Ix yacꞌ ganar chon̈abꞌ Rabá vin̈aj rey David
20
A dꞌa junxo abꞌil, dꞌa stiempoal sbꞌat ebꞌ rey dꞌa oval, ix can vin̈aj rey David dꞌa Jerusalén, axo vin̈aj Joab ix molbꞌanbꞌat ebꞌ soldado yetisraelal yic syixtanbꞌat ebꞌ tastac ay dꞌa yol smacbꞌen ebꞌ amonita. Ix bꞌatn̈ej ebꞌ, ix yoymitan chon̈abꞌ Rabá ebꞌ, ix yacꞌan oval ebꞌ yedꞌoc, masanto ix yacꞌ ganar jun chon̈abꞌ chiꞌ ebꞌ. 2 Ix lajvi chiꞌ ix cꞌoch vin̈aj rey David yicꞌcot scorona vin̈ sreyal ebꞌ amonita chiꞌ. Nabꞌa oro jun corona chiꞌ, tzijtum qꞌuen qꞌueen vachꞌ yilji ayoch dꞌay, ay am oxeoc arroba yalil. Ix yacꞌanqꞌue ebꞌ dꞌa sjolom vin̈aj rey David chiꞌ. Man̈ jantacoc tas caro stojol ix yicꞌ vin̈ dꞌa jun chon̈abꞌ chiꞌ. 3 Axo masanil ebꞌ anima ixto cani, ix icꞌjibꞌat ebꞌ yuj vin̈, ix acꞌchajoch ebꞌ dꞌa munlajel yedꞌ qꞌuen sierra, qꞌuen piocha yedꞌ qꞌuen chꞌacabꞌ. An̈ejaꞌ icha chiꞌ ix scꞌulej vin̈ yedꞌ ebꞌ amonita dꞌa juntzan̈xo chon̈abꞌ. Ix lajvi chiꞌ ix meltzajcot vin̈ yedꞌ masanil ebꞌ soldado dꞌa Jerusalén.Oval yedꞌ ebꞌ chaan̈ steel
4 Ix lajvi chiꞌ ix och jun oval yedꞌ ebꞌ filisteo dꞌa Gezer. A dꞌa jun oval chiꞌ, a vin̈aj Sibecai aj Husa ix milancham vin̈aj Sipai. A vin̈aj Sipai chiꞌ yin̈tilal vin̈ ebꞌ chaan̈ steel. Icha chiꞌ ix aj scan ebꞌ filisteo dꞌa yol scꞌabꞌ ebꞌ israel. 5 Ix och junxo oval yedꞌ ebꞌ filisteo chiꞌ. A vin̈aj Elhanán yuninal vin̈aj Jair ix milancham vin̈aj Lahmi yucꞌtac vin̈aj Goliat aj Gat. Te nivan spatic yoc slanza vin̈aj Lahmi chiꞌ, icha am spatic te teꞌ bꞌaj sbꞌacꞌchajoch an̈ chꞌal yic ebꞌ schꞌalvi.
6 Ix och junxo oval dꞌa Gat. Ay junxo vin̈ vinac taꞌ te chaan̈ steel, lajchaveꞌ yiximal scꞌabꞌ vin̈, lajchaveꞌ pax yiximal yoc vin̈, yin̈tilal pax vin̈ ebꞌ chaan̈ steel. 7 A jun vin̈ chiꞌ, ix bꞌuchvaj vin̈ dꞌa ebꞌ israel, yuj chiꞌ ix miljicham vin̈ yuj vin̈aj Jonatán yuninal vin̈aj Simea yucꞌtac vin̈aj rey David chiꞌ. 8 A juntzan̈ ebꞌ vin̈ nivac vinac chiꞌ, a vin̈aj Réfah aj Gat ay yin̈tilal ebꞌ vin̈, palta ix miljicham ebꞌ vin̈ yuj vin̈aj rey David yedꞌ ebꞌ soldado vin̈.