Ix bꞌatcan teꞌ scaxail trato dꞌa ebꞌ filisteo
5
A dꞌa Eben-ezer ix yiqꞌuecꞌ teꞌ scaxail strato Dios ebꞌ filisteo chiꞌ, ix cꞌoch teꞌ yuj ebꞌ dꞌa Asdod. 2 Ix lajvi chiꞌ, ix yacꞌanoch teꞌ ebꞌ dꞌa yol stemplo sdiosal. Ix yacꞌanem teꞌ ebꞌ dꞌa stzꞌey sdiosal scuchan Dagón. 3 Axo dꞌa qꞌuin̈ibꞌalil dꞌa junxo cꞌu, ix pet cꞌoch ebꞌ aj lugar chiꞌ dꞌa stemplo sdiosal chiꞌ, ix yilan ebꞌ to ix telvi sdiosal ebꞌ chiꞌ, n̈ojan yajcan dꞌa sat luum dꞌa yichan̈ teꞌ scaxail strato Jehová. Ix yicꞌanchaan̈ ebꞌ, ix yacꞌanxiqꞌue ebꞌ dꞌa yedꞌtal. 4 Axo yic ix cꞌochxi ebꞌ dꞌa junxo qꞌuin̈ibꞌalil, ix yilan ebꞌ pocꞌanxiem sdiosal ebꞌ chiꞌ dꞌa sat luum dꞌa yichan̈ teꞌ scaxail strato Jehová chiꞌ, ix el scꞌabꞌ yedꞌ sjolom, ato dꞌa yol ti puerta ayeqꞌui. Axon̈ej snivanil ix cani. 5 Yuj chiꞌ atax taꞌ, ayic tzꞌoch ebꞌ sacerdote yic Dagón yedꞌ masanil mach dꞌa yol templo chiꞌ, max stecꞌlaj smarcoal puerta chiꞌ ebꞌ.6 Ix lajvi chiꞌ, ix acꞌjioch syaelal ebꞌ aj Asdod chiꞌ yuj Jehová yedꞌ masanil ebꞌ anima ay dꞌa yol smacbꞌen chiꞌ. Ix pitzviqꞌue ilya dꞌa ebꞌ anima chiꞌ, ix laj qꞌue quiscꞌoy dꞌa ebꞌ. 7 Ayic ix yilanoch jun yaelal ix yacꞌcot Jehová chiꞌ ebꞌ, ix yalan ebꞌ: A teꞌ scaxail strato sDiosal ebꞌ israel, max yal-laj scan teꞌ dꞌa tic, yujto sjavi nivac yaelal dꞌa quibꞌan̈ yuj teꞌ, tzꞌixtaxpax co diosal yuj teꞌ, xchi ebꞌ.
8 Yuj chiꞌ ix laj yalbꞌat ebꞌ dꞌa ebꞌ yajalil ebꞌ filisteo chiꞌ to smolbꞌej sbꞌa ebꞌ sloloni. Ix yalan ebꞌ:
—¿Tas scutej teꞌ scaxail strato sDiosal ebꞌ israel tic? xchi ebꞌ.
—Iqꞌuecbꞌat teꞌ, bꞌat eyacꞌancan teꞌ dꞌa chon̈abꞌ Gat, xchi ebꞌ.
Yuj chiꞌ ix yicꞌbꞌat teꞌ ebꞌ. 9 Ayic ix bꞌat yacꞌancan teꞌ ebꞌ taꞌ, ix javi jun nivan somcꞌolal dꞌa yibꞌan̈ jun chon̈abꞌ chiꞌ yuj Jehová. Ix pitzvipax quiscꞌoy chiꞌ dꞌa ebꞌ unin yedꞌ dꞌa icham anima. 10 Yuj chiꞌ ix yicꞌbꞌat teꞌ caxa chiꞌ ebꞌ, ix bꞌat yacꞌancan teꞌ ebꞌ dꞌa Ecrón. Ayic ix cꞌoch teꞌ taꞌ, ix qꞌuex yav ebꞌ anima taꞌ, ix yalan ebꞌ: Ix eyicꞌcot teꞌ scaxail strato sDiosal ebꞌ israel dꞌa tic yic tzon̈ cham yuuj co masanil, xchi ebꞌ.
11 Ix cham ebꞌ anima dꞌa chon̈abꞌ Ecrón chiꞌ yuj xivelal yedꞌ yuj nivan yaelal ix yacꞌ Jehová dꞌa yibꞌan̈ ebꞌ, yuj chiꞌ ix avtajcot masanil ebꞌ yajalil chon̈abꞌ filisteo yuj ebꞌ, ix yalan ebꞌ dꞌa ebꞌ: Iqꞌuecbꞌat teꞌ scaxail strato sDiosal ebꞌ israel tic. Aqꞌuec meltzaj teꞌ dꞌa ebꞌ, axo ta tzꞌaji tzon̈ cham co masanil yuuj, xchi ebꞌ.
12 Te najat chequelto yel yav ebꞌ, scꞌoch masanto dꞌa satchaan̈ yuj yaelal ayoch dꞌa yibꞌan̈ ebꞌ, axo ebꞌ manto chamlaj, te ya yaj ebꞌ yuj quiscꞌoy chiꞌ.