—Tic val tzeyilcani to ix in cꞌanabꞌajej tas ix e cꞌan dꞌayin, yuj chiꞌ ix vacꞌcanoch jun vin̈ co reyal tic. 2 Aton jun vin̈ tic co reyal, a vin̈ ol ex cuchbꞌanoc. Ilecnabꞌi, icham vinac inxo, sacxo xil in jolom, axo ebꞌ vin̈ vuninal ayoch ebꞌ vin̈ eyedꞌoc. A in ix ex in cuchbꞌej yictax quelem in, masanto ticnaic. 3 Ayinecꞌ dꞌa eyichan̈ ticnaic. Tato ay mach ix viqꞌuecꞌ junoc nocꞌ svacax, ma junoc nocꞌ sbꞌuru, mato ay mach bꞌaj ix vacꞌ chucal, mato ay junoc tas ix in cha dꞌayex in montubꞌaloc dꞌa elcꞌaltac, alec dꞌa yichan̈ Jehová yedꞌ dꞌa yichan̈ vin̈ co reyal ix siqꞌuel tic. Tato icha chiꞌ, syal in tupan ticnaic, xchi vin̈.

4 Yuj chiꞌ ix yalan ebꞌ chon̈abꞌ chiꞌ icha tic:

—Malaj juneloc ix acꞌ chucal dꞌayon̈, malaj bꞌaj ix a cha junoc tas a montubꞌaloc, xchi ebꞌ.

5 —A Jehová yedꞌ vin̈ ix sicꞌoch co reyaloc tic, testigo tzꞌajcan ebꞌ to malaj in mul ix och dꞌayex, xchi vin̈aj Samuel chiꞌ.

—Maay, malaj tasi, xchi ebꞌ anima chiꞌ.

6 Ix yalanpax vin̈ dꞌa masanil ebꞌ yetisraelal chiꞌ:

—A Jehová sicꞌannaquel vin̈aj Moisés yedꞌ vin̈aj Aarón ayic yicꞌannaquelta ebꞌ co mam quicham dꞌa Egipto. 7 Yuj chiꞌ, scham val eyabꞌan tas ol val ticnaic dꞌa yichan̈ Jehová, yuj tas vachꞌ scꞌulejnac cuuj yedꞌ yuj ebꞌ co mam quicham chiꞌ. 8 Ayic scꞌochnac vin̈aj Jacob yedꞌ masanil yal yuninal dꞌa Egipto, te ya utajnac ebꞌ yuj ebꞌ anima ay taꞌ. Yalannac sbꞌa ebꞌ dꞌa Jehová yic scolji ebꞌ yuuj. Axo Jehová chiꞌ acꞌanbꞌat vin̈aj Moisés yedꞌ vin̈aj Aarón yic sbꞌat yicꞌanelta ebꞌ co mam quicham chiꞌ ebꞌ vin̈ taꞌ. Acꞌjinaccan cajan ebꞌ dꞌa tic yuj ebꞌ vin̈. 9 Palta ix bꞌat Jehová co Diosal satcꞌolal yuj ebꞌ, yuj chiꞌ cotac scal ix acꞌjioch ebꞌ dꞌa yol scꞌabꞌ ebꞌ ajcꞌool yuuj. Ay jun tiempoal ix acꞌjioch ebꞌ dꞌa yol scꞌabꞌ vin̈aj Sísara, yajal yaj dꞌa ebꞌ soldado yic chon̈abꞌ Hazor. Ix acꞌjipaxoch ebꞌ dꞌa yol scꞌabꞌ ebꞌ filisteo yedꞌ dꞌa yol scꞌabꞌ ebꞌ vin̈ sreyal Moab. Junjun macan̈ ebꞌ chiꞌ, ix yacꞌ oval ebꞌ yedꞌ ebꞌ co mam quicham. 10 Yuj chiꞌ, juntac el tzꞌacꞌjioch ebꞌ dꞌa yol scꞌabꞌ ebꞌ chiꞌ, syalanxi sbꞌa ebꞌ dꞌa Jehová, syalan ebꞌ: Mamin, ix och val co mul dꞌayach, yujto ix ach cactejcani, axo Baal yedꞌ Astarot scacꞌ servil. A ticnaic jun, colon̈ dꞌa yol scꞌabꞌ ebꞌ cajcꞌool, a achxon̈ej ol ach cacꞌ servil, xchi ebꞌ.

11 Yuj chiꞌ ix acꞌjicot vin̈aj Jerobaal, vin̈aj Barac, vin̈aj Jefté yedꞌ in tic yuj Jehová, yic tzex colji dꞌa yol scꞌabꞌ ebꞌ eyajcꞌool, yuj chiꞌ syal eyaj dꞌa juncꞌolal. 12 Ayic ix eyilani to scot vin̈aj Nahas sreyal ebꞌ amonita yacꞌ oval quedꞌoc, ix e cꞌanan junoc e reyal dꞌayin, yic tzꞌoch yajalil dꞌa co cal, vachꞌchom a Jehová co Diosal co reyal yaji. 13 A ticnaic ina vin̈ e reyal ix e cꞌan tic. Toxo ix acꞌjioch vin̈ rey dꞌa co cal yuj Jehová. 14 A ticnaic, tze naꞌ sicꞌlabꞌil to tze cꞌanabꞌajej Jehová tzeyacꞌan servil, man̈ e pitej e bꞌa dꞌay. Tato ol e cꞌanabꞌajej icha snibꞌej Jehová co Diosal, tato tze cꞌanabꞌajej vin̈ e reyal tic, vachꞌn̈ej ol aj e bꞌeybꞌati. 15 Tato pit ol eyutej e bꞌa dꞌa tas syal Jehová jun, tato max e cꞌanabꞌajej, ol yacꞌoch yaelal dꞌa eyibꞌan̈ icha ix utaj ebꞌ co mam quicham.

16 A ticnaic, maclejec eyilaꞌ, yujto ol schꞌox Jehová junoc tas satubꞌtac yilji dꞌa eyichan̈. 17 A ticnaic stiempoal sjochchaj ixim trigo, man̈ stiempoaloc yacꞌan n̈abꞌ. Palta ol in cꞌan dꞌa Jehová to ol macꞌvaj cꞌu, ol yacꞌancot n̈abꞌ. Icha chiꞌ ol aj snachajel eyuuj to chuc ix e cꞌulej dꞌa yichan̈ Jehová chiꞌ, ayic ix e cꞌanan jun vin̈ rey tic, xchi vin̈aj Samuel chiꞌ.

18 Ix lajvi chiꞌ, ix scꞌanan vin̈aj Samuel chiꞌ dꞌa Jehová to scot n̈abꞌ. Val dꞌa jun rato chiꞌ ix macꞌvaj cꞌu ix cot n̈abꞌ chiꞌ, yuj chiꞌ masanil anima ix xiv dꞌa Jehová yedꞌ dꞌa vin̈aj Samuel chiꞌ. 19 Yuj chiꞌ masanil ebꞌ ix alan dꞌa vin̈aj Samuel chiꞌ icha tic:

—Cꞌan dꞌa Jehová co Diosal yic max on̈ chami, yujto ix te vachꞌ och co mul yuj bꞌaj ix co cꞌan co reyal tic, xchi ebꞌ dꞌa vin̈.

20 Ix tacꞌvi vin̈:

—Vachꞌchom chuc tas ix e cꞌulej chiꞌ, palta man̈ ex xivoc. Ayic ol bꞌeyn̈ejbꞌat tic, man̈xo eyiqꞌuel e bꞌa dꞌa Jehová, axon̈ej tzeyacꞌ servil dꞌa smasanil e cꞌool. 21 Man̈ eyactejcan Jehová yic tzex och tzacꞌan yuj juntzan̈ comon dios malaj yelcꞌochi, yujto malaj jabꞌoc tas syacꞌ dꞌayon̈, max yalpax on̈ scolani. 22 A Jehová man̈ ol ex yactejcan e chꞌocoj, yic man̈ ol alchaj chucal dꞌay, yujto snibꞌej tzex och schon̈abꞌoc. 23 Colvajn̈ejocabꞌ Jehová vedꞌoc yic tzin lesalvin̈ej eyuuj yic max och in mul dꞌay. Palta to ol ex in cꞌaybꞌej dꞌa stojolal. 24 An̈ej to tze cꞌanabꞌajej, tzeyacꞌan servil Jehová dꞌa smasanil e cꞌool, tze naancot jantac tas vachꞌ ix scꞌulej cuuj. 25 Palta tato ol e cꞌulejn̈ej chucal, ol ex satjoquel yedꞌ e reyal tic yuj Jehová, xchi vin̈ dꞌa ebꞌ.