3 Macquiltac ix aj ebꞌ vin̈ sacerdote yuj vin̈aj rey David chiꞌ, yuj vin̈aj Sadoc yin̈tilal vin̈aj Eleazar yedꞌ vin̈aj Ahimelec yin̈tilal vin̈aj Itamar. 4 Axo ix yilan ebꞌ vin̈ to a ebꞌ vin̈ yin̈tilalcan vin̈aj Eleazar chiꞌ tzijtum sbꞌisul ebꞌ vin̈ dꞌa yichan̈ ebꞌ vin̈ yin̈tilalcan vin̈aj Itamar, yuj chiꞌ 16 macan̈ ix aj ebꞌ vin̈, axo ebꞌ vin̈ yin̈tilalcan vin̈aj Itamar chiꞌ, vajxac macan̈n̈ej ebꞌ vin̈. 5 Dꞌa sorteoal ix aj yochcan junjun macan̈ ebꞌ vin̈ dꞌa stzolal smunlaji, yujto a dꞌa scal ebꞌ vin̈ yin̈tilalcan vin̈aj Eleazar yedꞌ dꞌa scal ebꞌ vin̈ yin̈tilalcan vin̈aj Itamar ay ebꞌ vin̈ nivac yajal sicꞌbꞌiloch dꞌa yopisio dꞌa templo dꞌa yichan̈ Dios.

6 A ebꞌ vin̈ yajal yaj dꞌa scal ebꞌ vin̈ yin̈tilalcan vin̈aj Eleazar yedꞌ pax ebꞌ vin̈ yin̈tilalcan vin̈aj Itamar, ix sicꞌ sorteo ebꞌ vin̈ dꞌa stzolal, jun yic ebꞌ vin̈ yin̈tilalcan vin̈aj Eleazar chiꞌ, jun pax yic ebꞌ vin̈ yin̈tilalcan vin̈aj Itamar chiꞌ. Icha chiꞌ ix aj smunlaj ebꞌ vin̈ dꞌa yopisio. Axo vin̈aj Semaías yuninal vin̈aj Natanael yin̈tilalcan vin̈aj Leví ix tzꞌibꞌan sbꞌi ebꞌ vin̈ ayic ix sicꞌan sorteo chiꞌ ebꞌ vin̈. Axo ebꞌ vin̈ sacerdote ayoch dꞌa yopisio yedꞌ vin̈ rey, aton vin̈aj Sadoc yedꞌ vin̈aj Ahimelec yuninal vin̈aj Abiatar yedꞌ ebꞌ vin̈ yajal yaj dꞌa scal ebꞌ vin̈ sacerdote chiꞌ yedꞌ dꞌa scal ebꞌ vin̈ levita, testigo yajcan ebꞌ vin̈.

7-18 Aton sbꞌi ebꞌ vin̈ tic ix cann̈ej dꞌa junjun macan̈ dꞌa stzolal, icha syal sbꞌi ebꞌ vin̈ yajalil ebꞌ vin̈ ix sicꞌan sorteo chiꞌ, schael yich dꞌa ebꞌ vin̈ bꞌabꞌel masanto dꞌa ebꞌ vin̈ slajvubꞌ, 24 macan̈ ebꞌ vin̈ dꞌa smasanil: Vin̈aj Joiarib, vin̈aj Jedaías, vin̈aj Harim, vin̈aj Seorim, vin̈aj Malquías, vin̈aj Mijamín, vin̈aj Cos, vin̈aj Abías, vin̈aj Jesúa, vin̈aj Secanías, vin̈aj Eliasib, vin̈aj Jaquim, vin̈aj Hupa, vin̈aj Jesebeab, vin̈aj Bilga, vin̈aj Imer, vin̈aj Hezir, vin̈aj Afses, vin̈aj Petaías, vin̈aj Hezequiel, vin̈aj Jaquín, vin̈aj Gamul, vin̈aj Delaía yedꞌ vin̈aj Maazías.

19 Aton ebꞌ vin̈ tic ix pojchajecꞌ dꞌa stzolal dꞌa sacerdoteal yic smunlaj ebꞌ vin̈ dꞌa templo, icha syal sley Jehová co Diosal a on̈ israel on̈ tic, icha ajnac yalan dꞌa vin̈aj Aarón smam yicham ebꞌ vin̈.

20 Aton sbꞌi ebꞌ vin̈ yajal yaj dꞌa scal juntzan̈xo ebꞌ vin̈ yin̈tilal Leví tic: Aton vin̈aj Jehedías yin̈tilal vin̈aj Subael, yin̈tilal pax vin̈aj Amram. 21 Vin̈aj Isías bꞌabꞌel dꞌa scal ebꞌ vin̈ yin̈tilal vin̈aj Rehabías. 22 Vin̈aj Jahat yin̈tilal vin̈aj Selomot, yin̈tilal pax vin̈aj Izhar. 23 A ebꞌ vin̈ yin̈tilal vin̈aj Hebrón dꞌa stzolal: Aton vin̈aj Jerías, vin̈aj Amarías, vin̈aj Jahaziel yedꞌ vin̈aj Jecamán. 24 Vin̈aj Samir yin̈tilal vin̈aj Micaía, yin̈tilal pax vin̈aj Uziel. 25 Vin̈aj Zacarías yuninal vin̈aj Isías yucꞌtac vin̈aj Micaía. 26 Axo ebꞌ vin̈ yuninal vin̈aj Merari: Aton vin̈aj Mahli, vin̈aj Musi yedꞌ vin̈aj Jaazías. 27 Axo ebꞌ vin̈ yuninal vin̈aj Jaazías chiꞌ: Aton vin̈aj Beno, vin̈aj Soham, vin̈aj Zacur yedꞌ vin̈aj Ibri. 28-29 Chavan̈ yuninal vin̈aj Mahli chiꞌ: Aton vin̈aj Eleazar yedꞌ vin̈aj Cis. A vin̈aj Eleazar chiꞌ, malaj yuninal vin̈. Axo pax vin̈aj Cis chiꞌ, ay jun yuninal vin̈, aton vin̈aj Jerameel. 30 Axo ebꞌ vin̈ yuninal vin̈aj Musi chiꞌ: Aton vin̈aj Mahli, vin̈aj Edar yedꞌ vin̈aj Jerimot.

Aton ebꞌ vin̈ chiꞌ yajal yaj dꞌa scal ebꞌ yin̈tilal Leví. 31 An̈ejtonaꞌ ebꞌ vin̈ chiꞌ, dꞌa sorteoal ix aj yoch ebꞌ vin̈ dꞌa stzolal smunlaji, icha ix scꞌulej ebꞌ vin̈ scꞌabꞌyoc ebꞌ vin̈, aton ebꞌ vin̈ yin̈tilal vin̈aj Aarón. Aton dꞌa yichan̈ vin̈aj rey David yedꞌ vin̈aj Sadoc yedꞌ vin̈aj Ahimelec yedꞌ ebꞌ vin̈ yajal yaj dꞌa scal ebꞌ yin̈tilal Leví yedꞌ ebꞌ vin̈ sacerdote, ataꞌ ix och sorteo chiꞌ. Lajann̈ej ix aj ebꞌ vin̈ yajal yaj dꞌa scal yin̈tilal vin̈ bꞌabꞌel vinac yedꞌ dꞌa scal yin̈tilal vin̈ tzacꞌanto.