Salmos sbꞌi jun libro tic, syalelcꞌochi to tzꞌoch bꞌit yedꞌ juntzan̈ yamcꞌabꞌ yic bꞌit ay schꞌan̈al. Yuj chiꞌ icha chiꞌ ix sbꞌiejcan jun libro tic. Himnario yaji, slibroal pax lesal yaji. Tzijtum ebꞌ anima tzꞌibꞌjinac jun libro tic, najtil tiempo yicꞌnac yic tzꞌibꞌchajnac chiꞌ.

Cꞌojancꞌolal ajnac yil-lan sbꞌa juntzan̈ bꞌit chiꞌ. Axo ix aji aꞌ scꞌan ebꞌ israel yic sbꞌitan ebꞌ ayic tzꞌoch ebꞌ ejmelal dꞌa Dios. Axo yic ix bꞌeyn̈ej tiempo, ix och yedꞌ juntzan̈xo libro ojtacabꞌil yuj ebꞌ israel to a slolonel Dios tzꞌibꞌabꞌil dꞌay.

A jun libro Salmo tic chꞌocchꞌoc tastac ay dꞌay: Ay bꞌit, ay aloj vachꞌ lolonel dꞌa Dios, ay lesal yuj scꞌanchaj scolval Dios, ay lesal yuj scꞌanchaj nivancꞌolal, ay bꞌit yic acꞌoj yuj diosal yuj svachꞌcꞌolal Dios, ay pax lesal yuj scꞌanchaj yaelal dꞌa yibꞌan̈ ebꞌ ajcꞌool. A juntzan̈ lesal tic ay bꞌaj junn̈ej mach slesalvi yuj tas snibꞌej dꞌa yol yicoꞌ, ay pax juntzan̈xo lesal yuj ebꞌ schon̈abꞌ Dios.

Ix yacꞌ bꞌinaj jun libro Salmo tic Jesús. Tzijtum bꞌaj sbꞌinaj dꞌa yol chꞌan̈ Nuevo Testamento. Scꞌannac pax jun libro tic ebꞌ bꞌabꞌel creyente ayic sbꞌitan ebꞌ dꞌa sculto, ayic yelnac yich Iglesia.

A jun libro tic oyeꞌ macan̈ yaji: Bꞌabꞌel macan̈, tzꞌel yich dꞌa Salmo 1 masanto dꞌa 41. Schabꞌil macan̈, tzꞌel yich dꞌa Salmo 42 masanto dꞌa 72. Yoxil macan̈, tzꞌel yich dꞌa Salmo 73 masanto dꞌa 89. Schan̈il macan̈, tzꞌel yich dꞌa Salmo 90 masanto dꞌa 106. Yoil macan̈, tzꞌel yich dꞌa Salmo 107 masanto dꞌa 150, aton dꞌa tic slajvican jun libro tic.