A schamel vin̈aj Uza
6
Ix smolbꞌanxi ebꞌ soldado vin̈aj David, a ebꞌ te jelan dꞌa scal ebꞌ israel, ay 30 mil ebꞌ. 2 Ix bꞌat ebꞌ dꞌa Baala dꞌa yol yic Judá yic bꞌat yicꞌancot teꞌ scaxail strato Jehová Dios ebꞌ, aton te caxa bꞌaj sbꞌinaj Jehová Yajal dꞌa Smasanil, aton ayecꞌ dꞌa yibꞌan̈ ebꞌ querubín. 3-4 A dꞌa yol spat vin̈aj Abinadab ay dꞌa jun tzalan, ataꞌ ayecꞌ te caxa chiꞌ. A dꞌa yibꞌan̈ jun teꞌ carreta acꞌto, ataꞌ ix yicꞌcot teꞌ caxa chiꞌ ebꞌ. A ebꞌ yuninal vin̈aj Abinadab, aton vin̈aj Uza yedꞌ vin̈aj Ahío, a ebꞌ scuchbꞌan bꞌey nocꞌ vacax n̈erjinac teꞌ carreta bꞌaj ayqꞌue teꞌ caxa chiꞌ, a vin̈aj Ahío bꞌabꞌel sbꞌat yuj teꞌ. 5 Axo vin̈aj David yedꞌ masanil ebꞌ chon̈abꞌ, val dꞌa smasanil scꞌol ebꞌ ix bꞌitan dꞌa tzalajcꞌolal, ix qꞌue cheneljoc ebꞌ dꞌa yichan̈ Jehová van yoch teꞌ arpa yedꞌ salterio, panderas, castañuelas yedꞌ platillo. 6 Ayic ix javi ebꞌ yedꞌ scaxail strato Dios dꞌa stecꞌlabꞌ trigo vin̈aj Nacón, ijan ix telvi nocꞌ vacax edꞌjinac teꞌ carreta chiꞌ, yuj chiꞌ axo vin̈aj Uza chiꞌ ix yaman teꞌ caxa chiꞌ. 7 Yuj chiꞌ ix cot yoval Jehová dꞌa vin̈, yujto ix syam teꞌ caxa chiꞌ vin̈. Ataꞌ ix chamcan vin̈ dꞌa stzꞌey teꞌ chiꞌ.8 Ix cot yoval vin̈aj David chiꞌ yujto ix cham vin̈aj Uza chiꞌ yuj Jehová. Yuj chiꞌ Pérez-uza ix sbꞌiejcan jun lugar chiꞌ yuj vin̈. An̈ejaꞌ icha chiꞌ ticnaic.* 9 A dꞌa jun cꞌu chiꞌ, ix xivcanqꞌue vin̈aj rey David chiꞌ dꞌa Jehová. Yuj chiꞌ ix yal vin̈ icha tic: Vachꞌ am maxtzac vicꞌbꞌat teꞌ scaxail strato Jehová tic bꞌaj cajan in, xchi vin̈. 10 Majxo yal-laj scꞌol vin̈aj David chiꞌ ix yicꞌcot teꞌ caxa chiꞌ dꞌa schon̈abꞌ. Yuj chiꞌ ix yal vin̈ to tzꞌicꞌjibꞌat teꞌ dꞌa spat vin̈aj Obed-edom aj Gat. 11 Oxeꞌ ujal ix can teꞌ taꞌ. Ix yacꞌval svachꞌcꞌolal Jehová dꞌa yibꞌan̈ vin̈aj Obed-edom chiꞌ yedꞌ ebꞌ cajan yedꞌ vin̈.
Ix javi teꞌ scaxail strato Jehová dꞌa Jerusalén
12 Ayic ix yabꞌan vin̈aj rey David chiꞌ to yuj teꞌ scaxail strato Jehová, ix yacꞌ svachꞌcꞌolal Jehová dꞌa yibꞌan̈ vin̈aj Obed-edom chiꞌ yedꞌ ebꞌ cajan yedꞌ vin̈ yedꞌ masanil tastac ay dꞌa vin̈, yuj chiꞌ ix bꞌat yicꞌanxicot teꞌ vin̈aj David chiꞌ. Yedꞌ val tzalajcꞌolalil ix yicꞌcot teꞌ vin̈ dꞌa yol schon̈abꞌ. 13 Ayic jay bꞌecanto scot ebꞌ edꞌjinac teꞌ caxa chiꞌ, ix yacꞌan jun nocꞌ mam vacax vin̈aj David chiꞌ yedꞌ jun nocꞌ quelem vacax bꞌaqꞌuech silabꞌil dꞌa Jehová.
14 Ayoch jun chaleca nabꞌa lino yic sacerdote yuj vin̈aj David chiꞌ, ix qꞌue chennaj vin̈ yuj tzalajcꞌolal yedꞌ smasanil scꞌool dꞌa yichan̈ Jehová. 15 Icha chiꞌ ix scꞌulej vin̈ yedꞌ masanil chon̈abꞌ Israel. Nivan qꞌuin̈ ix yutej ebꞌ ayic ix yicꞌancot teꞌ scaxail trato chiꞌ ebꞌ dꞌa Jerusalén, tzꞌel yav ebꞌ, spuꞌan qꞌuen trompeta ebꞌ dꞌa tzalajcꞌolal.
16 Ayic ix javi teꞌ scaxail trato chiꞌ dꞌa schon̈abꞌ vin̈aj David chiꞌ, dꞌan̈anelta ix Mical yisilcan vin̈aj Saúl dꞌa sventena. Ix yilan ix to a vin̈aj David chiꞌ sqꞌue chennaj vin̈ dꞌa yichan̈ Jehová, yuj chiꞌ ix chabꞌaxqꞌue scꞌol ix dꞌa vin̈.
17 Axo yic ix javi teꞌ scaxail trato chiꞌ yuj ebꞌ, ix sbꞌoanoch teꞌ ebꞌ dꞌa yol jun mantiado bꞌobꞌil yuj vin̈aj David chiꞌ. Ix lajvi chiꞌ ix yalan vin̈ to sn̈usjitzꞌa silabꞌ yedꞌ pax silabꞌ yic juncꞌolal yedꞌ Jehová. 18 Ayic ix lajvi yacꞌji juntzan̈ silabꞌ chiꞌ, ix yalan vachꞌ lolonel vin̈aj David chiꞌ dꞌa yibꞌan̈ chon̈abꞌ Israel dꞌa sbꞌi Jehová Yajal dꞌa Smasanil. 19 Ix yacꞌan junjun ixim pan vin̈ yedꞌ jabꞌjabꞌ bꞌolbꞌil chibꞌej yedꞌ junjun quechan̈ taquin̈ sat uva dꞌa masanil ebꞌ chon̈abꞌ, aton dꞌa ebꞌ vin̈ vinac yedꞌ dꞌa ebꞌ ix ix. Ix lajvi chiꞌ, ix laj pax ebꞌ dꞌa spat.
20 Ayic ix pax vin̈aj rey David chiꞌ dꞌa spat yic syalan vachꞌ lolonel vin̈ dꞌa yibꞌan̈ ebꞌ cajan dꞌa spat chiꞌ, ix elta ix Mical chiꞌ scha vin̈, ix yalan ix dꞌa vin̈ icha tic:
—A ticnaic ach sreyal chon̈abꞌ Israel, te vachꞌxo val ix utej a chꞌoxanel a bꞌa bꞌian. Ix a chꞌoxcꞌabꞌejel a bꞌa dꞌa sat ebꞌ ix schecabꞌ ebꞌ vin̈ etyajalil. Te qꞌuixvelal ix utej a bꞌa icha junoc comon anima, xchi ix dꞌa vin̈.
21 Ix tacꞌvi vin̈ icha tic:
—Val yel ix in qꞌue chennaj yuj tzalajcꞌolal dꞌa yichan̈ Jehová, aton ix in sicꞌanoch yajaliloc schon̈abꞌ sqꞌuexuloc vin̈ a mam yedꞌ pax sqꞌuexuloc ebꞌ a cꞌabꞌ oc. Yuj chiꞌ ol in qꞌuen̈ej chennaj yuj tzalajcꞌolal dꞌa yichan̈ Jehová. 22 Syalpax in vachꞌ icꞌanemta in bꞌa, svachꞌ el in qꞌuixvelal icha tzal chiꞌ, palta a ebꞌ ix ix tzal chiꞌ, nivan ol in ajelcꞌoch dꞌa sat ebꞌ ix, xchi vin̈aj David chiꞌ.
23 A ix Mical chiꞌ, malaj junoc yuneꞌ ix aljinac.