3 Yuj chiꞌ ix yacꞌan lista sbꞌa vin̈aj Josué chiꞌ yedꞌ ebꞌ vin̈ soldado yic sbꞌat ebꞌ yacꞌ oval dꞌa chon̈abꞌ Hai chiꞌ, ix sicꞌanel 30 mil ebꞌ vin̈ soldado vin̈ te jelan dꞌa oval, ix schecanbꞌat ebꞌ vin̈ dꞌacꞌvalil. 4 Ix yalan vin̈ dꞌa ebꞌ vin̈ icha tic: Abꞌec tas ol valaꞌ, sbꞌat e cꞌubꞌejel e bꞌa dꞌa spatictac jun chon̈abꞌ chiꞌ, man̈ najatoc tzex eli, lista tzex aji. 5 A inxo yedꞌ juntzan̈xo ebꞌ vin̈ soldado tic, ol on̈ cꞌoch dꞌa slacꞌanil jun chon̈abꞌ chiꞌ. Ayic ol elta ebꞌ ajcꞌol chiꞌ dꞌayon̈, ol on̈ el lemnaj dꞌa ebꞌ, icha ix on̈ yutej ebꞌ dꞌa sbꞌabꞌelal. 6 Ayic ol cot ebꞌ dꞌayon̈, ol on̈ spechan ebꞌ, a snaan ebꞌ to ol on̈ yacꞌxi ganar ebꞌ, icha chiꞌ ol cutej co montanel ebꞌ yic najat tzꞌelcan ebꞌ dꞌa schon̈abꞌ chiꞌ. 7 Axo yic ol eyilan icha chiꞌ, ol ex elta bꞌaj cꞌubꞌan ex chiꞌ, axo eyoch n̈ilnaj dꞌa yol chon̈abꞌ chiꞌ, yujto a Jehová ol acꞌanoch jun chon̈abꞌ chiꞌ dꞌa yol co cꞌabꞌ. 8 Ayic toxo ix ex ochcꞌoch dꞌa yol jun chon̈abꞌ chiꞌ, tze n̈ustzꞌa icha ix yutej yalan Jehová. Aton tic sval dꞌayex, xchi vin̈aj Josué chiꞌ.

9 Ix lajvi chiꞌ, ix schecanbꞌat ebꞌ vin̈ soldado chiꞌ vin̈. Ix cꞌoch ebꞌ scꞌubꞌejel sbꞌa dꞌa snan̈al Betel yedꞌ Hai chiꞌ, dꞌa stojolal bꞌaj tzꞌem cꞌu. Axo vin̈, ix can vin̈ dꞌa junxo acꞌval chiꞌ dꞌa campamento chiꞌ. 10 Axo dꞌa junxo cꞌu ix pet qꞌue vaan vin̈, ix smolbꞌan juntzan̈xo ebꞌ vin̈ soldado vin̈. Ix lajvi chiꞌ, ix bꞌabꞌlaj vin̈ yuj ebꞌ yedꞌ ebꞌ yajalil chon̈abꞌ. Ix bꞌat ebꞌ yic syacꞌan oval ebꞌ yedꞌ ebꞌ aj Hai chiꞌ. 11 Masanil ebꞌ vin̈ soldado ajun yedꞌ vin̈aj Josué chiꞌ ix cꞌoch ebꞌ dꞌa slacꞌanilxo jun chon̈abꞌ chiꞌ dꞌa stojolal spuertail, ix sbꞌoanqꞌue scampamento ebꞌ dꞌa jun acꞌlic dꞌa stojolal norte. An̈ej jun chꞌolan ay dꞌa snan̈al ebꞌ yedꞌ jun chon̈abꞌ chiꞌ. 12 Oyeꞌ mil ebꞌ vin̈ soldado ix schecbꞌat vin̈aj Josué scꞌubꞌejel sbꞌa dꞌa snan̈al Betel yedꞌ Hai chiꞌ dꞌa stojolal bꞌaj tzꞌem cꞌu. 13 Yuj chiꞌ chabꞌ macan̈ ix aj ebꞌ vin̈ soldado chiꞌ, jun macan̈ ebꞌ ix bꞌat scꞌubꞌejel sbꞌa dꞌa spatictac chon̈abꞌ chiꞌ dꞌa stojolal bꞌaj tzꞌem cꞌu, axo junxo macan̈ ebꞌ, ixto can ebꞌ dꞌa yol scampamento dꞌa stojolal norte. Axo dꞌa jun acꞌval chiꞌ ix bꞌat vin̈aj Josué chiꞌ yedꞌ ebꞌ vin̈ soldado chiꞌ, ix emcꞌoch ebꞌ dꞌa jun chꞌolan chiꞌ.

14 Axo yic ix yilanelta vin̈ sreyal Hai chiꞌ to ay tas van scꞌoch dꞌa vin̈, yuj chiꞌ ix pet qꞌue vaan vin̈, ix yacꞌan lista masanil ebꞌ vin̈ soldado vin̈. Ix elta vin̈ yacꞌ oval yedꞌ ebꞌ israel chiꞌ dꞌa jun chꞌolan tzꞌemcꞌoch dꞌa stiꞌ aꞌ Jordán, palta man̈ yojtacoc vin̈ tato ay ebꞌ vin̈ soldado toxo ix scꞌubꞌejel sbꞌa dꞌa spatic chon̈abꞌ chiꞌ. 15 Axo ix yilan vin̈aj Josué chiꞌ sjavi ebꞌ, ichato ix xiv vin̈, elan̈chamel ix el lemnaj vin̈ yedꞌ ebꞌ vin̈ soldado, ix bꞌat ebꞌ dꞌa stojolal tzꞌinan luum. 16 Yuj chiꞌ axo vin̈ sreyal Hai chiꞌ ix alani to sbꞌat masanil ebꞌ aycan dꞌa yol chon̈abꞌ chiꞌ yic spechchaj vin̈aj Josué yedꞌ ebꞌ vin̈ soldado israel chiꞌ, yuj chiꞌ te najat ix el ebꞌ dꞌa schon̈abꞌ chiꞌ. 17 Man̈xa junoc vinac ix can dꞌa yol chon̈abꞌ Hai chiꞌ yedꞌ dꞌa Betel. Masanil ebꞌ ix bꞌat spech ebꞌ vin̈ soldado israel chiꞌ. Yujto ix bꞌat ebꞌ smasanil, yuj chiꞌ man̈xa mach ix can stan̈vej schon̈abꞌ ebꞌ chiꞌ. 18 Ix lajvi chiꞌ, ix yalan Jehová dꞌa vin̈aj Josué chiꞌ icha tic: Chꞌoxbꞌat qꞌuen a lanza dꞌa stojolal chon̈abꞌ Hai, yujto svacꞌoch jun chon̈abꞌ chiꞌ dꞌa yol a cꞌabꞌ, xchi dꞌa vin̈.

Elan̈chamel ix schꞌoxbꞌat qꞌuen slanza vin̈ dꞌa stojolal chon̈abꞌ Hai chiꞌ. 19 Val dꞌa jun rato chiꞌ a ebꞌ vin̈ soldado cꞌubꞌanel dꞌa spatictac jun chon̈abꞌ chiꞌ, ix och n̈ilnaj ebꞌ dꞌa yool. Ix yacꞌan ganar ebꞌ, ix sn̈usantzꞌa ebꞌ.

20 Axo yic ix meltzajbꞌat qꞌuelan ebꞌ vin̈ soldado aj Hai chiꞌ, ix yilan ebꞌ van sqꞌue stabꞌil schon̈abꞌ ebꞌ chiꞌ stzꞌabꞌati. Man̈xa bꞌaj ix yal scolan sbꞌa ebꞌ, yujto a ebꞌ israel van yel dꞌa ebꞌ chiꞌ, ix meltzaj ebꞌ yacꞌ oval yedꞌ ebꞌ. 21 Axo ix yilan vin̈aj Josué chiꞌ to van sqꞌue stabꞌil jun chon̈abꞌ chiꞌ, ix yojtacanel vin̈ to toxo ix och ebꞌ vin̈ soldado vin̈ dꞌa yol chon̈abꞌ chiꞌ. Yuj chiꞌ ix meltzaj vin̈ yedꞌ ebꞌ vin̈ soldado dꞌa ebꞌ aj Hai chiꞌ, ix och ijan vin̈ smilancham ebꞌ. 22 Ix eltapax ebꞌ ayxo och dꞌa yol chon̈abꞌ chiꞌ yacꞌ oval, ix meltzajpax ebꞌ pechbꞌil yuj ebꞌ aj Hai chiꞌ. Yuj chiꞌ ix oymaj ebꞌ israel chiꞌ dꞌa spatic ebꞌ, man̈xa junoc ebꞌ syal yeli, yuj chiꞌ ix cham ebꞌ smasanil. 23 Axon̈ej vin̈ sreyal Hai chiꞌ pitzan, ix yicꞌanbꞌat ebꞌ vin̈ dꞌa vin̈aj Josué chiꞌ.

24 Ayic ix lajvi scham masanil ebꞌ vin̈ soldado ix pechan ebꞌ israel chiꞌ, ix bꞌatxi ebꞌ dꞌa yol chon̈abꞌ chiꞌ, ix bꞌat svachꞌ satanel jantacto anima ebꞌ ix cani. 25 A dꞌa jun cꞌu chiꞌ, 12 mil ebꞌ aj Hai chiꞌ ix chami, ebꞌ ix ix yedꞌ ebꞌ vin̈ vinac. 26 Maj yicꞌ jabꞌoc yip vin̈aj Josué chiꞌ yedꞌ masanil ebꞌ vin̈ soldado, masanto ix yal scham ebꞌ aj Hai chiꞌ smasanil.

27 Masanil nocꞌ nocꞌ yedꞌ masanil tastac, ix yicꞌbꞌat ebꞌ israel chiꞌ, icha ix aj yalan Jehová dꞌa vin̈aj Josué chiꞌ. 28 Ix tzꞌacanbꞌat masanil chon̈abꞌ Hai chiꞌ yuj vin̈aj Josué chiꞌ yedꞌ ebꞌ vin̈ soldado, ix emcan bꞌulnaj stzꞌai, axon̈ej yedꞌtal chequel ix ajcani. 29 Ix qꞌue locan vin̈ sreyal Hai chiꞌ dꞌa scꞌabꞌ jun te teꞌ yuj vin̈aj Josué chiꞌ, masanto dꞌa yemcꞌualil. Axo yic ix qꞌuicꞌbꞌi, ix schecan vin̈ icꞌjoquemta vin̈. Ix yicꞌanemta snivanil vin̈ rey chiꞌ ebꞌ, ix bꞌat syumancan ebꞌ dꞌa spuertail schon̈abꞌ chiꞌ, ix qꞌuecan bꞌulan qꞌuen qꞌueen dꞌa yibꞌan̈ vin̈. A jun bꞌulan̈ qꞌuen chiꞌ ix canxon̈ej qꞌueen.

30 Ix lajvi chiꞌ, ix sbꞌoancanqꞌue jun altar vin̈aj Josué chiꞌ dꞌa Jehová sDiosal ebꞌ israel dꞌa yich lum vitz Ebal. 31 Ix scꞌulej vin̈ icha ajnac yalancan vin̈aj Moisés schecabꞌ Jehová dꞌa ebꞌ israel chiꞌ, icha yajcan bꞌaj tzꞌibꞌabꞌilcan jun cꞌaybꞌubꞌal icha tic: A qꞌuen qꞌueen man̈ tzeybꞌiloc, a qꞌuen tzꞌoch dꞌa junoc altar, xchi jun cꞌaybꞌubꞌal chiꞌ.

Axo dꞌa yibꞌan̈ qꞌuen chiꞌ ix n̈usjitzꞌa silabꞌ dꞌa yichan̈ Jehová, aton silabꞌ stzꞌabꞌat smasanil yedꞌ silabꞌ schꞌoxan juncꞌolal yedꞌ Dios. 32 Dꞌa yichan̈ ebꞌ chon̈abꞌ ix stzꞌibꞌejoch jun cꞌaybꞌubꞌal vin̈aj Josué chiꞌ dꞌa qꞌuen qꞌueen yic altar chiꞌ, aton jun yacꞌnaccan vin̈aj Moisés chiꞌ dꞌa ebꞌ yetisraelal. 33 Axo masanil ebꞌ israel, ebꞌ yichamtac vinaquil chon̈abꞌ, ebꞌ yajal soldado, ebꞌ juez yedꞌ ebꞌ chꞌoc chon̈abꞌil ayecꞌ dꞌa scal ebꞌ, cha macan̈ ix aj spojan sbꞌa ebꞌ dꞌa stzꞌeytac teꞌ scaxail strato Jehová. Dꞌa spaticbꞌat jun macan̈ ebꞌ ix can lum vitz Gerizim, axo dꞌa spaticbꞌat junxo macan̈ ebꞌ ix can lum vitz Ebal. Ix laj cot qꞌuelan ebꞌ scha macan̈il dꞌa ebꞌ sacerdote yin̈tilalcan vin̈aj Leví bꞌachjinac teꞌ scaxail strato Jehová chiꞌ, yic syalan vachꞌ lolonel ebꞌ dꞌa ebꞌ israel chiꞌ, icha aj yalannaccan vin̈aj Moisés, schecabꞌ Jehová.

34-35 Ix syamanoch vin̈aj Josué chiꞌ yavtan jun cꞌaybꞌubꞌal yalnaccan vin̈aj Moisés chiꞌ. Malaj junoc lolonel tzꞌibꞌabꞌilcan chiꞌ maj yavtej vin̈, aton masanil vachꞌ lolonel yedꞌ catabꞌ lolonel. Ix yavtan vin̈ yabꞌ masanil ebꞌ israel, ebꞌ ix ix, ebꞌ unin yedꞌ ebꞌ chꞌoc chon̈abꞌil ayecꞌ dꞌa scal ebꞌ.