—Ilnabꞌi, a in tic ayinxo och dꞌa yol in palacio nabꞌa cꞌuteꞌ ayoch dꞌay, palta axo scaxail strato Jehová, a dꞌa yol mantiado ayeqꞌui, xchi vin̈.

2 Ix tacꞌvi vin̈aj Natán chiꞌ icha tic:

—Syaln̈ej a bꞌoan masanil tas tza nibꞌej yujto ayoch Dios edꞌoc, xchi vin̈.

3 A dꞌa jun acꞌval chiꞌ ix lolon Dios dꞌa vin̈aj Natán chiꞌ, ix yalan dꞌa vin̈ icha tic: 4 Ixic, bꞌat al dꞌa vin̈ in checabꞌ aj David to a in Jehová in sval icha tic dꞌa vin̈: Man̈oc ach ol a bꞌoqꞌue junoc in templo bꞌaj ol in cajnajoc. 5 Yictax vicꞌannaquelta ebꞌ e mam eyicham dꞌa Egipto masanto ticnaic, manta bꞌaj tzin cajnaj dꞌa yol junoc pat, palta to an̈ej dꞌa yoltac mantiado ix in ajeqꞌui. 6 Masanil tiempo ix in bꞌeyecꞌ yedꞌ ebꞌ e mam eyicham chiꞌ, malaj bꞌaj valnac dꞌa ebꞌ yajalil ebꞌ scuchbꞌani to sbꞌo junoc templo ebꞌ nabꞌa cꞌuteꞌ tzꞌoch dꞌay bꞌaj tzin cajnaji, xchi Jehová, xa chi dꞌa vin̈. 7 Tzalanpax dꞌa vin̈ to a in sval icha tic: A in Jehová Yajal vaj dꞌa smasanil, a in sval icha tic: A in ix ach viqꞌuel dꞌa tan̈vum calnelal yic tzach och yajalil dꞌa in chon̈abꞌ Israel tic. 8 Bꞌajtactil ix ach eqꞌui ayinn̈ej och edꞌoc, ix in satel masanil ebꞌ ajcꞌol ix acꞌan oval edꞌoc, ol ach vacꞌan bꞌinajoc, icha sbꞌinaj ebꞌ nivac yajal ay dꞌa yolyibꞌan̈qꞌuinal tic. 9 An̈ejtonaꞌ ix in siqꞌuelta jun lum bꞌaj tzex cajnajcan a ex in chon̈abꞌ ex tic. A tic ol ex cann̈ej cajan dꞌa juneln̈ej. Man̈xa mach ol ex xibꞌtanoc, man̈xo ol ex tzuntzaj yuj ebꞌ eyajcꞌool icha ix ex yutej ebꞌ dꞌa sbꞌabꞌelal, 10 ayic ix vacꞌanoch ebꞌ ix ex cuchbꞌani. A in ol in satel masanil ebꞌ eyajcꞌool. Svacꞌanpax ojtaquejeli to ol vacꞌn̈ej opisio dꞌa ebꞌ in̈tilal. 11 Ayic ol lajvoquecꞌ a qꞌuinal, yic mucbꞌil achxo, ol vacꞌoch junoc uninal reyal a qꞌuexuloc, tecꞌan val ol vutej yopisio chiꞌ. 12 A jun uninal chiꞌ ol bꞌoanqꞌue in templo bꞌaj ol in bꞌinajoc. A in ol vacꞌn̈ejcan yopisio chiꞌ dꞌa yin̈tilal. 13 A in ol in och smamoc, axo ol och vuninaloc. Malaj bꞌaqꞌuin̈ ol vactejcan in xajanani. Man̈ ichaoc vutejnac vactancan in xajanan vin̈aj Saúl, vicꞌnaquel vin̈ dꞌa yopisio yic ach och sqꞌuexuloc vin̈, man̈ ichoc taꞌ ol vutoc. 14 Ol vacꞌn̈ej yopisio uninal chiꞌ dꞌa in chon̈abꞌ. A yopisio chiꞌ ol bꞌeyn̈ejbꞌat dꞌa masanil tiempo, xchi Jehová, xa chi dꞌa vin̈, xchi dꞌa vin̈aj Natán chiꞌ.

15 Yuj chiꞌ masanil tas ix yal Jehová dꞌa vin̈aj Natán chiꞌ, ix yal vin̈ dꞌa vin̈aj rey David chiꞌ. 16 Yuj chiꞌ ix och vin̈ rey chiꞌ dꞌa yichan̈ Jehová, ix em cꞌojan vin̈, ix yalan vin̈ icha tic: Mamin Jehová in Diosal, ¿tas val velcꞌoch a in tic? ¿tas pax val yelcꞌoch ebꞌ in mam vicham, yuj chiꞌ nivan a vachꞌcꞌolal tzacꞌ dꞌayin? 17 Ach in Diosal, man̈ocn̈ej juntzan̈ tic ix acꞌ dꞌayin, van alanpaxcani to ol acꞌ a vachꞌcꞌolal dꞌa yibꞌan̈ ebꞌ vin̈tilal dꞌa bꞌaqꞌuin̈. Lajan tzin utej icha juntzan̈ ebꞌ nivac vinac dꞌa sat luum tic. 18 ¿Tasto val syal valan dꞌayach yuj snivanil velcꞌoch tzacꞌaꞌ? A ach tic Mamin Jehová, ojtac val tas vaji. 19 Mamin Jehová, yujto tzin a xajanej a in a checabꞌ in tic, yuj chiꞌ ix el dꞌa a cꞌool, ix acꞌan juntzan̈ opisio satubꞌtac tic dꞌayin, ix acꞌan vojtaquejeli. 20 Mamin Jehová, malaj junocxo mach lajan edꞌoc. A achn̈ej toni, malaj junocxo Dios scabꞌ specal icha ach tic. 21 A on̈ pax a chon̈abꞌ Israel on̈ tic, malaj junocxo chon̈abꞌ lajan quedꞌoc, yujto a ach ix on̈ a coloꞌ, yic tzon̈ ochcan a chon̈abꞌoc. Mamin Jehová co Diosal, te nivan ix aj a bꞌinaj cuuj, yujto a cꞌulejnac tas satubꞌtac ayic a colannaquelta ebꞌ co mam quicham dꞌa Egipto. Icꞌannaquel juntzan̈xo chon̈abꞌ dꞌa yichan̈ ebꞌ. 22 Yujto ix on̈ acꞌoch a chon̈abꞌoc dꞌa juneln̈ej. A achxo Mamin Jehová, ach ochcan co Diosaloc.

23 A ticnaic Mamin Jehová, elocabꞌcꞌoch tas ix alcan dꞌayin a in a checabꞌ in tic yedꞌ dꞌa ebꞌ vin̈tilal. 24 Elocabꞌcꞌoch tas ix alaꞌ, yic vachꞌ tzach icꞌjichaan̈. Mamin Jehová, ol alchajoc to a ach Yajal aj dꞌa Smasanil, co Diosal ach pax a on̈ israel on̈ tic. Ol ochn̈ej pax vin̈tilal dꞌa reyal dꞌa juneln̈ej dꞌa ichan̈. 25 Mamin ach in Diosal, ix acꞌ vojtaquejeli to ol ochn̈ejcan vin̈tilal dꞌa vopisio. Yuj chiꞌ tzin tecꞌbꞌej in bꞌa in lesalvi dꞌayach. 26 A ach tic Mamin Jehová, co Diosal ach, a ach ix alcan jun vachꞌilal tic dꞌayin. 27 A ticnaic jun, elocabꞌ dꞌa a cꞌol acꞌan a vachꞌcꞌolal dꞌa vin̈tilal, yic vachꞌ ol ajn̈ej ecꞌ ebꞌ dꞌa ichan̈. A ach ol acꞌ a vachꞌcꞌolal dꞌa ebꞌ, ol schaann̈ej ebꞌ dꞌa masanil tiempo, xchi vin̈aj rey David chiꞌ dꞌa Jehová.