Jun trato yedꞌ ebꞌ aj Gabaón
9
Ay juntzan̈ ebꞌ vin̈ rey cajan dꞌa stojolal bꞌaj tzꞌem cꞌu dꞌa aꞌ Jordán, ebꞌ cajan dꞌa jolomtac vitz, ebꞌ cajan dꞌa span̈anil stiꞌ aꞌ Jordán chiꞌ yedꞌ ebꞌ cajan dꞌa stitac aꞌ mar Mediterráneo, masanto scꞌoch dꞌa Líbano, ix yabꞌ specal ebꞌ tas van yuji dꞌa slacꞌanil ebꞌ chiꞌ. A juntzan̈ ebꞌ rey chiꞌ, aton ebꞌ vin̈ sreyal ebꞌ hitita, ebꞌ amorreo, ebꞌ cananeo, ebꞌ ferezeo, ebꞌ heveo yedꞌ ebꞌ jebuseo, 2 ix slajtian sbꞌa ebꞌ to junn̈ej syutej sbꞌa ebꞌ, yic syacꞌan oval ebꞌ yedꞌ vin̈aj Josué yedꞌ ebꞌ chon̈abꞌ israel. 3 Palta a ebꞌ heveo cajan dꞌa Gabaón, ayic ix yabꞌan ebꞌ tas ix ajcan chon̈abꞌ Jericó yedꞌ Hai yuj vin̈aj Josué chiꞌ, 4 ix snaan ebꞌ tas syutej ebꞌ yacꞌan musansatil vin̈aj Josué chiꞌ. Yuj chiꞌ ix smolbꞌan juntzan̈ cꞌatac coxtal ebꞌ yedꞌ nocꞌ cꞌatac tzꞌuum yedꞌtal vino olchimtac, ix yacꞌanqꞌue ebꞌ dꞌa yibꞌan̈ nocꞌ bꞌuru, ix cot ebꞌ. 5 Ix yacꞌanoch cꞌatac pichul ebꞌ olchimtac yedꞌ nocꞌ xan̈abꞌ nipchimtac. Ix yicꞌancot ixim pan ebꞌ taquin̈xo, cꞌustumtacxo. 6 Ayic ix javi ebꞌ dꞌa scampamento vin̈aj Josué dꞌa Gilgal, ix yalan ebꞌ dꞌa vin̈ yedꞌ dꞌa ebꞌ yajalil chon̈abꞌ Israel chiꞌ icha tic:—Te najat bꞌaj on̈ coti, co gana sco bꞌo junoc co trato eyedꞌoc, xchi ebꞌ.
7 Ix tacꞌvi ebꞌ israel dꞌa ebꞌ heveo chiꞌ icha tic:
—Tecan lacꞌan bꞌaj cajan ex, ¿tas ol cutoc co bꞌoan junoc co trato eyedꞌoc? xchi ebꞌ.
8 Ix och ijan ebꞌ yalan dꞌa vin̈aj Josué chiꞌ:
—Bꞌecan co cꞌol coch e checabꞌoc, xchi ebꞌ. Ix scꞌanbꞌan vin̈ dꞌa ebꞌ:
—¿Mach ex jun? ¿Bꞌajtil ex coti? xchi vin̈.
9 Ix tacꞌvi ebꞌ icha tic:
—Te najat ayon̈, yujto ix cabꞌi to ay smay Jehová e Diosal, cabꞌnac tas e cꞌulej dꞌa Egipto. 10 Cabꞌnac tas utabꞌil chavan̈ ebꞌ vin̈ sreyal ebꞌ amorreo dꞌa scꞌaxepalbꞌat aꞌ Jordán yuj Jehová, aton vin̈aj Sehón sreyal Hesbón yedꞌ vin̈aj Og sreyal Basán cajan dꞌa Astarot. 11 Yuj chiꞌ, ix yal ebꞌ cajalil yedꞌ ebꞌ quetchon̈abꞌ: Iqꞌuecbꞌat e vael dꞌa yoltac bꞌe bꞌat eyilan ebꞌ israel chiꞌ bꞌaj ayeqꞌui. Tzeyalani to tzon̈ och schecabꞌoc ebꞌ, sco bꞌoan junoc co trato yedꞌ ebꞌ, xchi ebꞌ dꞌayon̈. 12 Ayic ix on̈ cot ex co sayeqꞌui, te cꞌacꞌto ixim pan tic a ix quicꞌancot ixim, axo ticnaic, cꞌustumtacxo ixim, taquin̈xo pax ixim. 13 An̈ejaꞌ juntzan̈ nocꞌ tzꞌuum tic, te acꞌto nocꞌ ix cacꞌanem vino dꞌa yol nocꞌ, axo ticnaic olanxo nocꞌ. An̈ejaꞌ co pichul tic, co xan̈abꞌ toxo ix n̈icꞌchaji yujto te najat bꞌaj on̈ coti, xchi ebꞌ.
14-15 Ix schaanecꞌ svael ebꞌ chiꞌ ebꞌ yajalil israel yic schꞌoxanel ebꞌ to sbꞌo junoc strato ebꞌ, palta mantalaj tas scꞌanbꞌej ebꞌ dꞌa Jehová yuj jun strato ebꞌ sbꞌo chiꞌ. Ix och vin̈aj Josué chiꞌ juncꞌolal yedꞌ ebꞌ, yic max satjiel-laj ebꞌ yuj vin̈. Icha pax chiꞌ ebꞌ yajalil ebꞌ israel chiꞌ, ix yacꞌ stiꞌ ebꞌ dꞌa yichan̈ Jehová.
16 Ayic schabꞌjialxo sbꞌoan strato ebꞌ chiꞌ, ix yabꞌan ebꞌ israel chiꞌ to lacꞌann̈ej cajan ebꞌ gabaonita chiꞌ. 17 Ix lajvi chiꞌ, ix syamanoch ebꞌ israel chiꞌ sbꞌat sayan bꞌaj cajan ebꞌ chiꞌ. Axo dꞌa schabꞌjial ix cꞌoch ebꞌ dꞌa schon̈abꞌ ebꞌ, aton Gabaón, Cafira, Beerot yedꞌ Quiriat-jearim. 18 Palta maj yal smiljicham ebꞌ yuj ebꞌ israel chiꞌ, yujto toxo ix yacꞌ stiꞌ ebꞌ yajalil ebꞌ dꞌa sbꞌi Jehová sDiosal to ol yacꞌ nivancꞌolal ebꞌ gabaonita chiꞌ ebꞌ.
Yuj chiꞌ ix cot yoval ebꞌ anima dꞌa ebꞌ yajal chiꞌ. 19 Palta ix yalan ebꞌ yajal chiꞌ dꞌa ebꞌ yetchon̈abꞌ chiꞌ icha tic:
—A on̈ tic, toxo ix cacꞌ co tiꞌ dꞌa yichan̈ Jehová co Diosal to max co milcham juntzan̈ anima tic, yuj chiꞌ max yal cacꞌan chucal dꞌa ebꞌ. 20 Yuj chiꞌ ol cann̈ej ebꞌ ichn̈ej taꞌ, ta maay ol cot yoval scꞌol Jehová dꞌayon̈, xchi ebꞌ.
21 Ix yalanpax ebꞌ: Mocabꞌ cham ebꞌ, palta to tzꞌochcan ebꞌ cꞌatzitzvumal yedꞌ cuchumail dꞌayon̈, xchi ebꞌ. Icha chiꞌ ix aj yalan ebꞌ yajalil chon̈abꞌ chiꞌ.
22 Ix yavtancot ebꞌ gabaonita vin̈aj Josué chiꞌ, ix yalan vin̈ dꞌa ebꞌ icha tic:
—¿Tas yuj ix eyesej dꞌayon̈? Ix eyalani to najat ayex, ticni tobꞌan lacꞌan ayex. 23 A ticnaic, yuj tas ix e cꞌulej chiꞌ, catabꞌil ex, yuj chiꞌ tzex ochcan cꞌatzitzvumal yedꞌ cuchumail dꞌa masanil tiempo dꞌa scajnubꞌ co Diosal, xchi vin̈.
24 Ix tacꞌvi ebꞌ dꞌa vin̈aj Josué chiꞌ icha tic:
—Ix co cꞌulej icha chiꞌ, yujto ix cabꞌ specal tas ix yal Jehová e Diosal dꞌa vin̈aj Moisés, vin̈ schecabꞌ to ol yacꞌoch juntzan̈ chon̈abꞌ tic smasanil dꞌa yol e cꞌabꞌ, ol laj e satel masanil anima cajan dꞌay. Icha chiꞌ ix co cꞌulej yujto tzon̈ te xiv dꞌayex. Tzon̈ xiv on̈ e sataneli. 25 A ticnaic, ayon̈xooch dꞌa yol e cꞌabꞌ, a ex tze naꞌa tas tzon̈ eyutej, aton tas smoj tze naꞌa, xchi ebꞌ.
26 Icha chiꞌ ix aj scolancanel ebꞌ gabaonita chiꞌ vin̈aj Josué yic max miljicham ebꞌ yuj ebꞌ yetisraelal vin̈ chiꞌ. 27 Yuj chiꞌ ix acꞌjicanoch ebꞌ cꞌatzitzvumal yedꞌ cuchumail dꞌa ebꞌ israel chiꞌ yedꞌ pax dꞌa scajnubꞌ Jehová. Yuj chiꞌ ix acꞌjicanoch ebꞌ dꞌa jun munlajel chiꞌ dꞌa jun lugar ol siqꞌuel Jehová bꞌaj ol och ejmelal dꞌay.