2 Ay jun vin̈ schecabꞌ vin̈aj Saúl scuch Siba, ix avtajcot vin̈ dꞌa yichan̈ vin̈aj rey David chiꞌ. Axo yic ix javi vin̈, ix scꞌanbꞌan vin̈ rey chiꞌ dꞌa vin̈ icha tic:

—¿A ach am tic tza cuch Siba? xchi vin̈ dꞌa vin̈.

—Iꞌ, a in ton mamin rey, xchi vin̈.

3 Ix scꞌanbꞌan vin̈ rey chiꞌ dꞌa vin̈ icha tic:

—¿Man̈xa am val junoc yin̈tilal vin̈aj Saúl ayeqꞌui, yic tzin chꞌox in vachꞌcꞌolal dꞌay icha ix vutej vacꞌan in tiꞌ dꞌa yichan̈ Jehová? xchi vin̈.

Ix tacꞌvi vin̈aj Siba chiꞌ:

—Aytocan jun vin̈ yuninal vin̈aj Jonatán, chuclaj yoc vin̈ schabꞌil, xchi vin̈.

4 —¿Bꞌajtil ay vin̈? xchi vin̈aj David chiꞌ.

—A dꞌa spat vin̈aj Maquir yuninal vin̈aj Amiel dꞌa Lodebar, ataꞌ ayecꞌ vin̈, xchi vin̈aj Siba chiꞌ.

5-6 Ix lajvi chiꞌ, ix yalan vin̈aj rey David chiꞌ to bꞌat icꞌjicot vin̈aj Mefi-boset yuninal vin̈aj Jonatán chiꞌ vin̈ yixchiquin vin̈aj Saúl chiꞌ. Ayic ix javi vin̈ dꞌa yichan̈ vin̈ rey chiꞌ, ix em n̈ojan vin̈ dꞌa sat luum. Ix yalan vin̈aj David chiꞌ dꞌa vin̈ icha tic:

—Mefi-boset, xchi vin̈.

—Tic ayin mamin rey, xchi vin̈.

7 Ix yalan vin̈aj David chiꞌ dꞌa vin̈ icha tic:

—Man̈ ach xivoc, vachꞌ ol vutej in bꞌa dꞌayach yuj bꞌaj xajan yilnac in vin̈aj Jonatán vin̈ a mam. Ol vacꞌxican masanil lum sluum vin̈ a mam icham aj Saúl dꞌayach. Ol ach van̈ej vedꞌ dꞌa in mexa, xchi vin̈.

8 Ix em n̈ojan vin̈aj Mefi-boset chiꞌ, ix yalan vin̈:

—Mamin rey, ¿tas val yuj tzꞌocꞌ a cꞌol dꞌayin? A in a checabꞌ in tic lajan in icha junoc nocꞌ chamnac tzꞌiꞌ, xchi vin̈.

9 Ix avtajxi vin̈aj Siba yuj vin̈ rey chiꞌ, aton vin̈ schecabꞌcan vin̈aj Saúl, ix yalan vin̈ dꞌa vin̈ icha tic:

—Tic val svacꞌxican masanil tastac yic vin̈ a patrón yedꞌ yuninal dꞌa vin̈ yixchiquin vin̈ tic. 10 A ach tic yedꞌ masanil ebꞌ uninal yedꞌ masanil ebꞌ a checabꞌ, ol ex munlaj dꞌa sat lum sluum vin̈ chiꞌ. Masanil tas ol el dꞌa sat luum, tza molbꞌej dꞌa yol junoc spatil, yic vachꞌ tzꞌoch yopisio yuj ebꞌ yuninal vin̈aj Mefi-boset tic, palta axo vin̈ jun, ol van̈ej vin̈ vedꞌoc, xchi vin̈ rey chiꞌ dꞌa vin̈.

Olajun̈van̈ yuninal vin̈aj Siba chiꞌ, 20 ebꞌ schecabꞌ vin̈. 11 Ix tacꞌvi vin̈aj Siba chiꞌ dꞌa vin̈ rey chiꞌ icha tic:

—Masanil tas tza chec in cꞌulej tic, ol in cꞌanabꞌajej, xchi vin̈.

A vin̈aj Mefi-boset chiꞌ, junjun cꞌu sva vin̈ yedꞌ vin̈ rey chiꞌ, icha val yuninal vin̈ ix yutej vin̈. 12 Ay jun yuninal vin̈aj Mefi-boset chiꞌ yuneto scuchan Micaía. Masanil mach ayecꞌ dꞌa spat vin̈aj Siba chiꞌ, schecabꞌ vin̈aj Mefi-boset chiꞌ yaj ebꞌ. 13 A vin̈aj Mefi-boset chiꞌ, chuclaj yoc vin̈ schabꞌil, a dꞌa Jerusalén ayecꞌ vin̈ yujto ataꞌ sva vin̈ yedꞌ vin̈aj rey David chiꞌ.