—Tato tzacꞌ junoc a trato quedꞌoc, ol cacꞌoch co bꞌa dꞌa yol a cꞌabꞌ, xchi ebꞌ.

2 Ix tacꞌvi vin̈aj Nahas sreyal ebꞌ amonita chiꞌ, ix yalan vin̈:

—Tzin bꞌo in trato chiꞌ eyedꞌoc, tato syal e cꞌol sviqꞌuelta junoc yol e sat junjun ex dꞌa e vachꞌ, yic tzꞌel sqꞌuixvelal ebꞌ eyetisraelal, xchi vin̈ dꞌa ebꞌ.

3 Ix tacꞌvi ebꞌ yajalil chon̈abꞌ, ix yalan ebꞌ:

—Tato icha chiꞌ, tzacꞌ uqueocxo cꞌual co permiso, ol cacꞌbꞌat co checabꞌ dꞌa masanil ebꞌ quetisraelal, tato malaj mach ol javoc on̈ scoloꞌ, ol cacꞌanoch co bꞌa dꞌa yol a cꞌabꞌ, xchi ebꞌ.

4 Ayic ix cꞌoch ebꞌ checabꞌ chiꞌ dꞌa Gabaa schon̈abꞌ vin̈aj Saúl, ix yalan schecnabꞌil ebꞌ dꞌa ebꞌ anima taꞌ. Axo masanil ebꞌ anima, ix laj ocꞌqꞌue ebꞌ. 5 A val dꞌa jun rato chiꞌ, ix cꞌoch vin̈aj Saúl, spetoj vin̈ dꞌa smunlajel, macbꞌil juntzan̈ nocꞌ vacax smunlaj yuj vin̈, ix scꞌanbꞌan vin̈:

—¿Tas tzꞌicꞌan ebꞌ anima tic yuj chiꞌ tzꞌocꞌ ebꞌ? xchi vin̈.

Ix yalan ebꞌ anima chiꞌ masanil tas ix ul yal ebꞌ checabꞌ ix cot dꞌa Jabes chiꞌ. 6 Ayic ix yabꞌan vin̈aj Saúl chiꞌ icha chiꞌ, elan̈chamel ix och Yespíritu Dios dꞌa vin̈, aꞌ ix acꞌan yip vin̈, ix cot yoval vin̈ sicꞌlabꞌil. 7 Ix schocꞌ xicanbꞌat chavan̈ nocꞌ vacax chiꞌ vin̈, ix yalan vin̈ to tzꞌicꞌjibꞌat nocꞌ chibꞌej chiꞌ yic schꞌoxji nocꞌ dꞌa masanil yol smacbꞌen israel. A ebꞌ tzꞌicꞌanbꞌat nocꞌ chiꞌ syal ebꞌ icha tic: Icha tic ol utaj nocꞌ svacax mach max yal scꞌool sbꞌat dꞌa oval yedꞌ vin̈aj Saúl yedꞌ pax vin̈aj Samuel, xchi ebꞌ.

Ix javi jun nivan xivelal dꞌa ebꞌ anima yuj Jehová, junxon̈ej ix yutej sbꞌa ebꞌ smasanil, ix javi ebꞌ yacꞌoch sbꞌa yedꞌ vin̈aj Saúl chiꞌ. 8 Ayic ix sbꞌisan jantac ebꞌ anima tzacꞌanoch yuj vin̈aj Saúl chiꞌ dꞌa Bezec, ay 30 mil ebꞌ ix cot dꞌa yin̈tilal Judá yedꞌ 300 mil ebꞌ ix cot dꞌa juntzan̈xo yin̈tilal Israel. 9 Ataꞌ ix yal vin̈aj Saúl chiꞌ dꞌa ebꞌ checabꞌ ix cot dꞌa Jabes chiꞌ:

—Alec dꞌa ebꞌ eyetchon̈abꞌ to a qꞌuicꞌan dꞌa qꞌuecꞌualil, toxo ix co col ebꞌ, xchi vin̈.

Ix bꞌat ebꞌ checabꞌ chiꞌ yal dꞌa ebꞌ yetchon̈abꞌ chiꞌ to a qꞌuicꞌan scolchaj ebꞌ. Ix te tzalajqꞌue ebꞌ. 10 Ix yalanbꞌat ebꞌ dꞌa vin̈aj Nahas icha tic:

—Ato qꞌuicꞌan bꞌat cacꞌoch co bꞌa dꞌa yol e cꞌabꞌ, tze naani tas tzon̈ eyutej, xchibꞌat ebꞌ.

11 Axo dꞌa junxo cꞌu, qꞌuicꞌto val, ix spojanecꞌ ebꞌ soldado vin̈aj Saúl chiꞌ, ox poj ix yutej ebꞌ vin̈. Ayto val sacbꞌi, ix cꞌoch lemnaj ebꞌ dꞌa yol scampamento ebꞌ amonita chiꞌ, ix och ijan ebꞌ smilancham ebꞌ masanto dꞌa qꞌuecꞌualil. Axo ebꞌ maj chamoc, ix saclemcanbꞌat ebꞌ, malaj bꞌaj junn̈ej ix can chavan̈oc ebꞌ. 12 Ix yalan ebꞌ anima chiꞌ dꞌa vin̈aj Samuel:

—¿Machtac ebꞌ ix alani to man̈ smojoc yoch vin̈aj Saúl co reyaloc? Iqꞌueccot ebꞌ dꞌa tic, ol co milcham ebꞌ, xchi ebꞌ.

13 Ix tacꞌvi vin̈aj Saúl chiꞌ:

—Maay, a dꞌa jun cꞌu tic, malaj junoc quetchon̈abꞌ syal schami, yujto a Jehová ix on̈ colani, xchi vin̈.

14 Ix yalanpax vin̈aj Samuel chiꞌ dꞌa ebꞌ anima smasanil:

—Coyec dꞌa Gilgal, yic bꞌat co vachꞌ aqꞌuejcanoch vin̈aj Saúl tic co reyaloc, xchi vin̈.

15 Yuj chiꞌ, ix bꞌat ebꞌ anima chiꞌ smasanil, ix smolbꞌanoch sbꞌa ebꞌ dꞌa yichan̈ Jehová taꞌ. Ix svachꞌ acꞌancanoch vin̈aj Saúl chiꞌ ebꞌ dꞌa reyal. Ix lajvi chiꞌ, ix yacꞌan silabꞌ ebꞌ yic juncꞌolal dꞌa yichan̈ Jehová. Axo ebꞌ chon̈abꞌ yedꞌ vin̈aj Saúl ix te tzalaj ebꞌ.