—¿Tom syal in qꞌuexcꞌoch dꞌa yol junoc chon̈abꞌ dꞌa yol yic Judá? xchi vin̈.

Ix tacꞌvi Jehová chiꞌ dꞌa vin̈:

—Syalaꞌ, xchi. Ix scꞌanbꞌanpax vin̈:

—¿Mach junoc chon̈abꞌ bꞌaj syal in cꞌochi? xchi vin̈.

—A dꞌa chon̈abꞌ Hebrón syal a cꞌochi, xchi Jehová chiꞌ.

2 Yuj chiꞌ, ataꞌ ix bꞌat vin̈aj David chiꞌ yedꞌ ebꞌ ix yetbꞌeyum schavan̈il, aton ix Ahinoam aj Jezreel yedꞌ ix Abigail yetbꞌeyumcan vin̈aj xilbꞌa Nabal, aj Carmel. 3 Ix yicꞌanpaxbꞌat ebꞌ vin̈ ayecꞌ yedꞌ vin̈ yedꞌ yetbꞌeyum junjun ebꞌ yedꞌ yal yuninal ebꞌ. Ix cajnaj ebꞌ dꞌa Hebrón yedꞌ dꞌa yaldeail. 4 Ix lajvi chiꞌ, ix cꞌoch ebꞌ yichamtac vinaquil yin̈tilal Judá dꞌa vin̈aj David chiꞌ, ix yacꞌancanoch vin̈ ebꞌ sreyaloc.

Ix yabꞌan vin̈aj David to a ebꞌ aj Jabes dꞌa yol yic Galaad ix mucan vin̈aj Saúl, 5 yuj chiꞌ ix yacꞌbꞌat juntzan̈ ebꞌ schecabꞌ vin̈, yic bꞌat yal ebꞌ dꞌa ebꞌ icha tic: Yacꞌocabꞌ svachꞌcꞌolal Jehová dꞌayex yuj tastac vachꞌ ix e cꞌulej yujto ix e muc vin̈aj Saúl co reyal. 6 A ticnaic aocabꞌ Jehová tzꞌocꞌ scꞌool dꞌayex, tzex xajanani, an̈ejtonaꞌ pax in a in tic, vachꞌ ol vutej in bꞌa dꞌayex yuj tas ix e cꞌulej chiꞌ. 7 Yuj chiꞌ, aqꞌuec eyip, tecꞌan tzeyutej e bꞌa, vachꞌchom ix cham vin̈aj Saúl co reyal chiꞌ, palta a masanil ebꞌ yin̈tilal Judá ix in acꞌanoch sreyaloc, xchibꞌat vin̈aj David chiꞌ.

8 Axo ix aji, a vin̈aj Abner yuninal vin̈aj Ner, yajalil masanil ebꞌ soldado vin̈aj Saúl, a vin̈ ix icꞌanbꞌat vin̈aj Is-boset yuninal vin̈aj Saúl chiꞌ dꞌa Mahanaim. 9 Ataꞌ ix yacꞌcanoch vin̈ sreyaloc juntzan̈ chon̈abꞌ tic: Aton Galaad, Gesuri, Jezreel, Efraín, Benjamín yedꞌ juntzan̈xo chon̈abꞌ yic Israel. 10 A vin̈aj Is-boset chiꞌ, 40 abꞌil sqꞌuinal vin̈ ayic ix och vin̈ reyal dꞌa chon̈abꞌ Israel chiꞌ, chabꞌ abꞌil ix yacꞌ reyal chiꞌ vin̈, palta axo ebꞌ yin̈tilal Judá, a vin̈aj David ayxo och sreyaloc ebꞌ. 11 Nan̈al svajxaquil abꞌil ix yacꞌ reyal vin̈aj David chiꞌ dꞌa ebꞌ yin̈tilal Judá dꞌa chon̈abꞌ Hebrón.

12 Icha tic ix aj yoch oval. A vin̈aj Abner chiꞌ, ix el vin̈ dꞌa Mahanaim, ix bꞌatcan vin̈ dꞌa Gabaón yedꞌ ebꞌ soldado yic vin̈aj Is-boset. 13 Axo vin̈aj Joab yuneꞌ ix Sarvia, ix el vin̈ yedꞌ ebꞌ soldado vin̈aj David dꞌa Hebrón, ix schalaj sbꞌa vin̈ yedꞌ vin̈aj Abner bꞌaj smolbꞌej sbꞌa a aꞌ dꞌa yic Gabaón. A chabꞌ macan̈ ebꞌ soldado chiꞌ, ix cꞌoch ebꞌ dꞌa a aꞌ chiꞌ, junjun macan̈ ebꞌ ix can dꞌa junjun scꞌaxepal aꞌ. 14 Yuj chiꞌ ix yal vin̈aj Abner dꞌa vin̈aj Joab chiꞌ icha tic:

—Elocabꞌcot jayvan̈oc ebꞌ vin̈ quelemtac yacꞌ oval dꞌa quichan̈ tic, xchi vin̈.

—Ichocabꞌtaꞌ, xchi vin̈aj Joab chiꞌ.

15 Yuj chiꞌ ix elta ebꞌ vin̈, lajann̈ej sbꞌisul yic junjun ebꞌ vin̈ ix elta, lajchavan̈ ebꞌ vin̈ dꞌa yin̈tilal Benjamín ayoch yedꞌ vin̈aj Is-boset chiꞌ, lajchavan̈ pax ebꞌ vin̈ yic vin̈aj David chiꞌ ix elta. 16 Junjun ebꞌ vin̈ ix syam sjolom ebꞌ yajcꞌol ebꞌ vin̈ chiꞌ, ix stiplanoch qꞌuen yespada ebꞌ vin̈ dꞌa scostil junjun, yuj chiꞌ junn̈ej ix aj scham ebꞌ vin̈ smasanil. Yuj chiꞌ “Teclajbꞌail” ix sbꞌiejcan jun lugar chiꞌ, a dꞌa yol yic Gabaón chiꞌ ay. 17 A dꞌa jun cꞌu chiꞌ, te nivan ix aj yoch oval yuj ebꞌ vin̈. Ix acꞌji ganar vin̈aj Abner yedꞌ ebꞌ soldado yuj ebꞌ soldado vin̈aj David chiꞌ.

18 Ataꞌ ayoch oxvan̈ ebꞌ vin̈ yuneꞌ ix Sarvia, aton vin̈aj Joab, vin̈aj Abisai yedꞌ vin̈aj Asael. A vin̈aj Asael chiꞌ te jelan sbꞌey vin̈ icha nocꞌ cꞌultaquil chej. 19 Ix och jin̈an vin̈ dꞌa spatic vin̈aj Abner, majxo yal-laj yel vin̈aj Abner chiꞌ. 20 Ayic ix yilanbꞌat vin̈ dꞌa spatic, ix yalan vin̈:

—Mato a ach Asael ach chiꞌ, xchi vin̈.

—A in toni, xchi vin̈.

21 Yuj chiꞌ ix yal vin̈aj Abner chiꞌ dꞌa vin̈ icha tic:

—Actej in a pechani, aocabꞌ junoc ebꞌ vin̈ quelem tic tza yamaꞌ, tzicꞌancan masanil tastac yedꞌnac, xchi vin̈ dꞌa vin̈.

Palta axo vin̈aj Asael chiꞌ jun, maj yal-laj scꞌol vin̈ syactej spechan vin̈. 22 Ix yalanxi vin̈aj Abner chiꞌ dꞌa vin̈ junelxo:

—Actej in a pechani, ¿mato tzin acꞌ val pural yic tzach in milanchamoc? Tato icha chiꞌ, ¿tas ol aj in sat in cꞌoch dꞌa yichan̈ vin̈ ucꞌtac aj Joab? xchi vin̈.

23 Palta a vin̈aj Asael chiꞌ, maj yactej vin̈ spechan vin̈, yuj chiꞌ axo yoc slanza vin̈aj Abner chiꞌ ix stipcot dꞌa spatic, a val dꞌa scꞌool vin̈aj Asael chiꞌ ix ochi, ix cꞌaxpajelcꞌoch teꞌ dꞌa yich spatic vin̈. Ix telvi vin̈, ix cham vin̈. Masanil mach scꞌoch dꞌa jun lugar bꞌaj ix cham vin̈ chiꞌ tzꞌoch van ebꞌ yilaꞌ. 24 Axo vin̈aj Joab yedꞌ vin̈aj Abisai ix bꞌatn̈ej ebꞌ vin̈ dꞌa spatic vin̈aj Abner chiꞌ. Ayic vanxo yem cꞌu, ix cꞌoch ebꞌ vin̈ dꞌa sjolom lum vitz Amma, ay dꞌa yichan̈ Gía, aton bꞌaj sbꞌatcan sbꞌeal juntzan̈ tzꞌinan luum dꞌa Gabaón. 25 Ataꞌ ix smolbꞌej sbꞌa ebꞌ yin̈tilal Benjamín yedꞌ vin̈aj Abner chiꞌ, junxon̈ej ix yutej sbꞌa ebꞌ smasanil dꞌa jun tzalan. 26 Axo vin̈aj Abner chiꞌ ix avaj dꞌa vin̈aj Joab icha tic:

—¿Tom man̈ ol actej a milancham anima tic? ¿Tom max a naꞌ jabꞌoc to an̈ej chucal syicꞌcot jun tic dꞌa quibꞌan̈? ¿Janicꞌ ol al dꞌa ebꞌ a soldado to tzꞌoch vaan ebꞌ spechan ebꞌ yetchon̈abꞌ? xchi vin̈.

27 Ix tacꞌvi vin̈aj Joab chiꞌ icha tic:

—Syil val Dios, qꞌuinaloc maj ach avajoc, ix am on̈ bꞌatn̈ej dꞌa e patic masanto dꞌa qꞌuin̈ibꞌalil qꞌuicꞌan, xchi vin̈.

28 Ix lajvi chiꞌ, ix yalan vin̈aj Joab chiꞌ to spuji nocꞌ chꞌaac, yuj chiꞌ ix och vaan masanil ebꞌ soldado yic vin̈aj David spechan ebꞌ yic Israel chiꞌ. 29 Axo vin̈aj Abner chiꞌ yedꞌ ebꞌ soldado pilan acꞌval ix bꞌey ebꞌ dꞌa span̈anil Arabá, ix cꞌaxpajecꞌ ebꞌ dꞌa aꞌ Jordán yedꞌ dꞌa yol yic Bitrón masanto ix cꞌoch ebꞌ dꞌa Mahanaim.

30 Axo pax vin̈aj Joab chiꞌ, ix och vaan vin̈ spechan vin̈aj Abner chiꞌ. Ichato chiꞌ ix smolbꞌan ebꞌ soldado vin̈ smasanil, ix yavtan slistail ebꞌ vin̈, axo ix aji to ay 19 ebꞌ soldado yic vin̈aj David chiꞌ ix chami, ix champax vin̈aj Asael. 31 Palta axo ebꞌ soldado yic Benjamín yedꞌnac vin̈aj Abner, 360 ebꞌ ix cham yuj ebꞌ soldado yic vin̈aj David chiꞌ.

32 A vin̈aj Joab yedꞌ masanil ebꞌ soldado, pilan acꞌval ix bꞌey ebꞌ, ayxoecꞌ ebꞌ dꞌa Hebrón ix qꞌuin̈ibꞌi. Ayic van smeltzaj ebꞌ, ix ecꞌ ebꞌ yicꞌ snivanil vin̈aj Asael chiꞌ. A bꞌaj mucan smam vin̈ dꞌa chon̈abꞌ Belén, ataꞌ ix mucji vin̈.