Proverbios sbꞌi jun libro tic, yujto a dꞌay tzꞌibꞌabꞌil juntzan̈ macan̈il jelanil, vachꞌ pensaril yedꞌ tas tzꞌaj yoch ejmelal dꞌa Dios. A juntzan̈ lolonel tic tzijtum el cꞌanbꞌil ayic tzꞌacꞌji cꞌaybꞌubꞌal dꞌa ebꞌ anima dꞌa pecaꞌ. A juntzan̈ cotac cꞌaybꞌubꞌal tic, aton scuch Proverbios. Nivan syalcot yuj tas tzꞌoch cuuj dꞌa junjun cꞌu. Bꞌabꞌel syacꞌ co nacoti, tato sco nibꞌej jelan tzꞌaj co pensar, nivanocabꞌ yelcꞌoch Dios dꞌa yol co sat, co cꞌanabꞌajejocabꞌi.

Syalanpaxcot yuj vachꞌ bꞌeybꞌal, yic vachꞌn̈ej cacꞌan yedꞌ Dios, acꞌumocabꞌ razón scutej co bꞌa, vachꞌocabꞌ pax caj yedꞌ ebꞌ quetanimail. A val juntzan̈ lolonel tic syalaꞌ tas val syutej sbꞌa ebꞌ jelan spensar. A juntzan̈ lolonel tic syalcoti tas val smoj scꞌulej junjun anima yedꞌ yuninal yedꞌ yisil. Syalanpax yuj vachꞌ pensaril scꞌanchaj dꞌa junjun chon̈abꞌ, ma dꞌa juntzan̈xo anima. Syalanpaxi to yovalil sco tan̈vej co bꞌa yedꞌ co nivanil, emnaquil scutej co bꞌa, nivan scutej co cꞌool, ayocabꞌ yelcꞌoch ebꞌ mebꞌaꞌ dꞌayon̈, ayocabꞌ pax yelcꞌoch ebꞌ yajal dꞌayon̈ yedꞌ pax ebꞌ camigo.

Ay juntzan̈ versículo tzꞌalan dꞌa jun libro tic to yedꞌ sjelanil Dios sbꞌonac masanil tastac ay dꞌa yolyibꞌan̈qꞌuinal tic.