Juntzan̈ chon̈abꞌ ix yacꞌ ganar vin̈aj rey David
18
Ayic ix lajvi yecꞌ juntzan̈ tic, ix acꞌji ganar ebꞌ filisteo yuj vin̈aj rey David. Ix can ebꞌ dꞌa yalan̈ smandar vin̈. Ix yicꞌanecꞌ chon̈abꞌ Gat vin̈ yedꞌ yaldeail dꞌa yol scꞌabꞌ ebꞌ. 2 Ix acꞌjipax ganar ebꞌ moabita yuj vin̈, yuj chiꞌ ix yacꞌoch sbꞌa ebꞌ dꞌa yol scꞌabꞌ vin̈, ix acꞌjicanoch dꞌa yibꞌan̈ ebꞌ yacꞌan qꞌuen tumin dꞌa vin̈.3 An̈ejtonaꞌ ix acꞌjipax ganar vin̈aj Hadad-ezer sreyal Soba ay dꞌa stojolal Hamat yuj vin̈. A jun vin̈ rey chiꞌ van smacan yicoc lum luum masanto dꞌa aꞌ Éufrates. 4 Ix yamchaj mil carruaje yic oval yuj vin̈aj David chiꞌ yedꞌ ebꞌ soldado. Ix yamchajpax 7 mil ebꞌ soldado ayqꞌue dꞌa yibꞌan̈ chej yedꞌ pax 20 mil ebꞌ soldado sbꞌey dꞌa yoc. Ix spol dꞌin̈chaj schꞌan̈al yoc masanil nocꞌ chej edꞌjinac carruaje yic oval chiꞌ ebꞌ, axon̈ej nocꞌ scꞌanchaj yic stocꞌan 100 carruaje ix cani.
5 Ix cꞌoch ebꞌ soldado sirio aj Damasco yic scolvaj ebꞌ yedꞌ vin̈aj Hadad-ezer chiꞌ, palta ix acꞌjipax ganar ebꞌ yuj vin̈aj rey David chiꞌ, ix miljicham 22 mil ebꞌ. 6 Ix lajvi chiꞌ ix yacꞌancan juntzan̈ ebꞌ soldado vin̈ dꞌa scal ebꞌ sirio aj Damasco chiꞌ. Icha chiꞌ ix aj scan ebꞌ dꞌa yol scꞌabꞌ vin̈, ix acꞌjicanoch dꞌa yibꞌan̈ ebꞌ yacꞌan qꞌuen tumin dꞌa vin̈. Bꞌajtac ix yacꞌ oval vin̈aj David chiꞌ, ix yacꞌn̈ej ganar vin̈ yuj Jehová.
7 An̈ejtonaꞌ, ix yicꞌanpaxecꞌ juntzan̈ maclabꞌ jul-labꞌ vin̈ ayoch oro dꞌay scꞌan ebꞌ yajalil ebꞌ soldado vin̈aj Hadad-ezer chiꞌ, ix yicꞌancot ebꞌ dꞌa Jerusalén. 8 Nivan pax qꞌuen bronce ix yiqꞌuecꞌ vin̈ dꞌa Tibhat yedꞌ dꞌa Cun, aton juntzan̈ chon̈abꞌ chiꞌ ay dꞌa yol smacbꞌen vin̈aj rey Hadad-ezer chiꞌ. Aton yedꞌ qꞌuen bronce chiꞌ ix sbꞌo jun nivan pila vin̈aj rey Salomón. Ix sbꞌo pax juntzan̈ nivac oy vin̈ yedꞌ masanil yamcꞌabꞌ nabꞌa bronce ix cꞌanchaj dꞌa templo.
9 Ayic ix yabꞌan vin̈aj Toi sreyal Hamat to toxo ix acꞌji ganar masanil ebꞌ soldado vin̈aj rey Hadad-ezer chiꞌ yuj vin̈aj rey David, 10 ix schecancot jun yuninal vin̈, scuchan Adoram. Yedꞌnac qꞌuen oro vin̈, qꞌuen plata yedꞌ qꞌuen bronce yic tzꞌacꞌji stzatzil scꞌool vin̈aj rey David yedꞌ yalan vachꞌ lolonel dꞌa vin̈, yujto ix acꞌji ganar vin̈aj rey Hadad-ezer chiꞌ yuj vin̈. A vin̈aj Toi chiꞌ yacꞌnac oval vin̈ yedꞌ vin̈aj rey Hadad-ezer chiꞌ dꞌa yalan̈taxo. 11 Ix yacꞌ masanil juntzan̈ qꞌuen chiꞌ vin̈aj rey David dꞌa Jehová. Junn̈ej ix aj yacꞌan qꞌuen vin̈ yedꞌ qꞌuen oro yedꞌ qꞌuen plata yicꞌnaquecꞌ vin̈ dꞌa juntzan̈ nación tic: Aton dꞌa Edom, dꞌa Moab, dꞌa Amón, dꞌa ebꞌ filisteo yedꞌ dꞌa ebꞌ amalecita.
12 Yedꞌ pax vin̈aj Abisai yuneꞌ ix Sarvia, yajalil jun macan̈ ebꞌ soldado vin̈aj rey David, ix acꞌji ganar ebꞌ soldado yic Edom yuj vin̈. 18 mil ebꞌ ix smilcham vin̈ dꞌa yacꞌlical Atzꞌam Atzꞌam. 13 Ix lajvi chiꞌ, ix yacꞌancan juntzan̈ ebꞌ soldado vin̈ dꞌa Edom chiꞌ. Yuj chiꞌ masanil ebꞌ edomita ix ochcan dꞌa yol scꞌabꞌ vin̈aj rey David chiꞌ. Bꞌajtac ix yacꞌ oval vin̈, ix yacꞌn̈ej ganar vin̈ yuj Jehová.
Ebꞌ vinac ay yopisio yedꞌ vin̈aj rey David
14 A vin̈aj David, ix yacꞌ reyal vin̈ dꞌa yibꞌan̈ chon̈abꞌ Israel. Te vachꞌ ix yutej sbꞌeybꞌal vin̈, dꞌa stojolal ix sbꞌo yaj vin̈ tas yaj ebꞌ chon̈abꞌ. 15 A vin̈ yajalil ebꞌ soldado, aton vin̈aj Joab yuneꞌ ix Sarvia. Axo pax vin̈aj Josafat yuninal vin̈aj Ahilud, tzꞌibꞌum yaj vin̈ dꞌa vin̈ rey chiꞌ. 16 A vin̈aj Sadoc yuninal vin̈aj Ahitob yedꞌ vin̈aj Abimelec yuninal vin̈aj Abiatar, sacerdote ebꞌ vin̈, axo vin̈aj Savsa, tzꞌibꞌum abꞌix vin̈. 17 A pax vin̈aj Benaía yuninal vin̈aj Joiada, yajal yaj vin̈ dꞌa ebꞌ quereteo yedꞌ dꞌa ebꞌ peleteo, aton ebꞌ stan̈vumal vin̈ rey, axo ebꞌ vin̈ yuninal vin̈ rey chiꞌ, yajal yaj ebꞌ yic scolvaj ebꞌ yedꞌ vin̈.