Ix acꞌji ganar ebꞌ sirio yedꞌ ebꞌ amonita yuj vin̈aj rey David
19
Ayic toxo ix ecꞌ jun tiempoal, ix cham vin̈aj Nahas sreyal ebꞌ amonita, axo vin̈ yuninal vin̈ scuchan Hanún ix ochcan reyal. 2 Ix snaꞌ vin̈aj rey David to yovalil schꞌox svachꞌcꞌolal vin̈ dꞌa vin̈aj Hanún chiꞌ, yujto a vin̈ smam vin̈ ix schꞌox svachꞌcꞌolal vin̈ dꞌa vin̈. Yuj chiꞌ ix schecbꞌat juntzan̈ schecabꞌ vin̈aj David chiꞌ dꞌa vin̈aj Hanún chiꞌ yic syacꞌan snivanil scꞌool vin̈ yuj schamel vin̈ smam vin̈ chiꞌ. Palta ayic ix cꞌoch ebꞌ vin̈ checabꞌ dꞌa schon̈abꞌ ebꞌ amonita, 3 a ebꞌ vin̈ yajal yaj dꞌa chon̈abꞌ chiꞌ, ix yal ebꞌ vin̈ dꞌa vin̈aj Hanún chiꞌ: Mamin rey, ¿tom tzacꞌoch dꞌa a cꞌool to nivan yelcꞌoch vin̈ a mam chiꞌ dꞌa yol sat vin̈aj rey David chiꞌ, yujn̈ej chiꞌ ix scheccot juntzan̈ vinac tic vin̈ yic syacꞌ snivanil a cꞌool ebꞌ vin̈? Maay. Ix checjicot ebꞌ vin̈ yuj vin̈ yic syil ebꞌ vin̈ tas yaj co chon̈abꞌ tic, yic tzul satanel ebꞌ vin̈, xchi ebꞌ vin̈ dꞌa vin̈.4 Yuj chiꞌ, ix schec vin̈aj Hanún chiꞌ yamjoc ebꞌ vin̈ schecabꞌ vin̈aj rey David chiꞌ. Ix joxjiel xil stiꞌ ebꞌ vin̈, ix poljiel yoctac stiꞌ spichul ebꞌ vin̈ masanto ix qꞌueul dꞌa stiꞌ syoop ebꞌ vin̈. Ix lajvi chiꞌ ix schecan pax ebꞌ vin̈ vin̈. 5 Ayic ix yabꞌan vin̈aj rey David tas ix aj ebꞌ vin̈, ix schecanbꞌat schaumal ebꞌ vin̈ yujto te qꞌuixvelal ix utaj ebꞌ vin̈. Ix alji dꞌa ebꞌ vin̈ to scan ebꞌ vin̈ dꞌa Jericó masanto sqꞌuibꞌxi xil stiꞌ ebꞌ vin̈ chiꞌ, ichato chiꞌ syal smeltzaj paxta ebꞌ vin̈.
6 Axo ebꞌ amonita chiꞌ, ix nachajel yuj ebꞌ to chuc ix can ebꞌ dꞌa vin̈aj rey David chiꞌ, yuj chiꞌ ix yacꞌbꞌat 660 quintal qꞌuen plata vin̈aj Hanún chiꞌ dꞌa Mesopotamia, dꞌa Siria, dꞌa Maaca yedꞌ dꞌa Soba yic scot carruaje yedꞌ ebꞌ vin̈ soldado edꞌjinac yedꞌ ebꞌ vin̈ soldado ayqꞌue yibꞌan̈ nocꞌ chej yic scolvaj yedꞌ vin̈. 7 Ix stupanpax ebꞌ dꞌa vin̈ sreyal Maaca yic scot vin̈ yedꞌ 32 mil carruaje yic oval yedꞌ soldado. Ix sbꞌoanqꞌue scampamento ebꞌ ix tupchaj chiꞌ dꞌa slacꞌanil chon̈abꞌ Medeba. Ix elpaxcot masanil ebꞌ amonita chiꞌ dꞌa yoltac schon̈abꞌ, ix smolbꞌan sbꞌa ebꞌ yic syacꞌan oval ebꞌ yedꞌ ebꞌ israel. 8 Ayic ix yabꞌan jun chiꞌ vin̈aj rey David ix schecanbꞌat vin̈aj Joab vin̈ yedꞌ masanil ebꞌ soldado. 9 Ix yacꞌ lista sbꞌa ebꞌ amonita chiꞌ dꞌa oval dꞌa yichan̈ schon̈abꞌ ebꞌ. Axo ebꞌ vin̈ rey ix yavtejcot ebꞌ chiꞌ, chꞌoc ix can ebꞌ vin̈ dꞌa acꞌlic. 10 Ayic ix yilan vin̈aj Joab to ay ebꞌ ajcꞌol dꞌa yichan̈ yedꞌ dꞌa spatic, ix sicꞌanel ebꞌ soldado te jelan vin̈ yic syacꞌan oval ebꞌ yedꞌ ebꞌ sirio chiꞌ. 11 Axo nan̈alxo ebꞌ ix yacꞌoch vin̈ yic scuchbꞌaj ebꞌ yuj vin̈aj Abisai yucꞌtac vin̈ yic syacꞌan oval ebꞌ yedꞌ ebꞌ amonita chiꞌ. 12 Ix yalan vin̈aj Joab chiꞌ icha tic: Tato max on̈ tzacꞌvan dꞌa ebꞌ sirio chiꞌ, elan̈chamel tzex colvaj quedꞌoc. Tato max ex tzacꞌvan dꞌa ebꞌ amonita chiꞌ jun, a on̈xo ol bꞌat on̈ colvaj eyedꞌoc. 13 Tecꞌbꞌej a bꞌa, cacꞌ oval yuj co colan ebꞌ quetchon̈abꞌ, aton schon̈abꞌ co Diosal. Yacꞌocabꞌ Jehová tas tzꞌel dꞌa scꞌool, xchi vin̈aj Joab chiꞌ.
14 Ix lajvi chiꞌ ix bꞌat vin̈aj Joab chiꞌ yedꞌ ebꞌ soldado yacꞌ oval yedꞌ ebꞌ sirio chiꞌ. Axo ix aji, ix el lemnaj ebꞌ dꞌa yichan̈ vin̈. 15 Ayic ix yilan ebꞌ amonita to toxo ix el lemnaj ebꞌ sirio chiꞌ, ix el pax lemnaj ebꞌ dꞌa yichan̈ vin̈aj Abisai chiꞌ, ix och ebꞌ scol sbꞌa dꞌa yol schon̈abꞌ. Ix lajvi chiꞌ ix meltzaj vin̈aj Joab chiꞌ yedꞌ masanil ebꞌ soldado dꞌa Jerusalén.
16 Ayic ix yilan ebꞌ sirio chiꞌ to ix acꞌji ganar ebꞌ yuj ebꞌ israel, ix yacꞌanbꞌat schecabꞌ ebꞌ dꞌa ebꞌ yetchon̈abꞌ ay dꞌa scꞌaxepalbꞌat aꞌ Éufrates yic scot ebꞌ colval yedꞌ ebꞌ. A vin̈aj Sofac yajalil ebꞌ soldado vin̈aj rey Hadad-ezer scuchbꞌan ebꞌ. 17 Ix alchaj juntzan̈ tic dꞌa vin̈aj rey David, yuj chiꞌ ix smolbꞌanpax masanil ebꞌ soldado Israel vin̈, ix cꞌaxpajecꞌ ebꞌ dꞌa aꞌ Jordán, ix cꞌoch ebꞌ bꞌaj ayecꞌ ebꞌ sirio chiꞌ. Ix sbꞌoanoch soldado vin̈aj rey David chiꞌ dꞌa yichan̈ ebꞌ sirio chiꞌ, axo ebꞌ ix acꞌan oval yedꞌ ebꞌ. 18 Axo ix aji, ix el lemnaj ebꞌ sirio dꞌa yichan̈ ebꞌ israel chiꞌ. Ay 40 mil ebꞌ soldado sbꞌey dꞌa yoc ix chami yedꞌ 7 mil ebꞌ ayqꞌue dꞌa yol carruaje. Ix champax vin̈aj Sofac chiꞌ. 19 Ayic ix yilan ebꞌ ayoch yedꞌ vin̈aj Hadad-ezer chiꞌ to toxo ix acꞌji ganar ebꞌ yuj ebꞌ israel, ix och ebꞌ dꞌa juncꞌolal yedꞌ vin̈aj rey David chiꞌ, ix can ebꞌ dꞌa yol scꞌabꞌ vin̈. Atax taꞌ majxo yal scꞌol ebꞌ sirio chiꞌ ix colvaj yedꞌ ebꞌ amonita.