2 Ix lajvi chiꞌ ix yalan vin̈aj rey David chiꞌ to smolchaj masanil ebꞌ chꞌoc chon̈abꞌil ayecꞌ cajan dꞌa scal ebꞌ israel. Ix sicꞌchajel ebꞌ tzeyum qꞌueen, aton qꞌuen ol och dꞌa yic sbꞌochaj stemplo Dios. 3 Nivan pax qꞌuen hierro ix smolbꞌej ebꞌ yic tzꞌoch qꞌuen dꞌa lavuxal scꞌanchaj dꞌa puerta. Nivan pax qꞌuen bronce ix molbꞌaji, maxtzac yal-laj yechtaj qꞌueen. 4 Nivan pax teꞌ cꞌuteꞌ, maxtzac nachaji jantac sbꞌisul teꞌ ix molchaji, yujto a ebꞌ aj Sidón yedꞌ ebꞌ aj Tiro te nivan teꞌ cꞌuteꞌ chiꞌ ix yicꞌcot ebꞌ.

5 Ix sna vin̈aj rey David chiꞌ icha tic: A vin̈ vuninal aj Salomón tic, te uninto vin̈, axo pax jun stemplo Jehová ol bꞌo chiꞌ, te nivan ol ajoc. Ol te bꞌinaj yuj svachꞌil yilji dꞌa yolyibꞌan̈qꞌuinal tic, yuj chiꞌ a ticnaic yovalil ol in molbꞌejcan tastac ol och dꞌay, xchi vin̈.

Yuj chiꞌ ayic pitzanto vin̈aj David chiꞌ, te nivan tas ix smolbꞌejcan vin̈. 6 Ix lajvi chiꞌ, ix yavtancot vin̈aj Salomón chiꞌ vin̈, aton vin̈ yuninal vin̈. Ix yalancan vin̈ to a vin̈ ol bꞌoanqꞌue jun stemplo Jehová sDiosal chon̈abꞌ Israel. 7 Ix yalan vin̈ icha tic: Ach vuninal, nabꞌilxo val vuuj to tzin bꞌoqꞌue junoc stemplo Jehová co Diosal. 8 Palta yalnac dꞌayin icha tic: Ix vilaꞌ to a ach tic, man̈ jantacoc anima ix a milchamoc, man̈ jantacoc pax oval ix acꞌaꞌ, yuj chiꞌ man̈oc ach ol a bꞌoqꞌue jun in templo chiꞌ. 9-10 Palta ay jun uninal toto ol ajoc, Salomón ol acꞌ sbꞌiej, malaj oval ol yacꞌaꞌ, yujto a in ol vacꞌoch juncꞌolal dꞌa scal yedꞌ ebꞌ ayoch ajcꞌolal dꞌay. A dꞌa stiempoal chiꞌ ol vacꞌ juncꞌolal yedꞌ tzalajcꞌolal dꞌa in chon̈abꞌ Israel. Aꞌ ol bꞌoanqꞌue jun in templo chiꞌ. Ol och vuninaloc, a inxo ol in och smamoc. Ol vacꞌn̈ejcan yopisio dꞌa yin̈tilal dꞌa chon̈abꞌ tic dꞌa juneln̈ej, xchinac Jehová dꞌayin.^* 11 Yuj chiꞌ a ticnaic ach vuninal, aocabꞌ Jehová tzꞌochn̈ej edꞌoc yic ol a bꞌoanqꞌue jun templo chiꞌ, icha ajnac yalan chiꞌ uuj. 12 Aocabꞌ Jehová co Diosal ol acꞌan a jelanil, yic vachꞌ ayic ol acꞌan reyal dꞌa chon̈abꞌ Israel tic, ol a cꞌanabꞌajej masanil schecnabꞌil. 13 Vachꞌn̈ej ol ajelcꞌoch smasanil, tato ol a cꞌanabꞌajej val masanil scꞌaybꞌubꞌal yedꞌ schecnabꞌil yalnaccan dꞌa vin̈aj Moisés cuj a on̈ israel on̈ tic. Acꞌ ip, tecꞌann̈ej tzutej a bꞌa. Man̈ acꞌ chabꞌax a cꞌool, man̈ ach xivoc. 14 Ix vacꞌ val vip yic smolbꞌajcan 66 mil quintal qꞌuen oro yic tzꞌoch dꞌa stemplo Jehová chiꞌ yedꞌ 660 mil quintal qꞌuen plata yedꞌ jun nivan bꞌulan̈ qꞌuen bronce yedꞌ qꞌuen hierro maxtzac yal yechtaji. Man̈ jantacoc pax te teꞌ ix in chec molbꞌajcanoc yedꞌ qꞌuen qꞌueen. A achxo ol acꞌ tzꞌacvoc. 15-16 Tzijtum ebꞌ vin̈ munlajvum ayecꞌ dꞌa yol a cꞌabꞌ ol munlaj edꞌoc, ebꞌ tzeyum qꞌueen, ebꞌ albañil yedꞌ ebꞌ n̈icum teꞌ. Maxtzac bꞌischaj jantac ebꞌ vin̈ vinac te jelan dꞌa yaln̈ej tas munlajelal, icha dꞌa qꞌuen oro, qꞌuen plata, qꞌuen bronce yedꞌ dꞌa qꞌuen hierro ol munlaj edꞌoc. Yuj chiꞌ jun, ochocabꞌ munlajel, ochocabꞌ Jehová edꞌoc, xchi vin̈ dꞌa vin̈aj Salomón chiꞌ.

17 Ix lajvi chiꞌ ix yalan vin̈ dꞌa masanil ebꞌ vin̈ ayoch yajalil to tzꞌoch ebꞌ vin̈ yedꞌ vin̈aj Salomón chiꞌ dꞌa munlajel. Ix yalan vin̈ dꞌa ebꞌ vin̈ icha tic: 18 A Jehová co Diosal ayoch eyedꞌoc. Aꞌ ix acꞌann̈ej juncꞌolal dꞌayon̈ dꞌa masanil co macbꞌen, yujto aꞌ ix acꞌanoch masanil juntzan̈ chon̈abꞌ tic dꞌa yol in cꞌabꞌ, yuj chiꞌ ix ochcan ebꞌ dꞌa yol scꞌabꞌ Jehová yedꞌ dꞌa yol co cꞌabꞌ a on̈ schon̈abꞌ on̈ tic. 19 Yuj chiꞌ aqꞌuec val och dꞌa e cꞌool eyacꞌanoch e bꞌa dꞌa yol scꞌabꞌ Jehová co Diosal. Tzeyacꞌ val och dꞌa e cꞌool e bꞌoanqꞌue templo bꞌaj tzꞌicꞌjichaan̈ Jehová chiꞌ, yic vachꞌ ol acꞌjococh teꞌ scaxail strato chiꞌ dꞌa yool yedꞌ pax masanil syamcꞌabꞌil jun templo chiꞌ, xchi vin̈ dꞌa ebꞌ vin̈.