7
Ix cꞌoch ebꞌ aj Quiriat-jearim yicꞌcot teꞌ scaxail strato Jehová chiꞌ, ix yacꞌanoch teꞌ ebꞌ dꞌa yol spat vin̈aj Abinadab ay dꞌa jun tzalan. Ix sicꞌjiel vin̈aj Eleazar yuninal vin̈aj Abinadab chiꞌ yuj ebꞌ, yic stan̈van teꞌ vin̈.Ix och vin̈aj Samuel yajaliloc chon̈abꞌ Israel
2 Ay am junoc 20 abꞌil ix can teꞌ scaxail strato Jehová dꞌa Quiriat-jearim chiꞌ. Masanil ebꞌ israel scus scꞌool, snibꞌej ebꞌ scolvaj Jehová yedꞌoc. 3 Yuj chiꞌ ix yal vin̈aj Samuel dꞌa ebꞌ: Tato dꞌa smasanil e cꞌool, tzex meltzaj dꞌa Jehová, yovalil tzeyiqꞌuelta juntzan̈ sdiosal ebꞌ chꞌoc chon̈abꞌil dꞌa e cal yedꞌ yechel Astarot, tzeyacꞌanoch e bꞌa dꞌa yol scꞌabꞌ Jehová yic an̈ej tzeyacꞌ servil. Tato icha chiꞌ, aꞌ ol ex colan dꞌa yol scꞌabꞌ ebꞌ filisteo.
4 Yuj chiꞌ ix yiqꞌuelta juntzan̈ comon dios chiꞌ ebꞌ, aton yechel Baal yedꞌ Astarot, axon̈ej dꞌa Jehová ix och ebꞌ ejmelal. 5 Ix yalan vin̈aj Samuel chiꞌ to smolbꞌej sbꞌa masanil ebꞌ chon̈abꞌ israel dꞌa Mizpa, yic stevi vin̈ dꞌa Jehová yuj ebꞌ.
6 Yuj chiꞌ ix smolbꞌej sbꞌa ebꞌ taꞌ. A dꞌa jun cꞌu chiꞌ ix yicꞌqꞌueta a aꞌ ebꞌ, ix secanem aꞌ ebꞌ dꞌa sat lum dꞌa yichan̈ Jehová, ix och ebꞌ smasanil dꞌa tzecꞌojcꞌolal, ix yalan ebꞌ icha tic: Ix och co mul dꞌa yichan̈ Jehová. (A dꞌa Mizpa chiꞌ ix schꞌolbꞌitej ebꞌ yetchon̈abꞌ vin̈aj Samuel chiꞌ.) 7 Ayic ix yabꞌan ebꞌ filisteo to ayecꞌ molan ebꞌ israel dꞌa Mizpa chiꞌ, ix smolbꞌanpax sbꞌa ebꞌ, yic scot ebꞌ yacꞌ oval yedꞌ ebꞌ israel chiꞌ. Axo yic ix yabꞌan ebꞌ israel icha chiꞌ, ix xivqꞌue ebꞌ. 8 Ix yalan ebꞌ dꞌa vin̈aj Samuel chiꞌ: Man̈ actej a tevi dꞌa Jehová to tzon̈ scol dꞌa ebꞌ filisteo tic, xchi ebꞌ.
9 Elan̈chamel ix yicꞌcot jun nocꞌ yuneꞌ calnel tzato chuni vin̈aj Samuel chiꞌ, ix sn̈usantzꞌa nocꞌ vin̈ smasanil silabꞌil dꞌa Jehová, ix och ijan vin̈ scꞌanan scolval. Elan̈chamel ix tacꞌvi Jehová dꞌa vin̈. 10 Ayic van yacꞌan silabꞌ chiꞌ vin̈, a ebꞌ filisteo van sjavi ebꞌ yacꞌ oval yedꞌ ebꞌ israel chiꞌ, axo Jehová te chaan̈ ix acꞌan macꞌvaj cꞌu dꞌa yichan̈ ebꞌ filisteo chiꞌ, yuj chiꞌ ix xivqꞌue ebꞌ, ix el lemnaj ebꞌ dꞌa ebꞌ israel chiꞌ. 11 Ix elta ebꞌ israel dꞌa Mizpa chiꞌ, ix och ebꞌ dꞌa spatic ebꞌ filisteo chiꞌ. Tzijtum ebꞌ filisteo chiꞌ ix cham yuj ebꞌ, masanto ix cꞌoch ebꞌ dꞌa yichan̈bꞌat Bet-car. 12 Ix lajvi chiꞌ, ix sayan jun qꞌuen qꞌueen vin̈aj Samuel chiꞌ, ix yacꞌanem qꞌuen vin̈ dꞌa scal Mizpa yedꞌ Sen. Eben-ezer ix yacꞌ vin̈ sbꞌiej, ix yalan vin̈: Masanto ticnaic ix colvajn̈ej Jehová quedꞌoc, xchi vin̈.*
13 A dꞌa jun cꞌu chiꞌ ix acꞌji ganar ebꞌ filisteo yuj ebꞌ israel chiꞌ. Yuj chiꞌ man̈xa junelocxo ix och ebꞌ dꞌa yol slugar ebꞌ israel yacꞌ oval. Yacbꞌan pitzanto vin̈aj Samuel chiꞌ, ayn̈ejoch Jehová xibꞌtan ebꞌ filisteo chiꞌ. 14 A juntzan̈ chon̈abꞌ yedꞌ smacbꞌen ebꞌ yicꞌnaquecꞌ ebꞌ filisteo chiꞌ, schabꞌat dꞌa Ecrón, masanto scꞌoch dꞌa Gat, ix yicꞌxicanecꞌ ebꞌ israel chiꞌ. Axo ebꞌ amorreo, malaj oval dꞌa scal ebꞌ yedꞌ ebꞌ israel chiꞌ.
15 Ix yacꞌ yajalil vin̈aj Samuel dꞌa chon̈abꞌ Israel chiꞌ masanto ix cham vin̈. 16 Junjun abꞌil xidꞌecꞌ vin̈ dꞌa Betel, dꞌa Gilgal yedꞌ dꞌa Mizpa, yuj schꞌolbꞌitan vin̈ tas yaj ebꞌ anima dꞌa juntzan̈ chon̈abꞌ chiꞌ. 17 Slajvi chiꞌ, smeltzaj vin̈ dꞌa Ramá, bꞌaj cajantaxoni. Ataꞌ schꞌolbꞌitejpax ebꞌ yetchon̈abꞌ vin̈. Ix sbꞌoanqꞌue jun altar yic Jehová vin̈ taꞌ.