen bronce, ma qꞌuen hierro ix yicꞌbꞌat ebꞌ, ix sicꞌanbꞌat ebꞌ bꞌaj sicꞌchaj tas tzꞌacꞌchaj dꞌa Jehová. 25 An̈ej ix Rahab yedꞌ smam snun yedꞌ ebꞌ ayto yuj sbꞌa yedꞌoc maj satel-laj yuj vin̈aj Josué chiꞌ, yujto colvajnac ix dꞌa ebꞌ vin̈ xidꞌnaquecꞌ yil jun chon̈abꞌ chiꞌ dꞌa sbꞌabꞌelal. Atax taꞌ ix can ix yedꞌ yin̈tilal dꞌa scal ebꞌ chon̈abꞌ israel.

26 Ix lajvi chiꞌ, ix yalan jun lolonel tic vin̈aj Josué: Catabꞌajocabꞌ yuj Jehová mach sbꞌoanxiqꞌue jun chon̈abꞌ tic dꞌa schaelal, chamocabꞌ sbꞌabꞌel unin ayic tzꞌem yich, chamocabꞌpax stzacꞌan unin ayic tzꞌoch spuertail, xchi vin̈.

27 Ix colvaj val Jehová yedꞌ vin̈aj Josué chiꞌ, te nivan ix aj sbꞌinaj vin̈ dꞌa masanil juntzan̈ lugar chiꞌ.