—Con̈ ecꞌ dꞌa junxo cꞌaxep chiꞌ, ol on̈ cꞌoch bꞌaj ayecꞌ ebꞌ filisteo chiꞌ, xchi vin̈.

Maj yal-laj vin̈aj Jonatán chiꞌ dꞌa vin̈ smam chiꞌ. 2 Axo vin̈aj Saúl chiꞌ, a dꞌa slacꞌanil Gabaa ay scampamento vin̈, dꞌa yich jun teꞌ granado bꞌaj stecꞌji ixim trigo, 600 ebꞌ soldado ajun yedꞌ vin̈. 3 Ajun vin̈aj Ahías yuninal vin̈aj Ahitob yedꞌnac vin̈. Ayoch schaleca vin̈ yic sacerdoteal. A vin̈aj Ahitob chiꞌ yucꞌtac sbꞌa vin̈ yedꞌ vin̈aj Icabod. A vin̈aj Finees smam ebꞌ vin̈, yixchiquin ebꞌ vin̈ vin̈aj Elí, aton vin̈ acꞌannac sacerdoteal dꞌa Silo.

Man̈ yojtacoc vin̈aj Saúl yedꞌ ebꞌ soldado tato ix bꞌat vin̈aj Jonatán chiꞌ. 4-5 A vin̈aj Jonatán chiꞌ, ayoch dꞌa spensar vin̈ scꞌaxpajecꞌ dꞌa scampamento ebꞌ filisteo chiꞌ. Ay jun qꞌuen tenam scuch Boses dꞌa yichan̈ Micmas dꞌa stojolal norte, axo junxo qꞌueen scuch Sene ay dꞌa yichan̈ Gabaa dꞌa stojolal sur. Ay jun nivan chꞌolan dꞌa scal qꞌuen schabꞌil. 6 Ix yalan vin̈aj Jonatán chiꞌ dꞌa vin̈ edꞌjinac syamcꞌabꞌ chiꞌ:

—A ticnaic con̈ em dꞌa sat qꞌuen tic yic tzon̈ qꞌuecꞌoch dꞌa scampamento ebꞌ chꞌoc chon̈abꞌil chiꞌ. Tope val ol colvaj Jehová quedꞌoc. Man̈ ajaltacoclaj scolvaj quedꞌoc tato syal scꞌool, vachꞌchom man̈ nivanoc co bꞌeyi, xchi vin̈.

7 —Ichocabꞌ taꞌ tato vachꞌ tzꞌaj tza naꞌ, an̈ej to tzacꞌan in och uj bꞌaj tzach bꞌati, xchi vin̈ schecabꞌ vin̈ chiꞌ.

8 Ix yalan vin̈aj Jonatán chiꞌ:

—Con̈ an, ayic ol on̈ emcꞌoch dꞌa yol chꞌolan chiꞌ, ol co chꞌoxan co bꞌa dꞌa ebꞌ. 9 Tato ol yal ebꞌ dꞌayon̈, tan̈vejec taꞌ, tato xchi ebꞌ, man̈ ol on̈ qꞌuelaj dꞌa bꞌaj ayecꞌ ebꞌ chiꞌ. 10 Tato ol yal ebꞌ jun, qꞌuean̈eccot dꞌa tic, tato xchi ebꞌ, ol on̈ qꞌueoc. Icha chiꞌ ol aj schꞌoxan Jehová dꞌayon̈ to ol yacꞌoch ebꞌ dꞌa yol co cꞌabꞌ, xchi vin̈.

11 Axo yic ix schꞌoxan sbꞌa ebꞌ, ix yalan ebꞌ filisteo chiꞌ: Ilecnabꞌ val yelta ebꞌ hebreo dꞌa yoltac olan bꞌajtac cꞌubꞌan, xchi ebꞌ. 12 A val dꞌa jun rato chiꞌ ix avajemta ebꞌ dꞌa vin̈aj Jonatán yedꞌ dꞌa vin̈ yedꞌnac vin̈ chiꞌ:

—Lemec, qꞌuean̈eccot dꞌa tic, ay jun tas ol cal eyabꞌi, xchi ebꞌ filisteo chiꞌ.

Axo ix yalan vin̈aj Jonatán dꞌa vin̈ ajun yedꞌ chiꞌ:

—Ol ach qꞌuen̈ej tzacꞌan vuuj, yujto a ticnaic ol yacꞌoch ebꞌ filisteo tic Jehová dꞌa yol co cꞌabꞌ a on̈ israel on̈ tic, xchi vin̈.

13 Ix qꞌue machaljoc ebꞌ vin̈. Axo yic ix qꞌuecꞌoch ebꞌ vin̈, ix syamanoch vin̈aj Jonatán chiꞌ smilancham ebꞌ filisteo chiꞌ, axo vin̈ edꞌjinac syamcꞌabꞌ vin̈ chiꞌ ix vachꞌ milancham ebꞌ maj cham sicꞌlabꞌil. 14 A dꞌa jun bꞌabꞌel oval chiꞌ, ay am junoc 20 ebꞌ ix smilcham ebꞌ vin̈, ay am junoc chan̈eꞌ chꞌan̈il bꞌaj ix cham ebꞌ chiꞌ. 15 Masanil ebꞌ filisteo ayecꞌ dꞌa yol scampamento yedꞌ ebꞌ ton̈ej sacleminac yajeli yedꞌ ebꞌ najat ayel stan̈vej yedꞌ pax ebꞌ aybꞌat yiqꞌuelta scꞌael ebꞌ israel chiꞌ, ix javi jun nivan xivcꞌolal dꞌa yibꞌan̈ ebꞌ. Ix ecꞌpax jun nivan quixcabꞌ, yuj chiꞌ ix te xivqꞌue ebꞌ.

16 Axo pax ebꞌ ayoch smaclej yuj vin̈aj Saúl chiꞌ dꞌa Gabaa dꞌa yol yic Benjamín, ix yilan ebꞌ to ix qꞌue somnaj ebꞌ filisteo chiꞌ smasanil, van saclempax ebꞌ. 17 Yuj chiꞌ ix yal vin̈aj Saúl chiꞌ dꞌa ebꞌ soldado icha tic:

—Sayec eyil ebꞌ soldado, ol checlajoc machtac malaj, xchi vin̈.

Axo ix checlaji to a vin̈aj Jonatán malaj yedꞌ vin̈ tzꞌicꞌan syamcꞌabꞌ vin̈. 18 A dꞌa jun tiempoal chiꞌ ayecꞌ teꞌ scaxail strato Jehová dꞌa scal ebꞌ israel, yuj chiꞌ ix yal vin̈aj Saúl chiꞌ dꞌa vin̈aj Ahías:

—Icꞌcot teꞌ scaxail strato Jehová yic sco cꞌanbꞌej dꞌay, xchi vin̈.

19 Yacbꞌan van slolon vin̈ yedꞌ vin̈ sacerdote chiꞌ, ix te vachꞌ somchajqꞌue ebꞌ filisteo chiꞌ, yuj chiꞌ ix yal vin̈ dꞌa vin̈ sacerdote chiꞌ:

—Actej, man̈xo ol co cꞌanbꞌej dꞌa Jehová chiꞌ, xchi vin̈.

20 A val dꞌa jun rato chiꞌ ix smolbꞌej masanil ebꞌ soldado vin̈aj Saúl chiꞌ, ix bꞌat ebꞌ bꞌaj ayoch oval chiꞌ. Axo yic ix cꞌoch ebꞌ, ix yilan ebꞌ to toxo ix te qꞌue somnaj ebꞌ filisteo chiꞌ, van smil-lancham sbꞌa ebꞌ. 21 Ay juntzan̈ ebꞌ israel ayxo tiempo yajecꞌ yedꞌ ebꞌ filisteo chiꞌ, ayic ix yilan ebꞌ tas van yuji chiꞌ, ix och ebꞌ yedꞌ vin̈aj Saúl yedꞌ vin̈aj Jonatán chiꞌ. 22 Ayic ix yabꞌanpax ebꞌ israel ix bꞌat scꞌubꞌejel sbꞌa dꞌa lum tzalquixtac dꞌa yol yic Efraín, to van yel ebꞌ filisteo chiꞌ, ix cot ebꞌ, ix och ebꞌ dꞌa spatic ebꞌ. 23 Ix och ebꞌ dꞌa spatic ebꞌ filisteo chiꞌ, masanto dꞌa yichan̈bꞌat Bet-avén, icha chiꞌ ix aj scolan chon̈abꞌ Israel Jehová dꞌa jun cꞌu chiꞌ.

24 A dꞌa jun cꞌu chiꞌ, ix te el yip ebꞌ israel chiꞌ, yujto malaj junoc ebꞌ ix va yuj tas ix yal vin̈aj Saúl icha tic: Catabꞌajocabꞌ mach sva dꞌa jun qꞌuicꞌbꞌalil tic, ayic mantzac viqꞌuel yoval in cꞌol dꞌa ebꞌ ajcꞌol tic, xchi vin̈. 25 Ayic ix cꞌoch ebꞌ soldado dꞌa jun caltac teꞌ, te ay nocꞌ yal chabꞌ ay dꞌa sat luum, 26 icha yel yoc a aꞌ, icha val chiꞌ sbꞌey nocꞌ yal chabꞌ chiꞌ, palta malaj val junoc ebꞌ ix yal yucꞌan jabꞌoc nocꞌ, yujto ix xiv ebꞌ dꞌa tas ix yal vin̈aj Saúl chiꞌ. 27 A vin̈aj Jonatán maj yabꞌlaj jun lolonel chiꞌ vin̈, yuj chiꞌ ix slabꞌejem jun te teꞌ vin̈ yedꞌnac dꞌa scal nocꞌ yalchabꞌ chiꞌ, ix yacꞌanoch vin̈ dꞌa stiꞌ, ix te och yip vin̈ yuj jabꞌ chiꞌ. 28 Ix yalan jun vin̈ soldado dꞌa vin̈:

—A vin̈ a mam ix yal vin̈ dꞌayon̈ icha tic: Tato ay junoc mach ay jabꞌoc tas syabꞌlej, catabꞌajocabꞌcani, yuj chiꞌ lajanxon̈ej yel quip co masanil, xchi jun vin̈ soldado chiꞌ.

29 Ix tacꞌvi vin̈aj Jonatán chiꞌ:

—A vin̈ in mam chiꞌ, te chuc tas syicꞌcot vin̈ dꞌa yibꞌan̈ co chon̈abꞌ tic. A in tic, ix vabꞌ val yoch vip yuj jabꞌ nocꞌ yalchabꞌ ix vabꞌlej tic. 30 Ocxom masanil ebꞌ soldado tic, tato ix sva jabꞌoc tas ix quicꞌcanecꞌ dꞌa ebꞌ ajcꞌol chiꞌ ebꞌ, ecꞌtom val te nivan ebꞌ filisteo chiꞌ ix cham cuuj, xchi vin̈.

31 A dꞌa jun cꞌu chiꞌ, ix och ebꞌ israel dꞌa spatic ebꞌ filisteo chiꞌ. Ix syamoch ebꞌ smilancham ebꞌ dꞌa Micmas, masanto ix cꞌoch ebꞌ dꞌa Ajalón. Ix te el yip ebꞌ israel chiꞌ. 32 Yuj chiꞌ, a jantac tas ix yiqꞌuecꞌ ebꞌ dꞌa ebꞌ ajcꞌol chiꞌ, aton nocꞌ vacax, nocꞌ calnel yedꞌ nocꞌ yunetac vacax, ix smilcham nocꞌ ebꞌ dꞌa sat luum, ix schiꞌan nocꞌ ebꞌ yedꞌ schiqꞌuil. 33 Ay ebꞌ ix bꞌat alan dꞌa vin̈aj Saúl icha tic:

—Van yoch smul ebꞌ soldado dꞌa yichan̈ Jehová, van schiꞌan nocꞌ chibꞌej ebꞌ yedꞌ schiqꞌuil, xchi ebꞌ.

Yuj chiꞌ ix yalan vin̈aj Saúl chiꞌ icha tic:

—Ix och e mul dꞌa yichan̈ Jehová. Yuj chiꞌ bꞌaleccot junoc qꞌuen nivan qꞌuen chiꞌ dꞌa tic ticnaic. 34 Pucocabꞌ abꞌix dꞌa scal ebꞌ anima, syicꞌcot junjunoc nocꞌ svacax ebꞌ, ma junoc scalnel ebꞌ, smilancham nocꞌ ebꞌ schiꞌa, mocabꞌ schilaj nocꞌ ebꞌ yedꞌ schiqꞌuil yic max och smul ebꞌ dꞌa yichan̈ Jehová, xchi vin̈.

A dꞌa jun acꞌval chiꞌ, junjun ebꞌ ix icꞌancot junjun svacax, ma scalnel, ix smilancham nocꞌ ebꞌ schiꞌa. 35 Ix sbꞌoan jun altar vin̈aj Saúl chiꞌ taꞌ. A jun tic bꞌabꞌel altar ix sbꞌoqꞌue vin̈ dꞌa yichan̈ Jehová. 36 Ix lajvi chiꞌ, ix yalan vin̈ dꞌa ebꞌ soldado icha tic:

—Coyec caqꞌuecxi oval yedꞌ ebꞌ filisteo dꞌa jun acꞌval tic, ol quicꞌanecꞌ masanil tastac ay dꞌa ebꞌ, masanto yic ol sacbꞌoc, ol co milcham ebꞌ smasanil, man̈xa junoc pitzan ol canoc, xchi vin̈.

Ix yalan ebꞌ smasanil icha tic:

—Yicꞌocabꞌ icha tas tzal chiꞌ, xchi ebꞌ.

Palta ix yalan vin̈ sacerdote icha tic:

—Ayic manto on̈ bꞌatec, vachꞌ ta sco cꞌanbꞌej dꞌa Dios, xchi vin̈.

37 Yuj chiꞌ ix scꞌanbꞌan vin̈aj Saúl chiꞌ dꞌa Dios:

—¿Tom tzon̈ bꞌatxi cacꞌ oval yedꞌ ebꞌ filisteo? ¿Ol am acꞌoch ebꞌ dꞌa yol co cꞌabꞌ? xchi vin̈.

Palta maj tacꞌvoclaj Jehová chiꞌ dꞌa vin̈ dꞌa jun acꞌval chiꞌ. 38 Yuj chiꞌ ix yalan vin̈ icha tic: Masanil ex yajal ex, nitzeccot e bꞌa dꞌa tic, ol co cꞌanbꞌani, mach ix och smul ticnaic. 39 Yujto svacꞌ in tiꞌ dꞌa Jehová co Columal a on̈ israel on̈ tic, vachꞌchom a vin̈ vuninal aj Jonatán ix och smul, syal scham vin̈, xchi vin̈aj Saúl chiꞌ.

Malaj junoc ebꞌ dꞌa scal ebꞌ soldado ix tacꞌvi. 40 Yuj chiꞌ, ix yalanxi vin̈ dꞌa ebꞌ smasanil icha tic:

—Canan̈ec e masanil dꞌa tic, chꞌoc ol in can a in tic yedꞌ vin̈ vuninal aj Jonatán, xchi vin̈.

—A achn̈ej tzala, xchi ebꞌ soldado chiꞌ.

41 Ix yalan vin̈ icha tic:

—Mamin Jehová ach co Diosal, ¿tas yuj max ach tacꞌvi dꞌa vin̈ a checabꞌ tic? A ticnaic ayic ol och sorteo, tato a qꞌuen Urim tzꞌelta, syalelcꞌochi to a in, ma a vin̈ vuninal aj Jonatán ix och smul, palta tato a qꞌuen Tumim tzꞌelta, syalelcꞌochi to a ebꞌ a chon̈abꞌ Israel tic ix och smul, xchi vin̈.

Axo ix aji, a dꞌa yibꞌan̈ vin̈aj Jonatán yedꞌ dꞌa vin̈aj Saúl ix emi, axo ebꞌ chon̈abꞌ, ix colchajcanel ebꞌ. 42 Ix yalanxi vin̈aj Saúl chiꞌ icha tic:

—Axo ticnaic jun, axon̈ej dꞌa vibꞌan̈ yedꞌ vin̈ vuninal tic tzꞌoch sorteo, xchi vin̈.

Axo ix aj jun, a dꞌa yibꞌan̈ vin̈aj Jonatán chiꞌ ix emi. 43 Yuj chiꞌ ix yal vin̈ dꞌa vin̈aj Jonatán chiꞌ icha tic:

—Al dꞌayin tas ix a cꞌulej, xchi vin̈.

Ix yalan vin̈aj Jonatán chiꞌ:

—Val yel ix vabꞌlej jabꞌ nocꞌ yalchabꞌ, ton̈ej ix in labꞌejem jun te teꞌ dꞌa scal nocꞌ, ix in lecꞌani, yuj chiꞌ ina in tic chamoc in ocabꞌi, xchi vin̈.

44 Ix yalan vin̈aj Saúl chiꞌ icha tic:

—Yacꞌocabꞌ och junoc nivan yaelal Dios dꞌa vibꞌan̈ tato max ach chami, xchi vin̈.

45 Ix tacꞌvi ebꞌ anima smasanil:

—Tocval ol co cha cham vin̈aj Jonatán tic, yujto a yuj vin̈, on̈ colchaj a on̈ israel on̈ tic. Man̈ smojoc icha chiꞌ. Yojtac Jehová co Diosal. Val yel malaj junoc xil sjolom vin̈aj Jonatán tic ol em dꞌa sat luum. Yujto a tas toxo ix elcꞌoch ticnaic, a Dios ix colvaj quedꞌoc, xchi ebꞌ.

Icha chiꞌ ix aj scolchajcanel vin̈aj Jonatán chiꞌ yuj ebꞌ yetchon̈abꞌ, yuj chiꞌ majxo chamlaj vin̈. 46 Ix lajvi chiꞌ, majxo bꞌatlaj vin̈aj Saúl yedꞌ ebꞌ soldado spech ebꞌ filisteo chiꞌ, yuj chiꞌ ix laj meltzaj ebꞌ filisteo chiꞌ dꞌa schon̈abꞌ.

47 Atax yic ix ochcan vin̈aj Saúl sreyaloc chon̈abꞌ Israel, ix syamanoch vin̈ yacꞌan oval yedꞌ juntzan̈ chon̈abꞌ ajcꞌool oyanoch dꞌa spatictac vin̈, aton ebꞌ aj Moab, ebꞌ aj Amón, ebꞌ aj Edom, ebꞌ vin̈ sreyal Soba yedꞌ ebꞌ filisteo. Ix yacꞌn̈ej ganar vin̈ bꞌajtac ix yacꞌ oval. 48 A dꞌa junel ix smolbꞌej masanil soldado vin̈, ix yacꞌan oval vin̈ yedꞌ ebꞌ amalec. Icha chiꞌ ix aj scolanel ebꞌ israel vin̈ dꞌa yol scꞌabꞌ ebꞌ ajcꞌol tzꞌelcꞌan tastac ay dꞌa ebꞌ israel chiꞌ.

49 Ay oxvan̈ yuninal vin̈aj Saúl chiꞌ, aton vin̈aj Jonatán, vin̈aj Isúi yedꞌ pax vin̈aj Malquisúa. Ay pax chavan̈ yisil vin̈, jun ix scuch Merab, aton ix bꞌabꞌel, axo ix schabꞌil, scuch Mical. 50 A ix yetbꞌeyum vin̈aj Saúl chiꞌ Ahinoam sbꞌi ix, yisil ix vin̈aj Ahimaas. Axo vin̈ sat yajalil ebꞌ soldado vin̈, Abner sbꞌi vin̈, yuninal vin̈aj Ner yicham vin̈aj Saúl chiꞌ. 51 A vin̈aj Cis smam vin̈aj Saúl chiꞌ yedꞌ vin̈aj Ner smam vin̈aj Abner, yuninal ebꞌ vin̈ vin̈aj Abiel.

52 Yacbꞌan ayoch vin̈aj Saúl chiꞌ reyal dꞌa scal ebꞌ yetisraelal, ix yacꞌn̈ej oval vin̈ yedꞌ ebꞌ filisteo. Yuj chiꞌ a ebꞌ quelemtac jelan, te ay pax yip, ix och ebꞌ dꞌa soldadoal yuj vin̈aj Saúl chiꞌ.