A Chꞌan̈ Libro
PROVERBIOS
Yichbꞌanil lolonel
1
A scꞌaybꞌubꞌal vin̈aj Salomón, aton vin̈ yuninal vin̈aj David sreyal Israel.2 Ix tzꞌibꞌchajcan juntzan̈ lolonel tic yic vachꞌ snachajel jelanil yedꞌ cꞌaybꞌubꞌal, yic scolvaji, yic vachꞌ snachajel juntzan̈ lolonel ay yelcꞌoch cuuj.
3 Yuj chiꞌ syal co bꞌeybꞌalan jelanil, vachꞌilal yedꞌ tojolal icha val yaji.
4 In gana to sjelanbꞌi spensar ebꞌ quelemtac, ebꞌ mantalaj spensar, to tzꞌacꞌji yojtaquejel ebꞌ, yic syil sbꞌa ebꞌ.
5 Yabꞌocabꞌ juntzan̈ tic ebꞌ ay spensar yic vachꞌ ste ojtaquejel ebꞌ. Yabꞌocabꞌ pax ebꞌ jelan yic vachꞌ ste jelanbꞌi ebꞌ yuuj.
6 A juntzan̈ lolonel tic scolvaj quedꞌoc yic snachajel cuuj tas syalelcꞌoch juntzan̈ lolonel satubꞌtac yedꞌ ajaltac, aton tas syal ebꞌ jelan.
7 Tato sco nibꞌej jelan tzon̈ aji, ayn̈ejocabꞌ yelcꞌoch Jehová dꞌa co sat. Tato sco nibꞌej man̈ pensaril jun, co patiquejocabꞌ el jelanil yedꞌ cꞌaybꞌubꞌal tzꞌalchaji.
A razón tzꞌacꞌji dꞌa ebꞌ quelemtac
8 Ach vuninal, cha abꞌ a cꞌaybꞌubꞌal svalaꞌ, man̈ a patiquejel razón syacꞌ ix a nun dꞌayach.
9 Yujto a juntzan̈ co cꞌaybꞌubꞌal tic ol bꞌo a bꞌeybꞌal yuuj, icha val junoc mach te vachꞌ tzꞌaj sbꞌoan sbꞌa yedꞌ spichul.
10 Tato a ebꞌ chuc sbꞌeybꞌal tzach montanbꞌati, man̈ ach bꞌatoc.
11 Qꞌuinaloc ay bꞌaj syal ebꞌ dꞌayach icha tic: Ochan̈ quedꞌoc yic vachꞌ bꞌat co maclejec dꞌa yol bꞌe, yic sco macꞌcham junoc anima tzꞌecꞌ taꞌ.
12 Malaj tas naan yuuj, ol co yamani, ol co macꞌanchamoc.
13 Ichato chiꞌ bꞌian ol quicꞌancan masanil macan̈il bꞌeyumal, ol co bꞌudꞌan co pat yuj masanil tas ol quelqꞌuej chiꞌ.
14 Cotan̈, ochan̈ quedꞌoc, ol cacꞌan ic dꞌa tastac ol quicꞌaꞌ, qꞌuinaloc xchi ebꞌ.
15 Palta ach vuninal, man̈ ach bꞌat yedꞌ ebꞌ. Bꞌesel a bꞌa dꞌa yol sbꞌe ebꞌ.
16 Yujto axon̈ej chucal syacꞌ yip ebꞌ scꞌulani, toxon̈ej snanon scꞌool ebꞌ smacꞌancham anima.
17 Tato syil junoc nocꞌ much yem syaalil, nabꞌan̈ej am tzꞌemi.
18 Palta a juntzan̈ vinac chiꞌ, a syaalil ebꞌ syaqꞌuemi, an̈ejaꞌ ebꞌ ol smilcham sbꞌa dꞌay.
19 A ebꞌ snibꞌej tzꞌoch bꞌeyumal dꞌa spatic chucal, ol cꞌoch ijan ol cham ebꞌ yuj schuc bꞌeybꞌal chiꞌ.
Avtabꞌil on̈ dꞌa jelanilal
20-21 A dꞌa yoltac calle, bꞌaj sja bꞌe, dꞌa mercado yedꞌ dꞌa yaln̈ej bꞌaj smolbꞌej sbꞌa ebꞌ anima, tzon̈ yavtej Dios yic syacꞌan co razón. Syalan icha tic:
22 A ex quelemtac ex tic, ex mantalaj e pensar, toxonton bꞌuchumtac ex, ¿bꞌaqꞌuin̈ ol eyactejcan e nibꞌan e man̈ pensaril chiꞌ? ¿bꞌaqꞌuin̈ ol eyactejcan e bꞌuchvaji yedꞌ e paticanel jelanil?
23 Chaec eyabꞌ tas bꞌaj ol ex in cachaꞌ, tato icha chiꞌ, ol vacꞌ in razón dꞌayex, ol vacꞌ eyojtaquejel in lolonel.
24 A in tic tzex vavtejcoti, palta malaj e gana tze cha eyabꞌi.
25 Tze patiquejel tas svalaꞌ, max yal e cꞌol tzex cachji.
26-27 Yuj chiꞌ ol ex in tzetzej ayic ol ja chucal dꞌa eyibꞌan̈, ayic ol ja xivcꞌolal, yaelal, ilcꞌolal yedꞌ cuscꞌolal dꞌa eyibꞌan̈, icha tzꞌaj sja junoc chacxuxum icꞌ slajanel masanil tastac. Ayic van e cham yuj xivelal chiꞌ, toxon̈ej ol in bꞌuchvaj dꞌayex.
28 A dꞌa jun cꞌual chiꞌ, ol ex te avaj dꞌayin, palta man̈xo ol in tacꞌvoclaj dꞌayex. Ol eyal e bꞌa dꞌayin, palta man̈ ol vabꞌlaj.
29 Yujto tze patiquejel jelanil, malaj e gana ay velcꞌoch dꞌa e sat,
30 malaj e gana tzeyabꞌ tas svalaꞌ, tze patiquejel e cachnabꞌil svacꞌaꞌ,
31 yuj chiꞌ ol eyabꞌ syail yuj e bꞌeybꞌal chiꞌ, ol ex somchajchaan̈ yuuj.
32 A ebꞌ mantalaj spensar, ol cham ebꞌ yuj sman̈ pensaril. Ol satel ebꞌ chuc spensar, yujto malaj yelcꞌoch razón tzꞌacꞌji dꞌa ebꞌ.
33 Axo pax ebꞌ schaan yabꞌ tas svalaꞌ, juncꞌolal ol aj ebꞌ, malaj bꞌaj ol xiv ebꞌ, xchi Dios.