—¿Tas scutej teꞌ scaxail strato Jehová chiꞌ? ¿Tas val tzꞌaj cacꞌan meltzaj teꞌ? xchi ebꞌ.

3 Ix tacꞌvi ebꞌ sacerdote chiꞌ:

—Tato tzeyacꞌ meltzaj teꞌ, man̈ eyacꞌ meltzaj teꞌ schꞌocoj, palta yovalil ay tas tzeyacꞌbꞌat stojoloc e mul chiꞌ, yic tzꞌoch vaan yoval scꞌol Jehová chiꞌ. Icha chiꞌ ol och vaan jun yaelal ayoch dꞌayex tic, ol nachajel eyuuj tas val yuj ayoch yaelal dꞌayex yuj Jehová, xchi ebꞌ.

4 —¿Tas vachꞌ scacꞌ stojol co mul chiꞌ jun? xchi ebꞌ.

—Aqꞌuec oyeoc oro icha yilji yabꞌil quiscꞌoy chiꞌ, junjun yic junjun ebꞌ eyajalil. Tzeyacꞌanpax oyeoc oro icha yilji nocꞌ chꞌoov, yujto te ya eyaj yuj nocꞌ yedꞌ ebꞌ eyajalil tic. 5 Yuj chiꞌ, tze bꞌo yechel quiscꞌoy chiꞌ yedꞌ yechel nocꞌ chꞌoov to toxo ix ixtaxbꞌat co lugar tic yuuj, tzeyicꞌanchaan̈ sDiosal ebꞌ israel. Tope syacꞌ nivancꞌolal yic tzꞌoch vaan jun yaelal tic dꞌayon̈ yedꞌ dꞌa co diosal yedꞌ pax dꞌa yol co macbꞌen tic. 6 Mocabꞌ pitoc scutej co bꞌa icha yutejnac sbꞌa ebꞌ vin̈ sreyal Egipto yedꞌ masanil ebꞌ anima ay taꞌ. Masanto ix och nivac yaelal dꞌa yibꞌan̈ ebꞌ, ichato chiꞌ ix yactanel chon̈abꞌ Israel ebꞌ. 7 A ticnaic tzeyacꞌ bꞌojoc junoc teꞌ acꞌ carreta, tzeyicꞌancot chavan̈oc nocꞌ vacax ay yuneꞌ, mantalaj bꞌaj tzꞌoch teꞌ yugo dꞌa sjaj nocꞌ, tze tzecꞌanoch teꞌ yugo chiꞌ dꞌa nocꞌ schavan̈il, tzeyacꞌanoch teꞌ carreta chiꞌ dꞌa teꞌ yugo chiꞌ. Man̈ e chabꞌat yuneꞌ nocꞌ chiꞌ yedꞌoc, tze maccan nocꞌ dꞌa yol smacteꞌ. 8 Slajvi chiꞌ, tzeyacꞌanqꞌue teꞌ caxa chiꞌ dꞌa yol carreta chiꞌ, tzeyacꞌanem juntzan̈ oro chiꞌ dꞌa yol junoc cajón, tzeyacꞌanqꞌue dꞌa stzꞌey teꞌ caxa chiꞌ, aton juntzan̈ chiꞌ tzeyacꞌbꞌat stojoloc e mul chiꞌ. Slajvi chiꞌ, tzeyactanbꞌat nocꞌ vacax chiꞌ yedꞌ teꞌ carreta chiꞌ schꞌocoj. 9 Tzeyilani tato a dꞌa sbꞌeal Bet-semes ol bꞌat nocꞌ, tato icha chiꞌ a Jehová sDiosal ebꞌ israel tzon̈ ixtani. Tato chꞌoc bꞌeal bꞌaj ol bꞌat nocꞌ jun, man̈oc Jehová tzꞌacꞌancot jun yaelal tic dꞌayon̈, comon yaelaln̈ej am tzon̈ icꞌani, xchi ebꞌ sacerdote chiꞌ.

10 Icha chiꞌ ix yutej ebꞌ filisteo chiꞌ, a chavan̈ nocꞌ vacax ay yuneꞌ ix yicꞌcot ebꞌ, ix smacancan nocꞌ yuneꞌ chiꞌ ebꞌ dꞌa yol macteꞌ, ix stzecꞌanoch teꞌ carreta chiꞌ ebꞌ dꞌa nocꞌ. 11 Ix lajvi chiꞌ, ix yacꞌanqꞌue teꞌ scaxail strato Jehová chiꞌ ebꞌ yedꞌ jun teꞌ cajón bꞌaj ayem oro icha yechel nocꞌ chꞌoov yedꞌ yechel quiscꞌoy chiꞌ. 12 Ix yactanel nocꞌ vacax chiꞌ ebꞌ, ix bꞌat nocꞌ dꞌa sbꞌeal Bet-semes, tzꞌocꞌ nocꞌ sbꞌat nocꞌ. Man̈ val jabꞌoc tzꞌelcan nocꞌ dꞌa titac bꞌe chiꞌ. Najat tzacꞌanto sbꞌat ebꞌ filisteo chiꞌ dꞌa spatic nocꞌ yic syilan ebꞌ, masanto ix cꞌoch ebꞌ dꞌa smojonal Bet-semes chiꞌ. 13 Ay ebꞌ aj Bet-semes van sjochvi trigo ayecꞌ dꞌa jun chꞌolan. Ayic ix yilan ebꞌ to van sjavi teꞌ scaxail strato Jehová. Ix te tzalajqꞌue ebꞌ. 14-15 A dꞌa jun acꞌlic yic vin̈aj Josué, dꞌa yol yic Bet-semes chiꞌ ix javi teꞌ carreta chiꞌ. Ataꞌ ix vanaj nocꞌ vacax chiꞌ. Ay jun qꞌuen nivan qꞌueen taꞌ, axo ebꞌ levita ix icꞌanemta teꞌ caxa yic Jehová yedꞌ te cajón bꞌaj ayem tastac chiꞌ. Ix yacꞌanqꞌue teꞌ ebꞌ dꞌa yibꞌan̈ jun qꞌuen nivan qꞌuen chiꞌ. Ix och ijan ebꞌ xicanbꞌat teꞌ carreta chiꞌ cꞌatzitzal, ix sn̈usantzꞌa nocꞌ vacax chiꞌ ebꞌ silabꞌil dꞌa Jehová. 16 Ix yil ovan̈ ebꞌ yajalil ebꞌ filisteo, tas ix yutej ebꞌ chiꞌ. Ix lajvi chiꞌ ix meltzaj ebꞌ dꞌa chon̈abꞌ Ecrón dꞌa jun cꞌu chiꞌ.

17 A oyeꞌ oro yechel jun yaelal ix yacꞌcot ebꞌ filisteo chiꞌ yuj stojoloc smul dꞌa yichan̈ Jehová, junjun yic juntzan̈ chon̈abꞌ tic, aton Asdod, Gaza, Ascalón, Gat yedꞌ Ecrón. 18 Axo sbꞌisul oro yechel nocꞌ chꞌoov, lajan sbꞌisul icha sbꞌisul schon̈abꞌ ebꞌ yajalil filisteo chiꞌ, aton chon̈abꞌ ayoch smuroal yedꞌ yaldeail. A qꞌuen nivan qꞌuen dꞌa sat slum vin̈aj Josué bꞌaj ix acꞌjiqꞌue teꞌ scaxail strato Jehová dꞌa Bet-semes chiꞌ, ayn̈ejecꞌ qꞌueen.

19 Ix cham 70^* vinac aj Bet-semes chiꞌ yuj Jehová, yujto ix say yil yol teꞌ caxa chiꞌ ebꞌ. Axo masanil ebꞌ anima, ix ocꞌ ebꞌ, yujto ix och chamel yuj Jehová. 20 Yuj chiꞌ ix yal ebꞌ anima ay taꞌ: Malaj mach syal stecꞌbꞌan sbꞌa dꞌa yichan̈ Jehová, yujto ay smay. ¿Bꞌaj val scacꞌbꞌat scaxail strato yic tzꞌelcan dꞌa co tzꞌey tic? xchi ebꞌ. 21 Ix yacꞌanbꞌat schecabꞌ ebꞌ dꞌa Quiriat-jearim, ix yalan ebꞌ: Ix yacꞌ meltzaj teꞌ scaxail strato Jehová ebꞌ filisteo, yuj chiꞌ iqꞌuecqꞌue teꞌ, xchi ebꞌ.