—Ecꞌan̈ dꞌa scal junjun macan̈ ebꞌ quetisraelal, scot dꞌa Dan masanto dꞌa chon̈abꞌ Beerseba, tzicꞌanqꞌue vaan sbꞌisul ebꞌ smojxo yoch soldadoal. Icha chiꞌ ol aj vojtacani jantac ebꞌ dꞌa smasanil, xchi vin̈ dꞌa vin̈.

3 Ix tacꞌvi vin̈aj Joab chiꞌ:

—Mamin rey, aocabꞌ Jehová co Diosal tzꞌacꞌan qꞌuibꞌ sbꞌisul ebꞌ anima, 100 ocabꞌto tzꞌecꞌ dꞌa yichan̈ icha ticnaic, olto ilaꞌ, palta, ¿tas val yuj a gana tzicꞌchaan̈ sbꞌisul ebꞌ anima tic? xchi vin̈.

4 Palta ix yacꞌxon̈ejoch vin̈ rey chiꞌ dꞌa yibꞌan̈ vin̈aj Joab yedꞌ ebꞌ yajalil ebꞌ soldado to yovalil tzꞌicꞌjiqꞌue vaan sbꞌisul ebꞌ anima chiꞌ. Yuj chiꞌ ix elta ebꞌ dꞌa yichan̈ vin̈ rey chiꞌ, ix scꞌanabꞌajan ebꞌ sbꞌat bꞌaj ix alchaj chiꞌ. 5 Ix cꞌaxpajecꞌ ebꞌ dꞌa aꞌ Jordán, ix sbꞌoanqꞌue scampamento ebꞌ dꞌa Aroer dꞌa snan̈al jun pan̈an. Ix lajvi chiꞌ, ix bꞌat ebꞌ dꞌa Gad yedꞌ dꞌa Jazer. 6 Ix bꞌat ebꞌ dꞌa Galaad yedꞌ dꞌa Cades dꞌa yol smacbꞌen ebꞌ hitita. Ix bꞌatpax ebꞌ dꞌa Dan, ichato chiꞌ ix meltzaj ebꞌ dꞌa stitac yic Sidón. 7 Ix bꞌatpax ebꞌ dꞌa nivan chon̈abꞌ Tiro dꞌa smacbꞌen ebꞌ heveo yedꞌ pax schon̈abꞌ ebꞌ cananeo. Ix lajvi chiꞌ ix bꞌat ebꞌ dꞌa chon̈abꞌ Beerseba dꞌa Neguev dꞌa yol yic Judá. 8 Bꞌalun̈eꞌ uj yedꞌ 20 cꞌualxo ix yacꞌ ebꞌ yecꞌ dꞌa smasanil, ix lajvi chiꞌ ix meltzajxi ebꞌ dꞌa Jerusalén. 9 Axo vin̈aj Joab chiꞌ ix acꞌan sbꞌisul ebꞌ anima dꞌa junjun chon̈abꞌ dꞌa vin̈ rey chiꞌ: 500 mil ebꞌ vin̈ aj Judá to stiempo yoch dꞌa soldadoal yedꞌ 800 mil yic juntzan̈xo macan̈ ebꞌ israel.

10 Ix lajvi chiꞌ ix snaan sbꞌa scꞌool vin̈aj rey David chiꞌ. Ix och vin̈ dꞌa ilcꞌolal yuj bꞌaj ix yicꞌqꞌue vaan sbꞌisul ebꞌ israel chiꞌ, ix yalan vin̈ icha tic:

—Mamin Jehová, te nivan in mul ix och dꞌayach yuj jun tas ix in cꞌulej tic. A val ticnaic tzin tevi val dꞌayach to tziqꞌuel jun in mul tic dꞌa vibꞌan̈. Icha junoc anima malaj spensar ix vutej in bꞌa dꞌayach, xchi vin̈.

11 Ayic ix sacbꞌi dꞌa junxo cꞌu, ayic mantzac qꞌue vaan vin̈aj David chiꞌ ix yalan Jehová icha tic dꞌa vin̈aj Gad schecabꞌ, aton vin̈ acꞌum pensar dꞌa vin̈aj David chiꞌ:

12 —Ixic al dꞌa vin̈aj David to a in Jehová in sval icha tic: Oxeꞌ macan̈ yaelal svaltej dꞌayach. A achxo ol a sicꞌlej bꞌaja junoc tza nibꞌej, xchi Jehová dꞌa vin̈aj Gad chiꞌ.

13 —Inye, xchi vin̈aj Gad chiꞌ. Ix ul yalan vin̈ dꞌa vin̈aj rey David chiꞌ icha tic:

—¿Tzam yal a cꞌol sjavi uqueoc abꞌil vejel dꞌa yol a chon̈abꞌ tic? ¿Mato a gana oxeoc ujal tzex acꞌji ganar yuj ebꞌ ajcꞌool? ¿Ma a gana oxeoc cꞌual ilya yic scham anima dꞌa yol a chon̈abꞌ tic? Naꞌ val sicꞌlabꞌil, ol alani. Slajvi chiꞌ ol bꞌat valanxi dꞌa Jehová ix in checancoti, xchi vin̈ dꞌa vin̈ rey chiꞌ.

14 Ix yalan vin̈ rey chiꞌ dꞌa vin̈:

—Maxtzac nachaj vuj ticnaic tas tzꞌaj valani. Vachꞌ tzon̈ can dꞌa yol scꞌabꞌ Jehová, yujto nivan tzꞌocꞌ scꞌol dꞌayon̈, mocabꞌ dꞌa yol scꞌabꞌ ebꞌ anima tzon̈ cani, xchi vin̈.

15 Yuj chiꞌ, a dꞌa jun qꞌuin̈ibꞌalil chiꞌ, ix yacꞌcot jun nivan ilya Jehová dꞌa scal ebꞌ israel, masanto ix tzꞌacvi scꞌual ix alchajcan chiꞌ. Yuj chiꞌ 70 mil anima ix cham dꞌa yol smacbꞌen ebꞌ chiꞌ, ix cotn̈ej dꞌa Dan masanto dꞌa Beerseba. 16 Ayic ix yacꞌanbꞌat scꞌabꞌ jun ángel dꞌa yibꞌan̈ Jerusalén yic syacꞌ lajvoc ebꞌ anima yalani, ix cus scꞌol Jehová yuj tas ix uji chiꞌ, yuj chiꞌ ix yal dꞌa jun ángel chiꞌ: Cꞌocbꞌilxo chiꞌ, ochocabꞌ vaan, xchi.

A dꞌa stecꞌlabꞌ trigo vin̈aj Arauna aj Jebús, ataꞌ ayecꞌ jun ángel chiꞌ ayic ix alji chiꞌ dꞌay. 17 Ayic ix yilan jun ángel chiꞌ vin̈aj David, ix yalan vin̈ dꞌa Jehová:

—A in ton ay in mul, malaj smul juntzan̈ anima tic. Tzin cꞌan dꞌayach to a dꞌa vibꞌan̈ yedꞌ dꞌa yibꞌan̈ vin̈tilal tzꞌoch jun nivan yaelal tic, xchi vin̈.

18 A dꞌa jun cꞌu chiꞌ, ix javi vin̈aj Gad yal dꞌa vin̈aj David chiꞌ icha tic:

—Qꞌuean̈ dꞌa stecꞌlabꞌ trigo vin̈aj Arauna aj Jebús, tza bꞌoan junoc altar dꞌa Jehová, xchi vin̈.^* 19 Ix bꞌat vin̈aj David chiꞌ icha ix aj yalan vin̈aj Gad yuj Jehová. 20 Ix yilancot vin̈aj Arauna to van scꞌoch vin̈ rey yedꞌ ebꞌ yetyajalil bꞌaj ayeqꞌui, ix cot vin̈ scha vin̈ rey chiꞌ, ix em n̈ojan vin̈ dꞌa sat luum dꞌa yichan̈ vin̈. 21 Ix yalan vin̈:

—Mamin rey, ¿tas val yuj tzach javi dꞌayin? xchi vin̈.

Ix tacꞌvi vin̈aj David chiꞌ:

—A yuj in manan jabꞌoc lugar dꞌa a tecꞌlabꞌ trigo tic, ol in bꞌoanqꞌue junoc yaltar Jehová dꞌay, yic vachꞌ ol vanaj scham anima dꞌa yol chon̈abꞌ tic, xchi vin̈.

22 Ix tacꞌvi vin̈aj Arauna chiꞌ:

—Ujocabꞌ mamin, bꞌoꞌocabꞌi, tzacꞌan silabꞌ dꞌa Jehová icha val snibꞌej a cꞌool. Ay nocꞌ vacax syal acꞌan silabꞌil dꞌa tic. Ay teꞌ macꞌlabꞌ trigo yedꞌ teꞌ yugo syal yoch cꞌatzitzal. 23 A in tic svacꞌ masanil juntzan̈ tic dꞌayach, xchi vin̈. Ix yalanxi vin̈:

—Tzoc valel dꞌa scꞌol Jehová to scha yabꞌ tas ol a cꞌan dꞌay, xchi vin̈.

24 Ix yalan vin̈ rey chiꞌ dꞌa vin̈aj Arauna chiꞌ icha tic:

—Maay, ol in man masanil juntzan̈ chiꞌ dꞌayach, yujto max yal-laj vacꞌan dꞌa Jehová co Diosal tastac to ton̈ej tza siej dꞌayin, xchi vin̈.

Yuj chiꞌ ix sman jun lugar chiꞌ vin̈aj David chiꞌ yedꞌ nocꞌ vacax dꞌa 50 siclo qꞌuen plata. 25 Ix sbꞌoanqꞌue jun altar vin̈ dꞌa Jehová, ix yacꞌan silabꞌ vin̈ sn̈usji yedꞌ pax silabꞌ yic juncꞌolal dꞌay. Ichato chiꞌ ix schaan yabꞌ Jehová tas ix scꞌan vin̈aj David chiꞌ yuj chamel van yoch dꞌa yoltac schon̈abꞌ ebꞌ israel. Yuj chiꞌ ix vanaj jun ilya chiꞌ.