16
Ix acꞌjioch teꞌ scaxail strato Dios chiꞌ dꞌa yol jun mantiado bꞌobꞌilxoqꞌue yuj vin̈aj rey David chiꞌ. Ix lajvi chiꞌ ix sn̈usan juntzan̈ silabꞌ ebꞌ stzꞌa smasanil yedꞌ juntzan̈ silabꞌ yic juncꞌolal yedꞌ Dios. 2 Ix lajvi chiꞌ ix yalan vachꞌ lolonel vin̈ rey chiꞌ dꞌa yibꞌan̈ masanil ebꞌ anima dꞌa sbꞌi Jehová. 3 Ix yacꞌan junjun ixim pan vin̈ yedꞌ jabꞌjabꞌ nocꞌ chibꞌej yedꞌ juntzan̈ teꞌ taquin̈ sat uva dꞌa junjun anima chiꞌ.4 Ix yacꞌancanoch yopisio ebꞌ vin̈ levita vin̈ yic smunlaj ebꞌ vin̈ bꞌaj ay teꞌ scaxail strato Jehová, aton ebꞌ vin̈ chiꞌ yovalil tzꞌacꞌan yuj diosal, syalanpax vachꞌ lolonel ebꞌ vin̈ dꞌa Jehová sDiosal chon̈abꞌ Israel dꞌa bꞌital. 5 A mach scuchbꞌan ebꞌ vin̈ dꞌa bꞌit chiꞌ, aton vin̈aj Asaf, axo vin̈ schabꞌil, aton vin̈aj Zacarías. Slajvi chiꞌ scot pax vin̈aj Jeiel, vin̈aj Semiramot, vin̈aj Jehiel, vin̈aj Matatías, vin̈aj Eliab, vin̈aj Benaía, vin̈aj Obed-edom yedꞌ vin̈aj Jeiel. Aton ebꞌ vin̈ chiꞌ ay syamcꞌabꞌ yic bꞌit, ay salterio ebꞌ vin̈, ay pax yarpa ebꞌ vin̈. Axo vin̈aj Asaf chiꞌ stzin̈an platillo. 6 Axo pax ebꞌ vin̈ sacerdote: Aton vin̈aj Benaía yedꞌ vin̈aj Jahaziel, a ebꞌ vin̈ spuꞌann̈ej qꞌuen trompeta dꞌa yichan̈ teꞌ scaxail strato Dios.
Bꞌit yuj acꞌoj yuj diosal yuj vin̈aj rey David
7 A dꞌa jun cꞌu chiꞌ bꞌabꞌelto ix yal vin̈aj rey David dꞌa vin̈aj Asaf yedꞌ pax dꞌa ebꞌ vin̈ ayoch yedꞌ vin̈ to sbꞌitej juntzan̈ acꞌoj yuj diosal tic ebꞌ vin̈ dꞌa Jehová:
8 Caqꞌuec yuj diosal dꞌa Jehová. Calequel yabꞌixal. Calec dꞌa masanil chon̈abꞌ tas ix scꞌulej.
9 Co bꞌitejec bꞌit yuj quicꞌanchaan̈. Calequel tas satubꞌtac yilji scꞌulejnac Jehová.
10 Con̈ tzalajec yujto yic on̈xo. Ayocabꞌ tzalajcꞌolal yic scacꞌanem co bꞌa dꞌay.
11 Co cꞌanec scolval Jehová, caqꞌuequem co bꞌa dꞌay dꞌa masanil tiempo.
12-13 A on̈ yuninal on̈ vin̈aj Jacob schecabꞌ Jehová, a on̈ chon̈abꞌ israel on̈ tic, to sicꞌbꞌil on̈ eli, co naeccot tastac satubꞌtac yilji scꞌulejnac Jehová yedꞌ tas syutej schꞌolbꞌitan dꞌa stojolal.
14 A Jehová co Diosal, Yajal dꞌa masanil sat luum tic.
15 Syacꞌn̈ej elcꞌoch strato dꞌa masanil qꞌuinal. A tas yalnaccani, syacꞌn̈ej elcꞌoch dꞌa smilal macan̈il anima tzꞌeqꞌui,
16 aton jun strato sbꞌonac yedꞌ vin̈aj Abraham, bꞌaj yacꞌnacpax stiꞌ dꞌa vin̈aj Isaac.
17 Ley ajnaccan jun tic dꞌa vin̈aj Jacob. A jun strato tic ix can dꞌayon̈ a on̈ israel on̈ tic dꞌa juneln̈ej,
18 ayic yalannaccan Jehová icha tic: Ol vacꞌ lum Canaán dꞌayach, ol ochcan lum a macbꞌenoc, xchinaccan dꞌa vin̈aj Jacob chiꞌ.
19 Jayvan̈anto sbꞌisul ebꞌ taꞌ. Ton̈ej scomon ecꞌ ebꞌ dꞌa sat lum luum tic.
20 Tzijtum chon̈abꞌ bꞌaj ecꞌnac cajan ebꞌ dꞌa yoltac smacbꞌen ebꞌ rey.
21 Man̈ yalnacoclaj scꞌool Dios ixtajnac ebꞌ, yuj chiꞌ icha tic yalnac dꞌa juntzan̈ ebꞌ rey chiꞌ:
22 Man̈ eyixtej ebꞌ in checabꞌ sicꞌbꞌilel tic, xchi.
23 Con̈ bꞌitanec dꞌa Jehová co masanil a on̈ cajan on̈ dꞌa sat luum tic. Calequeli to tzon̈ scoln̈ej Jehová dꞌa junjun cꞌu.
24 Calequel snivanil yelcꞌochi yedꞌ tas satubꞌtac yilji scꞌulej dꞌa masanil chon̈abꞌ yedꞌ dꞌa masanil nación.
25 Yujto a Jehová te nivan yelcꞌochi, smoj val tzꞌalchaj vachꞌ lolonel dꞌay. Te ay spoder dꞌa yichan̈ juntzan̈ comon dios.
26 A sdiosal juntzan̈ chon̈abꞌ, malaj jabꞌoc yelcꞌochi, palta a Jehová bꞌoannac satchaan̈.
27 Nivan chequel snivanil yelcꞌochi yedꞌ sbꞌinajnaquil. A svachꞌil yilji yedꞌ spoder scheclaj dꞌa scajnubꞌ.
28 Ex anima dꞌa junjun chon̈abꞌ, alec to a Jehová te nivan yelcꞌochi, te ay pax spoder.
29 Alec vachꞌ lolonel dꞌay yujto nivan yelcꞌochi. Ochan̈ec yedꞌ eyofrenda dꞌa yamaqꞌuil stemplo Jehová. Ochan̈ec ejmelal dꞌay dꞌa scajnubꞌ te vachꞌ yilji.
30 Ibꞌxocabꞌqꞌue masanil anima dꞌa yichan̈. Aꞌ ix tzatzbꞌitan yolyibꞌan̈qꞌuinal tic, yuj chiꞌ max ibꞌxilaj.
31 Tzalajocabꞌ satchaan̈ yedꞌ lum luum tic. Calec yabꞌ junjun chon̈abꞌ to a Jehová rey toni.
32 Cꞌan̈ocabꞌ aꞌ mar, elocabꞌ yav masanil tas ay dꞌa yol aꞌ. Tzalajocabꞌ masanil lum luum bꞌaj sbꞌo munlajel yedꞌ masanil tastac ay dꞌa sat luum.
33 Elocabꞌ yav teꞌ nivac teꞌ dꞌa yichan̈ Jehová yuj tzalajcꞌolal, yujto sja yacꞌ yajalil dꞌa sat luum tic.
34 Caqꞌuec yuj diosal dꞌa Jehová yujto vachꞌn̈ej, tzon̈ xajanej dꞌa masanil tiempo.
35 Calec icha tic: Mamin, co Columal ach, colon̈. Tzon̈ a molbꞌanxicot dꞌa scal juntzan̈ chꞌoc nacional, yic scacꞌ yuj diosal, scalan vachꞌ lolonel dꞌayach dꞌa tzalajcꞌolal.
36 Calec vachꞌ lolonel dꞌa Jehová co Diosal dꞌa masanil tiempo a on̈ israel on̈ tic, xe chi, xchi vin̈aj David chiꞌ.
Ix lajvi chiꞌ ix yalan masanil anima: Ujocabꞌ icha tzal chiꞌ, xchi ebꞌ. Yuj chiꞌ ix yal vachꞌ lolonel ebꞌ dꞌa Jehová.
37 Ix lajvi chiꞌ, a vin̈aj rey David chiꞌ ix acꞌancanoch vin̈aj Asaf yedꞌ ebꞌ vin̈ yetlevitail yic syilann̈ej ebꞌ vin̈ yoch ejmelal bꞌaj ix can teꞌ scaxail strato Jehová dꞌa junjun cꞌu. 38 Ix canpax vin̈aj Obed-edom yedꞌ 68 ebꞌ vin̈ ajun yedꞌ vin̈ yic scolvaj ebꞌ vin̈ yedꞌ ebꞌ vin̈. Axo pax vin̈aj Obed-edom yuninal vin̈aj Jedutún yedꞌ vin̈aj Hosa, a ebꞌ vin̈ ix tan̈vancan spatil chiꞌ. 39 Ix canpax vin̈aj sacerdote Sadoc yedꞌ ebꞌ vin̈ yetsacerdoteal ajun yedꞌoc yic syilan ebꞌ vin̈ yoch ejmelal dꞌa scajnubꞌ Dios dꞌa Gabaón, aton jun an̈ej Jehová ay yicoꞌ. 40 A ebꞌ vin̈ sn̈usan silabꞌ dꞌa Jehová dꞌa masanil tiempo dꞌa altar, dꞌa qꞌuin̈ibꞌalil yedꞌ dꞌa yemcꞌualil, icha val yajcan dꞌa sley Jehová acꞌbꞌilcan yuuj dꞌa chon̈abꞌ Israel. 41 A yedꞌ ebꞌ vin̈ sacerdote chiꞌ, ix can pax vin̈aj Hemán, vin̈aj Jedutún yedꞌ pax jayvan̈xo ebꞌ vin̈ sicꞌbꞌileli yic sbꞌitan ebꞌ vin̈, syalan ebꞌ vin̈ icha tic:
Calec vachꞌ lolonel dꞌa Jehová, yujto tzon̈ xajanej dꞌa masanil tiempo, xchi ebꞌ dꞌa sbꞌit chiꞌ.
42 A juntzan̈ ebꞌ vin̈ tic, spu qꞌuen strompeta ebꞌ vin̈, stzin̈an splatillo ebꞌ vin̈ yedꞌ juntzan̈ yamcꞌabꞌ yic bꞌit dꞌa Dios. Axo ebꞌ vin̈ yuninal vin̈aj Jedutún chiꞌ stan̈van tiꞌ puerta.
43 Ix lajvi chiꞌ, ix laj meltzaj masanil ebꞌ anima chiꞌ dꞌa spat. Ix meltzaj pax vin̈aj rey David yic bꞌat yalan vachꞌ lolonel vin̈ dꞌa yibꞌan̈ masanil ebꞌ cajan yedꞌoc dꞌa spat.