—A dꞌa jun chon̈abꞌ, ay chavan̈ ebꞌ vin̈ vinac: Ay jun vin̈ te bꞌeyum, ay pax junxo vin̈ te mebꞌaꞌ. 2 A vin̈ bꞌeyum chiꞌ, te ay nocꞌ scalnel vin̈ yedꞌ nocꞌ svacax. 3 Axo pax vin̈ mebꞌaꞌ chiꞌ jun, junn̈ej pitan̈ tzun scalnel vin̈ manbꞌil yuuj. Aꞌ vin̈ ix qꞌuibꞌtzitan nocꞌ. A dꞌa yol spat vin̈ ix qꞌuibꞌ nocꞌ yedꞌ ebꞌ yuninal. A tas sva vin̈, tas yucꞌ vin̈, a chiꞌ sva nocꞌ, syucꞌ nocꞌ. Schelvay nocꞌ vin̈, te xajan nocꞌ yuj vin̈. Ichato yisil nocꞌ vin̈. 4 Ay jun cꞌu, ay jun vin̈ ton̈ej sbꞌeyeqꞌui, ix ecꞌ vin̈ yacꞌ spaxyal vin̈ bꞌeyum chiꞌ. A vin̈ bꞌeyum chiꞌ, maj syamlaj junoc nocꞌ scalnel vin̈, ma junoc nocꞌ svacax vin̈ yic syacꞌan schi vin̈ paxyalvum chiꞌ, te ya yel nocꞌ yuj vin̈. Axo jun pitan̈ nocꞌ yic vin̈ mebꞌaꞌ chiꞌ ix bꞌat yacꞌ icꞌjoccot vin̈. A nocꞌ ix yacꞌ vin̈ schi jun vin̈ paxyalvum chiꞌ, xchi vin̈aj Natán chiꞌ dꞌa vin̈aj rey David chiꞌ.

5 Ix cot val yoval vin̈aj rey David chiꞌ, ix yalan vin̈ dꞌa vin̈aj Natán chiꞌ:

—Dꞌa yichan̈ Jehová Dios svalaꞌ, a jun vin̈ icha chiꞌ ix scꞌulej, smoj val scham vin̈. 6 Yovalil syacꞌ chan̈van̈oc nocꞌ vin̈ sqꞌuexuloc nocꞌ yuneꞌ calnel chiꞌ, yujto a jun vin̈ vinac chiꞌ malaj val jabꞌoc yoqꞌuelcꞌolal vin̈ dꞌa yetanimail, xchi vin̈.

7 Ix yalan vin̈aj Natán chiꞌ:

—A jun vin̈ chiꞌ, a ach toni. Icha tic yalan Jehová co Diosal a on̈ israel on̈ tic dꞌayach: A in ix ach in sicꞌoch sreyaloc Israel, ix ach in colanel dꞌa yol scꞌabꞌ vin̈aj Saúl. 8 Ix vacꞌ spat yedꞌ ebꞌ ix yetbꞌeyum vin̈ ajalil chiꞌ dꞌayach, ix ach vacꞌanoch sreyaloc chon̈abꞌ Israel yedꞌ Judá. Tato jabꞌn̈ej juntzan̈ chiꞌ tzabꞌi, tzato yal vacꞌan nan̈alocxo dꞌayach. 9 ¿Tas yuj ix a patiquejel in checnabꞌil, ix a cꞌulej tas to max scha in cꞌool? Ix a milcham vin̈aj Urías heteo yedꞌ qꞌuen yespada ebꞌ amonita. Ix icꞌancan ix yetbꞌeyum vin̈ chiꞌ. 10 Yuj chiꞌ ayn̈ej mach ol miljoccham dꞌa scal in̈tilal, yujto ix in a patiquejeli, ix icꞌancan ix yetbꞌeyum vin̈aj Urías heteo. 11 A in Jehová in svalaꞌ: Ol vacꞌoch yaelal dꞌa ibꞌan̈. A yaelal chiꞌ, a dꞌa scal ebꞌ uninal ol elta, dꞌa val ichan̈ ol viqꞌuelta ebꞌ ix etbꞌeyum, ol vacꞌan ebꞌ ix dꞌa junoc vin̈ uninal, ol vay vin̈ yedꞌ ebꞌ ix dꞌa cꞌualil dꞌa yichan̈ anima. 12 A ach tic, elcꞌaltac ix a cꞌulej, a inxo tic, dꞌa val saquilqꞌuinal dꞌa cꞌualil ol in chꞌoxel dꞌa yichan̈ chon̈abꞌ Israel, xchi Jehová, xchi vin̈aj Natán chiꞌ.

13 Ix schaan smuloc vin̈aj rey David dꞌa yichan̈ vin̈aj Natán chiꞌ, ix yalan vin̈:

—Dꞌa val yel, ix och in mul dꞌa Jehová, xchi vin̈.

Ix yalanpax vin̈aj Natán chiꞌ:

—Yel ton tzalaꞌ, palta ix acꞌji lajvoc a mul chiꞌ yuj Jehová, yuj chiꞌ man̈xo ol ach chamlaj. 14 Palta a yuj tas ix a cꞌulej chiꞌ, tzꞌalji chucal lolonel dꞌa Jehová yuj ebꞌ ajcꞌol yajoch dꞌay, yuj chiꞌ ol cham jun uninal toto ix alji chiꞌ, xchi vin̈aj Natán chiꞌ.

15 Ix lajvi chiꞌ ix pax vin̈aj Natán chiꞌ dꞌa spat. Axo Jehová, ix acꞌanoch syaelal jun yuninal vin̈aj David chiꞌ yedꞌ ix yetbꞌeyumcan vin̈aj Urías chiꞌ. 16 Yuj chiꞌ, ix och ijan vin̈ scꞌanan dꞌa Jehová to sbꞌoxi scꞌol vin̈ unin chiꞌ. Ix och vin̈ dꞌa tzecꞌojcꞌolal, ix cann̈ej telan vin̈ dꞌa sat luum dꞌa junjun acꞌval. 17 A jantac ebꞌ vin̈ yichamtac vinaquil chon̈abꞌ smunlaj yedꞌ vin̈, tzꞌoch ijan ebꞌ vin̈ stevi to sqꞌue vaan vin̈ dꞌa sat lum chiꞌ, palta maxtzac yal-laj scꞌol vin̈, max bꞌat valaj vin̈ yedꞌ ebꞌ vin̈.

18 Axo dꞌa yuquil cꞌual syamchaj vin̈ unin chiꞌ yuj ilya chiꞌ, ix chami. Ix te xiv ebꞌ vin̈ smunlajum vin̈ rey chiꞌ yalan dꞌay, yujto sna ebꞌ: Ina ayic pitzanto vin̈ unin chiꞌ, maj scha yabꞌ vin̈ tas ix calaꞌ, ocxom val ticnaic. Tato scal dꞌa vin̈ to toxo ix chami, tas am ol scꞌuloc vin̈, xchi ebꞌ vin̈.

19 Ix yabꞌan vin̈aj rey David chiꞌ ayic sajson ebꞌ vin̈ sloloni, ix snaanel vin̈ to toxo ix cham vin̈ unin chiꞌ, yuj chiꞌ ix scꞌanbꞌan vin̈:

—¿Tom toxo ix chami? xchi vin̈.

—Toxo ix cham mamin rey, xchi ebꞌ vin̈.

20 Ayic ix yabꞌan vin̈ icha chiꞌ, ix qꞌue vaan vin̈ dꞌa sat luum chiꞌ, ix sbꞌicanel sbꞌa vin̈, ix yacꞌanqꞌue yan̈al xil sjolom vin̈, ix sqꞌuexanel spichul vin̈, ix och vin̈ ejmelal dꞌa yol scajnubꞌ Jehová. Ix lajvi chiꞌ, ix bꞌat scꞌanan va sbꞌa vin̈ dꞌa yol spat. 21 Ix scꞌanbꞌan ebꞌ vin̈ smunlajvum vin̈ chiꞌ dꞌay:

—Mamin rey, ¿tas val yuj icha tic tza cꞌulej? Ayic pitzanto jun uninal chiꞌ, man̈ jabꞌoc syal a cꞌol tzach vaꞌi, tzach ocꞌ yuuj. Axo ticnaic toxo ix chami, tzach qꞌue vaan, tzach vaꞌi, xchi ebꞌ vin̈ dꞌa vin̈.

22 Ix tacꞌvi vin̈ dꞌa ebꞌ vin̈:

—Ayic pitzanto vin̈ unin chiꞌ, tzin och dꞌa tzecꞌojcꞌolal, tzin oqꞌui, a in naani talaj tzato ocꞌ scꞌol Jehová dꞌayin. 23 Axo pax ticnaic, ¿tasto val yuj tzin och dꞌa tzecꞌojcꞌolal? ¿Tom olto pitzvoc vin̈? Man̈xa bꞌaqꞌuin̈ ol jax vin̈ dꞌayin, an̈ej to a in ol in bꞌat bꞌaj ix cꞌoch vin̈ chiꞌ, xchi vin̈.

24 Ix lajvi chiꞌ, ix yacꞌan snivanil scꞌol ix Betsabé vin̈aj David chiꞌ, ix vay vin̈ yedꞌ ix, ix scuchanoch yuneꞌ ix. Ix alji junxo yuneꞌ ix, Salomón ix yacꞌ ix bꞌiej. Te xajan ix aj jun unin chiꞌ yuj Jehová. 25 Ix schecanbꞌat vin̈aj Natán Jehová yal dꞌa vin̈aj rey David chiꞌ to xajan jun unin chiꞌ yuuj. Yuj chiꞌ Jedidías ix sbꞌiej jun unin chiꞌ yuj Jehová.^*

26 Yacbꞌan chiꞌ, a vin̈aj Joab ix acꞌan oval yedꞌ ebꞌ amonita dꞌa Rabá. Ayic vanxo yacꞌan ganar vin̈ yoch dꞌa yol jun chon̈abꞌ chiꞌ, 27 ix yalancot vin̈ dꞌa vin̈aj rey David chiꞌ icha tic: Vanxo voch dꞌa yol chon̈abꞌ Rabá. A jun cuartel bꞌaj ay ebꞌ stan̈van a aꞌ scꞌanchaj dꞌa chon̈abꞌ tic, ayxo och dꞌa yol in cꞌabꞌ. 28 Yuj chiꞌ, mamin rey, molbꞌej masanil ebꞌ soldado aycan edꞌoc, tzach cot yedꞌ ebꞌ acꞌ oval dꞌa jun chon̈abꞌ tic yic tzacꞌan ganar. Qꞌuinaloc a in svacꞌ ganar jun chon̈abꞌ tic, a in am tzin bꞌinajcan dꞌay, xchicot vin̈aj Joab chiꞌ.

29 Ix smolbꞌan masanil ebꞌ soldado vin̈ rey chiꞌ, ix bꞌat vin̈ yacꞌ oval dꞌa chon̈abꞌ Rabá chiꞌ. Ix yacꞌan ganar vin̈ yicꞌancani. 30 Ix yicꞌanecꞌ scorona vin̈ sreyal ebꞌ amonita chiꞌ vin̈. Ix yacꞌanqꞌue ebꞌ dꞌa sjolom vin̈. Ay jun qꞌuen qꞌueen te caro stojol ayoch dꞌay. A jun corona chiꞌ, te al, ay am oxeoc arroba yalil. Tzijtumto pax tastac te ay stojol ix yiqꞌuecꞌ vin̈aj David chiꞌ dꞌa jun chon̈abꞌ chiꞌ. 31 Axo ebꞌ anima ixto cani, ix icꞌjielta ebꞌ yuj vin̈, ix acꞌjioch ebꞌ dꞌa munlajel ya, icha dꞌa qꞌuen sierra, qꞌuen piocha yedꞌ pax qꞌuen chꞌacabꞌ. Ix acꞌjipaxoch ebꞌ dꞌa mucoj ladrillo dꞌa horno. An̈ejaꞌ icha pax chiꞌ ix aj masanil ebꞌ ay dꞌa juntzan̈xo schon̈abꞌ ebꞌ amonita yuj vin̈. Ix lajvi chiꞌ, ix meltzaj vin̈ yedꞌ masanil ebꞌ soldado dꞌa Jerusalén.