—Ixiquec eyicꞌchaan̈ sbꞌisul ebꞌ soldado. Sbꞌat e chacot dꞌa chon̈abꞌ Beerseba, masanto tzex cꞌoch dꞌa chon̈abꞌ Dan. Ayic slajvi chiꞌ tzeyicꞌancot sbꞌisul ebꞌ chiꞌ dꞌayin, yic svilaꞌ jantac ebꞌ dꞌa smasanil.

3 Palta ix tacꞌvi vin̈aj Joab chiꞌ icha tic:

—Aocabꞌ Jehová tzꞌacꞌan qꞌuibꞌ sbꞌisul schon̈abꞌ masanto maxtzac yal sbꞌischaji. Mamin rey ayoch ebꞌ dꞌa yol a cꞌabꞌ smasanil, ¿tas yuj tza nibꞌej jun tic? A dꞌa jun tic ol och smul co chon̈abꞌ tic uuj, xchi vin̈.

4 Palta majxo schalaj yabꞌ vin̈ rey chiꞌ tas ix yal vin̈aj Joab chiꞌ, yuj chiꞌ ix bꞌat ebꞌ. Ayic ix lajvi yicꞌanchaan̈ sbꞌisul masanil ebꞌ soldado Israel chiꞌ ebꞌ, ix meltzaj ebꞌ dꞌa Jerusalén. 5 Ix yacꞌan jantac sbꞌisul masanil ebꞌ vin̈ soldado vin̈aj Joab dꞌa vin̈aj David chiꞌ, ay 470 mil ebꞌ vin̈ soldado yic Judá yedꞌ pax dꞌa juntzan̈xo smacbꞌen Israel ay jun millón yedꞌ 100 mil ebꞌ vin̈ vinac stiempo sbꞌat dꞌa oval. 6 Palta maj ochlaj ebꞌ vin̈ vinac yin̈tilal Leví yedꞌ ebꞌ vin̈ yic Benjamín sbꞌisuloc, yujto maj scha scꞌol vin̈aj Joab jun schecnabꞌil vin̈ rey chiꞌ.

7 Maj schapaxlaj scꞌol jun chiꞌ Dios, yuj chiꞌ ix yacꞌcot jun yaelal dꞌa yibꞌan̈ chon̈abꞌ Israel chiꞌ. 8 Ichato chiꞌ ix yalanqꞌueta smul vin̈aj rey David chiꞌ dꞌa Dios icha tic:

—Te nivan in mul ix ochi, yujto ix in cꞌulej jun tic, palta tzin cꞌan dꞌayach to tzacꞌ nivancꞌolal jun in mul tic, yujto icha junoc quistal anima ix vutej in bꞌa, xchi vin̈.

9 Yuj chiꞌ ix yal Jehová dꞌa vin̈aj Gad schecabꞌ, aton vin̈ tzꞌacꞌan srazón vin̈ rey chiꞌ, ix yalan icha tic: 10 Ixic, bꞌat il vin̈aj rey David, tzalan dꞌa vin̈ to a in Jehová in sval icha tic: Ay oxeꞌ tas svacꞌ a sicꞌlej, a ach ol a sicꞌlej tas junoc ol vacꞌ dꞌayach, xchi Jehová. 11 Yuj chiꞌ ix bꞌat vin̈aj Gad chiꞌ yil vin̈aj rey David chiꞌ, ix yalan vin̈ dꞌa vin̈ icha tic:

—A Jehová tzꞌalan icha tic: Sicꞌlej junoc dꞌa scal juntzan̈ yaelal tic: 12 ¿Tom aꞌ oxeꞌ abꞌil vejel, ma oxeꞌ ujal ol yacꞌ ebꞌ ajcꞌol ex smilanchamoc, mato oxeꞌ cꞌual ilya ol yacꞌ dꞌa yol a macbꞌen tic? A jun chiꞌ vespada a in Jehová in tic, yujto a jun vángel ol satanel anima dꞌa yol a macbꞌen tic, xchi Jehová. Yuj chiꞌ sicꞌlej ticnaic yic vachꞌ ol yal vacꞌan spac dꞌa Jehová, aton in checancoti, xchi vin̈aj Gad chiꞌ dꞌa vin̈.

13 Ix yalan vin̈aj rey David chiꞌ dꞌa vin̈aj Gad chiꞌ icha tic:

—Maxtzac nachajlaj vuuj tas tzin sicꞌlej. Vachꞌ ama to a Jehová tzꞌem scꞌabꞌ dꞌa vibꞌan̈, man̈oc anima sva scꞌabꞌ dꞌayin, yujto vojtac to nivan yoqꞌuelcꞌolal Jehová chiꞌ, xchi vin̈.

14 Yuj chiꞌ ix yacꞌcot jun ilya Jehová dꞌa yibꞌan̈ chon̈abꞌ Israel chiꞌ, 70 mil ebꞌ ix cham yuuj. 15 Ix schecancot jun yángel Jehová yic satanel ebꞌ anima dꞌa Jerusalén. Ayic van satanel ebꞌ anima chiꞌ, ix cusqꞌue scꞌol Jehová yuj jun yaelal chiꞌ, ix yalan dꞌa jun yángel van smilancham anima chiꞌ icha tic: Yechelxo chiꞌ, actej, xchi dꞌay.

A val dꞌa jun rato chiꞌ, a jun yángel Jehová chiꞌ, ay val ecꞌ bꞌaj van stecꞌvi trigo vin̈aj Ornán jebuseo. 16 Axo ix qꞌue qꞌuelan vin̈aj rey David, ix yilan vin̈ to ayecꞌ jun yángel Jehová chiꞌ dꞌa snan̈al lum luum tic yedꞌ satchaan̈, yedꞌnacqꞌue jun qꞌuen espada, van yacꞌanem qꞌuen yespada chiꞌ dꞌa yibꞌan̈ Jerusalén. Yedꞌn̈ej chiꞌ ix em n̈ojan vin̈aj rey David chiꞌ yedꞌ ebꞌ yichamtac vinaquil chon̈abꞌ Israel masanto dꞌa sat luum, ayoch pichul yic cuscꞌolal yuj ebꞌ. 17 Ix yalan vin̈aj rey David chiꞌ dꞌa Dios icha tic:

—Mamin, a in val ix valaꞌ to tzꞌicꞌjichaan̈ sbꞌisul ebꞌ chon̈abꞌ tic. A in val ix och in mul. Malaj smul ebꞌ anima tic. Mamin Jehová, ach in Diosal, tzin tevi dꞌayach to a jun yaelal tic, a dꞌa vibꞌan̈ yedꞌ vin̈tilal tzꞌemi, man̈ a satel a chon̈abꞌ tic, xchi vin̈.

18 Yuj chiꞌ ix yal Yángel Jehová chiꞌ dꞌa vin̈aj Gad to syal vin̈ dꞌa vin̈aj rey David chiꞌ to sbꞌoqꞌue junoc altar vin̈ bꞌaj stecꞌvi trigo vin̈aj Ornán jebuseo chiꞌ. 19 Yuj chiꞌ ix bꞌat vin̈ rey chiꞌ sbꞌoqꞌue jun altar yic tzꞌicꞌjichaan̈ sbꞌi Jehová, icha ix aj yalchaj chiꞌ. 20 A vin̈aj Ornán yedꞌ chan̈van̈ yuninal vin̈, van stecꞌvi trigo ebꞌ, axo ix yilan ebꞌ to ayecꞌ Yángel Jehová chiꞌ taꞌ, ix bꞌat ebꞌ vin̈ yuninal vin̈ chiꞌ scꞌubꞌejel sbꞌa. 21 Ayic ix yilan vin̈aj Ornán chiꞌ to van scꞌoch vin̈ rey dꞌa slacꞌanil, ix elta vin̈ bꞌaj van stecꞌvi trigo chiꞌ, ix em n̈ojan vin̈ dꞌa yichan̈ vin̈ rey chiꞌ. 22 Yuj chiꞌ ix yal vin̈ rey chiꞌ dꞌa vin̈ icha tic:

—Tzoc val el dꞌa a cꞌool, tza chon̈ jun lugar bꞌaj tzach tecꞌvi trigo tic dꞌayin, yic tzin bꞌoqꞌue junoc altar dꞌa Jehová, yic tzꞌoch vaan jun ilya tic dꞌa cal chon̈abꞌ tic. Chon̈ dꞌayin icha val jantac stojol, xchi vin̈ rey chiꞌ.

23 Ix tacꞌvi vin̈aj Ornán chiꞌ dꞌa vin̈:

—Mamin rey, syal in sian jun lugar tic dꞌayach yic tza bꞌoan tas snibꞌej a cꞌool. Svacꞌanpax nocꞌ toro yic tzꞌoch nocꞌ silabꞌil yedꞌ teꞌ tecꞌlabꞌ tic syal yoch teꞌ dꞌa cꞌatzitzal, axo ixim trigo tic, syal yoch ixim dꞌa ofrendail. Mamin rey, masanil juntzan̈ tic svacꞌ dꞌayach, xchi vin̈.

24 Palta ix tacꞌvi vin̈aj rey David chiꞌ icha tic:

—Yuj val dios dꞌayach yuj masanil juntzan̈ tic, palta a in tic yovalil ol in tup juntzan̈ tic smasanil icha val stojol, yujto max yal-laj vicꞌanecꞌ a tastac, svacꞌan silabꞌil dꞌa Jehová. Max yal-laj vacꞌan junoc tas silabꞌil to man̈ ol in tupuꞌ, xchi vin̈.

25 Icha chiꞌ ix aj smanan jun luum chiꞌ vin̈ rey chiꞌ dꞌa 600 siclo qꞌuen oro. 26 Ataꞌ ix sbꞌoqꞌue jun altar vin̈, ix sn̈usan silabꞌ vin̈ yedꞌ silabꞌ yic juncꞌolal. Ix lajvi chiꞌ, ix lesalvi vin̈ dꞌa Jehová, axo Jehová chiꞌ ix acꞌancot cꞌacꞌ dꞌa satchaan̈ dꞌa yibꞌan̈ jun silabꞌ dꞌa yibꞌan̈ altar chiꞌ. 27 Ix lajvi chiꞌ, ix yalan Jehová dꞌa jun ángel chiꞌ to syacꞌxiem qꞌuen yespada chiꞌ dꞌa yol yatut.

28 Ayic ix yilan vin̈aj rey David to ix tacꞌvi Jehová dꞌa vin̈ dꞌa stecꞌlabꞌ trigo vin̈aj Ornán chiꞌ, ix yacꞌan juntzan̈xo silabꞌ vin̈ dꞌa Jehová taꞌ. 29 Vachꞌchom a jun mantiado sbꞌonacqꞌue vin̈aj Moisés yicoc Jehová dꞌa tzꞌinan luum yedꞌ jun altar bꞌaj stzꞌa silabꞌ ay dꞌa Gabaón jun lugar chaan̈ yic ejmelal, 30 palta maj yal-laj sbꞌat vin̈aj rey David taꞌ yic scꞌanbꞌej dꞌa Dios, yujto ix te xiv vin̈ ayic ix yilan jun qꞌuen espada vin̈ yedꞌnac Yángel Jehová.