—Tic tzilaꞌ to nabꞌa cꞌuteꞌ ayoch dꞌa in palacio tic, axo pax teꞌ scaxail strato Dios jun, a dꞌa yol jun mantiado ayoch teꞌ, xchi vin̈.

3 Yuj chiꞌ ix yal vin̈aj Natán chiꞌ:

—Ujocabꞌ icha tas tza naꞌa, yujto a Jehová ayn̈ejoch edꞌoc, xchi vin̈.

4 A dꞌa jun acꞌval chiꞌ, ix lolon Jehová dꞌa vin̈aj Natán chiꞌ icha tic: 5 Ixic, bꞌat al dꞌa vin̈ in checabꞌ vin̈aj David, tzalani to a in Jehová in sval icha tic: Man̈oc achlaj ol a bꞌoqꞌue junoc templo bꞌaj ol in aj chiꞌ. 6 Atax yic ix vicꞌanelta ebꞌ e mam eyicham dꞌa Egipto masanto ticnaic, malaj bꞌaj ix in aj dꞌa yol junoc pat, an̈ej dꞌa yoltac mantiado in eqꞌui. 7 Bꞌajtactil ix in ecꞌn̈ej yedꞌ ebꞌ in chon̈abꞌ, malaj bꞌaj ix in cꞌan dꞌa junoc ebꞌ ayoch yajalil chon̈abꞌ chiꞌ vuuj, tas yuj max sbꞌo junoc in cajnubꞌ ebꞌ, nabꞌa cꞌuteꞌ tzꞌoch dꞌay, xchi Jehová, xa chi dꞌa vin̈ rey chiꞌ. 8 Tzalanpax dꞌa vin̈ icha tic: A in Jehová Yajal in dꞌa Smasanil svalaꞌ: A in ix ach viqꞌuel dꞌa tan̈voj calnel, ix ach vacꞌanoch yajaloc in chon̈abꞌ Israel. 9 Yaln̈ej bꞌajtil tzach eqꞌui ayinn̈ej och edꞌoc. Ix in satel masanil ebꞌ ayoch ajcꞌolal dꞌayach, ol ach vacꞌ bꞌinaj icha ebꞌ nivac vinac dꞌa yolyibꞌan̈qꞌuinal tic. 10 An̈ejtonaꞌ ix in siqꞌuelta jun lum tic bꞌaj tzex cajnajcan a ex in chon̈abꞌ ex tic. A tic ol ex cann̈ej cajan dꞌa juneln̈ej. Man̈xa mach ol ex xibꞌtanoc, man̈xo ol ex tzuntzaj yuj ebꞌ eyajcꞌool icha ix ex yutej ebꞌ dꞌa sbꞌabꞌelal, 11 ayic ix vacꞌanoch ebꞌ ix ex cuchbꞌani. A in ol in satel masanil ebꞌ eyajcꞌool.

Svacꞌanpax ojtaquejeli to ol vacꞌn̈ejcan opisio dꞌa ebꞌ in̈tilal. 12 Ayic ol lajvoc ecꞌ a qꞌuinal, ayic mucbꞌil achxo, ol vacꞌoch junoc uninal reyal a qꞌuexuloc, tecꞌtecꞌ val ol vutej yopisio chiꞌ. 13 Aꞌ ol bꞌoanqꞌue in cajnubꞌ bꞌaj ol in bꞌinajoc. Ol vacꞌann̈ejcan yopisio chiꞌ dꞌa ebꞌ yin̈tilal dꞌa masanil tiempo. 14 A in ol in och smamoc, axo ol och vuninaloc. Tato ay bꞌaj ol och spitalil dꞌayin, ol vacꞌoch syaelal icha syutej junoc mamabꞌil smacꞌan yuninal. 15 Palta man̈ jabꞌoc ol vactejcan in xajanani, man̈ ichaoc vutejnac vactancan in xajanan vin̈aj Saúl, vicꞌnaquel vin̈ dꞌa yopisio, yic ach och sqꞌuexuloc vin̈. 16 A in ol vacꞌn̈ejcan opisio tic dꞌa ebꞌ in̈tilal dꞌa masanil tiempo, xchi Jehová, xa chi dꞌa vin̈, xchi dꞌa vin̈aj Natán chiꞌ.

17 Icha ix aj yalan Jehová, icha val chiꞌ ix aj yalan vin̈aj Natán dꞌa vin̈aj rey David chiꞌ.

18 Yuj chiꞌ ix och vin̈aj David chiꞌ dꞌa yichan̈ Jehová, ix em cꞌojan vin̈ ix lesalvi vin̈, ix yalan vin̈ icha tic: Mamin Jehová Vajalil, ¿tas val jabꞌoc velcꞌoch yedꞌ ebꞌ in mam vicham, yuj chiꞌ ix acꞌ jun nivan opisio tic dꞌayin? 19 Mamin Jehová, tas val vaj a in tic dꞌayach yuj chiꞌ ix alaꞌ tas ol aj yelcꞌoch vin̈tilal dꞌa bꞌaqꞌuin̈. A tas tzutej a bꞌa tic dꞌayin, man̈ ichaoc chiꞌ syutej sbꞌa ebꞌ anima. 20 Mamin Jehová Vajalil, man̈xa tas syal valan dꞌayach. A ach tic ojtac tas yaj in pensar a in a checabꞌ in tic. 21 Masanil juntzan̈ lolonel satubꞌtac tic, a ach ix acꞌ vojtaquejeli, icha tas ix el dꞌa a cꞌool. 22 Mamin Jehová, malaj junocxo mach lajan edꞌoc. A achn̈ej toni, malaj junocxo dios scabꞌ specal icha ach tic. 23 A pax a chon̈abꞌ Israel tic jun, malaj junocxo chon̈abꞌ lajan yedꞌoc. Yujto axon̈ej jun chon̈abꞌ tic dꞌa sat lum tic ix a colcanel dꞌa yol scꞌabꞌ ebꞌ ajcꞌool yic tzꞌochcan a chon̈abꞌoc. Yedꞌ a poder yedꞌ tastac satubꞌtac a bꞌonac, icꞌnaquelta ebꞌ co mam quicham dꞌa Egipto, a satannaquel juntzan̈ chon̈abꞌ yedꞌ sdiosal dꞌa yichan̈ ebꞌ yic nivan tzꞌajelcꞌoch a bꞌi. 24 Yujto a ach ix on̈ acꞌoch a chon̈abꞌoc dꞌa juneln̈ej, yuj chiꞌ a ach ix ach ochcan co Diosaloc.

25 Mamin Jehová, a ticnaic jun, elocabꞌcꞌoch tas ix al dꞌayin a in a checabꞌ in tic yedꞌ dꞌa masanil vin̈tilal. Ichocabꞌ chiꞌ tzꞌaj yelcꞌoch tas ix alaꞌ, 26 yic vachꞌ tzach bꞌinaj dꞌa masanil tiempo, yic ol yal ebꞌ anima to a ach Jehová Dios ach, Yajal ach dꞌa yibꞌan̈ Smasanil, a achton co Diosal ach a on̈ israel on̈ tic. An̈ejaꞌ icha chiꞌ ol aj yochn̈ej vin̈tilal reyal dꞌa ichan̈. 27 Mamin Jehová, Yajal ach dꞌa Smasanil, co Diosal ach, a ach val tzacꞌ vojtaquejeli to ol ochcan vin̈tilal dꞌa yajalil. Yuj chiꞌ tzin tecꞌbꞌej in bꞌa in cꞌanan jun tic dꞌayach. 28 A ach tic Mamin Jehová, Dios ach, a tas tzalaꞌ yeln̈ej, yelxo val te vachꞌ tas ix acꞌ a tiꞌ acꞌan dꞌayin. 29 Elocabꞌ dꞌa a cꞌool acꞌan a vachꞌcꞌolal dꞌa vin̈tilal yic stecꞌbꞌejn̈ej sbꞌa ebꞌ dꞌa ichan̈. Mamin Jehová, a ach ix alcan jun tic, yuj chiꞌ a yuj a vachꞌcꞌolal, vachꞌ ol ajcan vin̈tilal dꞌa masanil tiempo, xchi vin̈ dꞌa Jehová chiꞌ.