—A Jehová ix in checani ayic ix ach in sicꞌancanoch reyal dꞌa Israel aton schon̈abꞌ. Yuj chiꞌ cha abꞌ tas syal Jehová dꞌayach. 2 A Jehová Yajal dꞌa Smasanil tzꞌalan icha tic: Ol vacꞌoch yaelal dꞌa yibꞌan̈ ebꞌ amalecita yujto yacꞌnac oval ebꞌ yedꞌ ebꞌ israel ayic scotnac ebꞌ dꞌa Egipto. 3 Yuj chiꞌ ol ach bꞌat acꞌ oval yedꞌ ebꞌ, tza satel ebꞌ yedꞌ tastac ay dꞌa ebꞌ, malaj junoc macan̈ bꞌaj tzꞌocꞌ a cꞌool. Tza milcham masanil ebꞌ vinac, ebꞌ ix ix, ebꞌ unin yedꞌ ebꞌ ato yalji yedꞌ pax nocꞌ vacax, nocꞌ calnel, nocꞌ camello yedꞌ nocꞌ bꞌuru, tza satel smasanil, xchi Jehová, xchi vin̈ dꞌa vin̈.

4 Ix smolbꞌej ebꞌ soldado vin̈aj Saúl chiꞌ, ix sayan yil ebꞌ vin̈ dꞌa Telaim. Ay 10 mil ebꞌ soldado dꞌa yin̈tilal Judá yedꞌ 200 mil ebꞌ yic juntzan̈xo yin̈tilal Israel. 5 Ix lajvi chiꞌ, ix bꞌat vin̈aj Saúl chiꞌ dꞌa chon̈abꞌ Amalec, ix bꞌat scꞌubꞌanel sbꞌa vin̈ yedꞌ ebꞌ soldado dꞌa yol jun taquin̈ melem. 6 Ix yalanbꞌat vin̈ dꞌa ebꞌ quenita:

—Elan̈ec dꞌa scal ebꞌ amalecita, yic man̈ ol ex in satel yedꞌ ebꞌ, yujto ocꞌnac e cꞌool dꞌa ebꞌ quetisraelal ayic sjavinac ebꞌ dꞌa tic, ayic spetoj ebꞌ dꞌa Egipto, xchibꞌat vin̈ dꞌa ebꞌ.

Elan̈chamel ix yiqꞌuel sbꞌa ebꞌ quenita chiꞌ dꞌa scal ebꞌ amalecita chiꞌ. 7 Ix cꞌoch vin̈aj Saúl chiꞌ yacꞌ oval yedꞌ ebꞌ amalecita chiꞌ, ix schaanel yich vin̈ dꞌa Havila, masanto ix cꞌoch vin̈ dꞌa Shur dꞌa smojonalxo Egipto dꞌa stojolal bꞌaj sjavi cꞌu. Ix acꞌji ganar ebꞌ amalecita chiꞌ yuj ebꞌ. 8 Ix syamancot vin̈aj Agag ebꞌ, aton vin̈ sreyal ebꞌ amalecita chiꞌ. Pitzan vin̈ ix syaman vin̈ ebꞌ. Axo masanil juntzan̈xo ebꞌ amalecita, ix miljicham ebꞌ. 9 Palta a vin̈aj Saúl chiꞌ yedꞌ ebꞌ soldado, maj smilchamlaj vin̈aj Agag chiꞌ ebꞌ. Maj smilpaxchamlaj nocꞌ vacax ebꞌ te vachꞌ, nocꞌ calnel, nocꞌ yunetac vacax te bꞌaqꞌuech, nocꞌ yunetac calnel yedꞌ juntzan̈ocxo tastac te ay stojol. Axo masanil tas malaj val yelcꞌochi, ix satel ebꞌ smasanil.

10 Ix yalan Jehová dꞌa vin̈aj Samuel icha tic:

11 Scus in cꞌool yujto ix vacꞌoch vin̈aj Saúl tic reyal, yujto tzin spatiquejcanel vin̈, maj scꞌanabꞌajej vin̈ tas ix valaꞌ, xchi dꞌa vin̈.

Ix cus scꞌool vin̈aj Samuel, yuj chiꞌ pilan acꞌval ix lesalvi vin̈ dꞌa Jehová. 12 Axo dꞌa junxo qꞌuin̈ibꞌalil, te acꞌvalto ix bꞌat vin̈ yil vin̈aj Saúl chiꞌ. Palta axo ix alchaj dꞌa vin̈ to ix bꞌat vin̈aj Saúl chiꞌ dꞌa Carmel. Ataꞌ ix sbꞌoqꞌue jun monumento vin̈ yuj yicꞌanchaan̈ sbꞌa. Ix lajvi chiꞌ ix bꞌat vin̈ dꞌa Gilgal. 13 Yuj chiꞌ ix bꞌat vin̈aj Samuel chiꞌ taꞌ. Axo ix cꞌoch vin̈, ix yalan vin̈aj Saúl chiꞌ dꞌa vin̈ icha tic:

—Yacꞌocabꞌ svachꞌcꞌolal Jehová dꞌa ibꞌan̈. Toxo ix in cꞌanabꞌajej tas ix yalaꞌ, xchi vin̈.

14 —¿Tas yaj nocꞌ calnel yedꞌ nocꞌ vacax svabꞌ yocꞌ chiꞌ? xchi vin̈aj Samuel chiꞌ.

15 —A dꞌa chon̈abꞌ Amalec ix cot nocꞌ, yujto a val nocꞌ calnel te vachꞌ ix yicꞌcot ebꞌ soldado yedꞌ nocꞌ vacax yic ol och silabꞌil dꞌa Jehová co Diosal. Axo masanil juntzan̈xo, ix co sateli, xchi vin̈.

16 —Numan tzach aji. Ol val dꞌayach tas ix yal Jehová dꞌayin dꞌa qꞌuiqꞌui dꞌacꞌval, xchi vin̈aj Samuel chiꞌ.

—Al an, xchi vin̈.

17 Ix yalan vin̈aj Samuel chiꞌ dꞌa vin̈ icha tic:

—A dꞌa yalan̈taxo malaj elcꞌoch a naani, palta ach och yajalil dꞌa masanil yin̈tilal Israel. A Jehová ix ach acꞌanoch sreyaloc co chon̈abꞌ tic. 18 Ach schecanpaxbꞌat a satel juntzan̈ ebꞌ amalecita malaj svachꞌil tas scꞌulej yedꞌ masanil tastac ay dꞌa ebꞌ. 19 ¿Tas yuj maj a cꞌanabꞌajej tas ix yal Jehová dꞌayach, ina to ix icꞌcot tastac dꞌa ebꞌ ajcꞌol chiꞌ? Te chuc tas ix a cꞌulej dꞌa yichan̈ Jehová, xchi vin̈.

20 Ix tacꞌvi vin̈aj Saúl chiꞌ:

—Maay, ix in cꞌanabꞌajej tas ix yalaꞌ, ix in xidꞌeqꞌui, ix in cꞌanabꞌajej tas ix schec in cꞌulej. Ix vicꞌcot vin̈aj Agag sreyal ebꞌ amalecita chiꞌ, ix in satanel masanil ebꞌ anima taꞌ. 21 Axo ebꞌ soldado ix icꞌancot nocꞌ scalnel ebꞌ yedꞌ nocꞌ vacax vachꞌ dꞌa scal nocꞌ to yovalil satjieli. Ix yicꞌancot nocꞌ ebꞌ, yic tzꞌacꞌchaj nocꞌ silabꞌil dꞌa Jehová co Diosal dꞌa Gilgal tic, xchi vin̈.

22 Ix yalanxi vin̈aj Samuel chiꞌ:

24 Ix tacꞌvi vin̈aj Saúl chiꞌ, ix yalan vin̈:

—Yel toni, ix och in mul, maj in cꞌanabꞌajej tas ix yal Jehová yedꞌ tas ix al dꞌayin, yujto ix in xiv dꞌa ebꞌ soldado ajun vedꞌoc, ix in cha vabꞌ tas ix yal ebꞌ. 25 Elocabꞌ dꞌa a cꞌool to tzin acꞌ nivancꞌolal yuj in mul ix ochi, meltzajan̈ vedꞌoc tzon̈ och ejmelal dꞌa yichan̈ Jehová, xchi vin̈.

26 —Man̈ ol in meltzajlaj edꞌoc, yujto ix a patiquejel tas ix yal Jehová, yuj chiꞌ ol ach yiqꞌuel dꞌa reyal dꞌa co chon̈abꞌ Israel tic, xchi vin̈aj Samuel chiꞌ.

27 Axo yic ix meltzaj vin̈aj Samuel chiꞌ yalani, ix och yubꞌnaj vin̈aj Saúl chiꞌ dꞌa stiꞌ spichul vin̈, ix n̈icꞌchaj yuj vin̈. 28 Yuj chiꞌ ix yal vin̈aj Samuel chiꞌ dꞌa vin̈ icha tic:

—Icha val ix utej a n̈icꞌchitan in pichul tic, icha chiꞌ ol yutej Jehová yicꞌanel opisio dꞌa reyal dꞌa yol a cꞌabꞌ, ol yacꞌanoch dꞌa yol scꞌabꞌ junxo quetchon̈abꞌ ecꞌto vachꞌ dꞌa ichan̈. 29 Yovalil ol elcꞌoch jun tic, yujto a Jehová squicꞌchaan̈ a on̈ israel on̈ tic, malaj bꞌaj syesej, malaj bꞌaj sqꞌuex spensar ichoc anima, xchi vin̈.

30 Ix yalan vin̈aj Saúl chiꞌ

—Yeltoni ix och in mul, palta elocabꞌ dꞌa a cꞌol tzach meltzaj vedꞌoc yic ay velcꞌoch dꞌa yichan̈ ebꞌ yajalil co chon̈abꞌ yedꞌ dꞌa yichan̈ ebꞌ quetchon̈abꞌ smasanil. Meltzajan̈ vedꞌoc, tzon̈ och ejmelal dꞌa Jehová co Diosal, xchi vin̈.

31 Yuj chiꞌ ix meltzaj vin̈aj Samuel chiꞌ yedꞌ vin̈, ix och vin̈aj Saúl chiꞌ ejmelal dꞌa yichan̈ Jehová. 32 Ix lajvi chiꞌ, ix yalan vin̈aj Samuel chiꞌ:

—Iqꞌueccot vin̈aj Agag sreyal ebꞌ Amalec chiꞌ dꞌa vichan̈, xchi vin̈.

Ix te tzalaj vin̈aj Agag chiꞌ ayic ix javi vin̈ dꞌa yichan̈ vin̈aj Samuel chiꞌ, man̈xo ol chamlaj vin̈ snaani. 33 Ix yalan vin̈aj Samuel chiꞌ dꞌa vin̈:

—Yuj qꞌuen espada tic tzijtum ebꞌ ix ix, ix can dꞌa man̈ uneal. Icha val ix ajcan ebꞌ ix chiꞌ, icha chiꞌ ol aj scan ix a nun, xchi vin̈.

Maj yacꞌ nivancꞌolal vin̈, ix scotacxicanbꞌat vin̈aj Agag chiꞌ vin̈ dꞌa yichan̈ Jehová dꞌa Gilgal chiꞌ. 34 Ix lajvi chiꞌ ix meltzaj vin̈ dꞌa Ramá, ix meltzajpax vin̈aj Saúl dꞌa spat dꞌa Gabaa. 35 Ayic pitzanto vin̈aj Samuel chiꞌ, majxo bꞌatlaj vin̈ yil vin̈aj Saúl chiꞌ, palta scus vin̈ yuj vin̈. Ix cuspax Jehová yujto ix yacꞌoch vin̈aj Saúl sreyaloc Israel.