A slesal ix Ana
2
Ix lesalvi ix Ana, ix yalan ix icha tic:Ste tzalaj val in cꞌol dꞌa Jehová. Aꞌ ix acꞌan vip. Ayxo tas syal valan dꞌa ebꞌ ayoch ajcꞌolal dꞌayin, yujto a Jehová ix och vedꞌoc. Yuj chiꞌ tzin tzalaj val ticnaic.
2 Malaj junoc mach lajan svachꞌil yedꞌ Jehová co Diosal. Malaj junocxo mach syal on̈ scolan icha co Diosal chiꞌ.
3 Man̈xa mach syal yicꞌanchaan̈ sbꞌa, malaj mach syal acꞌumtac syutej sbꞌa syalani, yujto a Jehová yojtac smasanil. A tzon̈ chꞌolbꞌitan junjun on̈ dꞌa tastac sco cꞌulej.
4 A Jehová scꞌocchitanbꞌat sjul-labꞌ ebꞌ te jelan. Aꞌ tzꞌicꞌanchaan̈ ebꞌ emnaquil syutej sbꞌa.
5 A mach syacꞌ sobre svael dꞌa yalan̈taxo, axo ticnaic smunlaj yuj jabꞌoc svael. A mach ix abꞌan syail vejel, axo ticnaic bꞌudꞌan scꞌool. A ix ix max unevitaxonlaj, axo ticnaic, ayxo ucvan̈ yuneꞌ ix. Axo pax ix tzijtum unin ix yuneej, axo ticnaic man̈xalaj yuneꞌ ix.
6 A dꞌa Jehová scot chamel yedꞌ pax qꞌuinal. A Jehová tzon̈ acꞌancanem bꞌaj tzꞌemcan junoc chamnac, an̈ejaꞌ tzon̈ icꞌanpaxqꞌueta.
7 A Jehová tzꞌacꞌan mebꞌail, syacꞌanpax bꞌeyumal, tzon̈ yiqꞌuemi, tzon̈ yicꞌanpaxchaan̈.
8 A Jehová tzꞌicꞌanchaan̈ ebꞌ mebꞌaꞌ dꞌa sat luum, sicꞌanqꞌue vaan ebꞌ cꞌanum tumin dꞌa scal cꞌalem, yic tzꞌem cꞌojan ebꞌ dꞌa scal ebꞌ nivac yajal, tzꞌoch ebꞌ dꞌa nivac opisio. A Jehová ix bꞌoanem yich jun yolyibꞌan̈qꞌuinal tic, axo dꞌa yibꞌan̈ ix sbꞌoem lum luum tic.
9 A Jehová stan̈van ebꞌ yicoꞌ bꞌajtac tzꞌecꞌ ebꞌ, axo ebꞌ anima te chuc, scan ebꞌ dꞌa cal qꞌuicꞌalqꞌuinal. Malaj mach syal yacꞌan ganar dꞌa yol yicoꞌ.
10 A satanel ebꞌ ayoch ajcꞌolal dꞌay, ato dꞌa satchaan̈ smacꞌvajcot cꞌu dꞌa yibꞌan̈ ebꞌ. A Jehová schꞌolbꞌitan masanil yolyibꞌan̈qꞌuinal tic. A tzꞌacꞌan spoder vin̈ rey sicꞌbꞌilel yuuj, tzꞌicꞌjichaan̈ vin̈ yuuj, xchi ix.
11 Ix pax vin̈aj Elcana dꞌa spat dꞌa Ramá, ix can vin̈ unin chiꞌ yacꞌ servil Jehová dꞌa yol scꞌabꞌ vin̈aj sacerdote Elí.
A schucal ebꞌ yuninal vin̈aj Elí
12 A ebꞌ vin̈ yuninal vin̈aj Elí chiꞌ, te chuc sbꞌeybꞌal ebꞌ vin̈, malaj yelcꞌoch Jehová dꞌa ebꞌ vin̈, 13 malaj pax yelcꞌoch sleyal yic sacerdoteal dꞌa ebꞌ vin̈. Ayic syacꞌan silabꞌ ebꞌ anima, scꞌoch ebꞌ vin̈ schecabꞌ ebꞌ vin̈ sacerdote chiꞌ yedꞌ qꞌuen nivac tenedor ayic van staji nocꞌ chibꞌej dꞌa yol chen. 14 Syacꞌanem qꞌuen ebꞌ vin̈ dꞌa yol chen chiꞌ. A jantac nocꞌ chibꞌej sqꞌueta yuj ebꞌ vin̈ dꞌa qꞌueen, syicꞌbꞌat nocꞌ ebꞌ vin̈ dꞌa ebꞌ vin̈ sacerdote chiꞌ. Ichan̈ej chiꞌ syutej masanil silabꞌ ebꞌ yetchon̈abꞌ ebꞌ vin̈ scꞌoch yacꞌ silabꞌ dꞌa Silo chiꞌ. 15 An̈ejaꞌ ayic manto n̈usjitzꞌa xepual nocꞌ silabꞌ, scꞌoch jun schecabꞌ ebꞌ sacerdote chiꞌ. Syalan dꞌa mach van yacꞌan jun silabꞌ chiꞌ: Acꞌ jabꞌoc nocꞌ chibꞌej tic dꞌayin, to ol in bꞌol nocꞌ schi vin̈ sacerdote, yujto man̈ ol schalaj nocꞌ tzꞌan̈bꞌilxo vin̈ dꞌayach, palta a nocꞌ yaxto, xchi jun checabꞌ chiꞌ. 16 Tato stacꞌvi ebꞌ anima chiꞌ, syalan ebꞌ: Tan̈vej ato ol tzꞌabꞌat xepual nocꞌ, ichato chiꞌ ol yal icꞌanbꞌat jantac tza nibꞌej, tato xchi ebꞌ, stacꞌvi jun checabꞌ chiꞌ: Maay, yovalil tzacꞌ nocꞌ dꞌayin val ticnaic, tato maay, ol in toqꞌuecꞌ nocꞌ dꞌayach, xchi jun checabꞌ chiꞌ. 17 Yuj chiꞌ, te nivan smul chavan̈ ebꞌ vin̈ sacerdote chiꞌ tzꞌoch dꞌa Jehová, yujto malaj yelcꞌoch ofrenda tzꞌacꞌji chiꞌ dꞌay dꞌa sat ebꞌ vin̈.
18 Axo pax vin̈aj yuneꞌ Samuel, ayoch schaleca vin̈ nabꞌa lino, yic syacꞌan servil Jehová vin̈. 19 A ix snun vin̈ unin chiꞌ, a dꞌa junjun abꞌil sbꞌoan jun spichul vin̈ ix, jucan syutej ix. Axo yic sbꞌat ix yedꞌ vin̈ yetbꞌeyum chiꞌ dꞌa Silo chiꞌ yic bꞌat yacꞌan silabꞌ ebꞌ dꞌa junjun abꞌil, syicꞌanbꞌat jun spichul vin̈ chiꞌ ix. 20 Yuj chiꞌ, ix yal vachꞌ lolonel vin̈aj Elí dꞌa yibꞌan̈ vin̈aj Elcana yedꞌ ix Ana chiꞌ, ix yalan vin̈ icha tic: Yacꞌocabꞌ uninal Jehová yedꞌ ix etbꞌeyum tic sqꞌuexuloc vin̈ unin ix yacꞌ ix dꞌa Jehová, xchi vin̈. Ix lajvi chiꞌ, ix meltzaj ebꞌ dꞌa spat. 21 Axo Jehová, ix acꞌan svachꞌcꞌolal dꞌa ix Ana chiꞌ. Ix alji oxvan̈ svinac unin ix yedꞌ chavan̈ ix unin. Axo pax vin̈aj Samuel, van sqꞌuibꞌ vin̈ dꞌa scajnubꞌ Jehová.
22 Te icham vinacxo vin̈aj Elí chiꞌ, ix yabꞌ vin̈ tas van scꞌulan ebꞌ vin̈ yuninal vin̈ chiꞌ dꞌa ebꞌ chon̈abꞌ israel. Ix vay ebꞌ vin̈ yedꞌ ebꞌ ix ix stan̈van stiꞌ mantiado bꞌaj schꞌox sbꞌa Jehová. 23 Yuj chi, ix yal vin̈ dꞌa ebꞌ vin̈ yuninal chiꞌ icha tic: Masanil ebꞌ anima tic syal ebꞌ dꞌayin tastac chucal tze cꞌulej. ¿Tas yuj icha chiꞌ tzeyutej e bꞌa? 24 Maay ex vuninal, te chuc tas syal ebꞌ schon̈abꞌ Jehová tic dꞌa eyibꞌan̈ yuj tas tze cꞌulej chiꞌ. 25 Tato ay junoc mach tzꞌoch smul dꞌa junoc yetanimail, tzato yal scolvaj Dios yedꞌoc. Palta tato ay junoc mach tzꞌoch smul dꞌa Jehová, ¿mach ol colanoc? xchi vin̈aj Elí chiꞌ. Malaj jabꞌoc yelcꞌoch tas ix yal vin̈ smam ebꞌ vin̈ chiꞌ dꞌay, yujto toxo ix snaꞌ Jehová to ol cham ebꞌ vin̈.
26 Axo pax vin̈aj yuneꞌ Samuel chiꞌ, van sqꞌuibꞌ vin̈, vachꞌ tas scꞌulej vin̈ dꞌa sat Jehová yedꞌ pax dꞌa ebꞌ anima.
27 A dꞌa jun tiempoal chiꞌ, ix cꞌoch jun schecabꞌ Dios dꞌa vin̈aj Elí chiꞌ, ix yalani: Icha tic yalan Jehová: Ayic ayecꞌ ebꞌ a mam icham dꞌa Egipto, ayic van yacꞌan servil vin̈ sreyal Egipto chiꞌ ebꞌ, in chꞌoxnac in bꞌa dꞌa ebꞌ chajtil vaji. 28 A dꞌa scal masanil ebꞌ yin̈tilal Israel, ataꞌ ix ex in siqꞌuelta, yic tzex och sacerdoteal dꞌayin, tze n̈usantzꞌa incienso dꞌa yibꞌan̈ valtar, tzeyacꞌanoch e chaleca yic e sacerdoteal yic tzex javi dꞌa vichan̈. Ix vacꞌanpax juntzan̈ ofrenda sva ebꞌ e mam eyicham chiꞌ, aton juntzan̈ sn̈ustzꞌa ebꞌ yic tzin yicꞌanchaan̈. 29 ¿Tas yuj malaj yelcꞌoch juntzan̈ silabꞌ, ma ofrenda tic dꞌa yol a sat to a in tzin chec yacꞌ ebꞌ dꞌa in cajnubꞌ? ¿Tas yuj axon̈ej ebꞌ vin̈ uninal chiꞌ tzicꞌchaan̈ dꞌa vichan̈, tzeyacꞌan bꞌaqꞌuechbꞌoc e bꞌa yuj svachꞌil yofrenda ebꞌ in chon̈abꞌ syacꞌ dꞌayin? 30 Vachꞌchom a in Jehová sDiosal in Israel ix valaꞌ to a ex yedꞌ ebꞌ in̈tilal dꞌa bꞌaqꞌuin̈ tzin eyacꞌn̈ej servil dꞌa in cajnubꞌ, axo ticnaic a in svalaꞌ to man̈xo ichocta ol ajoc, yujto a mach ay velcꞌoch dꞌa sat, a ebꞌ chiꞌ ay yelcꞌoch dꞌa in sat. Axo ebꞌ tzin paticaneli, malaj yelcꞌoch ebꞌ dꞌa in sat, a in Jehová in sval jun tic. 31 Van sjavi scꞌual to ol vacꞌ tzapanbꞌoc a qꞌuinal yedꞌ ebꞌ yin̈tilal ebꞌ a mam icham, man̈xa junoc ebꞌ in̈tilal chiꞌ ol och icham animail. 32 Ol ach cusoc, ol chichon a cꞌool ayic ol ilan tas vachꞌ ol in cꞌulej dꞌa ebꞌ etisraelal, palta man̈xa bꞌaqꞌuin̈ ay junoc in̈tilal ol och icham animail. 33 Ayto junoc in̈tilal olto can yil valtar, yic ol cus scꞌol yilani, axo masanil juntzan̈xo ebꞌ toto ol aljoc, quelemtac ebꞌ ol miljoccham ebꞌ. 34 A jun tic chꞌoxnabꞌil ol aj dꞌayach to ol elcꞌoch tas van valan tic, a ebꞌ vin̈ uninal, aton vin̈aj Ofni yedꞌ vin̈aj Finees, junn̈ej cꞌual ol cham ebꞌ vin̈ schavan̈il. 35 Ol vacꞌoch junxo sacerdote, to tzꞌacan ol scꞌanabꞌajej tas tzin nibꞌej, ol vacꞌan najtilax yopisio yedꞌ ebꞌ yin̈tilal, ol vacꞌanoch yopisio yedꞌ jun rey ol in siqꞌueli. 36 Yuj chiꞌ, a masanil ebꞌ in̈tilal olto canoc, ol javoc ebꞌ, ol em cuman ebꞌ dꞌa yichan̈ jun sacerdote chiꞌ, yic scꞌanan jabꞌoc stumin ebꞌ, ma jabꞌoc span ebꞌ. Ol scꞌanan jabꞌoc smunlajel ebꞌ dꞌa vin̈ sacerdote chiꞌ, yic syacꞌ ganar jabꞌoc svael ebꞌ, xchi Jehová, xchi jun checabꞌ chiꞌ dꞌa vin̈aj Elí chiꞌ.