3 An̈ejaꞌ vin̈aj rey David chiꞌ ix acꞌan ganar vin̈aj Hadad-ezer, ayic van sbꞌat vin̈ stocꞌxicanecꞌ smacbꞌen bꞌaj ay aꞌ nivan Éufrates. A vin̈aj Hadad-ezer chiꞌ yuninal vin̈ vin̈aj Rehob sreyal Soba. 4 A vin̈aj rey David chiꞌ ix yaman mil 700 ebꞌ soldado vin̈aj Hadad-ezer chiꞌ, aton ebꞌ ayqꞌue dꞌa yibꞌan̈ chej yedꞌ 20 mil ebꞌ sbꞌey dꞌa yoc. Ix yicꞌanbꞌat ebꞌ vin̈ dꞌa preso. Ix stzepan schꞌan̈al yoc nocꞌ chej edꞌjinac carruaje chiꞌ vin̈, axon̈ej nocꞌ sn̈eran 100 carruaje ix yactejcan vin̈.

5 Ix lajvi chiꞌ, ix javi ebꞌ sirio ay dꞌa yol yic Damasco yic scolvaj yedꞌ vin̈aj Hadad-ezer chiꞌ, palta ix acꞌjipax ganar ebꞌ yuj vin̈aj rey David chiꞌ, 22 mil ebꞌ ix cham yuj vin̈. 6 Elan̈chamel ix yacꞌoch ebꞌ soldado vin̈aj rey David chiꞌ dꞌa yol yic Damasco chiꞌ, icha chiꞌ ix aj scan ebꞌ sirio chiꞌ dꞌa yalan̈ smandar vin̈. Ix checji yacꞌ tumin ebꞌ dꞌa junjun abꞌil. A Jehová ix och yedꞌ vin̈, yuj chiꞌ yaln̈ej bꞌaj ix bꞌat vin̈ yacꞌ oval, ix yacꞌn̈ej ganar vin̈.

7 Ix lajvi chiꞌ, ix yicꞌanpaxcanecꞌ juntzan̈ maclabꞌ jul-labꞌ vin̈aj rey David chiꞌ dꞌa ebꞌ soldado vin̈aj Hadad-ezer chiꞌ, ayoch oro dꞌay, ix yicꞌancot vin̈ dꞌa Jerusalén. 8 An̈ejtonaꞌ te nivan pax qꞌuen bronce ix yicꞌcanecꞌ vin̈ dꞌa chon̈abꞌ Beta yedꞌ dꞌa Berotai, aton juntzan̈ chon̈abꞌ chiꞌ ay dꞌa yol smacbꞌen vin̈aj Hadad-ezer chiꞌ.

9 Axo pax vin̈aj Toi, sreyal Hamat, ayic ix yabꞌan vin̈ tas ix aj slajviel masanil ebꞌ soldado vin̈aj Hadad-ezer yuj vin̈aj David chiꞌ, 10 ix schecanbꞌat jun yuninal vin̈ scuchan Joram dꞌa vin̈. Ix yacꞌanpaxbꞌat qꞌuen plata vin̈, qꞌuen oro yedꞌ qꞌuen bronce, yuj yacꞌan stzatzil scꞌol vin̈aj David chiꞌ vin̈. Ix yalanpaxbꞌat vachꞌ lolonel vin̈ dꞌa vin̈ yujto ix acꞌji ganar vin̈aj Hadad-ezer yuj vin̈, yujto yacꞌnac oval vin̈aj Toi chiꞌ yedꞌ vin̈aj Hadad-ezer chiꞌ. 11 A masanil juntzan̈ qꞌuen ix schaꞌ vin̈aj David dꞌa vin̈aj Toi chiꞌ, ix yacꞌpax qꞌuen vin̈ dꞌa Jehová yedꞌ qꞌuen oro yedꞌ qꞌuen plata cotnac dꞌa juntzan̈xo chon̈abꞌ yacꞌnac ganar vin̈: 12 Aton dꞌa Edom, dꞌa Moab, dꞌa ebꞌ amonita, dꞌa ebꞌ filisteo, dꞌa ebꞌ amalecita yedꞌ qꞌuen ix yicꞌcanecꞌ vin̈ ayic ix yacꞌan oval vin̈ yedꞌ vin̈aj Hadad-ezer.

13 Ix te bꞌinaj val vin̈aj rey David chiꞌ sicꞌlabꞌil ayic ix meltzajxi vin̈ dꞌa oval yedꞌ ebꞌ edomita, 18 mil ebꞌ ix cham yuj vin̈ dꞌa jun Span̈anil Atzꞌam Atzꞌam. 14 Elan̈chamel ix yacꞌoch ebꞌ soldado vin̈aj David chiꞌ stan̈vej Edom. Masanil ebꞌ aj Edom chiꞌ, ix can ebꞌ dꞌa yalan̈ smandar vin̈. A Jehová ix ochn̈ej yedꞌ vin̈ dꞌa oval chiꞌ, yuj chiꞌ yaln̈ej bꞌajtil sbꞌat vin̈ yacꞌ oval, syacꞌn̈ej ganar vin̈.

15 A vin̈aj David chiꞌ, ix yacꞌ reyal vin̈ dꞌa masanil ebꞌ chon̈abꞌ israel dꞌa stojolal yedꞌ dꞌa svachꞌilal. 16 A ebꞌ ix acꞌan yajalil yedꞌ vin̈, aton ebꞌ tic: Vin̈aj Joab yuneꞌ ix Sarvia, yajal vin̈ dꞌa ebꞌ soldado smasanil, vin̈aj Josafat yuninal vin̈aj Ahilud, tzꞌibꞌum yaj vin̈ dꞌa vin̈ rey chiꞌ. 17 Vin̈aj Sadoc yuninal vin̈aj Ahitob yedꞌ vin̈aj Ahimelec yuninal vin̈aj Abiatar, sat sacerdote yaj ebꞌ vin̈. Axo vin̈aj Seraías stzꞌibꞌan yabꞌixal tastac scꞌulej vin̈ rey chiꞌ dꞌa stzolal. 18 Axo pax vin̈aj Benaía yuninal vin̈aj Joiada, yajal yaj vin̈ dꞌa ebꞌ soldado stan̈van vin̈ rey chiꞌ, aton ebꞌ cereteo yedꞌ ebꞌ peleteo, axo ebꞌ yuninal vin̈aj rey David chiꞌ, sat yajal yaj ebꞌ.