A dꞌa jun tiempoal chiꞌ ix smolbꞌej sbꞌa ebꞌ filisteo, yic syacꞌan oval ebꞌ yedꞌ ebꞌ israel, ix sbꞌoanqꞌue scampamento ebꞌ dꞌa Afec. Yuj chiꞌ ix smolbꞌejpax sbꞌa ebꞌ israel chiꞌ, ix och ebꞌ smac sat ebꞌ, ix sbꞌoanqꞌue scampamento ebꞌ dꞌa slacꞌanil Eben-ezer. 2 Ix sbꞌoanoch sbꞌa ebꞌ filisteo chiꞌ dꞌa yichan̈ ebꞌ israel chiꞌ yuj yacꞌan oval ebꞌ. Ix acꞌji ganar ebꞌ israel yuj ebꞌ, ay am 4 miloc ebꞌ ix chami. 3 Ayic ix jax ebꞌ israel dꞌa scampamento, ix yalan ebꞌ yichamtac vinaquil chon̈abꞌ: ¿Tas val yuj ix on̈ yacꞌoch Jehová dꞌa yol scꞌabꞌ ebꞌ filisteo tic? Bꞌat quiqꞌuec teꞌ scaxail strato Jehová ayecꞌ dꞌa Silo, yic vachꞌ sbꞌat Jehová quedꞌoc dꞌa oval, tzon̈ colji yuj dꞌa ebꞌ ajcꞌol chiꞌ, xchi ebꞌ.

4 Yuj chiꞌ ix yacꞌbꞌat juntzan̈ checabꞌ ebꞌ dꞌa Silo yic bꞌat yicꞌancot teꞌ scaxail strato Jehová Yajal dꞌa Smasanil ebꞌ, aton jun schꞌox stziquiquial dꞌa snan̈al chavan̈ querubín dꞌa yibꞌan̈ teꞌ caxa chiꞌ. Ayic ix yicꞌancot teꞌ caxa chiꞌ ebꞌ, tzacꞌanoch vin̈aj Ofni yedꞌ vin̈aj Finees yuninal vin̈aj Elí dꞌa spatic teꞌ. 5 Ayic ix cꞌoch teꞌ dꞌa scampamento ebꞌ, ix te tzalaj ebꞌ smasanil, ix ibꞌxi val lum luum yuj yel yav ebꞌ.

6 Ayic ix yabꞌan ebꞌ filisteo yel yav ebꞌ chiꞌ dꞌa tzalajcꞌolal, ix yalan ebꞌ: ¿Tas yuj ste avaj ebꞌ hebreo dꞌa scampamento? xchi ebꞌ. Axo ix yabꞌan ebꞌ to a teꞌ scaxail strato Jehová chiꞌ ix cꞌochi. 7 Ix te xivqꞌue ebꞌ, ix yalan ebꞌ dꞌay junjun: Ix cꞌoch sDiosal ebꞌ dꞌa yol scampamento, ¿tas ol aj ticnaic? Obꞌiltac on̈. Mantalaj bꞌaj tzuji jun tic dꞌayon̈. 8 Obꞌiltac on̈, ¿mach ol on̈ colan dꞌa juntzan̈ dios te ay smay chiꞌ? Aton ebꞌ ix satanel ebꞌ aj Egipto dꞌa tzꞌinan luum yedꞌ juntzan̈ yaelal. 9 A ticnaic jun, co tecꞌbꞌejec co bꞌa, caqꞌuec val quip cacꞌan oval, yic vachꞌ max on̈ can dꞌa yol scꞌabꞌ ebꞌ hebreo tic icha ix aj ebꞌ dꞌa yol co cꞌabꞌ, xchi ebꞌ.

10 Ix lajvi chiꞌ, ix och ebꞌ filisteo yacꞌ oval yedꞌ ebꞌ israel chiꞌ, axo ix aji, ix acꞌji ganar ebꞌ israel chiꞌ, ix bꞌat ebꞌ elelal dꞌa spat. Te tzijtum ebꞌ ix chami, ay am 30 miloc ebꞌ. 11 Ix yicꞌancanecꞌ teꞌ scaxail strato Dios ebꞌ filisteo chiꞌ, ix smilancham vin̈aj Ofni ebꞌ yedꞌ vin̈aj Finees chiꞌ, aton ebꞌ yuninal vin̈aj Elí. 12 Ay jun vin̈ soldado dꞌa yin̈tilal Benjamín ix yacꞌ ganar yel dꞌa scal oval chiꞌ, ix javi vin̈ dꞌa chon̈abꞌ Silo dꞌa jun cꞌu chiꞌ, n̈icꞌchimtac spichul vin̈, ayqꞌue pococ dꞌa sjolom vin̈ yuj schꞌoxanel scuscꞌolal. 13 Axo ix javi vin̈, cꞌojanem vin̈aj Elí dꞌa scꞌojnubꞌ dꞌa tiꞌ bꞌe smaclan junoc abꞌix, yujto ayoch vin̈ dꞌa ilcꞌolal yuj teꞌ scaxail strato Dios. Axo ix javi jun vin̈ soldado chiꞌ, ix och ijan vin̈ yalan dꞌa ebꞌ chon̈abꞌ tas van yuji. Ayic ix yabꞌan jun chiꞌ ebꞌ, ix qꞌue n̈ilnaj ebꞌ yel yav. 14-15 Ayxo 98 abꞌil sqꞌuinal vin̈aj Elí chiꞌ, maxtzac yal-laj yilan vin̈. Ayic ix yabꞌan vin̈ yel yav ebꞌ anima chiꞌ, ix scꞌanbꞌan vin̈:

—¿Tas yaj juntzan̈ anima tzꞌel yav chiꞌ? xchi vin̈. Axo jun vin̈ soldado chiꞌ yelcꞌolal scꞌoch bꞌaj ayecꞌ vin̈ chiꞌ. 16 Ix yalan vin̈:

—In petoj dꞌa scal oval, elelal ix aj in coti, xchi vin̈ soldado chiꞌ. Ix yalan vin̈aj Elí chiꞌ dꞌa vin̈:

—¿Tas val ix uji? xchi vin̈.

17 Ix yalan vin̈ soldado chiꞌ:

—Ix on̈ el dꞌa ebꞌ filisteo, man̈ jantacoc anima ix cham dꞌa co cal. Ix champax ebꞌ vin̈ uninal schavan̈il, axo teꞌ scaxail strato Dios, ix yicꞌcanbꞌat teꞌ ebꞌ vin̈ filisteo chiꞌ, xchi vin̈.

18 Ayic ix yabꞌan vin̈aj Elí tas ix aj teꞌ scaxail strato Dios chiꞌ, ix bꞌat pacꞌnaj vin̈ dꞌa spatic scꞌojnubꞌ dꞌa stiꞌ spuertail chon̈abꞌ chiꞌ, ix cꞌocchaj sbꞌaquil sjaj vin̈, yujto al snivanil vin̈, te icham vinacxo pax vin̈, yuj chiꞌ ix cham vin̈. 40 abꞌil ix yacꞌ yajalil vin̈ dꞌa Israel. 19 Axo ix yalibꞌ vin̈, ix yetbꞌeyum vin̈aj Finees, toxo tzꞌalji yuneꞌ ix, yuj chiꞌ ayic ix yabꞌan ix to ix icꞌjibꞌat teꞌ scaxail strato Dios, ix champax vin̈ yalibꞌ ix yedꞌ vin̈ yetbꞌeyum ix, ix cot syail scꞌol ix, ix alji yuneꞌ ix chiꞌ. 20 Ayic ix yilan ebꞌ ix tzꞌilan bꞌo scꞌol ix chiꞌ to van scham ix, ix yalan ebꞌ dꞌa ix: Man̈ ach xivoc, yujto vinac unin uneꞌ tic, xchi ebꞌ ix, palta majxo tacꞌvoclaj ix, ichato maxtzac yabꞌ ix. 21 A jun unin chiꞌ Icabod, ix yacꞌ ix sbꞌiej, ix yalan ix: A ticnaic ix icꞌjiecꞌ sbꞌinajnaquil Israel, xchi ix. Yujto ix icꞌjibꞌat teꞌ scaxail strato Dios, ix champax vin̈ yalibꞌ ix yedꞌ vin̈ yetbꞌeyum ix.^* 22 Yuj chiꞌ ix yalan ix: Ix icꞌjiecꞌ sbꞌinajnaquil Israel, xchi ix, yujto ix icꞌjicanbꞌat teꞌ scaxail strato Jehová.