A yabꞌixal vin̈aj Amnón yedꞌ ix Tamar
13
1-2 A vin̈aj Absalón yuninal vin̈aj rey David, ay jun ix yanabꞌ vin̈ scuch Tamar, te vachꞌ yilji ix. Axo ix aji, a vin̈aj Amnón yuninal pax vin̈aj rey David chiꞌ, ix te can sgana vin̈ dꞌa ix Tamar schabꞌil yanabꞌ, yuj chiꞌ ix te chucbꞌi scꞌol vin̈ yuj snaubꞌtan̈an ix. Te ayoch yilumal ix yujto cobꞌesto ix, yuj chiꞌ ix sna vin̈aj Amnón chiꞌ to ajaltac scꞌuman ix vin̈. 3 Palta ay jun vin̈ yamigo vin̈ scuchan Jonadab, yuninal vin̈aj Simea yucꞌtac vin̈aj David chiꞌ, te jelan vin̈ dꞌa chucal. 4 Ay jun cꞌu ix scꞌanbꞌej vin̈ dꞌa vin̈aj Amnón chiꞌ:—Ach yuninal rey, ¿tas tzach icꞌani? ¿Tas yuj junjun cꞌu tzach te tzꞌonbꞌi yuj cuscꞌolal? Al dꞌayin tas tzach icꞌani, xchi vin̈.
Ix tacꞌvi vin̈aj Amnón chiꞌ:
—Ste can val in gana dꞌa ix Tamar, yanabꞌ vin̈ schabꞌil vucꞌtac aj Absalón, xchi vin̈.
5 Axo ix yalan vin̈aj Jonadab chiꞌ dꞌa vin̈ icha tic:
—A ticnaic, ecꞌan̈ jichan dꞌa a chꞌat, tza tzꞌacan penaayax a bꞌa. Ayic ol javoc vin̈ a mam ach yilaꞌ, tzal dꞌa vin̈ icha tic: Tzin tevi dꞌayach to tza checcot ix Tamar ix vanabꞌ, yic syacꞌ jabꞌoc in vael ix, aocabꞌ ix sbꞌoani, yic vachꞌ ol vilaꞌ, ol in vaani, ol in chaan dꞌa ix, xa chi dꞌa vin̈, xchi vin̈.
6 Ix ecꞌ jichan vin̈aj Amnón chiꞌ dꞌa schꞌat, ix stzꞌacan penaayax sbꞌa vin̈. Ayic ix cꞌoch vin̈ rey chiꞌ yil vin̈, ix yal vin̈ icha tic:
—Tzin tevi dꞌayach to scot ix vanabꞌ Tamar dꞌa tic, sbꞌoan chabꞌoc in pan ix, tzul yacꞌancan ix dꞌayin, xchi vin̈ dꞌa vin̈ rey chiꞌ.
7 Yuj chiꞌ ix checjibꞌat ix yuj vin̈aj rey David chiꞌ, ix yalan vin̈ dꞌa ix:
—Ixic dꞌa spat vin̈aj Amnón a nulej, bꞌat a bꞌoan jabꞌoc tas sva vin̈, xchi vin̈.
8 Yuj chiꞌ ix bꞌat ix Tamar dꞌa spat vin̈ snulej chiꞌ, axo ix cꞌoch ix, jichan ecꞌ vin̈. Qꞌuelanoch vin̈ dꞌa ix, ix sbꞌoan ixim pan chiꞌ ix. 9 Ix yacꞌan cꞌanbꞌoc ixim ix dꞌa yol xalten, ix yicꞌanelta ix dꞌa yol xalten chiꞌ, palta axo vin̈aj Amnón chiꞌ maj yal-laj scꞌol vin̈ ix vaꞌi, ix yalan vin̈: Elan̈ec dꞌa tic e masanil, xchi vin̈. Ix elta ebꞌ, man̈xalaj junoc mach ix cani. 10 Ayic toxo ix elta ebꞌ chiꞌ smasanil dꞌa patic pat chiꞌ, ix yalan vin̈ dꞌa ix Tamar chiꞌ icha tic:
—Icꞌcot in vael chiꞌ bꞌaj tzin vay tic, xchi vin̈ dꞌa ix. Ix yicꞌanbꞌat ixim pan chiꞌ ix dꞌa vin̈ snulej chiꞌ dꞌa schꞌat. 11 Axo yic ix cꞌoch ix dꞌa stzꞌey vin̈ yedꞌ svael chiꞌ, ix och lacꞌnaj vin̈ dꞌa ix, ix yalan vin̈:
—Cotan̈ ach vanabꞌ, vayan̈ vedꞌoc, xchi vin̈ dꞌa ix.
12 Ix tacꞌvi ix dꞌa vin̈:
—Maay ach in nulej, man̈ in acꞌ pural, yujto a jun tic man̈ smojoc yuji dꞌa co cal a on̈ israel on̈ tic, te qꞌuixvelal ol aj jun tic. 13 Nato nabꞌi ¿tas ol in cꞌulej yuj jun in qꞌuixvelal tic? An̈ejtonaꞌ a ach tic icha junoc quistal ol ach ajcan dꞌa scal co chon̈abꞌ tic. A ticnaic, sval dꞌayach to tzal dꞌa vin̈ rey, a vin̈ ol in acꞌan dꞌayach etbꞌeyumoc, xchi ix.*
14 Palta majxo schalaj yabꞌ vin̈ tas ix yal ix chiꞌ. Yujto te ay yip vin̈ dꞌa yichan̈ ix, yuj chiꞌ ix yacꞌan pural ix vin̈ yixtani. 15 Ayic ix lajvi yixtan ix vin̈, te chuclaj ix aj yilanoch ix vin̈, dꞌa yichan̈ ix aj scan sgana vin̈ dꞌa ix dꞌa sbꞌabꞌelal, yuj chiꞌ ix yal vin̈ dꞌa ix icha tic:
—Qꞌuean̈ vaan, elan̈ dꞌa tic dꞌa elan̈chamel, xchi vin̈ dꞌa ix.
16 Palta ix tacꞌvi ix:
—Maay ach in nulej, tato tzin a pechel dꞌa tic ticnaic, yelxo te chuc dꞌa yichan̈ tas ix in utej tic, xchi ix.
—Pechel jun ix ix tic dꞌa tic, vachꞌ tzutej a macan teꞌ pat chiꞌ, xchi vin̈.
18 Yuj chiꞌ ix pechjielta ix yuj vin̈ schecabꞌ vin̈ chiꞌ, vachꞌ ix yutej vin̈ smacan stiꞌ teꞌ pat chiꞌ. A ix Tamar chiꞌ, ayoch jun spichul ix te vachꞌ yuuj, aton syacꞌoch ebꞌ ix cobꞌestac yisil rey. 19 Ix yacꞌanqꞌue qꞌuen ticꞌaqꞌuil taan̈ ix dꞌa sjolom, ix sn̈icꞌchitanbꞌat spichul ix ayoch yuuj, ix yacꞌanoch scꞌabꞌ ix dꞌa sat, te chaan̈ ix ocꞌ ix sbꞌat dꞌa yoltac bꞌe. 20 Ix scꞌanbꞌan vin̈ snulej ix scuchan Absalón dꞌay:
—¿Tom ach yixtej vin̈ a nulej aj Amnón chiꞌ? Tato icha chiꞌ ach vanabꞌ, eman̈ numan bꞌela. Mocabꞌ ach te ocꞌ yuj ilcꞌolal yuj jun chiꞌ, yujto a nulej vin̈, xchi vin̈ dꞌa ix.
Yuj chiꞌ ix can ix dꞌa spat vin̈ snulej chiꞌ. Te cuscꞌolal ix ajcan ix. 21 Ayic ix yabꞌan vin̈aj rey David masanil tas ix uji chiꞌ, ix cot val yoval vin̈ sicꞌlabꞌil. 22 Axo vin̈aj Absalón chiꞌ, malaj tas ix yal vin̈ dꞌa vin̈aj Amnón chiꞌ, vachꞌchom ste chichon scꞌol vin̈ dꞌa vin̈ yuj bꞌaj ix ixtaj ix yanabꞌ chiꞌ.
Ix miljicham vin̈aj Amnón
23 Schabꞌilxo abꞌil chiꞌ, a ebꞌ vin̈ schecabꞌ vin̈aj Absalón chiꞌ, sjoxvi calnel ebꞌ vin̈ dꞌa Baal-hazor, dꞌa slacꞌanil schon̈abꞌ ebꞌ aj Efraín. Ix yavtan masanil ebꞌ vin̈ yuninal vin̈ rey chiꞌ vin̈aj Absalón chiꞌ dꞌa jun nivan vael. 24 Ix bꞌat yalan vin̈ dꞌa vin̈ rey chiꞌ icha tic:
—Mamin rey, a ticnaic a ebꞌ vin̈ in checabꞌ van sjoxan nocꞌ in calnel ebꞌ vin̈. Tzin nibꞌej, tzach bꞌat vedꞌoc yedꞌ masanil ebꞌ etyajalil, xchi vin̈.
25 Ix tacꞌvi vin̈ rey chiꞌ dꞌa vin̈ icha tic:
—Maay ach vuninal, max yal-laj co bꞌat co masanil edꞌoc. Tecan nivan tas bꞌat co lajeli, xchi vin̈.
Ix och val tean vin̈aj Absalón chiꞌ dꞌa vin̈, palta maj yal-laj scꞌol vin̈ ix bꞌati, an̈ej vachꞌ lolonel ix yal vin̈ dꞌa vin̈. 26 Ix yalanxi vin̈aj Absalón chiꞌ:
—Tato val yel max yal-laj a bꞌati, elocabꞌ dꞌa a cꞌol a chaanbꞌat vin̈ vucꞌtac aj Amnón vedꞌoc, xchi vin̈.
—¿Tas yuj tza nibꞌej sbꞌat vin̈ ucꞌtac aj Amnón chiꞌ edꞌoc? xchi vin̈aj rey David chiꞌ dꞌa vin̈.
27 Ix och val tean vin̈aj Absalón chiꞌ dꞌa vin̈, yuj chiꞌ ix schecbꞌat vin̈aj Amnón chiꞌ vin̈ yedꞌ juntzan̈xo ebꞌ vin̈ yucꞌtac. 28 Ayic mantzac ochlaj vael chiꞌ, ix yalan vin̈aj Absalón chiꞌ dꞌa ebꞌ vin̈ schecabꞌ: Scham val eyilani ayic toxo ix qꞌue an̈ dꞌa sjolom vin̈aj Amnón chiꞌ, ol valan dꞌayex to tze milcham vin̈. Man̈ ex xivoc, yujto a in svalaꞌ, yuj chiꞌ tze tecꞌbꞌej e bꞌa e milancham vin̈, xchi vin̈.
29 Ix scꞌanabꞌajej ebꞌ vin̈ tas ix yal vin̈, ix smilcham vin̈aj Amnón chiꞌ ebꞌ vin̈. Ayic ix yilan masanil ebꞌ vin̈ yuninal vin̈ rey chiꞌ, ix qꞌue somnaj ebꞌ vin̈, ix laj qꞌue ebꞌ vin̈ dꞌa yibꞌan̈ nocꞌ smula, ix bꞌat ebꞌ vin̈ elelal.
30 Ayic ayto och ebꞌ vin̈ dꞌa yol bꞌe, ix cꞌoch specal dꞌa vin̈aj rey David to toxo ix cham masanil ebꞌ yuninal vin̈ yuj vin̈aj Absalón, man̈xo junoc ebꞌ vin̈ ixto cani. 31 Yuj chiꞌ ix qꞌue jucnaj vin̈, ix sn̈icꞌchitanbꞌat spichul vin̈, ix sjulanecꞌ telan sbꞌa vin̈ dꞌa sat luum yuj cuscꞌolal. Axo masanil ebꞌ yetyajalil vin̈ ayecꞌ yedꞌoc, ix sn̈icꞌchitejpaxbꞌat spichul ebꞌ. 32 Palta a vin̈aj Jonadab yuninal vin̈aj Simea, yucꞌtac vin̈aj rey David chiꞌ, ix yal vin̈ dꞌa vin̈ rey chiꞌ icha tic:
—Mamin rey, man̈ a naꞌ icha chiꞌ. Maj chamlaj ebꞌ vin̈ uninal chiꞌ smasanil, an̈ej vin̈aj Amnón ix chami, yujto icha chiꞌ ix aj snaan vin̈aj Absalón dꞌa spatic vin̈, yictax ix yixtan ix Tamar vin̈. 33 Yuj chiꞌ man̈ a naꞌ to masanil ebꞌ vin̈ uninal ix chami, palta an̈ej vin̈aj Amnón ix chami, xchi vin̈.
34 Yacbꞌan chiꞌ ix bꞌat vin̈aj Absalón chiꞌ elelal. Ay jun vin̈ quelem ayqꞌue dꞌa yibꞌan̈ smuroal chon̈abꞌ chiꞌ yic smaclani, ix qꞌue qꞌuelnaj vin̈, ix yilan vin̈ to ay juntzan̈ anima tzꞌemta dꞌa pacꞌan dꞌa sat vitz dꞌa sbꞌeal Horonaim, yuj chiꞌ ix yalbꞌat vin̈ dꞌa vin̈ rey chiꞌ. 35 Ix yalan vin̈aj Jonadab dꞌa vin̈ rey chiꞌ:
—Mamin rey, van sjavi ebꞌ vin̈ uninal icha ix aj valan a in a checabꞌ in tic, xchi vin̈.
36 Ato val slajvi yalan vin̈aj Jonadab chiꞌ ix cꞌoch ebꞌ vin̈ yuninal vin̈ rey chiꞌ. Ayic ix cꞌoch ebꞌ vin̈, ix qꞌue sjaj ebꞌ vin̈ yoqꞌui, ix te ocꞌpax vin̈ rey chiꞌ yedꞌ ebꞌ yetyajalil. 37-38 Axo vin̈aj Absalón chiꞌ, ix bꞌatcan vin̈ elelal. A dꞌa vin̈aj Talmai yuninal vin̈aj Amiud sreyal Gesur ix cꞌochcan vin̈. Oxeꞌ abꞌil ix can vin̈ taꞌ. Axo pax vin̈aj rey David chiꞌ, junjun cꞌu ix ocꞌ vin̈ yuj schamel vin̈ yuninal. 39 Ayic toxo ix ecꞌbꞌat scuscꞌolal vin̈ chiꞌ jun, snibꞌej vin̈ sbꞌat yil vin̈aj Absalón chiꞌ.