3 Ay jun cꞌu ix satbꞌat juntzan̈ nocꞌ sbꞌuru vin̈aj Cis chiꞌ. Yuj chiꞌ ix yal vin̈ dꞌa vin̈ yuninal chiꞌ:

—Acꞌ lista a bꞌa, sbꞌat a sayan nocꞌ bꞌuru chiꞌ, icꞌbꞌat junoc ebꞌ vin̈ co checabꞌ edꞌoc, xchi vin̈.

4 Ix bꞌat vin̈aj Saúl chiꞌ, ix cꞌaxpajbꞌat vin̈ dꞌa scal lum tzalquixtac dꞌa yol yic Efraín, ix ecꞌ vin̈ dꞌa yol yic Salisa. Maj chaxlaj nocꞌ bꞌuru chiꞌ yuj vin̈. Ix ecꞌpax vin̈ dꞌa yol smacbꞌen Saalim yedꞌ dꞌa yol yic Benjamín, palta malaj nocꞌ. 5 Axo ix cꞌoch vin̈ dꞌa yol smacbꞌen Zuf, ix yalan vin̈ dꞌa vin̈ schecabꞌ chiꞌ:

—Con̈ meltzaj dꞌa tic, axo ta tzꞌaji, svachꞌ och vin̈ in mam dꞌa ilcꞌolal cuuj dꞌa yichan̈ nocꞌ bꞌuru chiꞌ, xchi vin̈.

6 Ix tacꞌvi vin̈ checabꞌ chiꞌ:

—A dꞌa yol jun chon̈abꞌ tic ay jun vin̈ schecabꞌ Dios, te nivan yelcꞌoch vin̈ dꞌa ebꞌ anima, masanil tas syal vin̈, tzꞌeln̈ejcꞌochi. Bꞌat quilaꞌ, ol yal vin̈ tas bꞌeal ol quicꞌaꞌ, xchi vin̈.

7 —Con̈ an, an̈ej to malaj jabꞌoc tas squicꞌbꞌat dꞌa vin̈, malaj junoc ixim pan ay dꞌa yol co pa. Malaj jabꞌoc tas ol cacꞌ dꞌa vin̈, ¿tas val ol quicꞌbꞌati? xchi vin̈aj Saúl chiꞌ.

8 Ix tacꞌvi vin̈ checabꞌ chiꞌ:

—Ay jabꞌ tumin plata vedꞌnac, ol cacꞌ qꞌuen dꞌa vin̈ schecabꞌ Jehová chiꞌ, yic ol yal vin̈ tas ol on̈ ajoc, xchi vin̈.

9 (A dꞌa pecaꞌ chiꞌ, tato ay junoc israel sgana scꞌanbꞌej yabꞌ srazón dꞌa Dios syalan icha tic: Bꞌat quil jun vin̈ syal yilan chiꞌ, xchi ebꞌ. A vin̈ tzꞌalji schecabꞌoc Dios chiꞌ ticnaic, a dꞌa pecaꞌ, a vin̈ syal yilan junoc tas ol ujoc, sbꞌi vin̈ yuj ebꞌ.)

10 —Vachꞌ jun, bꞌat quilaꞌ, xchi vin̈aj Saúl chiꞌ.

Ix bꞌat ebꞌ vin̈ schavan̈il bꞌaj ayecꞌ vin̈ schecabꞌ Dios chiꞌ. 11 Ayic van sqꞌue ebꞌ vin̈ dꞌa svitzal chon̈abꞌ chiꞌ, ix schalan sbꞌa ebꞌ vin̈ yedꞌ juntzan̈ ebꞌ ix cobꞌestac van sbꞌat icꞌoj aꞌ, ix scꞌanbꞌan ebꞌ vin̈ dꞌa ebꞌ ix icha tic:

—¿Ay am ecꞌ vin̈ schecabꞌ Dios syal yilan tas ol ujoc? xchi ebꞌ vin̈.

12 Ix tacꞌvi ebꞌ ix:

—Ayecꞌ vin̈ dꞌa eyichan̈bꞌat chiꞌ, palta tato tze pil val jabꞌocxo eyip olto ilchaj vin̈ eyuuj. Toto val sjavi vin̈ dꞌa yol chon̈abꞌ tic yujto ay qꞌuin̈ ol och dꞌa tzalan bꞌaj tzꞌoch ejmelal. 13 An̈ej tzex cꞌochi tze sayanecꞌ vin̈ dꞌa cal chon̈abꞌ chiꞌ, yacbꞌan manto bꞌat vin̈ bꞌaj tzꞌoch ejmelal chiꞌ bꞌaj tan̈vabꞌil yuj ebꞌ anima. Masanto ol cꞌoch vin̈, ichato chiꞌ ol yalan vachꞌ lolonel vin̈ dꞌa yibꞌan̈ silabꞌ, axo sva vin̈ yedꞌ ebꞌ anima avtabꞌil chiꞌ. Yuj chiꞌ ixiquec val ticnaic, cꞌocbꞌilto ol eyil vin̈, xchi ebꞌ ix.

14 Ix bꞌat ebꞌ vin̈ bꞌian, axo yic van scꞌoch ebꞌ vin̈ dꞌa yol chon̈abꞌ chiꞌ, cꞌocbꞌil val ix schalaj sbꞌa ebꞌ vin̈ yedꞌ vin̈aj Samuel chiꞌ, van sbꞌat vin̈ dꞌa jun tzalan bꞌaj ol och ejmelal chiꞌ.

15 Qꞌuicꞌanocto scꞌoch vin̈aj Saúl, ix yalan Jehová dꞌa vin̈aj Samuel chiꞌ: 16 A qꞌuicꞌan yabꞌ icha tic, svacꞌcot jun vin̈ vinac dꞌayach, a dꞌa yol yic Benjamín scot vin̈. Tzacꞌqꞌue aceite dꞌa sjolom vin̈, a vin̈ ol och yajalil dꞌa chon̈abꞌ Israel tic. A vin̈ ol colan in chon̈abꞌ tic dꞌa yol scꞌabꞌ ebꞌ filisteo, yujto toxo ix cus in cꞌol yuj bꞌaj ix tevi ebꞌ dꞌayin, xchi dꞌa vin̈.

17 Ayic ix yilan vin̈aj Saúl vin̈aj Samuel chiꞌ, ix yalan Jehová dꞌa vin̈: Aton vin̈ tic val dꞌayach evi, a vin̈ ol och yajaliloc in chon̈abꞌ, xchi dꞌa vin̈.

18 A dꞌa spuertail chon̈abꞌ chiꞌ, ataꞌ ix schalaj sbꞌa ebꞌ vin̈, ix yalan vin̈aj Saúl dꞌa vin̈aj Samuel chiꞌ:

—Al dꞌayin mamin, bꞌajtil ay spat vin̈ schecabꞌ Dios syal yilan tas ol ujoc, xchi vin̈.

19 —A in toni. Con̈ vedꞌoc, bꞌabꞌlajan̈. Ol ach va vedꞌ bꞌaj van in bꞌat chiꞌ. Ato qꞌuicꞌan sval dꞌayach tas a gana tza cꞌanbꞌej chiꞌ, slajvi chiꞌ tzach paxi. 20 A yuj nocꞌ bꞌuru ix satbꞌat dꞌayach yictax oxji, man̈ acꞌ pensar yuj nocꞌ, toxo ix chax nocꞌ. Palta ay jun mach te nibꞌabꞌil yuj ebꞌ quetchon̈abꞌ israel tic, a ach toni yedꞌ ebꞌ a cꞌabꞌ oc, xchi vin̈.

21 Ix tacꞌvi vin̈aj Saúl chiꞌ:

—A in tic, yin̈tilal in Benjamín, yelxo val jayvan̈n̈ej co bꞌisul dꞌa quin̈tilal chiꞌ dꞌa scal masanil ebꞌ quetisraelal. An̈ejaꞌ ebꞌ scꞌabꞌ yoc in mam chiꞌ, malaj quelcꞌoch dꞌa scal ebꞌ quin̈tilal chiꞌ. ¿Tas val yuj tzal juntzan̈ tic dꞌayin? xchi vin̈.

22 Ix lajvi chiꞌ, ix icꞌjibꞌat vin̈ yedꞌ vin̈ schecabꞌ yuj vin̈aj Samuel chiꞌ dꞌa yol jun cuarto, ix acꞌji jun cꞌojnubꞌ te nivan yelcꞌoch dꞌa ebꞌ vin̈ dꞌa scal ebꞌ vin̈ avtabꞌil vael chiꞌ, ay am junoc 30 ebꞌ vin̈. 23 Ix yalan vin̈aj Samuel chiꞌ dꞌa jun vin̈ ilum vael dꞌa cocina icha tic:

—Icꞌcot nocꞌ chibꞌej ix val dꞌayach to chꞌoc tzicꞌcaneli, xchi vin̈.

24 Elan̈chamel ix yicꞌcot jun nocꞌ xubꞌ vin̈, ix yacꞌan vin̈ dꞌa vin̈aj Saúl chiꞌ. Ix yalan vin̈aj Samuel chiꞌ dꞌa vin̈aj Saúl chiꞌ:

—A jun chibꞌej tic icꞌbꞌilxocaneli, chiꞌa. A jun tic to naanxotax vuuj, ix in chec icꞌjicaneli, ayic ix in checan bꞌojoc jun qꞌuin̈ tic, xchi vin̈.

Junn̈ej ix va vin̈aj Saúl yedꞌ vin̈aj Samuel chiꞌ dꞌa jun cꞌu chiꞌ. 25 Ayic ix emixta ebꞌ vin̈ taꞌ, ix emul ebꞌ vin̈ dꞌa yol chon̈abꞌ chiꞌ, ix lolon vin̈aj Samuel yedꞌ vin̈aj Saúl chiꞌ dꞌa span̈anil yibꞌan̈ pat. 26 Axo ix sacbꞌi dꞌa junxo cꞌu, ix avtaj vin̈aj Saúl yuj vin̈aj Samuel chiꞌ, ix yalan vin̈ dꞌa vin̈ icha tic:

—Qꞌuean̈ vaan tzach bꞌati, xchi vin̈.

Ix qꞌue vaan vin̈ bꞌian. Ix lajvi chiꞌ, ix el ebꞌ vin̈ dꞌa yol calle. 27 Axo ix emcꞌoch ebꞌ vin̈ dꞌa titac chon̈abꞌ, ix yalan vin̈aj Samuel chiꞌ dꞌa vin̈aj Saúl chiꞌ:

—Al dꞌa vin̈ a checabꞌ tic to sbꞌabꞌlajbꞌat vin̈, tzach can jabꞌocxo, yujto ol val tas ix schec Jehová val dꞌayach, xchi vin̈. Ix schecan bꞌabꞌlaj vin̈ schecabꞌ vin̈aj Saúl chiꞌ.