Ix acꞌji ganar ebꞌ sirio
10
Ayic toxo ix ecꞌ jun tiempoal, ix cham vin̈aj Nahas, sreyal ebꞌ amonita, axo vin̈ yuninal vin̈ scuchan Hanún ix ochcan reyal. 2 Ix snaꞌ vin̈aj rey David chiꞌ to yovalil schꞌox svachꞌcꞌolal vin̈ dꞌa vin̈aj Hanún chiꞌ, yujto schꞌoxnac svachꞌcꞌolal vin̈ smam vin̈ dꞌa vin̈. Yuj chiꞌ ix schecbꞌat juntzan̈ schecabꞌ vin̈ dꞌa vin̈aj Hanún chiꞌ yic syacꞌan snivanil scꞌool vin̈ yuj schamel smam chiꞌ. Palta ayic ix cꞌoch ebꞌ checabꞌ dꞌa schon̈abꞌ ebꞌ amonita chiꞌ, 3 a ebꞌ vin̈ yajal yaj dꞌa chon̈abꞌ chiꞌ, ix yal ebꞌ vin̈ dꞌa vin̈aj Hanún chiꞌ: Mamin rey, ¿tom tzacꞌoch dꞌa a cꞌool to nivan yelcꞌoch vin̈ a mam chiꞌ dꞌa yol sat vin̈aj rey David chiꞌ, yuj chiꞌ ix scheccot juntzan̈ vinac tic vin̈ yic syacꞌ snivanil a cꞌool ebꞌ? Maay. Ix checjicot ebꞌ yuj vin̈ yic tzul yil ebꞌ tas yaj co chon̈abꞌ tic, yic tzul satanel ebꞌ, xchi ebꞌ dꞌa vin̈.4 Yuj chiꞌ, ix schecan vin̈aj Hanún chiꞌ yamjoc ebꞌ schecabꞌ vin̈aj rey David chiꞌ, ix joxjiel xil stiꞌ ebꞌ dꞌa jun pacꞌan̈ spacꞌul stiꞌ, ix poljiel yoctac stiꞌ spichul ebꞌ masanto ix qꞌueul dꞌa stiꞌ syoop ebꞌ, ix lajvi chiꞌ ix schecan pax ebꞌ vin̈. 5 Ayic ix yabꞌan vin̈aj rey David chiꞌ tas ix aj ebꞌ, ix checjibꞌat schaumal ebꞌ yuj vin̈, yujto te qꞌuixvelal ix utaj ebꞌ, ix alji dꞌa ebꞌ to scan ebꞌ dꞌa Jericó masanto sqꞌuibꞌxi xil stiꞌ ebꞌ chiꞌ, ichato chiꞌ syal smeltzaj pax ta ebꞌ.
6 Axo ebꞌ amonita chiꞌ, ix nachajel yuj ebꞌ to chuc ix can ebꞌ dꞌa vin̈aj rey David chiꞌ, yuj chiꞌ 20 mil ebꞌ soldado yic Siria dꞌa yol yic Bet-rehob yedꞌ dꞌa yol yic Soba ix stup ebꞌ. Ix cotpax mil ebꞌ soldado vin̈ sreyal Maaca yedꞌ 12 mil ebꞌ soldado aj Is-tob. 7 Axo ix yabꞌan jun chiꞌ vin̈aj rey David chiꞌ, ix schecanbꞌat vin̈aj Joab vin̈ yedꞌ ebꞌ soldado chiꞌ. 8 Ix elta ebꞌ amonita chiꞌ dꞌa stiꞌ schon̈abꞌ, ix sbꞌoanoch sbꞌa ebꞌ dꞌa oval taꞌ, axo ebꞌ soldado ix tupji yic scot yacꞌ oval chiꞌ, najat ix sbꞌopaxem sbꞌa ebꞌ dꞌa stiel chon̈abꞌ chiꞌ. 9 Ayic ix yilan vin̈aj Joab chiꞌ to ay jun macan̈ ebꞌ soldado dꞌa yichan̈ vin̈, ay pax junxo macan̈ ebꞌ dꞌa spatic vin̈, ix sicꞌanel ebꞌ soldado vin̈, aton ebꞌ te jelan dꞌa oval, yic syacꞌan oval ebꞌ yedꞌ ebꞌ sirio chiꞌ. 10 Axo juntzan̈xo ebꞌ soldado, ix yacꞌoch vin̈ dꞌa yol scꞌabꞌ vin̈aj Abisai vin̈ yucꞌtac vin̈, yic sbꞌat ebꞌ yacꞌ oval yedꞌ ebꞌ amonita chiꞌ. 11 Ix yalan vin̈aj Joab chiꞌ dꞌa vin̈ yucꞌtac chiꞌ icha tic: Tato a ebꞌ sirio chiꞌ van in yacꞌan ganar, tzach cot in a coloꞌ. Tato a ebꞌ amonita chiꞌ van ach yacꞌan ganar jun, a inxo ol in bꞌat ach in coloꞌ. 12 Cacꞌ quip, co tecꞌbꞌej co bꞌa yuj co colan co chon̈abꞌ a on̈ schon̈abꞌ on̈ co Diosal tic. Elocabꞌcꞌoch tas vachꞌ snibꞌej Jehová, xchi vin̈aj Joab chiꞌ.
13 Ix lajvi chiꞌ, ix bꞌat vin̈aj Joab chiꞌ yedꞌ ebꞌ soldado yacꞌ oval yedꞌ ebꞌ sirio chiꞌ, axo ix aji, ix el lemnaj ebꞌ dꞌa yichan̈ vin̈. 14 Ayic ix yilan ebꞌ amonita to toxo ix el lemnaj ebꞌ sirio chiꞌ, ix elpax lemnaj ebꞌ dꞌa yichan̈ vin̈aj Abisai, ix och ebꞌ scol sbꞌa dꞌa yol schon̈abꞌ chiꞌ. Yuj chiꞌ ix och vaan vin̈aj Joab chiꞌ yacꞌan oval yedꞌ ebꞌ amonita chiꞌ, ix meltzajcot vin̈ dꞌa Jerusalén.
15 Ayic ix yilan ebꞌ sirio chiꞌ to ix acꞌji ganar ebꞌ yuj ebꞌ israel, ix smolbꞌanxi sbꞌa ebꞌ. 16 Ix avtajcot ebꞌ sirio chiꞌ yuj vin̈aj rey Hadad-ezer, aton ebꞌ ay dꞌa junxo scꞌaxepalecꞌ aꞌ Éufrates, ix cꞌoch ebꞌ dꞌa chon̈abꞌ Helam. A vin̈aj Sobac bꞌabꞌel dꞌa yichan̈ ebꞌ, aton vin̈ yajal dꞌa ebꞌ soldado yic vin̈aj rey Hadad-ezer chiꞌ. 17 Palta ix alchajpax juntzan̈ tic dꞌa vin̈aj rey David, yuj chiꞌ ix smolbꞌej masanil ebꞌ soldado yic Israel vin̈, ix ecꞌ ebꞌ dꞌa scꞌaxepal aꞌ Jordán, ix cꞌoch ebꞌ dꞌa Helam. Ataꞌ ix stecꞌbꞌej sbꞌa ebꞌ sirio chiꞌ yacꞌan oval yedꞌ ebꞌ israel chiꞌ. 18 Axo ix aji, ix el lemnaj ebꞌ sirio chiꞌ dꞌa yichan̈ vin̈aj rey David chiꞌ yedꞌ ebꞌ israel. 40 mil soldado ayqꞌue dꞌa yibꞌan̈ chej yedꞌ pax 700 ebꞌ ayoch dꞌa yol carruaje ix smilcham ebꞌ soldado yic Israel chiꞌ. Ix champax vin̈aj Sobac yajalil ebꞌ soldado sirio yuj ebꞌ. 19 Ayic ix yilan masanil ebꞌ rey ayoch yedꞌ vin̈aj rey Hadad-ezer chiꞌ to toxo ix acꞌji ganar ebꞌ yuj ebꞌ israel chiꞌ, ix yacꞌanoch sbꞌa ebꞌ dꞌa juncꞌolal yedꞌ ebꞌ israel chiꞌ, yuj chiꞌ ix canxon̈ej ebꞌ dꞌa yalan̈ smandar vin̈aj rey David chiꞌ. Atax taꞌ ix xivcanqꞌue ebꞌ sirio chiꞌ, majxo yacꞌxiochlaj sbꞌa ebꞌ scolvaj yedꞌ ebꞌ amonita chiꞌ.