7 A ebꞌ vin̈ yuninal vin̈aj Gersón chiꞌ: Aton vin̈aj Laadán yedꞌ vin̈aj Simei. 8 Axo ebꞌ vin̈ yuninal vin̈aj Laadán chiꞌ, oxvan̈ ebꞌ vin̈: Aton vin̈aj Jehiel, vin̈ bꞌabꞌel yuninal vin̈, vin̈aj Zetam yedꞌ vin̈aj Joel. 9 Axo ebꞌ vin̈ yuninal vin̈aj Simei chiꞌ, oxvan̈ pax ebꞌ vin̈: Vin̈aj Selomit, vin̈aj Haziel yedꞌ vin̈aj Harán. Aton ebꞌ vin̈ tic yajal yaj dꞌa yin̈tilal vin̈aj Laadán chiꞌ. 10-11 Axo ebꞌ vin̈ yuninal vin̈aj Simei chiꞌ, chan̈van̈ ebꞌ vin̈: Aton vin̈aj Jahat bꞌabꞌel, vin̈aj Zina schabꞌil, vin̈aj Jeús yedꞌ vin̈aj Bería. A vin̈aj Jeús yedꞌ vin̈aj Bería chiꞌ, man̈ val tzijtumoc yin̈tilal ebꞌ vin̈ yic stzacꞌvan ebꞌ yilan yopisio, yuj chiꞌ junn̈ej macan̈ ix aj ebꞌ.

12 Axo ebꞌ vin̈ yuninal vin̈aj Coat, chan̈van̈ ebꞌ vin̈: Aton vin̈aj Amram, vin̈aj Izhar, vin̈aj Hebrón yedꞌ vin̈aj Uziel. 13 A ebꞌ yuninal vin̈aj Amram chiꞌ, aton vin̈aj Aarón yedꞌ vin̈aj Moisés. A vin̈aj Aarón chiꞌ ix sicꞌchajel yedꞌ yin̈tilal yuj Jehová dꞌa juneln̈ej, yic syil ebꞌ tastac yicn̈ej Jehová yaji, yic sn̈usan incienso ebꞌ, scuchbꞌan ebꞌ yetisraelal ebꞌ yic tzꞌoch ejmelal yedꞌ yalan vachꞌ lolonel ebꞌ dꞌa yibꞌan̈ ebꞌ anima dꞌa sbꞌi Jehová. 14 Axo pax ebꞌ vin̈ yin̈tilal vin̈aj Moisés schecabꞌ Dios jun, ix och ebꞌ stzꞌacubꞌoc ebꞌ yetlevitail.

15 A ebꞌ vin̈ yuninal vin̈aj Moisés, aton vin̈aj Gersón yedꞌ vin̈aj Eliezer. 16 A dꞌa scal ebꞌ vin̈ yin̈tilal vin̈aj Gersón chiꞌ, a vin̈aj Sebuel yajal yaji. 17 A vin̈aj Eliezer chiꞌ junn̈ej yuninal vin̈, aton vin̈aj Rehabías, vin̈ yajal yaji. Axo pax vin̈aj Rehabías chiꞌ, tzijtum yuninal vin̈. 18 A vin̈aj Selomit yuninal vin̈aj Izhar, yajal yaj vin̈. 19 A ebꞌ vin̈ yuninal vin̈aj Hebrón: Aton vin̈aj Jerías vin̈ bꞌabꞌel unin, vin̈aj Amarías vin̈ schabꞌil, vin̈aj Jahaziel vin̈ yoxil yedꞌ vin̈aj Jecamán vin̈ schan̈il. 20 Axo ebꞌ vin̈ yuninal vin̈aj Uziel: Aton vin̈aj Micaía vin̈ bꞌabꞌel yedꞌ vin̈aj Isías.

21 A ebꞌ vin̈ yuninal vin̈aj Merari, aton vin̈aj Mahli yedꞌ vin̈aj Musi. A ebꞌ vin̈ yuninal vin̈aj Mahli chiꞌ, aton vin̈aj Eleazar yedꞌ vin̈aj Cis. 22 A vin̈aj Eleazar chiꞌ malaj junoc yuninal vin̈, an̈ej ebꞌ ix yisil vin̈ ay, aton ebꞌ ix chiꞌ ix yicꞌ sbꞌa yedꞌ ebꞌ scꞌabꞌyoc, ebꞌ vin̈ yuninal vin̈aj Cis. 23 Axo pax ebꞌ vin̈ yuninal vin̈aj Musi, oxvan̈ ebꞌ vin̈: Aton vin̈aj Mahli, vin̈aj Edar yedꞌ vin̈aj Jeremot.

24 Aton juntzan̈ ebꞌ vin̈ chiꞌ yin̈tilal vin̈aj Leví, icha syal smacan̈il ix aj stzꞌibꞌchaj ebꞌ vin̈ ecꞌalxo dꞌa 20 abꞌil sqꞌuinal, aton juntzan̈ ebꞌ vin̈ chiꞌ ayoch yopisio dꞌa templo.

25 Ix yal vin̈aj rey David icha tic: Yujto a Jehová co Diosal ix on̈ acꞌancan cajan dꞌa tic a on̈ schon̈abꞌ on̈ tic, ix can pax scajnubꞌ dꞌa Jerusalén tic, 26 yuj chiꞌ a ebꞌ levita man̈xo ol scuch bꞌeyecꞌ smantiado Jehová ebꞌ yedꞌ pax jantac syamcꞌabꞌil yic tzꞌoch ejmelal, xchi vin̈.

27 Yuj chiꞌ a ebꞌ vin̈ yin̈tilal Leví, ayic stzꞌacvi 20 abꞌil sqꞌuinal ebꞌ vin̈, stzꞌibꞌan sbꞌa ebꞌ vin̈ icha ajnac yalancan vin̈aj rey David dꞌa slajvubꞌ slolonel. 28 A ebꞌ vin̈ chiꞌ ix can ebꞌ vin̈ dꞌa yol scꞌabꞌ ebꞌ vin̈ sacerdote yin̈tilal vin̈aj Aarón, yic smunlaj ebꞌ vin̈ dꞌa stemplo Jehová, yic syilan yamaqꞌuil ebꞌ vin̈ yedꞌ yoltac cuarto yedꞌ yilan ebꞌ vin̈ sacbꞌitaj masanil yamcꞌabꞌ yicn̈ej Jehová yaji. Syilanpax juntzan̈ munlajel ebꞌ vin̈ dꞌa templo chiꞌ. 29 Aton yic sbꞌochaj ixim pan tzꞌoch dꞌa yichan̈ Jehová, syilan ixim harina ebꞌ vin̈ tzꞌacꞌji dꞌa ofrendail, ixim cꞌoxox pan malaj yich, juntzan̈ ofrenda sbꞌochaj dꞌa yol xalten yedꞌ ixim harina calabꞌil yedꞌ aceite. Syilanpax echlabꞌ ebꞌ vin̈ scꞌanchaj dꞌa ofrenda. 30 An̈ejtonaꞌ yovalil ayn̈ejecꞌ ebꞌ vin̈ dꞌa templo chiꞌ, yuj yacꞌan yuj diosal ebꞌ vin̈ yedꞌ aloj vachꞌ lolonel dꞌa Jehová dꞌa junjun qꞌuin̈ibꞌalil yedꞌ dꞌa yemcꞌualil, 31 yedꞌ yic sn̈uschaj silabꞌ dꞌa Jehová dꞌa scꞌual icꞌoj ip, dꞌa scꞌual qꞌuin̈ ayic tzꞌalji qꞌuen uj yedꞌ pax juntzan̈xo qꞌuin̈ te nivac yelcꞌochi. Tzꞌacꞌvin̈ej servil ebꞌ vin̈ dꞌa Jehová icha jantac sbꞌisul ebꞌ vin̈ yedꞌ munlajel acꞌbꞌil scꞌulej ebꞌ vin̈. 32 A ebꞌ vin̈ chiꞌ stan̈vanpax mantiado bꞌaj schꞌox sbꞌa Jehová yedꞌ scajnubꞌ chiꞌ. Smunlajpax ebꞌ vin̈ dꞌa stemplo Jehová chiꞌ icha yajcan dꞌa yibꞌan̈ yin̈tilal ebꞌ vin̈ yuj tas yalnaccan ebꞌ vin̈ sacerdote yin̈tilalcan vin̈aj Aarón.