3 Yuj chiꞌ ix yavtejcot masanil ebꞌ yetisraelal vin̈, ix smolbꞌej sbꞌa ebꞌ dꞌa Jerusalén, yic sbꞌat icꞌchajcot teꞌ scaxail strato Jehová yic tzꞌochcan teꞌ dꞌa jun lugar bꞌobꞌilxo yuj vin̈. 4 Ix smolbꞌan pax masanil ebꞌ vin̈ yin̈tilal vin̈aj Aarón vin̈ yedꞌ juntzan̈xo ebꞌ levita. 5 A dꞌa ebꞌ vin̈ yin̈tilal vin̈aj Coat, 120 ebꞌ ix molchaji, a vin̈aj Uriel yajal yaj dꞌa ebꞌ scꞌabꞌyoc. 6 Axo dꞌa ebꞌ vin̈ yin̈tilal vin̈aj Merari, 220 ebꞌ ix molchaji. A vin̈aj Asaías yajal yaj dꞌa masanil ebꞌ scꞌabꞌyoc. 7 A dꞌa ebꞌ vin̈ yin̈tilal vin̈aj Gersón, 130 ebꞌ ix molchaji. A vin̈aj Joel yajal yaj dꞌa masanil ebꞌ scꞌabꞌyoc. 8 Axo dꞌa ebꞌ vin̈ yin̈tilal vin̈aj Elizafán, 200 ebꞌ ix molchaji: A vin̈aj Semaías yajal yaj dꞌa ebꞌ scꞌabꞌyoc. 9 A dꞌa ebꞌ vin̈ yin̈tilal vin̈aj Hebrón, 80 ebꞌ ix molchaji. A vin̈aj Eliel yajal yaj dꞌa masanil ebꞌ scꞌabꞌyoc. 10 A dꞌa ebꞌ vin̈ yin̈tilal vin̈aj Uziel, 112 ebꞌ ix molchaji, a vin̈aj Aminadab yajal yaj dꞌa masanil ebꞌ scꞌabꞌyoc.

11 Ix yavtan ebꞌ vin̈ sacerdote vin̈aj rey David chiꞌ, aton vin̈aj Sadoc, vin̈aj Abiatar yedꞌ pax juntzan̈xo ebꞌ vin̈ levita, aton vin̈aj Uriel, vin̈aj Asaías, vin̈aj Joel, vin̈aj Semaías, vin̈aj Eliel yedꞌ vin̈aj Aminadab. 12 Ix yalan vin̈ dꞌa ebꞌ vin̈ icha tic: A ex levita ex tic, yajal eyaj dꞌa scal masanil ebꞌ e cꞌabꞌ eyoc, bꞌoec e bꞌa icha yalan ley yedꞌ masanil ebꞌ e cꞌabꞌ eyoc, yic syal eyicꞌancot teꞌ scaxail strato Jehová co Diosal, yic tzꞌochcan teꞌ dꞌa jun lugar bꞌobꞌil vuuj. 13 Yujto a dꞌa sbꞌabꞌelal, man̈oc ex ix eyicꞌcot teꞌ, yuj chiꞌ ix cot yoval scꞌool Jehová co Diosal dꞌa quibꞌan̈, yujto man̈ chamoc ix co cꞌanbꞌej cabꞌi tas sco cꞌulej, xchi vin̈.

14 Yuj chiꞌ, ix sacbꞌitan sbꞌa ebꞌ vin̈ icha yalan ley, yic vachꞌ syal yicꞌancot teꞌ scaxail strato Jehová sDiosal Israel chiꞌ ebꞌ vin̈. 15 Ix sbꞌachancot teꞌ ebꞌ vin̈ dꞌa sjolom sjen̈jabꞌ yedꞌ teꞌ sbꞌachlabꞌil, icha ajnac yalancan vin̈aj Moisés yuj Jehová.

16 Ix yalanpax vin̈aj rey David chiꞌ dꞌa ebꞌ vin̈ yajalil ebꞌ levita to a dꞌa scal yin̈tilal ebꞌ vin̈ chiꞌ, sicꞌchajelta ebꞌ vin̈ sbꞌitan dꞌa tzalajcꞌolal yedꞌ juntzan̈ yamcꞌabꞌ, aton salterio, arpa yedꞌ platillo. 17-21 Yuj chiꞌ a dꞌa scal ebꞌ vin̈ yin̈tilal Leví chiꞌ ix sicꞌchajel ebꞌ vin̈ stzin̈an platillo, aton ebꞌ vin̈ tic: Vin̈aj Hemán yuninal vin̈aj Joel yedꞌ vin̈aj Asaf yuninal vin̈aj Berequías scꞌabꞌyoc vin̈aj Hemán chiꞌ yedꞌ vin̈aj Etán yuninal vin̈aj Cusaías. A ebꞌ vin̈ tic yin̈tilal ebꞌ vin̈ vin̈aj Merari.

Ix sicꞌchajpaxoch juntzan̈xo ebꞌ vin̈ tzꞌacꞌan teꞌ arpa: Aton vin̈aj Zacarías, vin̈aj Jaaziel, vin̈aj Semiramot, vin̈aj Jehiel, vin̈aj Uni, vin̈aj Eliab, vin̈aj Benaía, vin̈aj Maaseías, vin̈aj Matatías, vin̈aj Elifelehu, vin̈aj Micnías yedꞌ ebꞌ vin̈ stan̈van puerta, aton vin̈aj Obed-edom yedꞌ vin̈aj Jeiel. 22 Axo vin̈aj Quenanías yajalil ebꞌ vin̈ levita chiꞌ. A vin̈ scuchbꞌan ebꞌ vin̈ dꞌa bꞌit chiꞌ, yujto te jelan vin̈. 23-24 Axo ebꞌ vin̈ stan̈van teꞌ scaxail trato: Aton vin̈aj Berequías, vin̈aj Elcana, vin̈aj Obed-edom yedꞌ vin̈aj Jehías. Axo ebꞌ vin̈ sacerdote: Aton vin̈aj Sebanías, vin̈aj Josafat, vin̈aj Natanael, vin̈aj Amasías, vin̈aj Zacarías, vin̈aj Benaía yedꞌ vin̈aj Eliezer. Aton ebꞌ vin̈ spuꞌan trompeta dꞌa yichan̈ teꞌ scaxail strato Dios chiꞌ.

25 A vin̈aj rey David yedꞌ masanil ebꞌ vin̈ yichamtac vinaquil chon̈abꞌ Israel yedꞌ ebꞌ vin̈ yajalil ebꞌ vin̈ soldado, te tzalajcꞌolal yaj ebꞌ ayic ix xidꞌ yicꞌan teꞌ scaxail strato Jehová chiꞌ ebꞌ dꞌa spat vin̈aj Obed-edom chiꞌ. 26 Ix och val Dios yedꞌ ebꞌ levita chiꞌ ayic ix yicꞌancot teꞌ caxa chiꞌ ebꞌ, yuj chiꞌ ix yacꞌ ucvan̈ nocꞌ mam vacax ebꞌ yedꞌ ucvan̈ nocꞌ chꞌac calnel silabꞌil. 27 A pichul lino te vachꞌ ayoch yuj vin̈aj rey David chiꞌ, icha pax chiꞌ yic ebꞌ vin̈ levita bꞌachjinac teꞌ caxa chiꞌ yedꞌ yic ebꞌ vin̈ sbꞌitani yedꞌ yic vin̈aj Quenanías scuchbꞌan ebꞌ vin̈. Ay pax och jun chaleca nabꞌa lino yuj vin̈aj rey David chiꞌ. 28 Masanil ebꞌ israel ix el yav ebꞌ yuj tzalajcꞌolal ayic ix icꞌjicot teꞌ scaxail strato Jehová chiꞌ, ix puchaj nocꞌ chꞌaac calnel yedꞌ trompeta, ix tzin̈ji platillo, salterio yedꞌ arpa.

29 Ayic ix javi teꞌ scaxail strato Jehová chiꞌ dꞌa Schon̈abꞌ vin̈aj rey David, axo ix Mical ix yetbꞌeyum vin̈, aton ix yisil vin̈aj Saúl, ix elta dꞌan̈an ix dꞌa sventena. Ayic ix yilan ix to a vin̈aj rey David chiꞌ, sqꞌuechennaj vin̈ yuj tzalajcꞌolal, yuj chiꞌ ix schaquel vin̈ ix dꞌa spensar.