—¿Bꞌaqꞌuin̈ ol actej a cus yuj vin̈aj Saúl chiꞌ? Maxtzac yal in cꞌool to ol yacꞌn̈ej yajalil vin̈ dꞌa chon̈abꞌ Israel tic. A ticnaic, acꞌ bꞌudꞌjoc nocꞌ a chꞌaac yedꞌ aceite, tzach bꞌat dꞌa spat vin̈aj Isaí dꞌa Belén, yujto toxo ix in siqꞌuel jun vin̈ yuninal vin̈ yic tzꞌoch reyal sqꞌuexuloc vin̈aj Saúl chiꞌ, xchi dꞌa vin̈.

2 —¿Tas val tzꞌaj in bꞌati? Ta syabꞌ jun tic vin̈aj Saúl chiꞌ, tzam in smilcham vin̈, xchi vin̈aj Samuel chiꞌ.

Ix tacꞌvi Jehová chiꞌ dꞌa vin̈:

—Icꞌbꞌat junoc nocꞌ cobꞌes vacax tzach bꞌati, tzalani to acꞌoj silabꞌ dꞌa Jehová tzach cꞌochi. 3 Slajvi chiꞌ tzavtan vin̈aj Isaí chiꞌ yic schiꞌan nocꞌ silabꞌ chiꞌ vin̈. Ataꞌ ol val dꞌayach tas ol a cꞌulej. A mach ol in chꞌox dꞌayach, tza sicꞌcaneli, tzacꞌanqꞌue aceite dꞌa sjolom, xchi dꞌa vin̈.

4 Ix scꞌanabꞌajan vin̈ tas ix yal Jehová chiꞌ. Ayic ix cꞌoch vin̈ dꞌa Belén, ix ul chaji vin̈ dꞌa xivcꞌolal yuj ebꞌ yichamtac vinaquil chon̈abꞌ chiꞌ, elan̈chamel ix scꞌanbꞌej ebꞌ dꞌa vin̈:

—¿Tas tzul a cꞌulej mamin? ¿Vachꞌ am tas tzul a cꞌulej? xchi ebꞌ dꞌa vin̈.

5 —Iꞌ, tzin javi vacꞌ jun silabꞌ dꞌa Jehová. Bꞌoec e bꞌa icha yalan ley, ol ex bꞌat vedꞌoc yic sco chiꞌan jun silabꞌ tic, xchi vin̈.

Ix yalanpax vin̈ dꞌa vin̈aj Isaí yedꞌ dꞌa ebꞌ vin̈ yuninal to sbꞌo sbꞌa ebꞌ vin̈ icha yalan ley yic schiꞌan nocꞌ silabꞌ chiꞌ ebꞌ yedꞌ vin̈. 6 Ayic ix cꞌoch vin̈aj Isaí yedꞌ ebꞌ vin̈ yuninal chiꞌ, elan̈chamel ix yiloch vin̈aj Eliab vin̈aj Samuel chiꞌ, ix snaan vin̈: Tecan a jun vin̈ tic ix siqꞌuel Jehová, xchi vin̈.

7 Ix yalan Jehová dꞌa vin̈: Man̈ ach och qꞌuelan chajtil yilji jun vin̈ tic, man̈ iloch steel vin̈, yujto man̈oclaj vin̈ tic. A ebꞌ anima, a chajtil yilji ebꞌ anima, a syiloch ebꞌ, palta a in xo tic, a spensar ebꞌ svilochi, xchi dꞌa vin̈.

8 Ix lajvi chiꞌ, ix yicꞌancot junxo vin̈ yuninal vin̈aj Isaí chiꞌ scuchan Abinadab dꞌa yichan̈ vin̈, palta ix yalanxi vin̈:

Man̈oclaj junxo vin̈ tic sicꞌbꞌilel yuj Jehová, xchi vin̈.

9 Ix yicꞌancot junxo vin̈ yuninal vin̈aj Isaí chiꞌ scuchan Sama dꞌa yichan̈ vin̈, ix yalanxi vin̈:

—Man̈oclaj junxo vin̈ tic ix siqꞌuel Jehová, xchi vin̈.

10 Ix ecꞌchaj ebꞌ vin̈ yuninal vin̈aj Isaí chiꞌ yucvan̈il dꞌa yichan̈ vin̈.

Malaj junoc ebꞌ vin̈ tic ix siqꞌuel Jehová, xchi vin̈. 11 Yuj chiꞌ ix scꞌanbꞌan vin̈ dꞌa vin̈aj Isaí chiꞌ:

—¿Tom an̈ej ebꞌ vin̈ uninal tic? xchi vin̈.

—Ayto junxo vin̈ tzacꞌan unin, aycanbꞌat vin̈ tan̈voj calnel, xchi vin̈aj Isaí chiꞌ.

—Acꞌbꞌat yicꞌumal vin̈ an, tato max ja vin̈, man̈ ol on̈ valaj, xchi vin̈aj Samuel chiꞌ.

12 Ix schecanbꞌat yicꞌumal junxo vin̈ yuninal vin̈aj Isaí chiꞌ. Axo ix javi vin̈, ix yilanoch vin̈aj Samuel chiꞌ, chacpulinac yilji vin̈, te vivo yilji yol sat vin̈, te vachꞌ snivanil vin̈.

A val dꞌa jun rato chiꞌ ix yalan Jehová dꞌa vin̈aj Samuel chiꞌ:

—Aton vin̈ tic, acꞌqꞌue aceite dꞌa sjolom vin̈, xchi.

13 Ix lajvi chiꞌ, ix yicꞌancot nocꞌ schꞌaac vin̈aj Samuel chiꞌ, aton bꞌaj ayem aceite. Dꞌa yichan̈ ebꞌ vin̈ yucꞌtac vin̈ chiꞌ smasanil ix yacꞌqꞌue aceite vin̈aj Samuel chiꞌ dꞌa sjolom vin̈. A vin̈ chiꞌ David sbꞌi vin̈. Atax dꞌa jun cꞌu chiꞌ ix och Yespíritu Jehová dꞌa vin̈. Axo yic ix lajvi sva ebꞌ, ix meltzajxi vin̈aj Samuel chiꞌ dꞌa Ramá.

14 Ix yiqꞌuel Yespíritu Jehová dꞌa vin̈aj Saúl, axo jun espíritu chuc ix acꞌjicanoch dꞌa vin̈, ste ixtaj val vin̈ yuuj. 15 Yuj chiꞌ ix yal ebꞌ vin̈ schecabꞌ vin̈:

—Mamin rey, a tas tzach icꞌani tecan a junoc espíritu chuc ix acꞌjioch dꞌayach yuj Dios yic tzach yixtani. 16 Yuj chiꞌ schaocabꞌ a cꞌool, tzon̈ bꞌat a on̈ a checabꞌ on̈ tic co say junoc vin̈ syal schalan teꞌ arpa, yic vachꞌ a tzach yixtan jun espíritu chiꞌ, schalan teꞌ arpa chiꞌ vin̈, icha chiꞌ tzꞌaj sbꞌoxi a cꞌool, xchi ebꞌ vin̈.

17 —Ixiquec an, a junoc vin̈ te jelan schalan teꞌ tzeyicꞌcoti, xchi vin̈aj Saúl chiꞌ.

18 Ix yalan jun vin̈ yetbꞌeyum ebꞌ vin̈ ayecꞌ chiꞌ icha tic:

—Ay val jun vin̈ vojtac a in tic, yuninal vin̈ vin̈aj Isaí aj Belén, te vachꞌ schalan teꞌ arpa chiꞌ vin̈, an̈ejtonaꞌ te vachꞌ vin̈ dꞌa oval. Te ay spensar vin̈ sloloni, vachꞌ yiljipax snivanil vin̈. Ayoch Jehová yedꞌ vin̈ squilaꞌ, xchi vin̈.

19 Yuj chiꞌ, ix yacꞌbꞌat schecabꞌ vin̈aj Saúl dꞌa vin̈aj Isaí chiꞌ, ix yalanbꞌat vin̈: Acꞌcot vin̈ uninal aj David dꞌayin, vin̈ stan̈van nocꞌ a calnel, xchibꞌat vin̈. 20 Ix scꞌanabꞌajej vin̈aj Isaí chiꞌ, ix yacꞌancot vin̈aj David chiꞌ vin̈ dꞌa vin̈aj Saúl chiꞌ. Ix yacꞌancot jun nocꞌ bꞌuru vin̈ yedꞌ vin̈, cuchbꞌil jun icatzil pan yuj nocꞌ yedꞌ jun tzꞌuum ayem vino dꞌa yool yedꞌ pax jun nocꞌ yuneꞌ chiva. 21 Ayic ix javi vin̈aj David dꞌa vin̈aj Saúl chiꞌ, ix ochcan vin̈ schecabꞌoc vin̈. Te xajan ix aj vin̈, ix yacꞌanoch vin̈ vin̈aj Saúl chiꞌ yicꞌumaloc syamcꞌabꞌ yic oval. 22 Ix yacꞌanbꞌat jun schecabꞌ vin̈aj Saúl chiꞌ dꞌa vin̈aj Isaí, smam vin̈aj David chiꞌ, ix yalanbꞌat vin̈ icha tic: Elocabꞌ dꞌa a cꞌool to scan vin̈aj David tic vedꞌoc, yujto te vachꞌ vin̈ dꞌayin svilaꞌ, xchibꞌat vin̈. 23 Ayic tzꞌixtaj vin̈aj Saúl chiꞌ yuj jun espíritu chuc ayoch chiꞌ dꞌay, tzꞌoch ijan vin̈aj David chiꞌ schalan teꞌ arpa chiꞌ. Ayic syabꞌan jun chiꞌ vin̈aj Saúl chiꞌ, tzꞌel jun espíritu chuc chiꞌ dꞌa vin̈, vachꞌ tzꞌajxi scꞌol vin̈ syabꞌi.