A Chꞌan̈ Schabꞌil Libro
SAMUEL
Yabꞌnac vin̈aj David to chamnac vin̈aj Saúl
1
1-2 Ayic ix acꞌji ganar ebꞌ amalecita yuj vin̈aj David, ix meltzaj vin̈ dꞌa Siclag. Axo dꞌa schabꞌjial scꞌochxi vin̈ taꞌ, ix cꞌoch jun vin̈ quelem spetoj dꞌa scampamento vin̈aj Saúl, toxo ix sn̈icꞌchitejbꞌat spichul vin̈ ayochi, aypaxqꞌue lum luum dꞌa scal xil sjolom vin̈, yic schꞌoxanel vin̈ to ay scuscꞌolal vin̈. Axo ix cꞌoch vin̈ dꞌa yichan̈ vin̈aj David chiꞌ, ix em n̈ojan vin̈. 3 Ix scꞌanbꞌan vin̈aj David chiꞌ dꞌa vin̈:—¿Bꞌajtil ach coti? xchi vin̈.
—Toxon̈ej ix in el lemnaj dꞌa scampamento ebꞌ etisraelal, xchi vin̈.
4 —¿Tas ix uji jun? Al jabꞌoc vabꞌi, xchi vin̈aj David chiꞌ.
—Ix acꞌji ganar ebꞌ etisraelal chiꞌ. Ay ebꞌ ixto elcani, ay ebꞌ ix chami. Ix champax vin̈aj Saúl yedꞌ vin̈ yuninal, aton vin̈aj Jonatán, xchi vin̈.
5 —¿Tas ix aj ojtacaneli tato ix cham vin̈aj Saúl yedꞌ vin̈ yuninal chiꞌ? xchi vin̈aj David chiꞌ. 6 Ix tacꞌvi vin̈:
—Qꞌuin̈ val ayinecꞌ dꞌa vitzal Gilboa, ix vilani to toxon̈ej n̈ojanem vin̈aj Saúl chiꞌ dꞌa yibꞌan̈ qꞌuen slanza. Tzacꞌanxo val scꞌoch ebꞌ ajcꞌol chiꞌ dꞌa spatic vin̈ yedꞌ scarruaje ebꞌ yic oval yedꞌ ebꞌ ayqꞌue dꞌa yibꞌan̈ chej. 7 A dꞌa jun rato chiꞌ, ix bꞌat qꞌuelnaj vin̈ dꞌa spatic, ix in yilanbꞌat vin̈, ix in yavtancot vin̈.
—Tic ayin mamin, xin chi dꞌa vin̈. 8 Ix scꞌanbꞌan vin̈ dꞌayin bꞌajtil in coti. Ix valan dꞌa vin̈ to amalecita in. 9 Ix yalanxi vin̈ dꞌayin to tzin nitzbꞌat in bꞌa dꞌa stzꞌey, tzin milancham vin̈ dꞌa juneln̈ej yalani. Moc chiꞌ pitzanto vin̈, palta toxo ix och pitzꞌan syail dꞌa scꞌool vin̈. 10 Yuj chiꞌ ix in nitzbꞌat in bꞌa dꞌa stzꞌey vin̈, ix in vachꞌ milancham vin̈ yic max ste abꞌej syail, yujto ix vilaꞌ to toxoval scham vin̈, yujto toxo ix em vin̈ dꞌa yibꞌan̈ sn̈iꞌ qꞌuen slanza chiꞌ. Ayic ix lajvi scham vin̈ chiꞌ, ix vicꞌanel scorona vin̈ dꞌa sjolom yedꞌ brazalete ayoch dꞌa scꞌabꞌ vin̈, ix vicꞌancot dꞌayach mamin, xchi vin̈.
11 Ayic ix yabꞌan vin̈aj David chiꞌ icha chiꞌ, ix sn̈icꞌchitanbꞌat spichul vin̈ yuj cuscꞌolal yedꞌ ebꞌ ajun yedꞌoc. 12 Ix te ocꞌ ebꞌ yuj schamel vin̈aj Saúl yedꞌ vin̈ yuninal chiꞌ, aton vin̈aj Jonatán, yujto toxo ix acꞌji ganar ebꞌ soldado israel schon̈abꞌ Jehová yuj ebꞌ filisteo. Majxo valaj ebꞌ yuj cuscꞌolal masanto ix em cꞌu. 13 Ix lajvi chiꞌ ix scꞌanbꞌan vin̈aj David dꞌa vin̈ quelem ix icꞌancot abꞌix chiꞌ:
—¿Bꞌajtil aljinac ach? xchi vin̈.
—A in tic yuninal in jun vin̈ amalecita ayecꞌ cajan dꞌa e cal tic, xchi vin̈ quelem chiꞌ.
14 —¿Tas yuj ix a tecꞌbꞌej a bꞌa a milancham vin̈ sicꞌbꞌilel yuj Jehová chiꞌ? xchi vin̈aj David chiꞌ. 15 Ix lajvin̈ej chiꞌ, ix yavtancot jun soldado vin̈aj David chiꞌ:
—Milcham jun vinac tic, xchi vin̈.
Val chiꞌ ix miljicham vin̈ quelem chiꞌ. 16 Ayic van smiljicham vin̈ chiꞌ, ix yalan vin̈aj David chiꞌ:
—A ach ay a mul yuj chiꞌ tzach chami. A ach ix alelta a mul chiꞌ to ix a milcham vin̈ rey sicꞌbꞌiloch yuj Jehová, xchi vin̈.
Sbꞌital schamel vin̈aj Saúl yedꞌ vin̈aj Jonatán
17 Ix sbꞌitej jun bꞌit tic vin̈aj David yuj cuscꞌolal yuj schamel vin̈aj Saúl yedꞌ vin̈aj Jonatán. 18 A jun bꞌit tic, ix checji scꞌaybꞌej masanil ebꞌ aj Judá yuj vin̈. Ix stzꞌibꞌchajpaxcan dꞌa yol chꞌan̈ slibro vin̈aj Jaser:
19 Ex vetisraelal, obꞌiltac ix aj yacꞌji ganar sbꞌinajnaquil co chon̈abꞌ dꞌa vitzal Gilboa. Ay... tas val yuj ix acꞌji ganar ebꞌ nivac vinac yaj dꞌa co cal.
20 Man̈ eyal yabꞌ ebꞌ aj chon̈abꞌ Gat tas ix uji, man̈ eyalel dꞌa yoltac scalleal Ascalón, yic vachꞌ max tzalaj ebꞌ ix filistea, yic vachꞌ max qꞌue chennaj ebꞌ ix chꞌoc chon̈abꞌil chiꞌ yuj tzalajcꞌolal.
21 Man̈xoocabꞌ em n̈abꞌ yedꞌ yal acꞌval dꞌa yibꞌan̈ vitzal Gilboa chiꞌ, yic maxtzac qꞌuibꞌ tas tzꞌacꞌji dꞌa ofrendail, yujto ataꞌ ix laj tecꞌjican smaclabꞌ jul-labꞌ ebꞌ vin̈ soldado yic Israel te tecꞌan. Ataꞌ ix satel scopopial yilji smaclabꞌ jul-labꞌ vin̈aj Saúl.
22 Juntaquel ix meltzaj vin̈aj Saúl yedꞌ vin̈aj Jonatán dꞌa oval, chicꞌtac, ma xepuꞌtac qꞌuen yespada ebꞌ vin̈ yedꞌ sjul-labꞌ. Malaj bꞌaj smeltzaj ebꞌ vin̈ dꞌa ichn̈ejtaꞌ, a ebꞌ ajcꞌol nivac yelcꞌochi, a ebꞌ smilcham ebꞌ vin̈.
23 Ach Saúl yedꞌ ach Jonatán, te nibꞌabꞌil ex. Junn̈ej eyaji ayic pitzan ex, junn̈ej pax ix aj e chami. Te jelan e bꞌey dꞌa yichan̈ nocꞌ chꞌacbꞌa. Te ay eyip dꞌa yichan̈ nocꞌ choj.
24 Ex ix aj Israel, ocꞌan̈ec yuj vin̈aj Saúl. Ix eyacꞌoch cꞌapac pichul chacchac yedꞌ pax lino te vachꞌ yuj vin̈, ix yacꞌan oro vin̈ yelvanubꞌoc e pichul.
25 Ay... tas val ix aj yacꞌji ganar ebꞌ nivac vinac dꞌa oval. Ix miljicham vin̈aj Jonatán dꞌa jolomtac vitz.
26 Ach vucꞌtac aj Jonatán, tzin te cus uuj. Man̈xa yalbꞌanil jantac a vachꞌil ix acꞌ dꞌayin. A val bꞌaj in a xajanejnac, ecꞌto dꞌa yichan̈ bꞌaj tzon̈ xajanej ebꞌ ix ix.
27 Ay... tas ix aj scham ebꞌ vin̈ soldado te tecꞌan. Masanil syamcꞌabꞌ ebꞌ vin̈ acꞌum oval ix satcaneli, xchi vin̈aj David chiꞌ.