A vin̈aj rey David yedꞌ ix Betsabé
11
A dꞌa junxo abꞌil, dꞌa stiempoal sbꞌat ebꞌ rey dꞌa oval, ix checjibꞌat vin̈aj Joab yuj vin̈aj rey David yedꞌ masanil ebꞌ yajalil ebꞌ soldado yedꞌ masanil ebꞌ soldado israel dꞌa oval. Ix satanel ebꞌ amonita ebꞌ, ix yoyan sbꞌa ebꞌ dꞌa spatic chon̈abꞌ Rabá. Maj bꞌatlaj vin̈ rey chiꞌ yedꞌ ebꞌ, ix can vin̈ dꞌa Jerusalén. 2 A dꞌa jun yemcꞌualil, ix qꞌue vaan vin̈aj rey David chiꞌ dꞌa sat schꞌat, ix qꞌue vin̈ matzꞌanel dꞌa span̈anil yibꞌan̈ spat. Ayic ayecꞌ vin̈ taꞌ, ix yilanbꞌat jun ix ix vin̈, van sbꞌican sbꞌa ix, te vachꞌ yilji ix ix yil vin̈. 3 Elan̈chamel ix schecbꞌat vin̈ cꞌanbꞌajecꞌoc mach jun ix ix chiꞌ, axo ix alchaj dꞌa vin̈ to a ix Betsabé yisil vin̈aj Eliam, yetbꞌeyum vin̈aj Urías heteo. 4 Elan̈chamel ix schecbꞌat schecabꞌ vin̈ yic bꞌat icꞌjoccot ix, ix vay vin̈ yedꞌ ix. Ix lajvi chiꞌ, ix sacbꞌitan sbꞌa ix, ix pax ix dꞌa spat.5 Axo ix aji, ix scuchcanoch yuneꞌ ix, yuj chiꞌ elan̈chamel ix yalbꞌat ix yabꞌ vin̈aj rey David chiꞌ. 6 Ayic ix yabꞌan vin̈ icha chiꞌ, ix yalanbꞌat vin̈ dꞌa vin̈aj Joab to spaxta vin̈aj Urías chiꞌ dꞌa oval. Ix scꞌanabꞌajan vin̈aj Joab tas ix yal vin̈ chiꞌ. 7 Axo ix javi vin̈aj Urías schꞌox sbꞌa dꞌa yichan̈ vin̈ rey chiꞌ, ix scꞌanbꞌan vin̈ tato vachꞌ scꞌol vin̈aj Joab yedꞌ ebꞌ soldado, chajtil pax yacꞌan oval. 8 Ix lajvi chiꞌ ix yalan vin̈ dꞌa vin̈aj Urías chiꞌ icha tic: Ixic, bꞌat icꞌ ip, tzach vay dꞌa a pat, xchi vin̈ dꞌa vin̈.
Ixn̈ej val elta vin̈ dꞌa yol spalacio vin̈ rey chiꞌ, ix bꞌat acꞌjican svael vin̈, te vachꞌ icha svael vin̈ rey. 9 Palta maj bꞌatlaj vin̈ dꞌa spat chiꞌ. Ix vaycan vin̈ yedꞌ ebꞌ soldado stan̈van palacio chiꞌ. 10 Axo dꞌa junxo cꞌu, ix alji dꞌa vin̈ rey chiꞌ to maj bꞌat vaylaj vin̈aj Urías chiꞌ dꞌa spat dꞌa jun acꞌval chiꞌ. Yuj chiꞌ ix scꞌanbꞌej vin̈ rey chiꞌ dꞌa vin̈:
—¿Tas yuj maj xidꞌ ach vay dꞌa a pat, ina to ayxotax a bꞌatcani? xchi vin̈ rey chiꞌ dꞌa vin̈.
11 Ix tacꞌvi vin̈:
—Max yal-laj in comon bꞌat dꞌa in pat yic tzin vaꞌi, tzin vaypax yedꞌ ix vetbꞌeyum yacbꞌan a teꞌ scaxail strato Jehová yedꞌ ebꞌ vetsoldadoal yic Israel yedꞌ ebꞌ yic Judá, a teꞌ xiltac teꞌ ayqꞌue dꞌa yibꞌan̈ ebꞌ, icha pax chiꞌ vin̈ vajalil vin̈aj Joab yedꞌ ebꞌ yetyajalil, a dꞌa acꞌlic bꞌaj svay ebꞌ. Mamin rey, max yal-laj in cꞌol to vachꞌ bꞌaj ol in vayoc, xchi vin̈aj Urías chiꞌ.
12 Ix yalan vin̈aj David chiꞌ dꞌa vin̈:
—Canan̈ dꞌa junxo acꞌval tic, axo qꞌuicꞌan tzach bꞌati, xchi vin̈ dꞌa vin̈.
Ichato chiꞌ ix can vin̈aj Urías chiꞌ dꞌa junxo acꞌval chiꞌ dꞌa Jerusalén. 13 Ix yavtej vin̈ vin̈ rey chiꞌ vael yedꞌoc, ix yacꞌan vino vin̈ yuqꞌuej vin̈. Ix qꞌue dꞌa sjolom vin̈aj Urías chiꞌ, palta man̈ yujoc chiꞌ ix bꞌat vin̈ vayan̈ dꞌa spat chiꞌ, ataꞌ ix vayxican vin̈ yedꞌ ebꞌ soldado junelxo.
14 Axo ix qꞌuin̈ibꞌi dꞌa junxo cꞌu, ix stzꞌibꞌanbꞌat jun carta vin̈aj rey David chiꞌ dꞌa vin̈aj Joab, ix schecan vin̈ yicꞌbꞌat chꞌan̈ vin̈aj Urías chiꞌ. 15 Ix yalanbꞌat vin̈ dꞌa chꞌan̈ icha tic: Tzacꞌoch vin̈aj Urías tic dꞌa yichan̈ bꞌaj te ov yacꞌan oval, tzex el dꞌa stzꞌey vin̈ yic vachꞌ scham vin̈, xchibꞌat vin̈.
16 Yuj chiꞌ, ayic ix yoyan sbꞌa vin̈aj Joab chiꞌ yedꞌ ebꞌ soldado dꞌa spatic jun chon̈abꞌ chiꞌ, a bꞌaj ayecꞌ ebꞌ ajcꞌol te jelan, ataꞌ ix acꞌjioch vin̈aj Urías chiꞌ yuj vin̈aj Joab chiꞌ. 17 Axo yic ix elta ebꞌ ajcꞌol chiꞌ dꞌa yol schon̈abꞌ, ix yacꞌan oval ebꞌ yedꞌ ebꞌ soldado vin̈aj Joab chiꞌ. Ay jayvan̈ ebꞌ soldado vin̈aj David chiꞌ ix chami, a dꞌa scal ebꞌ ix cham vin̈aj Urías chiꞌ.
18 Ix yacꞌancot jun vin̈ schecabꞌ vin̈aj Joab chiꞌ dꞌa vin̈aj rey David yic syalani chajtil ix aj yoch oval chiꞌ. 19 Ix yalan vin̈ dꞌa vin̈ schecabꞌ chiꞌ: Ayic slajvi alan dꞌa vin̈ rey tas ix aj yoch oval tic, 20 talaj scot yoval vin̈, syalan vin̈: ¿Tas yuj ix ex te och dꞌa tzꞌey jun chon̈abꞌ chiꞌ? ¿Tom man̈ eyojtacoc to a ebꞌ ayqꞌue dꞌa yibꞌan̈ muro syal yactanemta junoc tas ebꞌ dꞌa eyibꞌan̈? 21 ¿Tom man̈ eyojtacoc yabꞌixal jun ix ix dꞌa Tebes, ix yactejemta jun qꞌuen qꞌueen yic molino ix dꞌa sjolom vin̈aj Abimelec yuninal vin̈aj Jerobaal? ¿Tas yuj ix e te nitzejoch e bꞌa? ta xchi vin̈, tzalani to ix champax vin̈aj Urías heteo, xchi vin̈aj Joab chiꞌ. 22 Ix cot jun vin̈ checabꞌ chiꞌ, ix javi vin̈ dꞌa yichan̈ vin̈aj rey David chiꞌ, ix yalan vin̈ masanil tas ix yalcot vin̈aj Joab chiꞌ.
23 Ix yalan vin̈ icha tic:
—Te ov ix aj yelta ebꞌ ajcꞌol chiꞌ dꞌayon̈. Ijan val ix on̈ yacꞌ ganar ebꞌ, palta ix co tecꞌbꞌej co bꞌa co pechan meltzaj ebꞌ, masanto ix ochxican ebꞌ dꞌa yol schon̈abꞌ chiꞌ. 24 A dꞌa yibꞌan̈ muro ix julvajcot ebꞌ vin̈ ajcꞌol chiꞌ dꞌa ebꞌ a checabꞌ, yuj chiꞌ ix cham jayvan̈ ebꞌ vin̈ soldado, ix champax vin̈aj Urías heteo, xchi jun vin̈ checabꞌ chiꞌ.
25 Ix yalan vin̈ rey dꞌa jun vin̈ checabꞌ chiꞌ:
—Al dꞌa vin̈aj Joab chiꞌ to max cuslaj vin̈ yuj jun chiꞌ. Toxonton icha chiꞌ dꞌa oval tic, ay mach schami. Yacꞌocabꞌ yip vin̈ yacꞌan oval dꞌa jun chon̈abꞌ chiꞌ, masanto syal satel ebꞌ anima chiꞌ yuj vin̈, xa chi dꞌa vin̈. Icha chiꞌ tzꞌaj iptzitan vin̈aj Joab chiꞌ, xchi vin̈aj rey David chiꞌ dꞌa jun vin̈ checabꞌ chiꞌ.
26 Ayic ix yabꞌan ix yetbꞌeyum vin̈aj Urías to toxo ix cham vin̈ yetbꞌeyum ix chiꞌ, ix och ix dꞌa cuscꞌolal yuj vin̈. 27 Ayic ix lajvi yecꞌ scuscꞌolal ix, icha sbꞌeybꞌal ebꞌ, ix bꞌat checchaj icꞌjicot ix dꞌa spat yuj vin̈aj rey David chiꞌ, ix och ix yetbꞌeyumoc vin̈. Ix alji jun yuneꞌ ix. Palta a jun tas ix scꞌulej vin̈ chiꞌ, maj schalaj scꞌol Jehová.