Ix yalan vin̈aj Joab chiꞌ tas ol yutoc ix yalani. 4 Ix bꞌat ix dꞌa yichan̈ vin̈ rey chiꞌ, ix em n̈ojan ix dꞌa sat luum yuj schꞌoxanel yemnaquilal ix dꞌa vin̈, ix yalan ix:

—Mamin rey, colvajan̈ vedꞌoc, xchi ix.

5 —¿Tas tzach icꞌani? xchi vin̈.

Ix tacꞌvi ix:

—Mamin rey, a in tic chamnacxo vin̈ vetbꞌeyum. 6 An̈ej chavan̈ vuneꞌ ay. Ay junel ix yacꞌ oval ebꞌ vin̈ dꞌa caltac teꞌ. Yujto malaj mach ix pojan ebꞌ vin̈, yuj chiꞌ ay jun vin̈ ix miljicham yuj vin̈ yucꞌtac chiꞌ. 7 Axo ticnaic masanil ebꞌ in cꞌabꞌ voc smeltzajoch ajcꞌolal dꞌayin, snibꞌej ebꞌ svacꞌoch vin̈ ix milancham vin̈ yucꞌtac chiꞌ dꞌa yol scꞌabꞌ ebꞌ yic smilancham vin̈ ebꞌ yuj schamel vin̈ yucꞌtac chiꞌ. Icha chiꞌ snibꞌej ebꞌ yic satcanel vin̈ ay yalan yic yicꞌancan smacbꞌen smam chiꞌ. Tato icha chiꞌ, man̈xa mach svacꞌoch yipoc in cꞌool, tzam satel masanil yin̈tilal vin̈ vetbꞌeyum, man̈xa am bꞌaj sbꞌinajcan vin̈, xchi ix.

8 Ix tacꞌvi vin̈ rey chiꞌ dꞌa ix icha tic:

—Paxan̈ dꞌa a pat, ol xo vilaꞌ tas ol vutej in colvaj dꞌayach, xchi vin̈.

9 Ix tacꞌvi ix dꞌa vin̈ icha tic:

—Ach mamin rey, a smul vin̈ vuneꞌ chiꞌ, emocabꞌ dꞌa vibꞌan̈ yedꞌ dꞌa yibꞌan̈ masanil ebꞌ in cꞌabꞌ voc, palta mocabꞌ dꞌa ibꞌan̈ yedꞌ dꞌa yibꞌan̈ a macbꞌen tzꞌemi, xchi ix.

10 Ix tacꞌvixi vin̈ rey chiꞌ dꞌa ix:

—A mach snibꞌej tzach ixtan chiꞌ, icꞌcot dꞌayin dꞌa tic yic vachꞌ man̈xo ol ach stzuntzoc, xchi vin̈.

11 Palta ix ochn̈ej tean ix dꞌa vin̈ rey chiꞌ:

—Tzin tevi dꞌayach mamin rey, to tzacꞌ a tiꞌ dꞌa yichan̈ Jehová co Diosal to a jun in cꞌabꞌ voc snibꞌej yacꞌanecꞌ spac schamel vin̈ vuneꞌ chiꞌ, mocabꞌ smilcham junxo vuneꞌ chiꞌ, yic max te javi cuselal dꞌa vibꞌan̈, xchi ix.

Ix tacꞌvi vin̈ rey chiꞌ:

—Svacꞌ in tiꞌ dꞌa yichan̈ Jehová to malaj jabꞌoc tas ol icꞌan vin̈ uneꞌ chiꞌ, xchi vin̈.

12 Ix ochxi ijan ix yalan icha tic:

—Mamin rey, elocabꞌ dꞌa a cꞌol to tza cha abꞌ jun bꞌelan̈ lolonel ol val dꞌayach, xchi ix.

—Alaꞌ, xchi vin̈ dꞌa ix.

13 Ix yalan ix icha tic:

—Mamin rey, ¿tom man̈ vanoc acꞌan chucal dꞌa schon̈abꞌ Dios? Ayic ix alani to tza bꞌo yaj tas tzꞌaj vin̈ vuneꞌ, van a chꞌoxaneli to man̈ tojoloc a pensar yujto maxtzac a cha meltzaj vin̈ uninal aycanbꞌat elelal dꞌa junxo chꞌoc chon̈abꞌil. 14 Yujto co masanil ol on̈ chamoc. Lajan on̈ icha a aꞌ stobꞌbꞌat dꞌa sat luum, maxtzac yal co molanqꞌuei, palta a Dios man̈ comonoc syiqꞌuel co qꞌuinal, a tas scꞌulej to say tas tzꞌaj smeltzajxicot ebꞌ najat aycanbꞌati. 15 A ticnaic mamin rey, in javi ul val juntzan̈ tic dꞌayach, yuj ebꞌ anima tzin xibꞌtan chiꞌ. Yuj chiꞌ ix in coti yic tzin lolon dꞌa ichan̈, qꞌuinaloc tza cha abꞌ tas tzin cꞌan tic mamin rey 16 to tzin a col dꞌa mach snibꞌej tzin satanel yedꞌ ebꞌ vuneꞌ dꞌa sat lum luum ix yacꞌ Dios co macbꞌenoc tic. 17 A in a checabꞌ vaj tic, ol in tan̈vej tas ol aj a pacan dꞌayin yic vachꞌ man̈xa tas ol in naꞌa, yujto a ach tic mamin rey, ojtac val a chꞌolbꞌitan tas yaji, tato vachꞌ, mato chuclaj, lajan ach icha junoc ángel yic Dios. Aocabꞌ Jehová co Diosal ayoch edꞌoc, mamin rey, xchi ix.

18 Ix yalan vin̈ rey chiꞌ dꞌa ix:

—A ticnaic ay tas ol in cꞌanbꞌej dꞌayach. Malaj tas ol a cꞌubꞌejel dꞌayin, xchi vin̈.

—Al an mamin rey, xchi ix.

19 Yuj chiꞌ ix scꞌanbꞌej vin̈ rey chiꞌ dꞌa ix icha tic:

—¿Tom man̈oc vin̈aj Joab ix bꞌoan al jun tic? xchi vin̈.

Ix tacꞌvi ix:

—Ichaton chiꞌ mamin rey, ix a naeli. A vin̈ a checabꞌ chiꞌ ix in checancoti, a vin̈ ix alanpax dꞌayin tastac tzul val tic dꞌayach. 20 Ix sna juntzan̈ tic vin̈ yic tope sqꞌuexvi a pensar dꞌa vin̈ uninal aj Absalón. Palta a ach tic mamin rey, te aj pensar ach, lajan ach icha val junoc yángel Dios, ojtac masanil tastac tzuji dꞌa yol a macbꞌen tic, xchi ix.

21 Yuj chiꞌ ix avtaj vin̈aj Joab chiꞌ yuj vin̈ rey chiꞌ:

—Toxo ix in naꞌa, elocabꞌcꞌoch icha tas tza nibꞌej chiꞌ. Ixic, bꞌat icꞌ meltzaj vin̈aj quelem Absalón chiꞌ, xchi vin̈ rey chiꞌ dꞌa vin̈.

22 Yuj chiꞌ ix em n̈ojan vin̈aj Joab chiꞌ dꞌa yichan̈ vin̈ rey chiꞌ dꞌa sat luum, yuj schꞌoxanel vin̈ to nivan yelcꞌoch vin̈ rey chiꞌ dꞌa sat vin̈. Ix yalan vachꞌ lolonel vin̈ dꞌa vin̈ rey chiꞌ icha tic:

—A ticnaic mamin rey, ix nachajel vuuj to ay velcꞌoch dꞌayach, yujto ix a cha abꞌ tas tzin nibꞌej ix val dꞌayach, xchi vin̈.

23 Ix lajvi chiꞌ, ix bꞌat vin̈aj Joab chiꞌ dꞌa chon̈abꞌ Gesur yic bꞌat yicꞌanxicot vin̈aj Absalón chiꞌ vin̈, yic sjax vin̈ dꞌa Jerusalén. 24 Palta ix yalan vin̈ rey to bꞌen̈ej scꞌochcan vin̈ dꞌa spat, max jalaj vin̈ dꞌa yichan̈ vin̈ rey chiꞌ. Icha chiꞌ ix aj scꞌochcan vin̈aj Absalón chiꞌ dꞌa spat chiꞌ, maj cꞌochlaj vin̈ dꞌa yichan̈ vin̈ rey chiꞌ.

25 A dꞌa scal masanil ebꞌ israel, malaj junoc vinac vachꞌ yilji icha yilji vin̈aj Absalón chiꞌ. Te bꞌinajnac vin̈ yuj svachꞌil yilji chiꞌ, malaj jabꞌoc palta dꞌa snivanil vin̈. 26 Juneln̈ej sjoxjiel xil sjolom vin̈ dꞌa junjun abꞌil, ayic ste albꞌi syabꞌ vin̈. A xil sjolom vin̈ chiꞌ, ecꞌto chan̈eꞌ libra yalil, icha yechlabꞌ ebꞌ rey scꞌanaꞌ. 27 Ay oxvan̈ yuninal vin̈ yedꞌ jun yisil. A ix yisil vin̈ chiꞌ, Tamar sbꞌi ix, te vachꞌ yilji ix.

28 Schabꞌilxo abꞌil sjax vin̈aj Absalón chiꞌ dꞌa Jerusalén, palta an̈ejaꞌ max yal-laj scꞌoch vin̈ dꞌa yichan̈ vin̈ rey. 29 Yuj chiꞌ, ix avtaj vin̈aj Joab chiꞌ yuj vin̈ yic tzꞌicꞌjibꞌat vin̈ dꞌa yichan̈ vin̈ rey chiꞌ, palta maj cotlaj vin̈aj Joab chiꞌ. Ix yavtanxi vin̈aj Joab chiꞌ vin̈ dꞌa schaelal, palta an̈ejaꞌ maj cotlaj vin̈. 30 Axo ix aji, ix schecanbꞌat ebꞌ schecabꞌ vin̈aj Absalón chiꞌ, ix yalan vin̈:

—Ixiquec bꞌaj ay smunlajel vin̈aj Joab dꞌa slacꞌanil stiꞌ vicoꞌ, aton bꞌaj avabꞌil ixim cebada yuj vin̈, tze n̈usantzꞌa tas avabꞌil chiꞌ yuj vin̈, xchi vin̈.

Ix bꞌat ebꞌ schecabꞌ vin̈ chiꞌ, ix bꞌat sn̈usantzꞌa tas avabꞌil chiꞌ ebꞌ. 31 Ix bꞌat vin̈aj Joab dꞌa spat vin̈aj Absalón chiꞌ, ix yalan vin̈:

—¿Tas yuj ix a checbꞌat ebꞌ a checabꞌ sn̈ustzꞌa tas avabꞌil vuuj? xchi vin̈.

32 Ix tacꞌvi vin̈aj Absalón chiꞌ dꞌa vin̈:

—Ix ach vavtej, yic sbꞌat a cꞌanbꞌej dꞌa vin̈ rey tas yuj ix bꞌat in cot dꞌa chon̈abꞌ Gesur. Te vachꞌ ama, tato ix in canxon̈ej taꞌ. In gana svil vin̈ rey chiꞌ. Tato ay in mul, syal in smilancham vin̈, xchi vin̈.

33 Yuj chiꞌ ix bꞌat vin̈aj Joab yal dꞌa vin̈ rey tas ix yal vin̈aj Absalón chiꞌ. Ix lajvi chiꞌ, ix avtaj vin̈aj Absalón yuj vin̈ rey chiꞌ. Ayic ix cꞌoch vin̈, ix em n̈ojan vin̈ dꞌa sat luum dꞌa yichan̈ vin̈ rey chiꞌ, ix chaji vin̈ yuj vin̈ rey chiꞌ, ix stzꞌubꞌan stiꞌ vin̈ yuninal vin̈ chiꞌ.