2 Yuj chiꞌ, masanil ebꞌ israel chiꞌ ix actancan vin̈aj rey David chiꞌ, axo yedꞌ vin̈aj Seba chiꞌ ix bꞌat ebꞌ. Axo ebꞌ soldado dꞌa yin̈tilal Judá, ix cann̈ej ebꞌ yedꞌ vin̈ rey chiꞌ, ix cot ebꞌ yedꞌ vin̈ dꞌa stiꞌ aꞌ Jordán masanto dꞌa Jerusalén.

3 Ayic ix jax vin̈aj rey David chiꞌ dꞌa spalacio dꞌa Jerusalén, ix yicꞌanelta lajun̈van̈ ebꞌ ix schabꞌil yetbꞌeyum vin̈, aton ebꞌ ix aycan stan̈vej spat vin̈ chiꞌ, chꞌoc junxo pat bꞌaj ix tan̈vaj ebꞌ ix. Toxon̈ej ix acꞌji tas sva ebꞌ ix, palta majxo vaylaj vin̈ yedꞌ ebꞌ ix. Ataꞌ ix cann̈ej ebꞌ ix masanto ix cham ebꞌ ix, icha ebꞌ ix chamnacxo yetbꞌeyum ix ajcan ebꞌ ix.

4 Ix lajvi chiꞌ, ix yalan vin̈ rey chiꞌ dꞌa vin̈aj Amasa:

—Bꞌat molbꞌejcot masanil ebꞌ vin̈ vinac yic Judá, axo chabꞌej tzach javi yedꞌ ebꞌ vin̈ dꞌa tic, xchi vin̈.

5 Ix bꞌat vin̈aj Amasa chiꞌ smolbꞌej ebꞌ vin̈, palta ix ecꞌ tiempo, maj jalaj vin̈ icha val scꞌual yaj yalancan ebꞌ vin̈ chiꞌ. 6 Yuj chiꞌ ix yalan vin̈aj rey David chiꞌ dꞌa vin̈aj Abisai:

—Tecan to ecꞌbꞌal ol on̈ yixtej vin̈aj Seba tic dꞌa yichan̈ icha ix scꞌulej vin̈aj Absalón. Yuj chiꞌ cuchbꞌej masanil ebꞌ soldado, tzach bꞌat dꞌa spatic vin̈, axo talaj tzꞌaji tzꞌoch vin̈ scol sbꞌa dꞌa junoc chon̈abꞌ ayoch smuroal, tzꞌel vin̈ dꞌayon̈, xchi vin̈.

7 Masanil ebꞌ soldado yic vin̈aj Joab yedꞌ ebꞌ cereteo, ebꞌ peleteo yedꞌ juntzan̈xo ebꞌ soldado te jelan, ix el ebꞌ dꞌa Jerusalén, ix bꞌat ebꞌ yedꞌ vin̈aj Abisai chiꞌ dꞌa spatic vin̈aj Seba chiꞌ. 8 Ayic ix cꞌoch ebꞌ dꞌa slacꞌanil jun nivan tenam ay dꞌa Gabaón, ataꞌ ix schalaj sbꞌa vin̈aj Amasa chiꞌ yedꞌ ebꞌ. A vin̈aj Joab ayoch spichul vin̈ yic oval, ayoch jun cincho dꞌa snan̈al vin̈. A dꞌa snan̈al vin̈ chiꞌ jachanoch jun qꞌuen espada ayem dꞌa yol yatut. Ayic van scꞌoch vin̈ yacꞌ stzatzil scꞌol vin̈aj Amasa chiꞌ, ix qꞌueta jasnaj qꞌuen yespada vin̈ chiꞌ, ix sicꞌanxiqꞌue qꞌueen vin̈. 9 Ix syaman xil stiꞌ vin̈aj Amasa chiꞌ vin̈ yedꞌ svachꞌ cꞌabꞌ yic stzꞌubꞌanelta stiꞌ vin̈ vin̈, ix scꞌanbꞌan vin̈ dꞌa vin̈:

—¿Vachꞌ am ix ach ajelcꞌoch vucꞌtac? xchi vin̈aj Joab chiꞌ.

10 A vin̈aj Amasa chiꞌ max snalaj vin̈ yuj qꞌuen espada ix siqꞌuixqꞌue vin̈aj Joab chiꞌ. Axo ix aji, ix stipanoch qꞌuen vin̈ dꞌa scꞌol vin̈aj Amasa chiꞌ. Ix elta lan̈naj yol scꞌol vin̈ smasanil dꞌa sat luum. Junn̈ej ix yacꞌ vin̈aj Joab chiꞌ dꞌa vin̈, ix cham vin̈. Ix lajvi chiꞌ, ix bꞌat vin̈aj Joab chiꞌ yedꞌ vin̈ yucꞌtac chiꞌ, aton vin̈aj Abisai dꞌa spatic vin̈aj Seba chiꞌ. 11 Ay jun vin̈ dꞌa scal ebꞌ soldado vin̈aj Joab chiꞌ ix och lin̈an dꞌa stzꞌey snivanil vin̈aj Amasa chiꞌ, ix yalan vin̈:

—A mach ayoch yedꞌ vin̈aj Joab yedꞌ pax vin̈aj rey David, ochocabꞌ tzacꞌan yuj vin̈aj Joab chiꞌ, xchi vin̈.

12 Ix can telan snivanil vin̈aj Amasa chiꞌ dꞌa scal schiqꞌuil dꞌa yol bꞌe chiꞌ. Ayic ix yilan jun vin̈ soldado chiꞌ to ayic van yecꞌta ebꞌ soldado dꞌa stzꞌey snivanil vin̈aj Amasa chiꞌ, tzꞌoch lin̈an ebꞌ yilaꞌ, yuj chiꞌ ix sn̈ercanel vin̈ dꞌa tiꞌ bꞌe, ix slichꞌanbꞌat jun cꞌapac vin̈ dꞌa yibꞌan̈. 13 Ayic toxo ix sn̈ercanel vin̈ chiꞌ, ix ecꞌbꞌat ebꞌ soldado smasanil, ix bꞌat ebꞌ yedꞌ vin̈aj Joab say vin̈aj Seba chiꞌ.

14 A vin̈aj Seba chiꞌ, ix ecꞌ vin̈ smolbꞌej ebꞌ soldado dꞌa junjun macan̈ yin̈tilal ebꞌ israel, masanto ix cꞌoch vin̈ dꞌa Abel-bet-maaca. Axo masanil ebꞌ yin̈tilal Bicri tzacꞌanxo och ebꞌ yuj vin̈, ix och ebꞌ dꞌa yol chon̈abꞌ chiꞌ. 15 Ayic ix cꞌoch ebꞌ soldado vin̈aj Joab dꞌa Abel-bet-maaca chiꞌ, ix oymaj ebꞌ dꞌa spatic, ix sbꞌoanoch lum luum ebꞌ stecꞌnubꞌoc dꞌa spatictac smuroal chon̈abꞌ chiꞌ, yic syacꞌan oval ebꞌ dꞌay. Ix och ijan ebꞌ smacꞌanem vecnaj smuroal chiꞌ. 16 Ataꞌ ay jun ix ix te ay spensar, ix qꞌue ix dꞌa yibꞌan̈ smuroal chon̈abꞌ chiꞌ, ix yalan ix icha tic:

—Abꞌec, abꞌec tas ol valaꞌ. Alec dꞌa vin̈aj Joab chiꞌ to scot vin̈ dꞌa tic, yujto tzin nibꞌej tzin lolon yedꞌ vin̈, xchi ix.

17 Ayic ix cꞌoch vin̈ dꞌa slacꞌanil ix, ix scꞌanbꞌan ix icha tic:

—¿Tom a ach tic ach Joab? xchi ix dꞌa vin̈.

—A in toni, xchi vin̈. Ix yalanxi ix dꞌa vin̈:

—Abꞌ tas ol val a in a checabꞌ in tic, xchi ix.

—Tic svabꞌi, xchi vin̈. 18 Ix syamanoch ix yalan icha tic:

—A dꞌa pecaꞌ tzꞌalji icha tic: A mach snibꞌej syojtaquejel junoc tasi, scꞌanbꞌejocabꞌ dꞌa chon̈abꞌ Abel, xchi. Icha chiꞌ tzꞌaj sbꞌo yaj junoc tasi. 19 A on̈ cajan on̈ dꞌa jun co chon̈abꞌ tic, ichn̈ej taꞌ cajeqꞌui, cꞌanabꞌajum on̈ dꞌa scꞌaybꞌubꞌal Dios. Te nivan pax yelcꞌoch jun co chon̈abꞌ tic. Palta a achxo tic tza nibꞌej tza sateli. ¿Tas yuj tza nibꞌej tza satel tastac to yic Jehová yaji? xchi ix.

20 Ix yalan vin̈aj Joab chiꞌ icha tic:

—Man̈ ichoctaꞌ van in naani yic tzin sataneli. 21 Man̈oc jun chiꞌ sco sayaꞌ, palta a jun vin̈ scuchan Seba yuninal vin̈aj Bicri aj tzalquixtac dꞌa yol yic Efraín sco sayaꞌ. A jun vin̈ chiꞌ ix qꞌue vaan vin̈ ajcꞌolal dꞌa vin̈aj rey David. An̈ej vin̈ tzeyacꞌ dꞌa yol co cꞌabꞌ, tzon̈ el dꞌa jun chon̈abꞌ tic, xchi vin̈.

—Dꞌa yibꞌan̈ muro tic ol co julem sjolom vin̈ dꞌayach, xchi ix.

22 Yuj sjelanil spensar ix chiꞌ, ix bꞌat ix smontej ebꞌ yetchon̈abꞌ chiꞌ. Ix lajvi chiꞌ, ix stzepanel sjolom vin̈aj Seba chiꞌ ebꞌ, ix sjulanemta ebꞌ dꞌa vin̈aj Joab chiꞌ. Ix lajvi chiꞌ, ix yalan vin̈ to spuchaj nocꞌ chꞌaac yic tzꞌel ebꞌ dꞌa jun chon̈abꞌ chiꞌ, yuj chiꞌ ix paxcan junjun ebꞌ soldado dꞌa spat, ix meltzajpaxcan vin̈aj Joab chiꞌ dꞌa Jerusalén yic bꞌat lolon vin̈ yedꞌ vin̈ rey chiꞌ.

23 Icha chiꞌ ix aj scanxi vin̈aj Joab chiꞌ yajalil dꞌa scal masanil ebꞌ soldado yic Israel, axo pax vin̈aj Benaía yuninal vin̈aj Joiada, a vin̈ yajal yaj dꞌa ebꞌ cereteo yedꞌ dꞌa ebꞌ peleteo. 24 A vin̈aj Adoram tzꞌilan ebꞌ ayn̈ejcanoch sbꞌoan munlajel, axo vin̈aj Josafat yuninal vin̈aj Ahilud tzꞌibꞌum yaj vin̈ dꞌa vin̈ rey chiꞌ. 25 A vin̈aj Seva stzꞌibꞌan yabꞌixal vin̈ rey chiꞌ dꞌa stzolal. Axo vin̈aj Sadoc yedꞌ vin̈aj Abiatar, sacerdote yaj ebꞌ vin̈. 26 Axo pax vin̈aj Ira, aj chon̈abꞌ Jair, sacerdote yaj vin̈ dꞌa vin̈aj rey David chiꞌ.