Slajvubꞌal slolonel vin̈aj rey David
23
Aton juntzan̈ slajvubꞌ slolonel vin̈aj rey David tic:A vin̈aj David yuninal vin̈aj Isaí, ix icꞌjivalchaan̈ vin̈ yuj Dios Axon̈ej Ochi. Ix sicꞌjiel vin̈ yuj Dios chiꞌ yic tzꞌoch vin̈ reyal dꞌa scal ebꞌ yin̈tilal vin̈aj Jacob. Te vachꞌ sbꞌitan vin̈ dꞌa scal ebꞌ yetisraelal. A vin̈ ix alan icha tic:
2 A Yespíritu Jehová tzꞌacꞌan val juntzan̈ tic. A slolonel ayecꞌ dꞌa in tiꞌ.
3 A Jehová co Diosal a on̈ israel on̈ tic, co Columal paxi, a ix alan dꞌayin: A mach tzꞌacꞌan yajalil dꞌa scal anima dꞌa stojolal, icha val snibꞌej in cꞌool,
4 lajan val icha saquil yichchaan̈, ayic sqꞌueul cꞌu dꞌa junoc cꞌu te cꞌachan, malaj asun. Lajan icha scꞌachvi ayic toxo ix ecꞌ junoc yax n̈abꞌ tzꞌacꞌan syaxil sat lum luum, xchi Jehová dꞌayin.
5 Icha chiꞌ ol aj vin̈tilal, masanil tas ix yal Dios dꞌayin ol eln̈ejcꞌochoc, malaj bꞌaqꞌuin̈ ol sqꞌuex tas ix yalcan chiꞌ dꞌayin. A Dios chiꞌ ol colvajn̈ej vedꞌoc yic tzꞌelcꞌoch tastac tzin nibꞌej.
6 Palta masanil ebꞌ scꞌulan chucal, lajan ol aj ebꞌ icha teꞌ qꞌuiix smolbꞌaji yic stacji, malaj junoc mach syal syamani.
7 Tato ay junoc mach snibꞌej smolbꞌan teꞌ, yovalil scꞌan junoc qꞌuen qꞌueen, ma junoc steꞌal lanza yic smolbꞌani, sn̈usjitzꞌa teꞌ dꞌa yedꞌtal chiꞌ, stzꞌacanbꞌat teꞌ juneln̈ej, xchi vin̈aj David chiꞌ dꞌa slajvubꞌal sbꞌit tic.
Juntzan̈ ebꞌ soldado vin̈aj rey David te jelan
8 A ebꞌ vin̈ soldado te jelan dꞌa scal ebꞌ vin̈ soldado vin̈aj rey David, oxvan̈ ebꞌ vin̈: Vin̈ bꞌabꞌel, aton vin̈aj Joseb-basebet aj Tacmón. A dꞌa junel, 800 vinac smilcham vin̈ yedꞌ qꞌuen slanza. 9 Axo vin̈ schabꞌil dꞌa scal ebꞌ vin̈ oxvan̈ jelan chiꞌ, aton vin̈aj Eleazar yuninal vin̈aj Dodo aj Aho. Ayecꞌ vin̈ yedꞌ vin̈aj rey David chiꞌ dꞌa Pas-damim, ix stzuntzejbꞌat ebꞌ filisteo ebꞌ vin̈ taꞌ yic syacꞌan oval ebꞌ vin̈, axo yic ix cot ebꞌ filisteo chiꞌ dꞌa ebꞌ vin̈, ix el lemnaj ebꞌ yetisraelal ebꞌ vin̈ chiꞌ. 10 Axo vin̈aj Eleazar chiꞌ ix stecꞌbꞌej sbꞌa, ix smilancham ebꞌ filisteo chiꞌ vin̈, ix tzatzbꞌicanoch bꞌucꞌnaj scꞌabꞌ vin̈ dꞌa yoc qꞌuen yespada chiꞌ. A dꞌa jun cꞌu chiꞌ, ix cꞌanchaj vin̈ yuj Jehová yic ix yacꞌan ganar oval chiꞌ. Ayic toxo ix lajvi oval chiꞌ, ix meltzajxicꞌoch ebꞌ soldado israel chiꞌ yedꞌ vin̈aj Eleazar chiꞌ yujn̈ej yicꞌanecꞌ ebꞌ masanil tastac yedꞌnac ebꞌ ajcꞌol ix cham chiꞌ.
11 Axo vin̈ yoxil, aton vin̈aj Sama, yuninal vin̈aj Age aj Arar. Ayic ix smolbꞌan sbꞌa ebꞌ filisteo dꞌa Lehi, aton bꞌaj avabꞌil juntzan̈ tut scuchan lenteja. Ataꞌ ix el lemnaj ebꞌ soldado yic Israel. 12 Palta ix stecꞌbꞌej sbꞌa vin̈aj Sama chiꞌ dꞌa scal juntzan̈ an̈ tut chiꞌ yic scolancan vin̈. Ix smilancham ebꞌ filisteo chiꞌ vin̈. A vin̈ ix cꞌanchaj yuj Jehová yuj yacꞌan ganar jun oval chiꞌ.
13 A dꞌa junel, dꞌa stiempoal smolji sat avbꞌen, a ebꞌ vin̈ oxvan̈ sat yaj dꞌa scal ebꞌ vin̈ 30 soldado te jelan, ix bꞌat ebꞌ vin̈ bꞌaj ayecꞌ vin̈aj David dꞌa qꞌuen n̈aqꞌueen yic Adulam. Axo pax ebꞌ filisteo, ayecꞌ scampamento ebꞌ dꞌa span̈anil chꞌolan yic Refaim. 14 A dꞌa Belén, ay jun macan̈ ebꞌ soldado ebꞌ filisteo chiꞌ. 15 Axo vin̈aj David chiꞌ ix alan icha tic: Comonoc ay mach tzꞌacꞌan a aꞌ scot dꞌa aꞌ ucꞌbꞌilaꞌ ay dꞌa spuertail Belén vuqꞌuej, xchi vin̈.
16 Axo ebꞌ vin̈ oxvan̈ soldado te jelan chiꞌ, ix och ebꞌ vin̈ dꞌa scampamento ebꞌ filisteo, ix bꞌat yicꞌan a aꞌ chiꞌ ebꞌ vin̈ dꞌa spuertail Belén chiꞌ, ix yicꞌancot aꞌ ebꞌ vin̈ dꞌa vin̈aj David chiꞌ. Palta maj yal-laj scꞌol vin̈ ix yuqꞌuej aꞌ, ton̈ej ix sequem aꞌ vin̈ dꞌa sat luum icha junoc ofrenda tzꞌacꞌji dꞌa Jehová. 17 Ix yalan vin̈: Mamin Jehová, ¿tom ol vucꞌ val jun a aꞌ tic? Tato svuqꞌuej aꞌ icha val to a schiqꞌuil juntzan̈ ebꞌ vin̈ tic svuqꞌuej, yujto ix sbꞌec sbꞌa ebꞌ vin̈ schami yic ix bꞌat yicꞌancot aꞌ ebꞌ vin̈, xchi vin̈aj David chiꞌ. Yuj chiꞌ maj yal-laj scꞌol vin̈ ix yuqꞌuej aꞌ.
A ebꞌ vin̈ oxvan̈ soldado te jelan chiꞌ, a ebꞌ vin̈ ix cꞌulan jun chiꞌ.
18 A vin̈aj Abisai yucꞌtac vin̈aj Joab yuneꞌ ix Sarvia, a vin̈ ayoch yajaliloc 30 ebꞌ vin̈ soldado te jelan. A junel ix smilcham 300 vinac vin̈ yedꞌ qꞌuen slanza. Icha chiꞌ ix aj snivanbꞌi yelcꞌoch vin̈, icha val ebꞌ vin̈ oxvan̈ chiꞌ. 19 Yelxo te nivan ix aj yicꞌjichaan̈ vin̈ dꞌa scal ebꞌ vin̈ chiꞌ, yuj chiꞌ ix ochcan vin̈ yajaliloc ebꞌ vin̈ 30 chiꞌ, palta maj ochlaj vin̈ stzꞌacubꞌoc ebꞌ vin̈ oxvan̈ bꞌabꞌel chiꞌ.
20 Axo pax vin̈aj Benaía, yuninal vin̈aj Joiada aj chon̈abꞌ Cabseel, te jelan vin̈, tzijtum tas ix scꞌulej vin̈. Chan̈van̈ ebꞌ soldado aj Moab te jelan ix smilcham vin̈. A junel ayic te ay qꞌuen sacbꞌacom, ix em vin̈ dꞌa yol jun qꞌuen xabꞌ, ix smilancham jun nocꞌ choj vin̈ taꞌ. 21 Ay pax jun vin̈ aj Egipto te chaan̈ steel yedꞌnac slanza ix smilcham vin̈. Axo vin̈ an̈ej jun te teꞌ yedꞌnac vin̈, ix bꞌat jucnaj vin̈ dꞌa vin̈ aj Egipto chiꞌ, ix yicꞌanecꞌ slanza vin̈ chiꞌ vin̈, axo yedꞌ qꞌuen ix smilcham vin̈ aj Egipto chiꞌ vin̈. 22 A yuj tas ix scꞌulej vin̈aj Benaía chiꞌ, lajan ix aj yelcꞌoch vin̈ icha oxvan̈ ebꞌ vin̈ soldado te jelan. 23 Vachꞌchom nivan yelcꞌoch vin̈ dꞌa scal ebꞌ vin̈ 30, palta maj ochlaj vin̈ stzꞌacubꞌoc ebꞌ vin̈ oxvan̈ chiꞌ. Ix acꞌjioch vin̈ yuj vin̈aj David yajaliloc ebꞌ stan̈vumal.
24 A dꞌa scal ebꞌ vin̈ 30 jelan chiꞌ, ayoch vin̈aj Asael yucꞌtac vin̈aj Joab, vin̈aj Elhanán yuninal vin̈aj Dodo aj Belén, 25 vin̈aj Sama yedꞌ vin̈aj Elica aton ebꞌ aj Harod, 26 vin̈aj Heles aj Palti, vin̈aj Ira yuninal vin̈aj Iques aj Tecoa, 27 vin̈aj Abiezer aj Anatot, vin̈aj Mebunai aj Husa, 28 vin̈aj Salmón aj Aho, vin̈aj Maharai aj Netofa, 29 vin̈aj Heleb yuninal vin̈aj Baana, vin̈aj Itai yuninal vin̈aj Ribai aj Gabaa dꞌa yol yic Benjamín, 30 vin̈aj Benaía aj Piratón, vin̈aj Hidai cajan dꞌa stiꞌ a aꞌ dꞌa yol yic Gaas, 31 vin̈aj Abi-albón aj Arba, vin̈aj Azmavet aj Bahurim, 32 vin̈aj Eliaba aj Saalbón, ebꞌ vin̈ yuninal vin̈aj Jasén, aton vin̈aj Jonatán yedꞌ 33 vin̈aj Sama aj Harod, vin̈aj Ahíam yuninal vin̈aj Sarar aj Harod paxi, 34 vin̈aj Elifelet yuninal vin̈aj Ahasbai aj Maaca, vin̈aj Eliam yuninal vin̈aj Ahitofel aj Gilo, 35 vin̈aj Hesrai aj Carmel, vin̈aj Paarai aj Arba, 36 vin̈aj Igal yuninal vin̈aj Natán aj Soba, vin̈aj Bani aj Gad, 37 vin̈aj Selec aj Amón, vin̈aj Naharai aj Beerot, scuchumal syamcꞌabꞌ vin̈aj Joab yuneꞌ ix Sarvia, 38 vin̈aj Ira aj Itra, vin̈aj Gareb aj Itra paxi, 39 yedꞌ vin̈aj Urías hitita. 37 ebꞌ vin̈ tic dꞌa smasanil.