Snibꞌej ebꞌ israel tzꞌoch junoc sreyal
8
Ayic ix ichamax vin̈aj Samuel chiꞌ, ix yacꞌanoch chavan̈ ebꞌ vin̈ yuninal vin̈ yajaliloc ebꞌ chon̈abꞌ chiꞌ. 2 Joel sbꞌi jun vin̈ bꞌabꞌel, axo junxo vin̈, Abías sbꞌi vin̈. Ix yacꞌ yajalil ebꞌ vin̈ dꞌa Beerseba. 3 Palta man̈oc sbꞌeybꞌal vin̈ smam ebꞌ vin̈ chiꞌ ix sbꞌeybꞌalej. A val dꞌa qꞌuen tumin ix yacꞌoch spensar ebꞌ vin̈. Scha qꞌuen ebꞌ vin̈ dꞌa elcꞌaltac, malaj svachꞌil syutej ebꞌ vin̈ schꞌolbꞌitan yaj ebꞌ anima. 4 Yuj chiꞌ ix smolbꞌej sbꞌa masanil ebꞌ yichamtac vinaquil chon̈abꞌ, ix bꞌat ebꞌ yil vin̈aj Samuel chiꞌ dꞌa Ramá. 5 Ix yalan ebꞌ vin̈: A ach tic, te icham vinac achxo, axo ebꞌ vin̈ uninal, man̈ ichaoc ix utej a bꞌa syutej sbꞌa ebꞌ vin̈, te chuc syutej sbꞌa ebꞌ vin̈. Yuj chiꞌ to tza sayoch junoc co reyal yic tzon̈ scuchbꞌan icha yaj juntzan̈xo nación, xchi ebꞌ vin̈.6 Maj schalaj scꞌol vin̈aj Samuel chiꞌ ayic ix yabꞌan vin̈ to snibꞌej junoc sreyal ebꞌ yic scuchbꞌaj ebꞌ. Yuj chiꞌ ix lesalvi vin̈ dꞌa Jehová. 7 Ix tacꞌvi Jehová chiꞌ dꞌa vin̈: Cꞌanabꞌajej masanil tas scꞌan ebꞌ chon̈abꞌ chiꞌ, yujto man̈oc ach tzach spatiquejel ebꞌ, palta a in, yujto man̈xa sgana ebꞌ svacꞌ yajalil dꞌa yibꞌan̈. 8 Atax yic vicꞌannaquelta ebꞌ dꞌa Egipto, tzꞌochn̈ej ebꞌ ejmelal dꞌa comon dios, malaj velcꞌoch dꞌa ebꞌ. Icha val ix in yutej ebꞌ, icha val chiꞌ tzach yutej ebꞌ ticnaic. 9 Yuj chiꞌ, cꞌanabꞌajej tas syal ebꞌ. Palta yovalil tzacꞌ yojtaquejel ebꞌ tastac ol utaj ebꞌ yuj jun sreyal ol och chiꞌ, xchi dꞌa vin̈.
10 Ix lajvi chiꞌ, ix yalan vin̈ dꞌa ebꞌ ix cꞌanan sreyal chiꞌ, icha ix aj yalan Jehová chiꞌ. 11 Ix yalan vin̈ icha tic:
—Icha val tic ol ex yutoc jun vin̈ e reyal ol yacꞌ yajalil dꞌa e cal chiꞌ: Ol smolbꞌej masanil ebꞌ eyuninal vin̈, ay ebꞌ ol yacꞌoch vin̈ dꞌa yol carruaje yic oval, ay ebꞌ ol qꞌue dꞌa yibꞌan̈ chej yic sbꞌat dꞌa oval, ay pax ebꞌ ol ochcan stan̈vumaloc vin̈. 12 Ay ebꞌ ol yacꞌoch vin̈ yajalil dꞌa junjun n̈ilan̈ soldado. Ay pax ebꞌ ol och munlajel dꞌa sluum vin̈, ol ochpax ebꞌ jochoj trigo. Ay pax ebꞌ ol och bꞌoꞌoj yamcꞌabꞌ yic oval yedꞌ dꞌa bꞌoꞌoj tastac tzꞌoch dꞌa carruaje yic oval. 13 Ol yicꞌanbꞌat ebꞌ ix eyisil vin̈ dꞌa spat. Ay ebꞌ ix ol och bꞌoꞌoj perfume, ma bꞌoꞌoj vael yedꞌ dꞌa bꞌoꞌoj pan. 14 Ol stoqꞌuecꞌ svachꞌil lum e luum vin̈ yedꞌ tas avabꞌil eyuuj, teꞌ uva yedꞌ teꞌ olivo, ol yacꞌan vin̈ dꞌa ebꞌ ayoch yajalil yedꞌoc. 15 A tas tzeyavej, ol yiqꞌuel sdiezmoal vin̈ yedꞌ e vino, ol yacꞌan vin̈ dꞌa ebꞌ ayoch yajalil yedꞌoc yedꞌ dꞌa ebꞌ schecabꞌ chiꞌ. 16 Ol yicꞌanpaxecꞌ ebꞌ e checabꞌ vin̈ yedꞌ ebꞌ ix e checabꞌ. Ol yicꞌanpaxecꞌ nocꞌ e vacax vin̈ yedꞌ nocꞌ e bꞌuru te vachꞌ, ol yacꞌanoch vin̈ dꞌa smunlajel. 17 An̈ejaꞌ ol yicꞌpaxecꞌ sdiezmoal nocꞌ e calnel vin̈, ol eyacꞌan servil vin̈. 18 A dꞌa jun tiempoal chiꞌ, olto eyal e bꞌa dꞌa Jehová yuj tas ol ex utaj yuj vin̈ e reyal ol e sicꞌoch chiꞌ, palta man̈xo ol colvaj eyedꞌoc, xchi vin̈aj Samuel chiꞌ.
19 Palta maj schalaj yabꞌ ebꞌ chon̈abꞌ tas ix yal vin̈ chiꞌ. Ix tacꞌvi ebꞌ icha tic:
—Malaj yelcꞌoch juntzan̈ chiꞌ, an̈ej to tzꞌoch junoc co reyal. 20 Co gana lajan tzon̈ aj icha juntzan̈xo nación, co gana to ay junoc co reyal tzꞌacꞌan yajalil dꞌa co cal, tzon̈ scuchbꞌanpax dꞌa oval, xchi ebꞌ.
21 Ayic ix yabꞌan vin̈ tas ix yal ebꞌ anima chiꞌ, ix yalanxi vin̈ dꞌa Jehová. 22 Ix tacꞌvi Jehová chiꞌ dꞌa vin̈ icha tic:
—Cꞌanabꞌajej tas syal ebꞌ chiꞌ, acꞌoch junoc sreyal ebꞌ, xchi dꞌa vin̈.
Ix lajvi chiꞌ, ix yalan vin̈ dꞌa ebꞌ: Meltzajan̈ec dꞌa e chon̈abꞌ bꞌela, xchi vin̈.