A tas ix scꞌulej Dios yuj svachꞌiloc Israel
105
Caqꞌuec yuj diosal dꞌa Jehová. Calec co bꞌa dꞌay. Calec dꞌa junjun chon̈abꞌ yuj tas ix scꞌulej.2 Con̈ bꞌitan̈ec dꞌay. Calequel tas satubꞌtac ix scꞌulej.
3 Con̈ tzalajec yuj Jehová. Ayocabꞌ pax stzalajcꞌolal ebꞌ emnaquil dꞌay.
4 Co cꞌanec scolval Jehová. Caqꞌuequem co bꞌa dꞌay dꞌa masanil tiempo.
5-6 A on̈ yin̈til on̈ vin̈aj Jacob yixchiquin vin̈aj Abraham schecabꞌ Jehová, sicꞌbꞌil on̈ el yuj Jehová. Co naeccot tas satubꞌtac ix scꞌulej co Diosal yedꞌ juntzan̈ sley ix yalcani.
7 A Jehová co Diosal ayoch Yajalil dꞌa masanil yolyibꞌan̈qꞌuinal tic.
8 Syacꞌn̈ejelcꞌoch strato. Tzꞌeln̈ejcꞌoch tas syal dꞌa jantac smilal macan̈il anima tzꞌeqꞌui.
9 Ix elcꞌoch stiꞌ yacꞌnac dꞌa vin̈aj Abraham. Ix elpaxcꞌoch tas yalnaccan dꞌa vin̈aj Isaac.
10 Ix can tas yalnaccan chiꞌ dꞌa vin̈aj Jacob. Ayn̈ejecꞌ jun stiꞌ yacꞌnac chiꞌ dꞌayon̈ a on̈ israel on̈ tic dꞌa masanil qꞌuinal.
11 A Jehová chiꞌ alannaccan dꞌa junjun ebꞌ icha tic: Ol vacꞌ lum Canaán dꞌayach, ol ochcan lum icoc, xchi.
12 Ayic chiꞌ jayvan̈anto ebꞌ, bꞌeyum animan̈ej yajecꞌ ebꞌ dꞌa sat lum luum chiꞌ.
13 Ton̈ej tzꞌecꞌ cajan ebꞌ dꞌa junjun chon̈abꞌ yedꞌ dꞌa smacbꞌen ebꞌ rey.
14 Palta maj yal scꞌool Dios ix ixtaj ebꞌ, yuj chiꞌ ix cachji ebꞌ rey chiꞌ yuuj, ix yalani:
15 Man̈ eyixtej ebꞌ vic sicꞌbꞌileli. Man̈ e tzuntzej ebꞌ in checabꞌ, xchi.
16 Ix yacꞌcot jun nivan vejel dꞌa jun lugar chiꞌ, ix yicꞌcanecꞌ masanil tas sva ebꞌ.
17 Palta ayic manto jalaj jun vejel chiꞌ, ix bꞌabꞌlaj checjibꞌat vin̈aj José dꞌa Egipto yuj Dios, aton vin̈ ix schon̈bꞌat ebꞌ checabꞌvumal.
18 Ix lajvi yoc vin̈ yuj qꞌuen cadena, ix ochpax qꞌuen dꞌa sjaj vin̈,
19 masanto ix elcꞌoch masanil tas yalnac Dios dꞌa vin̈, ix schꞌoxanel Dios chiꞌ to yelton tas ix yalel vin̈ chiꞌ.
20 A vin̈ rey, yajal yaj vin̈ dꞌa yibꞌan̈ jantac anima ix jacanelta vin̈aj José chiꞌ dꞌa preso.
21 Ix acꞌjioch vin̈ yilumaloc spalacio vin̈ rey chiꞌ. Ix acꞌjipaxoch vin̈ yajalil dꞌa yibꞌan̈ masanil smacbꞌen vin̈ rey chiꞌ.
22 Ix scꞌaybꞌej ebꞌ yetyajalil vin̈. Ix acꞌjipax sjelanil ebꞌ ichamtac vinac yuj vin̈.
23 Axo dꞌa stzacꞌanilxo ix cꞌoch vin̈aj Israel, aton vin̈aj Jacob bꞌaj ayecꞌ vin̈aj José. A dꞌa Egipto chiꞌ ix cajnaj vin̈, aton lum sluum ebꞌ yin̈tilal vin̈aj Cam.
24 A Dios ix acꞌan qꞌuibꞌ sbꞌisul yin̈tilal vin̈aj Jacob chiꞌ, yelxo val tecꞌan ix aj ebꞌ dꞌa yichan̈ ebꞌ aj Egipto chiꞌ.
25 Palta a Dios ix acꞌan scꞌulej ebꞌ aj Egipto chiꞌ, ix och ebꞌ ajcꞌolal dꞌa schon̈abꞌ chiꞌ, ix ixtaj ebꞌ schecabꞌ yuj ebꞌ.
26 Ix schecancot vin̈ schecabꞌ Dios chiꞌ, aton vin̈aj Moisés. Ix schecanpaxcot vin̈aj Aarón, vin̈ sicꞌbꞌilel yuuj.
27 A ebꞌ vin̈ ix chꞌoxan smilagro Dios dꞌa ebꞌ aj Egipto chiꞌ. A tas satubꞌtac ix scꞌulej ebꞌ vin̈ dꞌa yol smacbꞌen ebꞌ yin̈tilal vin̈aj Cam.
28 Ix acꞌjicot qꞌuicꞌalqꞌuinal yuj Dios chiꞌ dꞌa smasanil smacbꞌen ebꞌ. Maj spitejlaj sbꞌa ebꞌ vin̈ chavan̈ schecabꞌ chiꞌ dꞌa slolonel.
29 Ix och masanil a aꞌ chicꞌal yuj Dios chiꞌ. Masanil nocꞌ chay ix chami.
30 Ix yacꞌan bꞌudꞌjoquel masanil chon̈abꞌ dꞌa yol smacbꞌen Egipto yuj nocꞌ pajtzaꞌ. Ix laj qꞌue nocꞌ dꞌa sat schꞌat vin̈ rey.
31 A Dios ix alani, ix qꞌuicꞌbꞌi qꞌuinal scꞌoch nocꞌ cach. Ix pitzvipaxchaan̈ nocꞌ cotac us dꞌa masanil yol smacbꞌen Egipto chiꞌ.
32 Ix yacꞌcot qꞌuen nivac sacbꞌat dꞌa satchaan̈ sqꞌuexuloc n̈abꞌ. Jantac ix macꞌvaj cꞌu dꞌa yol smacbꞌen ebꞌ chiꞌ.
33 Ix lajviem teꞌ uva yedꞌ teꞌ higo, aton yavbꞌen teꞌ ebꞌ. Ix laj jecchaj scꞌabꞌtac te teꞌ dꞌa yol smacbꞌen ebꞌ chiꞌ.
34 Ix yalanxi Dios, ix cꞌoch nocꞌ cꞌulubꞌ. Man̈xo jantacoc nocꞌ ix cꞌochi.
35 Ix lajviel masanil an̈ an̈cꞌultac yuj nocꞌ. Masanil tastac sqꞌuibꞌ chiꞌ taꞌ, ix lajviel yuj nocꞌ.
36 Ix miljicham masanil ebꞌ sbꞌabꞌel unin ebꞌ aj Egipto chiꞌ. Ix laj cham junjun bꞌabꞌel unin dꞌa junjun pat.
37 Ix lajvi chiꞌ, ix yicꞌanelta ebꞌ schon̈abꞌ. Nivan qꞌuen oro yedꞌ qꞌuen plata ix scuchcot ebꞌ, malaj junoc mach tzꞌontac dꞌa scal ebꞌ.
38 Ix tzalaj ebꞌ aj Egipto chiꞌ ayic ix yilan ebꞌ yelta ebꞌ aj Israel chiꞌ yujto te xivnac ebꞌ yuj ebꞌ.
39 A Dios ix acꞌancot jun asun yen̈uloc ebꞌ schon̈abꞌ chiꞌ. Axo dꞌacꞌvalil, a jun cꞌacꞌ tzꞌacꞌan saquilqꞌuinal dꞌa yol sbꞌe ebꞌ.
40 Ix scꞌanan schibꞌej ebꞌ dꞌa Dios, ix yacꞌcot nocꞌ ubꞌ dꞌa ebꞌ. Aton vael ix cot dꞌa satchaan̈ ix acꞌan bꞌudꞌjoc ebꞌ.
41 Ix jat qꞌuen nivan qꞌueen yuj Dios chiꞌ, ix elta secnaj a nivac aꞌ. Ix bꞌey aꞌ dꞌa lum taquin̈ luum chiꞌ icha sbꞌey aꞌ nivac elumaꞌ.
42 Ix snacot slolonel nivan yelcꞌoch yalnaccan dꞌa vin̈aj Abraham, aton schecabꞌ.
43 Ichaton chiꞌ ajnac yicꞌanelta ebꞌ schon̈abꞌ Dios sicꞌbꞌilel yuuj yedꞌ nivan tzalajcꞌolal.
44 A sluum juntzan̈xo chon̈abꞌ ix yacꞌcanoch dꞌa yol scꞌabꞌ ebꞌ yedꞌ masanil tas bꞌobꞌil yuj juntzan̈ chon̈abꞌ chiꞌ.
45 Ichaton chiꞌ ix yutej Dios dꞌa ebꞌ schon̈abꞌ yic cꞌanabꞌajum syutej sbꞌa ebꞌ dꞌa schecnabꞌil yedꞌ dꞌa scꞌaybꞌubꞌal.
Calec vachꞌ lolonel dꞌa Jehová.