2 Ayic ayecꞌ vin̈aj Josué yedꞌ ebꞌ israel dꞌa Jericó, ix schecanbꞌat jayvan̈ ebꞌ vin̈ vinac vin̈ yic sbꞌat yilan ebꞌ vin̈ chajtil yaj chon̈abꞌ Hai. Aton jun ay dꞌa yichan̈cot Betel dꞌa slacꞌanil Bet-avén. Ix bꞌat ebꞌ vin̈ yilaꞌ tas yaj jun chon̈abꞌ chiꞌ. 3 Axo ix jax ebꞌ vin̈, ix yalan ebꞌ vin̈ dꞌa vin̈aj Josué chiꞌ icha tic: Man̈ yovaliloc sbꞌat ebꞌ vin̈ chon̈abꞌ tic smasanil, palta an̈ej chabꞌoc, ma oxeoc mil ebꞌ vin̈ sbꞌat yacꞌ oval yedꞌ ebꞌ, yic man̈ ton̈ejoc syixtej sbꞌa ebꞌ vin̈ smasanil, yujto quenn̈ej ebꞌ stan̈van jun chon̈abꞌ chiꞌ, xchi ebꞌ vin̈.

4 Yuj chiꞌ an̈ejam oxeoc mil ebꞌ vin̈ soldado ix bꞌat yacꞌ oval yedꞌ ebꞌ aj Hai chiꞌ. Palta axo ix aji, ix acꞌji ganar ebꞌ vin̈ soldado israel chiꞌ yuj ebꞌ. 5 Ix pechji ebꞌ vin̈ dꞌa spuertail chon̈abꞌ chiꞌ masanto dꞌa juntzan̈ lugar bꞌaj tzꞌicꞌjielta qꞌuen qꞌueen stzeyji. Ix miljicham 36 ebꞌ vin̈ soldado israel chiꞌ yuj ebꞌ dꞌa sat vitz dꞌa yalan̈ jun chon̈abꞌ chiꞌ, yuj chiꞌ ix te xiv ebꞌ israel chiꞌ smasanil, ix chabꞌaxqꞌue scꞌol ebꞌ.

6 Yuj chiꞌ, a vin̈aj Josué yedꞌ ebꞌ vin̈ yajalil chon̈abꞌ, ix sn̈icꞌbꞌat spichul ebꞌ vin̈ yuj cuscꞌolal, ix yacꞌanpaxqꞌue pococ ebꞌ vin̈ dꞌa sjolom, ix lajvi chiꞌ, ix em cumnaj ebꞌ vin̈ dꞌa yichan̈ teꞌ scaxail strato Jehová, ix emcꞌoch snan̈al sat ebꞌ vin̈ dꞌa sat luum masanto ix em cꞌu.

7 Ix yalan vin̈aj Josué chiꞌ icha tic:

—Ay Mamin Jehová, ¿tas yuj ix iqꞌuecꞌta a chon̈abꞌ tic dꞌa scꞌaxepal aꞌ Jordán tic? ¿Tom yuj on̈ satanel ebꞌ amorreo, yuj chiꞌ on̈ iqꞌuecꞌta dꞌa jun lugar tic? Te vachꞌ ama, ta ix on̈ can dꞌa scꞌaxepalecꞌ aꞌ Jordán chiꞌ. 8 Ay Mamin, ¿tasto val ol valaꞌ? A ebꞌ a chon̈abꞌ tic toxon̈ej ix el ebꞌ dꞌa ebꞌ ajcꞌool. 9 Axo ebꞌ cananeo yedꞌ masanil chon̈abꞌ cajan dꞌa juntzan̈ lugar tic, ol yabꞌ specal ebꞌ tas ix scꞌulej ebꞌ a chon̈abꞌ tic, ol smolbꞌan sbꞌa ebꞌ, axo on̈ satanel ebꞌ chiꞌ, man̈xo ol on̈ bꞌinaj dꞌa sat lum tic. Axo ebꞌ anima, chuc ol yal ebꞌ dꞌa a patic, xchi vin̈.

10 Ix tacꞌvi Jehová dꞌa vin̈ icha tic:

—Qꞌuean̈ vaan, ¿tas tza cꞌulej?

11 A ebꞌ eyetisraelal tic ix och smul, yujto maj scꞌanabꞌajej ebꞌ tas ix val dꞌayex. Ix yelqꞌuejcot tastac ebꞌ ix valaꞌ to satel smasanil. Ix elcꞌan ebꞌ, ix yicꞌancot ebꞌ dꞌa elcꞌaltac, ix scꞌubꞌanel ebꞌ bꞌaj cajan. 12 Yuj val chiꞌ maxtzac yal-laj e tecꞌbꞌan e bꞌa dꞌa ebꞌ eyajcꞌol chiꞌ, tzex el dꞌa ebꞌ. Yuj chiꞌ a ticnaic smoj val tzex sateli. Tato man̈ ol e satel masanil tas ix valaꞌ to tze sateli, val yel man̈xo ol in och eyedꞌoc. 13 A ticnaic jun, qꞌuean̈ vaan, al dꞌa ebꞌ anima tic to sacbꞌitej sbꞌa ebꞌ, syacꞌan lista sbꞌa ebꞌ, yujto a qꞌuicꞌan sjavi ebꞌ dꞌa vichan̈ smasanil. A in Jehová e Diosal in svalaꞌ: Dꞌa e cal a ex israel ex tic, ay tas ix valaꞌ to satjieli, yuj chiꞌ tato an̈ejaꞌ e cꞌubꞌaneli, val yel man̈xo ol yal e tecꞌbꞌan e bꞌa dꞌa ebꞌ eyajcꞌol chiꞌ. 14 A qꞌuicꞌan, dꞌa junjun in̈tilal tzꞌaj e ja dꞌa vichan̈. A jun in̈tilal tzin chꞌoxoꞌ, a dꞌa scal jun chiꞌ ay jun in̈tilal tzꞌoch dꞌa vichan̈ dꞌa junjun macan̈. A jun macan̈ tzin chꞌox chiꞌ, sjavi dꞌa vichan̈ dꞌa junjun familiail, axo jun familia tzin chꞌox chiꞌ, sjavi masanil ebꞌ vin̈ vinac ay dꞌa scal, dꞌa junjunal sja ebꞌ vin̈ dꞌa vichan̈. 15 A dꞌa vin̈ tzꞌilchajelta tas ix valaꞌ to satjieli, a jun vin̈ chiꞌ sn̈usjitzꞌa vin̈ yedꞌ yetbꞌeyum, yuninal yedꞌ masanil tastac ay dꞌay, yujto ix scꞌulej vin̈ tas man̈ smojoc, maj scꞌanabꞌajej in trato vin̈, xchi Jehová.

16 Axo dꞌa junxo cꞌu, ix pet qꞌue vaan vin̈aj Josué chiꞌ, ix yalan vin̈ to smolbꞌej sbꞌa ebꞌ anima dꞌa junjun in̈tilal. Elan̈chamel ix chꞌoxji yin̈tilal vin̈aj Judá yuj Jehová. 17 Ix yalan vin̈aj Josué chiꞌ to macquiltac tzꞌaj schꞌoxan sbꞌa ebꞌ yin̈tilal Judá chiꞌ. Axo dꞌa scal ebꞌ, ataꞌ ix schꞌox ebꞌ yin̈tilal vin̈aj Zera Jehová, axo pax dꞌa scal ebꞌ chiꞌ ix elta ebꞌ yin̈tilal vin̈aj Zabdi. 18 Junjunal ix aj snitzancot sbꞌa ebꞌ yin̈tilal vin̈aj Zabdi chiꞌ. Axo dꞌa scal ebꞌ ix chꞌoxji vin̈aj Acán yuninal vin̈aj Carmi, yixchiquin vin̈aj Zabdi schabꞌil yixchiquin vin̈aj Zera, dꞌa yin̈tilal Judá yuj Jehová.

19 Ix lajvi chiꞌ ix yalan vin̈aj Josué dꞌa vin̈aj Acán chiꞌ icha tic:

—Ach vetchon̈abꞌ, dꞌa yichan̈ Jehová co Diosal a on̈ israel on̈ tic, jichan val tzalaꞌ tas chucal ix a cꞌulej, man̈ a cꞌubꞌejeli, xchi vin̈.

20 Ix tacꞌvi vin̈aj Acán chiꞌ icha tic:

—Val yel ix och in mul dꞌa Jehová co Diosal. Ay ton juntzan̈ tas ix velqꞌuejcoti. 21 A dꞌa scal masanil tastac ay dꞌa Jericó, ix vicꞌcot jun cꞌapac cꞌapac cotnac dꞌa Babilonia, yujto te vachꞌ yilji cꞌapac yedꞌ qꞌuen plata oyeꞌ am libra yalil yedꞌ jun telan̈ qꞌuen oro ay am junoc libra yalil. Ix viloch in cꞌol dꞌa juntzan̈ chiꞌ, yuj chiꞌ ix vicꞌcoti. A dꞌa snan̈al yol in mantiado mucan vuuj. A qꞌuen plata chiꞌ a dꞌa yalan̈ aycanem qꞌueen, xchi vin̈.

22 Ix lajvi chiꞌ, ix schecanbꞌat juntzan̈ ebꞌ vin̈ vinac vin̈aj Josué chiꞌ yil dꞌa yol smantiado vin̈aj Acán chiꞌ. Elan̈chamel ix bꞌat ebꞌ vin̈, ix bꞌat sjoyanqꞌueta juntzan̈ chiꞌ ebꞌ vin̈. A dꞌa yalan̈, ataꞌ ayem qꞌuen oro yedꞌ qꞌuen plata chiꞌ. 23 Ix yicꞌancot ebꞌ vin̈ dꞌa vin̈aj Josué chiꞌ dꞌa yichan̈ masanil ebꞌ israel. Ix lajvi chiꞌ ix acꞌjioch dꞌa yichan̈ Jehová. 24 Axo vin̈aj Josué chiꞌ yedꞌ masanil ebꞌ israel chiꞌ ix yaman vin̈aj Acán chiꞌ yedꞌ juntzan̈ chiꞌ: Aton qꞌuen plata, jun cꞌapac cꞌapac, jun telan̈ qꞌuen oro, ebꞌ yuninal vin̈, ebꞌ ix yisil vin̈, nocꞌ vacax, nocꞌ bꞌuru, nocꞌ calnel, smantiado vin̈ yedꞌ masanil tas ay dꞌa ebꞌ. Ix yicꞌanbꞌat ebꞌ israel chiꞌ dꞌa jun acꞌlic scuchan Acor.

25 Axo yic ix cꞌoch ebꞌ taꞌ ix yalan vin̈aj Josué chiꞌ icha tic:

—¿Tas yuj ix icꞌcot jun yaelal chiꞌ dꞌa quibꞌan̈? A ticnaic jun, yacꞌocabꞌcot yaelal Jehová dꞌa ibꞌan̈, xchi vin̈.

Ix lajvi yalan juntzan̈ chiꞌ vin̈, ix syamanoch ebꞌ israel chiꞌ sjulqꞌuenancham vin̈aj Acán chiꞌ yedꞌ masanil ebꞌ yuninal. Ix lajvi chiꞌ ix sn̈usancantzꞌa ebꞌ masanil tastac ay dꞌa vin̈. 26 Ix lajvi chiꞌ, ix qꞌuecan juyan̈ qꞌuen qꞌueen dꞌa yibꞌan̈ ebꞌ, ix cann̈ej jun juyan̈ qꞌuen qꞌueen chiꞌ taꞌ, yuj chiꞌ Acor^* ix sbꞌiejcan jun acꞌlic chiꞌ. Icha chiꞌ ix aj yoch vaan yoval scꞌol Jehová dꞌa yibꞌan̈ chon̈abꞌ Israel.