—A Jehová tzach sicꞌanel ticnaic yic tzach och yajalil dꞌa yibꞌan̈ schon̈abꞌ. 2 Ayic ol co pucan co bꞌa tic, ol a chalan a bꞌa yedꞌ chavan̈ ebꞌ vin̈ vinac dꞌa slacꞌanil bꞌaj mucan ix Raquel dꞌa chon̈abꞌ Selsa dꞌa yol yic Benjamín. A ebꞌ vin̈ chiꞌ ol alan dꞌayach to toxo ix chax nocꞌ a bꞌuru tza sayaꞌ, man̈xo ayoc och vin̈ a mam dꞌa cuscꞌolal yuj nocꞌ, axo pax uuj a ach tic syacꞌ pensar vin̈ yuj tas ol aj a chaxi. 3 Ayto val jabꞌxo a cꞌoch dꞌa teꞌ ji dꞌa Tabor, ay oxvan̈ ebꞌ vin̈ vinac ol a cha taꞌ, van sbꞌat ebꞌ vin̈ dꞌa Betel yic tzꞌoch ebꞌ vin̈ ejmelal dꞌa Jehová taꞌ. Ay jun vin̈, oxvan̈ chiva yedꞌnac vin̈, axo junxo vin̈ oxeꞌ ixim pan yedꞌnac vin̈, axo junxo vin̈, yedꞌnac jun tzꞌuum vin̈ bꞌudꞌan dꞌa vino. 4 Ol yacꞌan stzatzil a cꞌol ebꞌ vin̈, ol yacꞌan chabꞌoc ixim pan chiꞌ ebꞌ vin̈ dꞌayach, ol a cha ixim dꞌa ebꞌ vin̈. 5 Slajvi chiꞌ, ol ach qꞌuecꞌoch dꞌa chon̈abꞌ Gabaa, bꞌaj tzꞌochtaxon ejmelal dꞌa Jehová, ataꞌ ay jun yedꞌtal jun macan̈ ebꞌ filisteo. Ayic ol ach och dꞌa yol chon̈abꞌ chiꞌ, ol ilan jayvan̈ ebꞌ vin̈ schecabꞌ Jehová van yemuli, syalan slolonel Dios ebꞌ vin̈, bꞌabꞌel ebꞌ vin̈ van yacꞌanoch salterio, pandereta, flauta yedꞌ arpa. 6 Axo dꞌa jun rato chiꞌ, ol och Yespíritu Jehová dꞌayach, icha ebꞌ vin̈ chiꞌ ol ach ajoc, ol qꞌuexmaj a pensar. 7 Ayic ol ilani to icha chiꞌ aji, a tas vachꞌ ol abꞌi, a ol a cꞌulej, yujto a Dios ol och edꞌoc. 8 Slajvi chiꞌ, tzach bꞌabꞌlajcꞌoch dꞌa Gilgal. Ataꞌ ol co chalaj co bꞌa, ol in n̈usantzꞌa silabꞌ yedꞌ pax silabꞌ yic juncꞌolal yedꞌ Jehová. Uqueꞌ cꞌual ol in a tan̈vej taꞌ, ato yic ol in cꞌochoc. Ichato chiꞌ ol valan dꞌayach tas ol a cꞌulej, xchi vin̈aj Samuel chiꞌ.

9 Ixn̈ej val lajvi yalancan quil co bꞌa vin̈aj Saúl dꞌa vin̈aj Samuel chiꞌ, ix qꞌuexji spensar vin̈ yuj Dios, yuj chiꞌ a val dꞌa jun cꞌu chiꞌ ix elcꞌoch juntzan̈ tas ix yal vin̈aj Samuel chiꞌ. 10 Axo ix cꞌoch vin̈aj Saúl chiꞌ dꞌa Gabaa yedꞌ vin̈ schecabꞌ chiꞌ, ix elta ebꞌ vin̈ schecabꞌ Jehová icha ix aj yalan vin̈aj Samuel chiꞌ, ix chaji vin̈ yuj ebꞌ vin̈. A val dꞌa jun rato chiꞌ, ix och Yespíritu Dios dꞌa vin̈aj Saúl, ix och ijan vin̈ yalan slolonel Dios dꞌa scal ebꞌ vin̈. 11 A mach ojtannac vin̈aj Saúl chiꞌ dꞌa yalan̈taxo, ayic ix yilan ebꞌ yoch vin̈ ejmelal, ix yilanpax ebꞌ to ix qꞌuexmaj vin̈ icha juntzan̈xo ebꞌ vin̈ schecabꞌ Jehová, ix yalan ebꞌ: ¿Tas tzꞌicꞌan vin̈ yuninal vin̈aj Cis tic? ¿Tom ipan vin̈ schecabꞌ Jehová yaji? xchi ebꞌ.

12 Ay jun vin̈ aj Gabaa chiꞌ ix alani: ¿Mach smam juntzan̈xo ebꞌ vin̈ checabꞌ tic jun? xchi vin̈. Ataꞌ ix elcancot jun slolonel ebꞌ anima: ¿Tom ipan vin̈aj Saúl tic schecabꞌ Dios? xchi ebꞌ.

13 Ix lajvi yecꞌbꞌat juntzan̈ chiꞌ, ix qꞌuecꞌoch vin̈aj Saúl chiꞌ dꞌa tzalan bꞌaj tzꞌoch ejmelal. 14 Ix scꞌanbꞌan jun vin̈ yucꞌtac smam vin̈ dꞌay yedꞌ dꞌa vin̈ schecabꞌ vin̈ yedꞌnac chiꞌ:

—¿Bꞌajtil ix ex xidꞌeqꞌui? xchi vin̈.

Ix tacꞌvi vin̈aj Saúl chiꞌ:

—Ix on̈ xidꞌecꞌ co say nocꞌ bꞌuru, palta maj chaxlaj nocꞌ cuuj, yuj chiꞌ on̈ bꞌatcan co cꞌanbꞌej dꞌa vin̈aj Samuel, xchi vin̈.

15 Ix yalan vin̈ yucꞌtac vin̈ smam vin̈ chiꞌ:

—Tzoc val el dꞌa e cꞌool, tzeyal dꞌayin, tas ix yal vin̈aj Samuel chiꞌ dꞌayex, xchi vin̈.

16 Ix tacꞌvi vin̈aj Saúl chiꞌ:

—Vachꞌ ix yutej vin̈ yalani. Ix yal vin̈ to toxo ix chax nocꞌ bꞌuru chiꞌ, xchi vin̈. Malaj jabꞌoc tas ix yal vin̈ yuj tas ix yal vin̈aj Samuel dꞌay to ol och reyal.

17 Ix lajvi yecꞌbꞌat jayeꞌ cꞌual, ix smolbꞌan ebꞌ israel vin̈aj Samuel dꞌa Mizpa dꞌa yichan̈ Jehová. 18 Ix yalan vin̈ dꞌa ebꞌ:

—Ix yal Jehová co Diosal a on̈ israel on̈ tic: A in ix ex viqꞌuelta dꞌa Egipto, ix ex in colelta dꞌa yol scꞌabꞌ ebꞌ aj Egipto chiꞌ yedꞌ dꞌa yol scꞌabꞌ juntzan̈xo chon̈abꞌ ix ex ixtani, xchi Dios chiꞌ. 19 Palta axo ticnaic tze patiquejel co Diosal ix on̈ icꞌanelta bꞌaj ix on̈ ecꞌ dꞌa syaelal yedꞌ dꞌa cuscꞌolal chiꞌ. Ix e patiquejcaneli, ix ex och ijan e cꞌanan junoc co reyal yuj yacꞌan yajalil dꞌa quibꞌan̈. Yuj chiꞌ jun, tzex och dꞌa yichan̈ Jehová, dꞌa junjun in̈tilal yedꞌ dꞌa junjun macan̈il tzꞌaj eyochi.

20 Ix lajvi chiꞌ ix yalan vin̈ to snitzcot sbꞌa ebꞌ yajalil junjun in̈tilal ebꞌ israel, axo dꞌa yibꞌan̈ ebꞌ yin̈tilal Benjamín ix em sorteo. 21 Ix yalanpax vin̈ to snitzcot sbꞌa ebꞌ yajal yaj dꞌa junjun macan̈ yin̈tilal Benjamín chiꞌ, axo val dꞌa yibꞌan̈ yin̈tilal vin̈aj Matri ix emi. Ix yalanxi vin̈ to snitzcot sbꞌa yin̈tilal vin̈aj Matri chiꞌ, axo val dꞌa yibꞌan̈ vin̈aj Saúl yuninal vin̈aj Cis ix emi. Ix sayjiecꞌ vin̈ yuj ebꞌ, palta maj ilchajlaj vin̈. 22 Yuj chiꞌ, ix scꞌanbꞌan ebꞌ dꞌa Jehová tato ayecꞌ vin̈ taꞌ. Ix yalani to ayecꞌ vin̈, to ix scꞌubꞌejel sbꞌa vin̈ dꞌa scal juntzan̈ spa ebꞌ. 23 Ix bꞌat sayjielta vin̈ yuj ebꞌ bꞌaj cꞌubꞌanel chiꞌ. Axo yic ix schꞌoxan sbꞌa vin̈ dꞌa scal ebꞌ anima chiꞌ, ix ilji to a ebꞌ te chaan̈ steel, an̈ej dꞌa sjolom sjen̈jabꞌ vin̈ sqꞌuecꞌoch ebꞌ. 24 Ix yalan vin̈aj Samuel dꞌa ebꞌ anima chiꞌ:

—Ilecnabꞌ val vin̈ co reyal ix sicꞌoch Jehová tic, malaj junoc vinac dꞌa co cal tic syal slajbꞌan sbꞌa yedꞌ vin̈, xchi vin̈. Ix qꞌue n̈ilnaj ebꞌ yalani:

—Nivanocabꞌ yelcꞌoch vin̈ co reyal, xchi ebꞌ smasanil.

25 Ix lajvi chiꞌ, ix yalan vin̈aj Samuel chiꞌ sleyal yic rey dꞌa ebꞌ chon̈abꞌ israel. Ix stzꞌibꞌejcan vin̈, ix yacꞌanoch vin̈ dꞌa yol scajnubꞌ Jehová. Ix lajvi chiꞌ, ix stacꞌlancan sbꞌa ebꞌ, ix pax ebꞌ dꞌa spat. 26 Ichapax chiꞌ vin̈aj Saúl, ix pax vin̈ dꞌa spat dꞌa Gabaa. Ay pax juntzan̈ ebꞌ vin̈ vinac te jelan dꞌa oval ix bꞌat yedꞌ vin̈, yujto ix lolon Dios dꞌa spensar ebꞌ yic sbꞌat ebꞌ yedꞌ vin̈. 27 Palta ay juntzan̈ vinac bꞌuchumtac ix alan icha tic: ¿Tas ol yutoc jun vin̈ tic on̈ scolani? xchi ebꞌ vin̈. Emnaquil ix yutej vin̈aj Saúl chiꞌ ebꞌ vin̈, malaj tas ix siej ebꞌ vin̈ dꞌa vin̈. Palta malaj tas ix yal vin̈ dꞌa ebꞌ vin̈.