A Chꞌan̈ Bꞌabꞌel Libro
SAMUEL
Ix acꞌji jun yuneꞌ ix Ana yuj Dios
1
A dꞌa chon̈abꞌ Ramataim, dꞌa tzalquixtac dꞌa yol yic Efraín, ataꞌ cajan jun vin̈ scuch Elcana, yuninal vin̈aj Jeroham, yixchiquin vin̈aj Eliú. A vin̈aj Eliú chiꞌ yuninal vin̈aj Tohu, yixchiquin vin̈aj Zuf. 2 A vin̈aj Elcana chiꞌ, chavan̈ yetbꞌeyum vin̈, jun ix scuch Ana, axo junxo ix scuchan Penina. A ix Penina chiꞌ, tzijtum yuneꞌ ix, axo ix Ana chiꞌ, malaj junoc yic ix. 3 Junjun abꞌil sbꞌat vin̈aj Elcana chiꞌ dꞌa Silo yic syacꞌan silabꞌ vin̈, yic tzꞌochpax vin̈ ejmelal dꞌa Jehová Yajal dꞌa Smasanil. Ataꞌ ayoch chavan̈ yuninal vin̈aj sacerdote Elí sacerdoteal yedꞌ smam chiꞌ, aton vin̈aj Ofni yedꞌ vin̈aj Finees.4 Ayic sjavi scꞌual yic bꞌat yacꞌan silabꞌ vin̈aj Elcana chiꞌ, syacꞌ nocꞌ silabꞌ chiꞌ vin̈ dꞌa ix Penina chiꞌ yedꞌ dꞌa ebꞌ yuninal, aton jantac smoj yacꞌjitaxon dꞌa ebꞌ. 5 Axo pax ix Ana chiꞌ, te xajan ix yuj vin̈, yuj chiꞌ te vachꞌ nocꞌ chibꞌej tzꞌacꞌji dꞌa ix, vachꞌchom malaj yuneꞌ ix syacꞌ Jehová. 6 Te chuc syal ix Penina chiꞌ dꞌa ix Ana chiꞌ, yic syacꞌan cus scꞌool ix ix yujto malaj yuneꞌ ix syacꞌ Jehová.
7 Ichan̈ej chiꞌ syutej sbꞌa ix dꞌa ix Ana chiꞌ ayic xidꞌecꞌ ebꞌ dꞌa junjun abꞌil dꞌa scajnubꞌ Jehová, ste bꞌuchvaj ix Penina chiꞌ dꞌa ix Ana chiꞌ. Ste ocꞌ ix Ana chiꞌ, man̈xalaj sgana ix svaꞌi. 8 Yuj chiꞌ, scꞌanbꞌan vin̈aj Elcana chiꞌ dꞌa ix icha tic: Ana, ¿tas yuj tzach oqꞌui, maxtzac ach vapax yuj cuscꞌolal? ¿Tom man̈ vachꞌoc vaj edꞌoc dꞌa yichan̈ lajun̈van̈oc uneꞌ? xchi vin̈ dꞌa ix.
9 A junel ayic ayecꞌ ebꞌ dꞌa Silo chiꞌ, ayic ix lajvi sva ebꞌ, ix qꞌue vaan ix Ana chiꞌ, ix bꞌat ix dꞌa scajnubꞌ Dios. A dꞌa yol stiꞌ scajnubꞌ Dios chiꞌ, ataꞌ cꞌojanem vin̈aj sacerdote Elí dꞌa jun scꞌojnubꞌ. 10 Ayic ix cꞌoch ix taꞌ, ix te ocꞌ ix sicꞌlabꞌil, ix syamanoch ix slesalvi dꞌa Jehová. 11 Ix yacꞌan stiꞌ ix dꞌay icha tic: Mamin Jehová, Yajal Ach dꞌa Smasanil, tato smoj val ilanoch in cuscꞌolal a in a checabꞌ in tic, tato tzin a nacoti, comonoc tzꞌel val dꞌa a cꞌol acꞌan junoc vuneꞌ vinac unin. Svacꞌcan dꞌayach dꞌa juneln̈ej, max joxjiel-laj xil sjolom, yic scheclajeli to ic yaji, xchi ix.
12 Te junip ix lesalvi ix dꞌa yichan̈ Jehová, yuj chiꞌ ix och qꞌuelan vin̈aj Elí chiꞌ dꞌa stiꞌ ix. 13 Man̈ chaan̈oclaj slesalvi ix, an̈ej dꞌa spensar ix slesalvi dꞌa Jehová, ton̈ej tzꞌibꞌxi stiꞌ ix, a snaan vin̈aj Elí chiꞌ to ucꞌum an̈ ix. 14 Ix yalan vin̈:
—¿Tom man̈xo ol el jabꞌoc an̈ an̈ dꞌa a sat? Actejxo ucꞌan an̈, xchi vin̈.
15 —Maay mamin, man̈ in ucꞌumoc an̈, malaj tas ix vucꞌuꞌ, to ay val in cuscꞌolal tzul val dꞌa yichan̈ Jehová. 16 Man̈ a naꞌ to chuclaj tas tzin cꞌulej dꞌa tic, ayxo tiempo in cajvi in lesalvi yuj jun vilcꞌolal tic, xchi ix.
17 Ix yalan vin̈aj Elí chiꞌ dꞌa ix:
—Paxan̈ dꞌa juncꞌolal, aocabꞌ Jehová co Diosal a on̈ israel on̈ tic ol acꞌan dꞌayach tas ix a cꞌan chiꞌ dꞌay, xchi vin̈.
18 —Yuj val dios dꞌayach, comonoc vachꞌ tzin can dꞌa a sat, xchi ix.
Ix lajvi chiꞌ ix meltzaj ix, ix jax ix bꞌaj ayecꞌ ebꞌ chiꞌ, ix va ix dꞌa tzalajcꞌolal, man̈xalaj yilcꞌolal ix. 19 Axo dꞌa junxo cꞌu ayic ix sacbꞌi, ayic ix lajvi yochcan ebꞌ ejmelal dꞌa Jehová, ix meltzaj ebꞌ dꞌa spat dꞌa Ramá. Ayic ix vay vin̈aj Elcana chiꞌ yedꞌ ix Ana chiꞌ, ix nachajcot slesal ix yuj Jehová. 20 Ix scuchcanoch yuneꞌ ix. Axo yic ix cꞌoch stiempoal yalji yuneꞌ ix chiꞌ, vinac unin ix alji, ix yacꞌan ix scuch Samuel, yujto ix yabꞌ Dios tas ix in cꞌan dꞌay, xchi ix.*
21 Ix cꞌochpax scꞌual sbꞌatxi vin̈aj Elcana yedꞌ ebꞌ ix yetbꞌeyum yedꞌ ebꞌ yuninal dꞌa chon̈abꞌ Silo, ichataxon scꞌulej vin̈ dꞌa junjun abꞌil, yic bꞌat yacꞌan silabꞌ vin̈ tacꞌvabꞌil yuuj yacꞌan dꞌa Jehová icha sleyal. 22 Maj bꞌatlaj ix Ana chiꞌ yedꞌ ebꞌ, ix yalan ix dꞌa vin̈ yetbꞌeyum chiꞌ icha tic:
—Man̈ ol in bꞌatlaj, masanto ol el vin̈ unin tic dꞌa yim, ichato chiꞌ ol in bꞌatoc. Svicꞌancanbꞌat vin̈, svacꞌancan vin̈ juneln̈ej dꞌa Jehová, xchi ix.
23 Ix tacꞌvi vin̈aj Elcana chiꞌ icha tic:
—Vachꞌ toni tato vachꞌ tza naꞌ. Canan̈ yedꞌ vin̈ masanto ol el vin̈ dꞌa yim chiꞌ. Aocabꞌ Jehová tzꞌoch edꞌoc yic tzꞌelcꞌoch bꞌaj ix acꞌ a tiꞌ dꞌay, xchi vin̈.
Yuj chiꞌ ix can ix yedꞌ vin̈ unin chiꞌ, ix sqꞌuibꞌtzitan vin̈ ix, masanto ix el vin̈ dꞌa yim. 24 Ayic maxtzac chunilaj vin̈ unin chiꞌ, yuneto vin̈ ix yicꞌanbꞌat vin̈ ebꞌ dꞌa scajnubꞌ Jehová dꞌa Silo chiꞌ. Ix yicꞌanbꞌat jun nocꞌ quelem vacax ebꞌ oxeꞌ abꞌil sqꞌuinal* yedꞌ jun arroba ixim trigo yedꞌ jun tzꞌuum ayem vino dꞌa yool. 25 Ix lajvi chiꞌ ix smilancham nocꞌ vacax chiꞌ ebꞌ silabꞌil, ix yacꞌancan vin̈ unin chiꞌ ebꞌ dꞌa yol scꞌabꞌ vin̈aj sacerdote Elí. 26 Ix yalan ix Ana chiꞌ icha tic:
—Acꞌ nivancꞌolal dꞌayin mamin, a in ton tic ulnac in ecꞌ dꞌa a tzꞌey dꞌa junel, ayic in lesalvinac dꞌa Jehová. 27 Aton vin̈ unin tic in cꞌannac dꞌa Jehová, axo ix acꞌan dꞌayin. 28 Axo ticnaic tzꞌel dꞌa in cꞌool, svacꞌancan vin̈ dꞌa Jehová. Yacbꞌan pitzan vin̈, yic Jehová yaj vin̈, xchi ix.
Ix lajvi chiꞌ ix em cumnaj ebꞌ ejmelal dꞌa yichan̈ Jehová.