2 Yuj chiꞌ ix yavtej ebꞌ gabaonita chiꞌ vin̈ rey chiꞌ yic slolon vin̈ yedꞌ ebꞌ. (A ebꞌ gabaonita chiꞌ, man̈ israeloc ebꞌ, amorreo ebꞌ, aycan ebꞌ dꞌa scal ebꞌ israel chiꞌ, yujto ix yacꞌ stiꞌ ebꞌ israel chiꞌ to max satel ebꞌ gabaonita chiꞌ ebꞌ. Palta axo vin̈aj Saúl, ix yacꞌlej vin̈ satanel ebꞌ yuj svachꞌiloc ebꞌ israel yedꞌ ebꞌ aj Judá yalani.) 3 Ix yalan vin̈aj rey David chiꞌ dꞌa ebꞌ:

—¿Tas vachꞌ tzin cꞌulej eyedꞌoc? ¿Tas spac svacꞌ dꞌayex yuj bꞌaj ix ex ixtaxi, yic vachꞌ syacꞌ svachꞌcꞌolal Jehová dꞌa quibꞌan̈ a on̈ schon̈abꞌ on̈ tic? xchi vin̈.

4 Ix tacꞌvi ebꞌ gabaonita chiꞌ icha tic:

—A coval yedꞌ vin̈aj Saúl yedꞌ yin̈tilal, malaj sbꞌonabꞌil, max bꞌolaj yedꞌ qꞌuen tumin, malaj calan quic co milancham junoc ex, xchi ebꞌ.

Ix yalanxi vin̈aj rey David chiꞌ dꞌa ebꞌ:

—Alec dꞌayin an, tas tze nibꞌej svacꞌ dꞌayex, xchi vin̈.

5 Ix tacꞌvi ebꞌ icha tic:

—Co gana tzacꞌoch ucvan̈oc yin̈tilal vin̈aj Saúl dꞌa yol co cꞌabꞌ, yujto snibꞌejnac vin̈ on̈ sateli yic vachꞌ max on̈ can dꞌa e cal a ex israel ex tic. 6 A ebꞌ ucvan̈ chiꞌ ol co milcham ebꞌ, ol cacꞌanqꞌue locan ebꞌ dꞌa yichan̈ Jehová dꞌa Gabaa dꞌa schon̈abꞌ vin̈aj Saúl chiꞌ, aton vin̈ sicꞌnacoch Jehová reyal, xchi ebꞌ.

Ix stacꞌvej vin̈aj rey David chiꞌ yacꞌan dꞌa ebꞌ. 7 Maj acꞌjilaj vin̈aj Mefi-boset dꞌa yol scꞌabꞌ ebꞌ, aton vin̈ yuninal vin̈aj Jonatán yixchiquin vin̈aj Saúl, yujto yacꞌnac stiꞌ vin̈aj David dꞌa vin̈aj Jonatán chiꞌ dꞌa yichan̈ Jehová to man̈ ol miljoccham yin̈tilal vin̈. 8 Ix schecan vin̈ rey chiꞌ yamchaj vin̈aj Armoni yedꞌ junxo vin̈ scuchan Mefi-boset, aton ebꞌ vin̈ yuninal vin̈aj Saúl yedꞌ ix Rizpa yisil vin̈aj Aja. Ix schecan vin̈ yamchajpax ovan̈ ebꞌ vin̈ yuneꞌ ix yisil vin̈aj Saúl chiꞌ scuchan Merab, aton ebꞌ vin̈ yuneꞌ ix yedꞌ vin̈aj Adriel, yuninal vin̈aj Barzilai aj Mehola. 9 Ix acꞌjioch ebꞌ vin̈ ucvan̈ chiꞌ dꞌa yol scꞌabꞌ ebꞌ aj Gabaón chiꞌ. Ix acꞌjiqꞌue locan ebꞌ vin̈ dꞌa yichan̈ Jehová dꞌa jolom vitz. Icha chiꞌ ix aj scham ebꞌ vin̈ ucvan̈ chiꞌ dꞌa stiempoal yel yich sjochchaj ixim cebada.

10 Axo ix Rizpa chiꞌ ix lichꞌanem jun icha nocꞌ lopil dꞌa sjolom jun qꞌuen qꞌueen, ix can ix stan̈vej snivanil ebꞌ vin̈ chamnac chiꞌ. Ix cann̈ej ix taꞌ yic ix el yich sjochchaj ixim cebada, masanto ix javi n̈abꞌil qꞌuinal. Max scha emlaj nocꞌ ostoc ix dꞌa snivanil ebꞌ vin̈ chiꞌ dꞌa cꞌualil, max schapaxcꞌochlaj nocꞌ chium nocꞌ ix dꞌacꞌvalil.

11 Ayic ix yabꞌan vin̈aj rey David tastac scꞌulej ix Rizpa chiꞌ, 12 ix schecan vin̈ bꞌat icꞌjoccot sbꞌaquil vin̈aj Saúl yedꞌ yic vin̈ yuninal, aton vin̈aj Jonatán, dꞌa chon̈abꞌ Jabes dꞌa yol yic Galaad. Yujto a ebꞌ aj Jabes chiꞌ xidꞌ icꞌjinaccot dꞌa slacꞌanil mercado yic Bet-sán, bꞌaj locancanqꞌue yuj ebꞌ filisteo, ayic smiljicham ebꞌ dꞌa oval dꞌa Gilboa. 13 Ix schecan vin̈ rey chiꞌ icꞌjoccot sbꞌaquil ebꞌ vin̈ chiꞌ yedꞌ pax sbꞌaquil ebꞌ vin̈ ucvan̈ ix qꞌue locan chiꞌ. 14 Ix mucji sbꞌaquil ebꞌ vin̈ chiꞌ dꞌa Zela dꞌa yol yic Benjamín, aton bꞌaj mucan vin̈aj Cis smam vin̈aj Saúl chiꞌ. Ix uji masanil tas icha ix aj yalan vin̈ rey chiꞌ. Ix lajvi chiꞌ, ix yabꞌ Dios tas ix cꞌanchaj dꞌay yuj svachꞌiloc chon̈abꞌ.

15 Ix yacꞌanxi oval ebꞌ filisteo yedꞌ ebꞌ israel, yuj chiꞌ ix bꞌatxi vin̈aj rey David chiꞌ yedꞌ ebꞌ soldado yacꞌ oval yedꞌ ebꞌ, palta ix te cꞌunbꞌi vin̈ rey chiꞌ. 16 Ay jun vin̈ scuchan Isbi-benob, yin̈tilal ebꞌ chaan̈ steel, ix snibꞌej vin̈ smilcham vin̈ rey chiꞌ. A qꞌuen slanza vin̈, ecꞌto uqueꞌ libra yalil qꞌueen, axo dꞌa jun cincho vin̈ ayoch dꞌa snan̈al locanoch jun qꞌuen espada acꞌto. 17 Axo vin̈aj Abisai yuneꞌ ix Sarvia ix colan vin̈aj rey David chiꞌ. Ix smilancham jun vin̈ filisteo chiꞌ vin̈, yuj chiꞌ ix yacꞌ stiꞌ ebꞌ soldado dꞌa vin̈aj David chiꞌ icha tic: Man̈xo ol ach co chabꞌat quedꞌ dꞌa oval, yic vachꞌ max ach chami, yujto a ach ayachoch yipoc co cꞌol a on̈ israel on̈ tic, xchi ebꞌ.

18 Ix lajvi chiꞌ, ix yacꞌanxi oval ebꞌ israel yedꞌ ebꞌ filisteo dꞌa Gob. A dꞌa jun tiempoal chiꞌ, a vin̈aj Sibecai aj Husa ix milancham vin̈aj Saf yin̈tilal ebꞌ chaan̈ steel. 19 An̈ejaꞌ dꞌa Gob chiꞌ ix ochpax junxo oval yedꞌ ebꞌ filisteo chiꞌ. A vin̈aj Elhanán yuninal vin̈aj Jaare-oregim aj Belén, ix milancham vin̈aj Goliat aj Gat. A steꞌal slanza jun vin̈ chiꞌ, lajan spatic icha te teꞌ bꞌaj tzꞌoch an̈ chꞌal dꞌa teꞌ jal-labꞌ.

20 Ix ochpax junxo oval dꞌa Gat. Ay jun vin̈ te chaan̈ steel taꞌ, yin̈tilal ebꞌ chaan̈ steel. A jun vin̈ chiꞌ, lajchaveꞌ yiximal scꞌabꞌ vin̈, lajchaveꞌ pax yiximal yoc vin̈. 21 Ix te bꞌuchvaj vin̈ dꞌa ebꞌ soldado Israel, palta ix miljicham vin̈ yuj vin̈aj Jonatán yuninal vin̈aj Simea yucꞌtac vin̈aj rey David. 22 A ebꞌ vin̈ chan̈van̈ chiꞌ, a vin̈aj Refa aj Gat ay yin̈tilal ebꞌ, palta ix acꞌji ganar ebꞌ vin̈ yuj vin̈aj rey David yedꞌ ebꞌ soldado.