Ix avtaj vin̈aj Samuel yuj Jehová
3
A vin̈aj Samuel quelemxo vin̈, an̈ejaꞌ smunlaj vin̈ dꞌa scajnubꞌ Jehová dꞌa yalan̈ smandar vin̈aj sacerdote Elí. A dꞌa jun tiempoal chiꞌ nibꞌabꞌil slolonel Jehová, yujto man̈ comonoc schꞌox sbꞌa dꞌa junoc mach dꞌa vayichal. 2 Axo vin̈aj Elí chiꞌ van yixtax yol sat vin̈, maxtzac yal-laj yilan vin̈. Ay jun acꞌval ayic vaynac vin̈ dꞌa yol scuarto, 3 axo vin̈aj Samuel chiꞌ svay dꞌa junxo scuarto dꞌa slacꞌanil cajnubꞌ bꞌaj ayecꞌ teꞌ scaxail strato Jehová Dios. Ayic ayto sacbꞌi, ayto och scꞌacꞌal candil, 4 ix avaj Jehová dꞌa vin̈aj Samuel chiꞌ, ix yalani:—Samuel, xchi.
—Oy, xchi vin̈.
5 Ix bꞌat lemnaj vin̈ bꞌaj ayecꞌ vin̈aj Elí chiꞌ, ix yalan vin̈:
—Ina in tic, ¿tas yuj tzin avtej? xchi vin̈.
—Malaj in tzach vavtej, ixic bꞌat ecꞌanxi jichan, xchi vin̈aj Elí chiꞌ.
—Samuel, xchi.
Ix qꞌuex van vin̈, ix bꞌatxi vin̈ bꞌaj ayecꞌ vin̈aj Elí chiꞌ, ix yalanxi vin̈:
—Ina in tic, ¿tas yuj tzin avtej? xchi vin̈.
—Ach vuninal, malaj ach tzach vavtej. Bꞌat vayan̈xi, xchi vin̈aj Elí chiꞌ.
7 A vin̈aj Samuel chiꞌ manto yojtacoc Jehová vin̈, yujto manta bꞌaj slolon juneloc dꞌa vin̈. 8 Axo dꞌa yoxelal ix avajxi Jehová dꞌa vin̈, ix qꞌuex vaan vin̈, ix bꞌatxi vin̈ bꞌaj ayecꞌ vin̈aj Elí chiꞌ:
—Ina in tic, yujto a ach tic tzin avtej, xchi vin̈.
Ichato chiꞌ ix nachajel yuj vin̈aj Elí to a Jehová tzꞌavtan vin̈ quelem chiꞌ. 9 Ix yalan vin̈aj Elí chiꞌ dꞌa vin̈ icha tic:
—Ixic, bꞌat ecꞌan̈xi jichan. Tato ay mach tzach avtan junelxo, tzach tacꞌvi icha tic: Lolonan̈ Mamin, tic svabꞌ a in a checabꞌ in tic, xa chi, xchi vin̈aj Elí chiꞌ.
Yuj chiꞌ, ix bꞌat ecꞌxi jichan vin̈ bꞌaj vaynac chiꞌ. 10 Ix cꞌoch Jehová dꞌa slacꞌanil vin̈, ix avaj dꞌa vin̈ icha ix aj yavtan vin̈ dꞌa juntac el chiꞌ, ix yalani:
—Samuel, Samuel, xchi.
—Lolonan̈ Mamin, tic svabꞌ a in a checabꞌ in tic, xchi vin̈aj Samuel chiꞌ.
11 Ix yalan Jehová dꞌa vin̈ icha tic:
—Ay jun tas ol in cꞌulej dꞌa chon̈abꞌ Israel tic, ol te somchajchaan̈ ebꞌ anima yabꞌani. 12 A dꞌa jun cꞌu chiꞌ, ol elcꞌoch masanil ix valcan dꞌa yibꞌan̈ vin̈aj Elí yedꞌ masanil yin̈tilal. 13 Toxo ix val yabꞌ vin̈ to ol vacꞌ syaelal ebꞌ yin̈tilal vin̈ dꞌa juneln̈ej, yujto yojtacxo vin̈ tas chucal scꞌulej ebꞌ vin̈ yuninal vin̈ chiꞌ, ix in spatiquejel ebꞌ vin̈ a in Dios in tic, palta maj scach jabꞌoc ebꞌ vin̈ yuninal vin̈ chiꞌ. 14 Yuj chiꞌ ix vacꞌ in tiꞌ to a ebꞌ yin̈tilal vin̈aj Elí chiꞌ, malaj junoc silabꞌ, ma junoc ofrenda syal stupanel smul ebꞌ, xchi dꞌa vin̈.
15 Ix ecꞌxi jichan vin̈aj Samuel chiꞌ, axo yic ix sacbꞌi, ix sjacan scajnubꞌ Jehová vin̈. Ix xiv vin̈ yalan juntzan̈ chiꞌ dꞌa vin̈aj Elí chiꞌ. 16 Palta ix avtaj vin̈ yuj vin̈aj Elí chiꞌ, icha tic:
—Samuel, xchi vin̈.
—Ina in tic, xchi vin̈.
17 Ix scꞌanbꞌan vin̈aj Elí chiꞌ dꞌa vin̈ icha tic:
—¿Tas ix yal Jehová dꞌayach? Elocabꞌ dꞌa a cꞌool to malaj junoc tas ol a cꞌubꞌejel dꞌayin. Aocabꞌ Jehová chiꞌ ol acꞌan a yaelal tato ay junoc ol a cꞌubꞌejel dꞌayin, xchi vin̈.
18 Ix yalan vin̈aj Samuel smasanil dꞌa vin̈, malaj val jabꞌoc tas to maj yal vin̈. Ix yalan vin̈aj Elí chiꞌ icha tic:
—A val Jehová ix alani, elocabꞌcꞌoch tas vachꞌ dꞌa sat, xchi vin̈.
19 Yacbꞌan van sqꞌuibꞌ vin̈aj Samuel chiꞌ, a Jehová ayn̈ejoch yedꞌ vin̈. Masanil lolonel syal vin̈ tzꞌeln̈ejcꞌochi. 20 Yuj chiꞌ, masanil ebꞌ anima dꞌa yol smacbꞌen Israel, syalelcꞌochi scot dꞌa Dan masanto dꞌa Beerseba, ix nachajel yuj ebꞌ to a vin̈aj Samuel chiꞌ yel schecabꞌ ton val Jehová yaj vin̈. 21 Ix schꞌoxn̈ej sbꞌa Jehová chiꞌ dꞌa vin̈ dꞌa Silo, ix lolon dꞌa vin̈.