4 Masanil ebꞌ israel ix abꞌani to toxo ix satel jun scampamento ebꞌ filisteo yuj vin̈aj Saúl chiꞌ, ix yabꞌanpax ebꞌ to aycot yoval ebꞌ filisteo chiꞌ dꞌa ebꞌ. Yuj chiꞌ, dꞌa elan̈chamel ix smolbꞌej sbꞌa ebꞌ soldado israel yedꞌ vin̈aj Saúl chiꞌ dꞌa Gilgal. 5 An̈ejaꞌ ebꞌ filisteo chiꞌ, ix smolbꞌejpax sbꞌa ebꞌ yic syacꞌan oval ebꞌ yedꞌ ebꞌ israel chiꞌ. Ay oxeꞌ mil scarruaje ebꞌ yic oval, vaqueꞌ mil ebꞌ soldado ayqꞌue dꞌa yibꞌan̈ chej, tzijtum pax ebꞌ sbꞌeyi, man̈xo bꞌischajbꞌenoc ebꞌ. Ix bꞌat ebꞌ dꞌa Micmas, ix sbꞌoan scampamento ebꞌ dꞌa stojolal bꞌaj sjavi cꞌu dꞌa Bet-avén.

6 Ayic ix yilan ebꞌ israel to max techaj yacꞌan oval ebꞌ yedꞌ ebꞌ filisteo chiꞌ, ix xivqꞌue ebꞌ. Ix bꞌat ebꞌ scꞌubꞌejel sbꞌa dꞌa yoltac qꞌuen n̈aqꞌueen, dꞌa scaltac vayumtac, dꞌa sattac qꞌuen tenam, dꞌa yoltac juntzan̈ jul yic a aꞌ yedꞌ dꞌa yoltac qꞌuen xabꞌ. 7 Ay pax ebꞌ ix cꞌaxpajecꞌ dꞌa aꞌ Jordán, ix bꞌat ebꞌ dꞌa yol yic Gad yedꞌ dꞌa Galaad. Axo vin̈aj Saúl chiꞌ jun, ix bꞌatcan vin̈ dꞌa Gilgal. Masanil ebꞌ soldado vin̈ yedꞌnac, toxon̈ej sluclon ebꞌ yuj xivelal. 8 A vin̈aj Saúl chiꞌ, uqueꞌ cꞌual ix can vin̈ dꞌa Gilgal yic stan̈van vin̈ scꞌoch vin̈aj Samuel, yujto icha chiꞌ yaj yalancan vin̈. Palta axo ix aji, maj cꞌochlaj vin̈ dꞌa Gilgal chiꞌ, yuj chiꞌ vanxo yactajcan vin̈aj Saúl chiꞌ yuj ebꞌ soldado. 9 Yuj chiꞌ ix yal vin̈aj Saúl chiꞌ:

—Iqꞌueccot nocꞌ silabꞌ ol n̈usjoctzꞌaoc yedꞌ silabꞌ yic juncꞌolal yedꞌ Jehová, xchi vin̈.

Axo vin̈ ix comon n̈usantzꞌa nocꞌ silabꞌ chiꞌ.

10 Ayic van slajvi sn̈usan silabꞌ chiꞌ vin̈, ix cꞌoch vin̈aj Samuel chiꞌ. Ayic ix yabꞌan vin̈aj Saúl chiꞌ to scꞌoch vin̈, ix elta vin̈ scha vin̈ yic syacꞌan stzatzil scꞌool vin̈. 11 Ix yalan vin̈aj Samuel chiꞌ:

—¿Tas ix a cꞌulej tic? xchi vin̈.

—Ix vilaꞌ to van in yactancan ebꞌ anima tic, a achxo max ach jalaj icha yaj scꞌual alancani, axo ebꞌ vin̈ filisteo toxon̈ej lecanecꞌ ebꞌ vin̈ dꞌa Micmas. 12 Yuj chiꞌ ix in naꞌa, qꞌuinaloc sja ebꞌ vin̈ yacꞌ oval dꞌayin dꞌa Gilgal tic, manto in cꞌanpax scolval Jehová, yuj chiꞌ ix vacꞌ pural in bꞌa vacꞌan jun silabꞌ tic, xchi vin̈aj Saúl chiꞌ.

13 Ix tacꞌvi vin̈aj Samuel chiꞌ:

—Yuj a man̈ pensaril ix a cꞌulan jun tic. Octom to ix a cꞌanabꞌajej tas ix yal Jehová co Diosal dꞌayach, tato icha chiꞌ, ix am yalaꞌ to tzach can reyal dꞌa scal ebꞌ israel dꞌa juneln̈ej. 14 Ocxo jun, man̈xo ol najtilax opisio. Ol say Jehová mach junoc scꞌanabꞌajan tas snibꞌej, a ol och yajalil dꞌa schon̈abꞌ, yujto ix a tenecꞌ tas ix yalaꞌ.

15 Ix lajvi chiꞌ, ix el vin̈aj Samuel dꞌa Gilgal chiꞌ, ix pax vin̈. A jantacto ebꞌ anima tzacꞌan dꞌa spatic vin̈aj Saúl chiꞌ, ix bꞌat ebꞌ dꞌa oval. Ix el ebꞌ dꞌa Gilgal chiꞌ, ix bꞌatcan ebꞌ dꞌa Gabaa dꞌa yol yic Benjamín. Ataꞌ ix sbꞌis vin̈aj Saúl chiꞌ jantacto ebꞌ soldado tzacꞌan yuuj, 600 to syil sbꞌa ebꞌ. 16 Ajun pax vin̈aj Jonatán vin̈ yuninal vin̈ yedꞌnac yedꞌ ebꞌ soldado. A dꞌa Gabaa chiꞌ ix can ebꞌ, axo pax ebꞌ filisteo, a dꞌa Micmas ay scampamento ebꞌ. 17 Ox macan̈ ix yutej sbꞌa ebꞌ filisteo chiꞌ, ix bꞌat yicꞌanelta scꞌael ebꞌ israel ebꞌ. Jun macan̈ ebꞌ ix bꞌatcan dꞌa sbꞌeal Ofra dꞌa yol yic Sual. 18 Axo junxo macan̈ ebꞌ ix bꞌatcan dꞌa Bet-horón, axo ebꞌ yoxil macan̈, ix bꞌatcan ebꞌ dꞌa pacꞌan dꞌa schꞌolanil Zeboim bꞌaj schabꞌat tzꞌinan luum.

19 Masanil dꞌa yol smacbꞌen Israel, malaj junoc ebꞌ bꞌoum qꞌuen ix chaji sbꞌo qꞌueen yuj ebꞌ filisteo, yujto malaj sgana ebꞌ sbꞌo qꞌuen espada yedꞌ lanza ebꞌ israel chiꞌ. 20 Ayic tzꞌel ye qꞌuen syamcꞌabꞌ ebꞌ israel chiꞌ, a dꞌa ebꞌ filisteo xidꞌecꞌ ebꞌ sn̈ic ye qꞌuen sqꞌueen chiꞌ, icha qꞌuen arado, qꞌuen asaron, qꞌuen chꞌacabꞌ yedꞌ qꞌuen jochlabꞌ trigo. 21 Chabꞌ plata scꞌan ebꞌ filisteo chiꞌ yuj sn̈icjiqꞌue ye qꞌuen arado yedꞌ qꞌuen asaron. Jun scꞌan ebꞌ yic sqꞌue ye junoc qꞌuen chꞌacabꞌ yedꞌ junoc qꞌuen teclabꞌ vacax. 22 Yuj chiꞌ, malaj junoc ebꞌ soldado israel edꞌjinac yespada, ma slanza, an̈ej vin̈aj Saúl yedꞌ vin̈aj Jonatán edꞌjinac yicoꞌ ayic ix och oval chiꞌ.

23 Axo jun macan̈ ebꞌ soldado ebꞌ filisteo, macbꞌil bꞌaj lodꞌan yuj ebꞌ, aton bꞌaj tzꞌecꞌ sbꞌeal Micmas.